Rô-ma 16

1Hlãq lakơu akhàt pa-thơu ga pơnõq adơi sơai sa aràc adơi sơai kamơi pơnõq hlãq hũ la Phe-be, mơnuĩh duh vruãq Sàc Pơjũm Sơđah pãq Sen-kơ-re, 2pioh ga pơnõq adơi sơai pơlih tồq ròq nhũ dơlãp Yàc, tui pơnẽq đang mang yơu dơgrữq mơnuĩh gơnuar pơđar sơđah, sì dõc nhũ dơlãp avih dơgrữq kaya halơi nữn nhũ chàc trôh pơnõq adơi sơai. Kơyua rùp phuỗt nhũ kung song dõc lũ mơnuĩh, dơlãp nữn hũ hlãq.

3Lakơu chuãq Be-rit-sin sì A-qui-la, dơgrữq ban mơyơu ngãq vruãq sigỡuq hlãq hũ dơlãp Yàc Dõc Pơ-tlah Je-su, 4nữn la dơgrữq mơnuĩh song tlàq kaya hadiuq drơi pioh dõc hlãq, hlãq ỡn ngai pơnõq nhũ, nữn ôh mĩn sa aràc hlãq, nữn avih dơgrữq Sàc Pơjũm Sơđah vual vơla lơniãu hũ kung ỡn ngai pơnõq nhũ, 5sì lakơu chuãq Sàc Pơjũm Sơđah pơjũm pơtõm pãq sàc pơnõq nhũ. Lakơu chuãq E-bai-net, mơnuĩh adơi sơai anĩt anar hlãq hũ, nữn nhũ la voh akõq thũt ga Yàc Dõc Pơ-tlah pãq palơi A-si. 6Lakơu chuãq Ma-ri, mơnuĩh song ngãq vruãq dleh dlàr kơyua mưng pơnõq adơi sơai. 7Lakơu chuãq An-tô-ni-kơ sì Ju-ni-a, la gỡuq gãt sì hlãq gãm la mơnuĩh kađòc krỡq sigỡuq sì hlãq, dua aràc pơnõq nhũ la dơgrữq mơnuĩh tiẽng dơnai di khrãh dơgrữq mơnuĩh gơnuar pơđar, nữn pơnõq nhũ kung song dòq dơlãp Yàc Dõc Pơ-tlah hlơu sì hlãq. 8Lakơu chuãq Am-li-a, ban mơyơu anĩt anar hlãq hũ dơlãp Yàc. 9Lakơu chuãq U-rơ-banh, la mơnuĩh ngãq vruãq sigỡuq sì hlãq dơlãp Yàc Dõc Pơ-tlah, sì Ech-ta-chy, la ban mơyơu anĩt anar hlãq hũ. 10Lakơu chuãq A-be-lơ, la mơnuĩh hũ tồq kaya lòc dơlãp Yàc Dõc Pơ-tlah. Lakơu chuãq dơgrữq mơnuĩh dơlãp sàc anĩh A-rit-tô-bu. 11Lakơu chuãq He-rô-đi-ôn, la gỡuq gãt hlãq. Lakơu chuãq dơgrữq mơnuĩh halơi pơweh pãq sàc anĩh Nat-sĩt hũ, la dơgrữq mơnuĩh dòq dơlãp Yàc. 12Lakơu chuãq Tri-phe-nơ sì Tri-phô-sơ, la dơgrữq mơnuĩh ãt dleh dlàr dơlãp Yàc. Lakơu chuãq Bet-si-đơ la mơnuĩh hlãq anĩt anar, mơnuĩh song ngãq vruãq dleh dlàr lũ dơlãp Yàc. 13Lakơu chuãq Ru-phu, la mơnuĩh hũ duỡt ruãh dơlãp Yàc, sì lakơu chuãq rơwãc ami nhũ sì kung la ami hlãq. 14Lakơu chuãq A-sin-kơ-rit, Phơ-le-gôn, Het-me, Ba-trô-ba, Het-ma, gãm sì dơgrữq pơnõq adơi sơai dòq sì pơnõq nhũ. 15Lakơu chuãq Phi-lô-lô-gơ sì Ju-li, Ne-re sì sơai kamơi nhũ nữn, sigỡuq sì Ô-lim gãm sì avih dơgrữq mơnuĩh pãc-tui yàc dòq sì pơnõq nhũ. 16Lakơu chuãq gỡuq mưng kaya chũm sơđah sơchih. Avih dơgrữq Sàc Pơjũm Sơđah Yàc Dõc Pơ-tlah hũ lakơu chuãq rơwãc pơnõq adơi sơai.

