1 Kô-rin-tô 1

1Pol, hũ duỡt ruãh ngãq mơnuĩh gơnuar pơđar Yàc Dõc Pơ-tlah Je-su kơyua mưng hatai ưng Yàc Pô Lơngĩq hũ, sigỡuq sì Sôt-then, la mơnuĩh adơi sơai pơnõq drơi, 2pơyua ga Sàc Pơjũm Sơđah Yàc Pô Lơngĩq hũ dòq pãq Kô-rin-tô, nữn la ga dơgrữq mơnuĩh song hũ pa-sơdua vơhrơu dơlãp Yàc Dõc Pơ-tlah Je-su, nữn la dơgrữq mơnuĩh gơnuar pơđar prõng hũ duỡt ruãh, sigỡuq sì dơgrữq mơnuĩh dòq vãq avih anĩh iơu lakơu angãn Yàc pơnõq drơi la Yàc Dõc Pơ-tlah Je-su, la Yàc pơnõq nhũ sì kung la Yàc pơnõq drơi hũ. 3Lakơu kaya anĩt sì kaya dadu lơngai mưng Yàc Pô Lơngĩq la Ama pơnõq drơi, sì mưng Yàc Dõc Pơ-tlah Je-su dòq sigỡuq sì pơnõq adơi sơai.

4Hlãq ỡn ngai Yàc Pô Lơngĩq hlãq hũ gãm mưng pơnõq adơi sơai kơyua mưng kaya anĩt Pitrai hũ, la kaya song vrơi ga pơnõq adơi sơai dơlãp Yàc Dõc Pơ-tlah Je-su. 5Kơyua dơlãp dơgrữq kaya pơnõq adơi sơai song hũ tơviãq jỡc mơda gơnãp dơlãp Pitrai, dơlãp dơgrữq pơnuaĩq đơp sì dơgrữq kaya thơu pãc, 6drưh yơu pơnuaĩq ngãq chưng mưng Yàc Dõc Pơ-tlah song hũ ngãq chưng gơnĩt la iỡuq viãq dơlãp pơnõq adơi sơai, 7kơyua yơu nữn, pơnõq adơi sơai ôh siẽuq avih dơgrữq kaya anĩt halơi, tũq pơnõq adơi sơai tluỡiq gơhuar chơkhãq chàc kaya ràc pa-tơviãq Yàc pơnõq drơi hũ, la Yàc Dõc Pơ-tlah Je-su, 8la Pitao kung ròq ngãq ga pơnõq adơi sơai jỡc prãn khãc tãl trôh luôĩq hadơi, pioh pơnõq adơi sơai ròq ôh kađòc tơwãq kaya sỗq dlàiq dơlãp harơi Yàc pơnõq drơi hũ, la Yàc Dõc Pơ-tlah Je-su. 9Yàc Pô Lơngĩq la tui tơpãq, kơyua mưng Pitrai nữn pơnõq adơi sơai song hũ duỡt ruãh tơma dơlãp kaya salơnuãq sì Anàq Pitrai hũ, la Yàc Dõc Pơ-tlah Je-su, Yàc pơnõq drơi.

10Nữn pa-thơu pơnõq adơi sơai, hlãq pơto pa-sơdor pơnõq adơi sơai kơyua mưng angãn Yàc pơnõq drơi hũ, la Yàc Dõc Pơ-tlah Je-su, làiq avih dơgrữq pơnõq adơi sơai iỡuq hũ sa pơnuaĩq đơp sigỡuq, sì juơi hũ dơgrữq kaya pa-chơlah krơi dơlãp pơnõq adơi sơai, nữn pơnõq adơi sơai iỡuq sa hatai sigỡuq dơlãp kaya sơnơng sì sa hatai sigỡuq dơlãp kaya ưng ngãq gơnĩt. 11Kơyua, pa-thơu pơnõq adơi sơai hlãq hũ gơnang mưng mơnuĩh sàc Kơ-lô-e, hlãq song hũ vrơi pa-thơu nĩq nũn kaya wãc rơsi mưng pơnõq adơi sơai, làiq hũ dơgrữq kaya pa-chơlah tơpuôl jơdrãq sigỡuq dơlãp pơnõq adơi sơai. 12Hlãq hũ kaya sơnơng yơu nĩ, nữn la dơgrữq tãl aràc dơlãp pơnõq adơi sơai mơnuĩh halơi đơp làiq: “Hlãq tui Pol,” hẽla “Hlãq tui A-bô-lô,” hẽla “Hlãq tui Se-pha,” hẽla “Hlãq tui Yàc Dõc Pơ-tlah.” 13Yàc Dõc Pơ-tlah song ãt kađòc pa-chơlah krơi yơh? Iỡuq mĩn Pol song ãt pỡc đĩn pãq dlòc kayơu pỡc ala ga pơnõq adơi sơai yơh? Hẽla pơnõq adơi sơai song ãt ngãq bãp-tem mãq angãn Pol? 14Hlãq ỡn ngai Yàc Pô Lơngĩq kơyua hlãq song ôh ngãq bãp-tem ga asơi dơlãp pơnõq adơi sơai, lơniãu Kơ-rit-bu sì Gai-ut, 15tồq ôh mơnuĩh halơi pơlih đơp làiq pơnõq adơi sơai song tồq mãq angãn hlãq ãt ngãq bãp-tem. 16(Hlãq kung song ngãq bãp-tem ga sàc anĩh Se-pha-na. Lơniãu sàc anĩh nữn, hlãq ôh thơu drơi song hũ ngãq bãp-tem ga asơi tơmo tơra wỡq.) 17Kơyua Yàc Dõc Pơ-tlah song ôh pơđar hlãq nao ngãq bãp-tem, nữn la pơto akhàt Pơnuaĩq Siàp — ôh iỡuq mưng pơnuaĩq đơp jãc rgơi, tồq pioh ga kayơu pỡc Yàc Dõc Pơ-tlah hũ ôh kađòc lơhiãq avih gơnuar chơnuãq.

