Rô-ma 5:8

1Kơyua pơnõq drơi song hũ angãn la tơpãq dãng mưng voh tui, yơu nữn pơnõq drơi hũ salơnuãq sì Yàc Pô Lơngĩq gơnang mưng Yàc Dõc Pơ-tlah Je-su pơnõq drơi. 2Gơnang mưng Pitrai, kơyua mưng voh tui, pơnõq drơi kung hũ yàp tơma dơlãp kaya anĩt nĩ, la kaya anĩt pơnõq drơi ãn dòq dỡc gơjãp, sì pơnõq drơi uỗt sơh kơyua kaya chơkhãq chàc gơjãp gơnĩt mưng kaya gơhluh Yàc Pô Lơngĩq hũ. 3Ôh iỡuq mĩn yơu nữn, pơnõq drơi dòq uỗt sơh dơlãp kaya dleh dlàr, kơyua thơu làiq kaya dleh dlàr tơviãq jỡc kaya ãt ỡl. 4Kaya ãt ỡl tơviãq jỡc kaya thơu-va, kaya thơu-va tơviãq jỡc kaya chơkhãq chàc gơjãp gơnĩt. 5Kaya chơkhãq chàc nữn ôh ngãq ãt mơlơu alah, kơyua kaya khiãng anĩt Yàc Pô Lơngĩq hũ song tôh tơmã dơlãp hatai pơnõq drơi gơnang mưng Yàc Vơngãq Sơđah, Pitao song hũ vrơi ga pơnõq drơi. 6Kơyua ãn tũq pơnõq drơi dòq lơduh lơmuỡn nữn, tãl trôh iỡuq tũq lơwah, Yàc Dõc Pơ-tlah song ãt mơtai ala ga mơnuĩh hũ dlàiq. 7Hũ tơkìq soh mơnuĩh ãt mơtai kơyua mưng mơnuĩh tơpãq dãng, kung hũ tũq pơlih hũ mơnuĩh khĩn mơtai kơyua mưng mơnuĩh ngãq siàp. 8Nữn Yàc Pô Lơngĩq song akhàt tơviãq kaya khiãng anĩt Pitrai hũ pơweh sì pơnõq drơi, kơyua dơlãp tũq pơnõq drơi dòq la mơnuĩh hũ dlàiq, nữn Yàc Dõc Pơ-tlah mơtai ala ga pơnõq drơi. 9Rlao nữn wỡq, kơyua pơnõq drơi song hũ angãn la tơpãq dãng kơyua mưng dơrãh Pitrai, nữn jỡc pơnõq drơi ròq hũ dõc tlah mưng kaya anõc mơvai prõng Pitrai hũ. 10Kơyua mơyah làiq dơlãp tũq pơnõq drơi dòq la mơnuĩh Jơdrãq nữn vloh hũ salơnuãq sì Yàc Pô Lơngĩq gơnang mưng kaya mơtai Anàq Pitrai hũ, nữn tũq nĩ song hũ salơnuãq vloh, pơnõq drơi vloh ròq hũ kaya dõc pơ-tlah rlao wỡq tơra mưng kaya hadiuq Anàq nữn hũ. 11Ôh iỡuq mĩn yơu nữn, pơnõq drơi kung uỗt sơh dơlãp Yàc Pô Lơngĩq gơnang mưng Yàc Dõc Pơ-tlah Je-su pơnõq drơi, gơnang mưng Pitrai nữn pơnõq drơi hũ kaya salơnuãq nĩ.

12Yơu nữn, kơyua mưng sa aràc mơnuĩh nữn dlàiq dơnũh tơmã dơlãp dun kơyua, nữn kaya mơtai kung mưng dlàiq dơnũh nữn tơmã drưh yơu nữn. Sì kaya mơtai bàq vãq avih tãl dơgrữq aràc, kơyua dơgrữq tãl aràc kung sỗq dlàiq. 13Kơyua miẽt tãl trôh tũq hũ kaya voh-va, nữn dlàiq dơnũh song hũ dòq gãm dơlãp dun kơyua vloh, nữn dlàiq ôh hũ angãn la dlàiq tũq ka-ôh hũ voh-va. 14Bôh làiq yơu nữn, kaya mơtai nữn mĩn dòq apãt akõq mưng rài A-đam trôh rài Môi-se, vloh gãm mơnuĩh ôh sỗq dlàiq kung drưh yơu dlàiq A-đam hũ, nữn ung la sẽq vơngãq Pitao hũ iỡuq trôh.

15Nữn kaya vrơi soh ôh iỡuq yơu kaya sỗq dlàiq. Kơyua mơyah làiq mưng kaya sỗq dlàiq sa aràc mơnuĩh nữn lũ mơnuĩh iỡuq mơtai, nữn kaya anĩt Yàc Pô Lơngĩq, sì kaya vrơi soh mưng kaya anĩt sa aràc mơnuĩh, nữn la Yàc Dõc Pơ-tlah Je-su, vloh dòq dơlah dơlai rlao tơra ga lũ mơnuĩh! 16Kaya vrơi soh nữn ôh iỡuq yơu vruãq tơviãq trôh mưng sa aràc mơnuĩh sỗq dlàiq. Kơyua, viãq, mĩn sa kaya sỗq dlàiq ngãq ga aràc iỡuq ãt chahrơna sì kađòc ngãq dlàiq, dơlãp tũq kaya vrơi soh nữn hũ vrơi hadơi sì lũ bãc sỗq dlàiq sì kaya anĩt va trôh kaya angãn tơpãq dãng. 17Mơyah làiq kơyua mưng kaya sỗq dlàiq sa aràc mơnuĩh hũ, nữn mưng mơnuĩh nữn, kaya mơtai song apãt akõq, nữn mơnuĩh tồq mãq kaya anĩt dơlah dơlai sigỡuq sì kaya vrơi soh tơpãq dãng ròq gơnang mĩn sa aràc, nữn la Yàc Dõc Pơ-tlah Je-su, nữn apãt akõq dơlãp kaya hadiuq lũ rlao tơra. 18Yơu nữn, kơyua mưng sa kaya sỗq dlàiq nữn dơgrữq mơnuĩh ãt ngãq dlàiq nữn, kung yơu nữn, kơyua mưng sa vruãq ngãq tơpãq dãng nữn dơgrữq mơnuĩh hũ angãn tơpãq dãng sì hũ hadiuq. 19Kơyua yơu mưng kaya ôh pãc tui sa aràc mơnuĩh hũ nữn lũ mơnuĩh tơviãq jỡc mơnuĩh sỗq dlàiq, nữn kung kơyua kaya duh huaĩq mưng sa aràc mơnuĩh nữn hũ lũ mơnuĩh ròq hũ tơviãq jỡc tơpãq dãng yơu nữn. 20Voh-va blah tơma, ngãq ga kaya sỗq dlàiq bluãq pơtãl. Nữn anĩh hlơi dlàiq dơnũh pơtãl lũ tơra nữn kaya anĩt vloh dòq dơlah dơlai rlao. 21Vruãq tơviãq jỡc yơu nĩ, luơi ga dlàiq dơnũh apãt akõq va trôh kaya mơtai yơu hlơi, nữn kaya anĩt vrơi soh kung apãt akõq mưng kaya tơpãq dãng va trôh kaya hadiuq dòq gãm gãm yơu nữn mĩn, gơnang mưng Yàc Dõc Pơ-tlah Je-su, Yàc pơnõq drơi.