17Vơnah tơmo, pa-thơu pơnõq adơi sơai, hlãq lakơu pa-sơdor pơnõq adơi sơai iỡuq gơrhia iãq dơgrữq mơnuĩh ưng ngãq pa-chơlah sì ngãq ga sơnẽq sỗq, suẽl sì kaya pơto pơđar nữn pơnõq adơi sơai song hũ mơgrũ, sì iỡuq pleh atah di pơnõq nhũ. 18Kơyua dơgrữq mơnuĩh yơu nữn ôh duh vruãq Yàc pơnõq drơi, la Yàc Dõc Pơ-tlah, nữn duh vruãq ga tũc tiàt pơnõq nhũ hũ mĩn, sì kơyua pơnõq nhũ angui pơnuaĩq đơp jơmãn gãm sì đơp lavơr, pioh pơnõq nhũ pa-gơla dơgrữq mơnuĩh lơmuỡn hatai pãc-tui. 19Kơyua dơgrữq mơnuĩh kung thơu hatai duh huaĩq pơnõq adơi sơai hũ. Yơu nữn, hlãq uỗt sơh mưng pơnõq adơi sơai, nữn hlãq ưng pơnõq adơi sơai hũ jãc rgơi mưng kaya siàp, sì sơđah sơchih pơweh sì kaya mơsãc. 20Yàc Pô Lơngĩq kaya dadu lơngai hũ ròq sơmar juãq jơlìq Sa-tan pãq ala tơkai pơnõq adơi sơai. Lakơu kaya anĩt Yàc pơnõq drơi hũ, la Yàc Dõc Pơ-tlah Je-su, dòq sigỡuq sì pơnõq adơi sơai.

21Ti-mô-the, ban mơyơu ngãq vruãq sigỡuq sì hlãq, Lu-si-ut, Ja-sôn, sì Sô-si-ba-te, dơgrữq mơnuĩh gỡuq gãt hlãq hũ, pơyua pơnuaĩq chuãq rơwãc pơnõq adơi sơai. 22Hlãq, la Tet-tiu, mơnuĩh wãq sơrãq pơyua nĩ, lakơu chuãq pơnõq adơi sơai dơlãp Yàc. 23Gai-ut, la mơnuĩh song tồq ròq hlãq sì gãm Sàc Pơjũm Sơđah, kung pơyua pơnuaĩq chuãq rơwãc pơnõq adơi sơai. E-rat-tu, la mơnuĩh pô pioh Jĩn priãq palơi prõng, sigỡuq sì mơnuĩh adơi sơai la Kua-tu, kung pơyua pơnuaĩq chuãq rơwãc pơnõq adơi sơai. 24[Lakơu kaya anĩt Yàc pơnõq drơi hũ, la Yàc Dõc Pơ-tlah Je-su, dòq sigỡuq sì avih dơgrữq tãl aràc pơnõq adơi sơai. A-men.]

25Lakơu kaya gơhluh pơweh pa Pitao hũ gơnuar pơlih ngãq ga pơnõq adơi sơai jỡc gơjãp kađỡc tui Pơnuaĩq Siàp hlãq hũ sì kaya ràc akhàt Yàc Dõc Pơ-tlah Je-su, tui kaya akhàt pa-tơviãq mưng kaya dơlãp dơđỡuq song pioh rơmiãq gơnĩt mưng rài sơđãq, 26nữn tũq nĩ song hũ akhàt pa-tơviãq sì ràc tơviãq ga dơgrữq vual vơla kơyua mưng pơnuaĩq đơp hwơr dơlãp Sơrãq Sơđah, tui yơu gơnuar pơđar Yàc Pô Lơngĩq hũ gãm gãm, song hũ vrơi pa-thơu ga dơgrữq vual vơla tồq va pơnõq nhũ trôh pãq kaya duh huaĩq mưng voh tui hũ, 27lakơu kaya gơhluh pơweh pa Pitrai, la mĩn Yàc Pô Lơngĩq jãc rgơi, gơnang mưng Yàc Dõc Pơ-tlah Je-su, tãl trôh gãm gãm. A-men.