18Kơyua pơnuaĩq yàc mưng kayơu pỡc bôh làiq la kaya gơla pơtòq pơweh sì mơnuĩh ãn mơtai lơhiãq, nữn pơweh sì pơnõq drơi, dơgrữq mơnuĩh hũ kaya dõc pơ-tlah, nữn la gơnuar chơnuãq Yàc Pô Lơngĩq hũ. 19Kơyua hũ pơnuaĩq wãq làiq:

“Kơu ròq ngãq pa-lơhiãq kaya jãc rgơi dơgrữq mơnuĩh jãc rgơi hũ;

sì Kơu ròq ngãq pa-dlưh kaya pãc thơu dơgrữq mơnuĩh pãc thơu hũ.”

20Mơnuĩh jãc rgơi dòq pãq halơi? Mơnuĩh mơgrũ jãc dòq pãq halơi? Mơnuĩh khưh rgơi duah pơnuaĩq prơjai rài nĩ hũ dòq pãq halơi? Ôh iỡuq Yàc Pô Lơngĩq song ngãq kaya jãc rgơi dun kơyua hũ tơviãq jỡc kaya gơla pơtòq vloh yơh? 21Kơyua iãq gơnĩt làiq, dơlãp kaya jãc rgơi Yàc Pô Lơngĩq hũ, dun kơyua song ôh kơnãl thơu Yàc Pô Lơngĩq mưng kaya jãc rgơi nữn, yơu nữn Yàc Pô Lơngĩq song siàp hatai, gơnang mưng kaya pơto akhàt gơla pơtòq, pioh dõc pơ-tlah dơgrữq mơnuĩh halơi pãc-tui. 22Kơyua mưng mơnuĩh Ju-đa nữn ưng duah kaya nỡm krơi, dòq mơnuĩh Gơ-rec nữn ưng duah kaya jãc rgơi. 23Dòq pơnõq hlãq nữn pơto akhàt Yàc Dõc Pơ-tlah kađòc pỡc đĩn pãq dlòc kayơu pỡc, bôh làiq la voh patơu sơnẽq tơkai pơweh sì mơnuĩh Ju-đa, nữn la kaya gơla pơtòq pơweh sì mơnuĩh lơniãu. 24Vơnah tơmo, pơweh sì pơnõq nhũ, la dơgrữq mơnuĩh hũ duỡt ruãh, gãm mơnuĩh Ju-đa sì gãm mơnuĩh Gơ-rec, Yàc Dõc Pơ-tlah la gơnuar chơnuãq Yàc Pô Lơngĩq hũ sì la kaya jãc rgơi Yàc Pô Lơngĩq hũ. 25Kơyua kaya gơla pơtòq Yàc Pô Lơngĩq hũ la kaya jãc rgơi rlao sì anàq mơnuĩh, sì kaya lơduh lơmuỡn Yàc Pô Lơngĩq hũ la prãn khãc rlao sì anàq mơnuĩh.

26Pa-thơu pơnõq adơi sơai, iỡuq viãq la pơnõq adơi sơai iãq pơwih kaya duỡt ruãh drơi hũ, iãq làiq ôh hũ lũ mơnuĩh jãc rgơi tui rơlo rùp, ôh hũ lũ mơnuĩh gơnuar prãn, kung ôh hũ lũ mơnuĩh tơviãq mưng apõc pơtiàt mơda gơnãp. 27Bôh làiq yơu nữn, Yàc Pô Lơngĩq song duỡt ruãh dơgrữq kaya gơla pơtòq dun kơyua hũ pioh Pitrai pơlih ngãq ga dơgrữq mơnuĩh jãc rgơi mơlơu ơlah, Yàc Pô Lơngĩq song duỡt ruãh dơgrữq kaya lơduh lơmuỡn dun kơyua hũ pioh Pitrai ngãq ga dơgrữq mơnuĩh prãn khãc mơlơu ơlah, 28sì Yàc Pô Lơngĩq song duỡt ruãh dơgrữq kaya halơi ôh jỡc ôh chãq, sigỡuq sì dơgrữq kaya ãt kađòc iãq ôh srãp dơlãp dun kơyua, dơgrữq kaya ôh hũ, pioh Pitrai pơlih ngãq ga dơgrữq kaya hũ tơviãq jỡc ôh hũ, 29tồq ga dơgrữq rơlo rùp ôh tũq halơi pơlih yeh drơi hagĩq pãq anãq Yàc Pô Lơngĩq. 30Nữn gơnang mưng Pitrai, nữn pơnõq adơi sơai hũ dòq dơlãp Yàc Dõc Pơ-tlah Je-su, la Pitao hũ tơviãq jỡc kaya jãc rgơi trôh mưng Yàc Pô Lơngĩq, kung yơu la gãm kaya tơpãq dãng sì kaya tơviãq jỡc sơđah, sigỡuq sì kaya dơvuh sơlih pioh ga pơnõq drơi, 31tồq pioh, yơu hũ pơnuaĩq wãq: “Asơi yeh drơi, iỡuq yeh drơi vẽq dơlãp Yàc.”