Skip to content
BibleKenya

Roglai Bible Literal Text

Rô-ma 4

Yơu nữn, pơnõq drơi ròq đơp A-bra-ham, ung kõq pơnõq drơi mưng gah vơnah rơlo rùp, tồq mãq hũ hagĩq? Kơyua mơyah làiq A-bra-ham hũ angãn la tơpãq dãng mưng vruãq ngãq, nữn ung song hũ kanõh gơtha pioh yeh drơi, nữn ôh iỡuq di anãq Yàc Pô Lơngĩq. Kơyua Sơrãq Sơđah đơp hayơu? “A-bra-ham chàc gơnang di Yàc Pô Lơngĩq, sì vruãq nữn hũ angãn la tơpãq dãng ga ung.” Vơnah tơmo, pơweh sì mơnuĩh halơi ngãq vruãq, nữn jĩn harơi tồq mãq hũ ôh iỡuq la kaya anĩt, nữn la kaya srẽ. Dòq mơnuĩh halơi ôh ngãq vruãq, nữn mĩn pãc-tui dơlãp Pitao ngãq ga mơnuĩh ôh pãc-tui Yàc tơviãq jỡc tơpãq dãng, nữn voh tui mơnuĩh nữn hũ angãn la tơpãq dãng. Vloh Đa-vit kung akhàt vrơi pa-thơu mưng kaya lơngai mơnuĩh nữn hũ, la mơnuĩh Yàc Pô Lơngĩq angãn la tơpãq dãng ôh iỡuq mưng vruãq ngãq: Làiq:

“Lơngai ga mơnuĩh halơi song hũ tơleh avih dơgrữq vruãq ngãq sỗq suẽl drơi,

sì dơgrữq dlàiq dơnũh drơi song hũ sapỡq avih.

Lơngai ga mơnuĩh nữn Yàc song ôh angãn la mơnuĩh hũ dlàiq.”

Yơu nữn, kaya lơngai nĩ mĩn hũ akhàt pa-tơviãq ga mơnuĩh ãt sìq kalìq soh, hẽla kung vrơi ga mơnuĩh ôh-ka ãt sìq kalìq wỡq? Kơyua pơnõq drơi ãn đơp: “Voh tui nữn hũ angãn la tơpãq dãng ga A-bra-ham.” Yơu nữn, voh tui nữn hũ iãq pơwih yơu halơi? La dơlãp tũq A-bra-ham song ãt sìq kalìq hẽla ka-ôh sìq kalìq? Ôh iỡuq hadơi sì tũq song ãt sìq kalìq, nữn la hlơu sì tũq ka-ôh ãt sìq kalìq. Ung song tồq mãq nỡm sìq kalìq yơu kaya ngãq chưng tang kaya tơpãq dãng hũ kơyua mưng voh tui, nữn la voh tui dơlãp tũq ka-ôh ãt sìq kalìq, pioh ga ung tơviãq jỡc ung kõq ga avih dơgrữq mơnuĩh halơi pãc-tui bôh làiq pơnõq nhũ ôh-ka ãt sìq kalìq, pioh ga pơnõq nhũ kung ròq hũ angãn la tơpãq dãng; kung pioh ga ung la ung kõq ga mơnuĩh ãt sìq kalìq pơweh sì dơgrữq mơnuĩh halơi ôh iỡuq mĩn ga mơnuĩh ãt adãt sìq kalìq, nữn la ga dơgrữq mơnuĩh nao tui nỡm voh tui A-bra-ham hũ, ung kõq pơnõq drơi dơlãp tũq ôh-ka ãt sìq kalìq.

Kơyua ôh iỡuq pơnuaĩq hẽ grưh pioh ga A-bra-ham hẽla pioh ga anàq tơcho ung hũ, nữn la pioh ga mơnuĩh la mơnuĩh hũ tồq mãq palơi lơgar dun kơyua, ôh iỡuq gơnang di voh-va nữn la gơnang di kaya tơpãq dãng mưng voh tui hũ. Kơyua mơyah làiq dơgrữq mơnuĩh hũ tồq mãq apôh hamã kơyua gơnang mưng voh-va, nữn voh tui kađòc ôh hũ kuơ hagĩq, sì pơnuaĩq hẽ grưh kađòc tlàq luơi. Kơyua voh-va va trôh kaya ơnõc mơvai prõng, sì anĩh halơi ôh hũ voh-va nữn anĩh nữn kung ôh hũ kaya ngãq sỗq. Yơu nữn, dơgrữq mơnuĩh hũ vơnah tồq mãq la tơviãq mưng voh tui, tồq ga gơnang mưng kaya anĩt, pioh pơnuaĩq hẽ grưh hũ gơjãp gơnĩt ga dơgrữq anàq tơcho A-bra-ham — ôh iỡuq mĩn vrơi ga mơnuĩh dòq pãq ala gơnuar voh-va, nữn kung vrơi ga mơnuĩh hũ voh tui yơu A-bra-ham, nữn ung la ung kõq avih dơgrữq tãl aràc pơnõq drơi hũ, yơu pơnuaĩq song hũ wãq làiq: “Kơu song padỡc anàq ngãq jỡc ama lũ vual vơla hũ,” pãq anãq Pitao nữn ung chàc gơnang, nữn la Yàc Pô Lơngĩq, Pitao vrơi kaya hadiuq ga mơnuĩh mơtai sì ngãq dơgrữq vruãq ôh hũ tơviãq jỡc hũ; nữn ung la mơnuĩh song pãc-tui gơnang di kaya chàc gơnang tơpa rơlao avih di kaya chơkhãq chàc, pioh ga ung hũ tơviãq jỡc ama ga lũ vual vơla, tui yơu pơnuaĩq song akhàt ga ung: “Pơjẽh pơtiàt anàq ròq hũ la yơu nữn.” Sì bôh làiq ôh tũq halơi lơduh lơmuỡn dơlãp voh tui, ung song kơnãl bôh rùp phàp drơi ngãq yơu kađòc mơtai vloh (kơyua pơgãp hũ sa rơtôh thũt), kơyua gãm kaya wãc rơsi Sa-ra hũ ôh tũq halơi đeh anàq jỡc wỡq. Nữn gơnang mưng pơnuaĩq hẽ grưh Yàc Pô Lơngĩq hũ, A-bra-ham ôh dỡq dỡng mưng kaya sơnơng dơlãp kaya ôh pãc-tui. Pa-vlữq wỡq ung brõq prãn tơgùq dơlãp voh tui, tũq padỡc tơgùq kaya gơhluh ga Yàc Pô Lơngĩq, sì ung song pãc gơnĩt wil tãl kaya halơi Yàc Pô Lơngĩq song grưh, nữn Pitrai kung hũ gơnuar pioh ngãq jỡc kaya nữn. Yơu nữn “voh tui nữn hũ angãn la tơpãq dãng ga ung”. Pơnuaĩq song wãq “voh tui nữn hũ angãn la tơpãq dãng ga ung” nữn ôh iỡuq mĩn pioh ga A-bra-ham, nữn kung pioh luơi ga pơnõq drơi, la pioh ga dơgrữq mơnuĩh nữn voh tui ròq hũ angãn la tơpãq dãng, nữn la pioh ga dơgrữq mơnuĩh halơi pãc-tui dơlãp Pitao song ngãq ga Yàc Je-su, Yàc pơnõq drơi, hadiuq wỡq mưng kaya mơtai, nữn la Pitrai song kađòc pơjao kơyua mưng dlàiq dơnũh pơnõq drơi sì kung song hadiuq wỡq kơyua mưng kaya angãn tơpãq dãng pơnõq drơi hũ.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.