Rô-ma 15

1Nữn pơnõq drơi, la mơnuĩh prãn khãc, iỡuq gui anòng kaya halơi nữn mơnuĩh lơduh lơmuỡn ngãq ôh jỡc, sì juơi ngãq pioh ga siàp hatai drơi. 2Avih tãl aràc dơlãp pơnõq drơi iỡuq ngãq siàp hatai mơnuĩh jẽq phia drơi kơyua kaya sa kanõh siàp mơkrờ, nữn la pơweh trôh mưng vruãq vỡq padỡc mơnuĩh nữn. 3Kơyua rùp phuỗt Yàc Dõc Pơ-tlah song ôh ngãq ga siàp hatai drơi. Pa-vlữq wỡq, yơu pơnuaĩq song wãq làiq: “Dơgrữq pơnuaĩq đơp sàq dơgrữq mơnuĩh siẽq siẽl Pitrai song tôh wỡq pãq dlòc anàq.” 4Kơyua dơgrữq kaya hũ wãq wỡq mưng hlơu thrơi la pioh pơto pơđar pơnõq drơi, tồq gơnang mưng kaya ãt ỡl sì kaya paluơ padờp Sơrãq Sơđah hũ, nữn pơnõq drơi hũ tồq kaya chơkhãq chàc gơjãp gơnĩt. 5Lakơu kaya ãt-ỡl sì kaya paluơ padờp Yàc Pô Lơngĩq hũ vrơi ga pơnõq adơi sơai pioh hũ sa hatai sì gỡuq dơlãp kaya sơnơng, tui yơu Yàc Dõc Pơ-tlah Je-su, 6tồq ga pơnõq adơi sơai pơlih sa hatai sigỡuq dơlãp kaya sơ-uỗt mơyòp Yàc Pô Lơngĩq, la Ama Yàc Dõc Pơ-tlah Je-su, Yàc pơnõq drơi hũ.

7Yơu nữn, pơnõq adơi sơai iỡuq tồq ròq gỡuq, vloh kung yơu Yàc Dõc Pơ-tlah song tồq ròq pơnõq adơi sơai, pioh pơweh trôh kaya gơhluh Yàc Pô Lơngĩq hũ. 8Kơyua hlãq lakơu đơp làiq Yàc Dõc Pơ-tlah song ngãq tơviãq jỡc mơnuĩh halỗt mơnãq ga vual vơla ãt sìq kalìq kơyua mưng pơnuaĩq tơpãq Yàc Pô Lơngĩq hũ, pioh ngãq chưng gơnĩt pơnuaĩq hẽ grưh song vrơi ga dơgrữq ung kõq, 9nữn la pioh ga dơgrữq vual vơla lơniãu sơ-uỗt mơyòp Yàc Pô Lơngĩq kơyua mưng hatai anĩt duman Pitrai hũ, drưh yơu pơnuaĩq song wãq:

“Kơyua yơu nữn, anàq ròq sơ-uỗt mơyòp Pitrai di khrãh dơgrữq vual vơla lơniãu

sì adoh sơ-uỗt mơyòp angãn Pitrai.”

10Vloh kung hũ pơnuaĩq wãq làiq:

“Ơ dơgrữq vual vơla lơniãu, iỡuq uỗt sơh sigỡuq sì vual vơla Pitrai.”

11Sì wãq wỡq làiq:

“Avih dơgrữq tãl aràc pơnõq hã la vual vơla lơniãu, iỡuq sơ-uỗt mơyòp Yàc;

sì avih dơgrữq vual vơla, iỡuq adoh sơ-uỗt mơyòp Pitrai.”

12Sì E-sai kung đơp wỡq làiq:

“Mưng Je-se ròq tơmuh sa phuỗt akhà, la Pitao hũ padỡc tơgùq pioh apãt akõq dơgrữq vual vơla lơniãu;

dơgrữq vual vơla lơniãu ròq hũ kaya chơkhãq chàc dơlãp Pitrai.”

13Lakơu Yàc Pô Lơngĩq la kaya chơkhãq chàc ngãq ga pơnõq adơi sơai vãq sơrè dơgrữq kaya uỗt sơh sì dadu lơngai dơlãp voh tui, pioh ngãq ga pơnõq adơi sơai dơlah dơlai dơlãp kaya chơkhãq chàc gơnang di gơnuar chơnuãq Yàc Vơngãq Sơđah hũ.

14Vơnah tơmo, ơ pơnõq adơi sơai hlãq hũ, rùp phuỗt hlãq kung pãc làiq mưng pơnõq adơi sơai mĩn, rùp phuỗt pơnõq adơi sơai kung hũ vãq sơrè hatai lơmuỡn siàp, kơyua vãq sơrè dơgrữq kaya jãc thơu sì rgơi thơu pioh pơto pa-sơdor gỡuq. 15Nữn hlãq kung wãq pơtãl kaya chãc khĩn ga pơnõq adơi sơai hadùp pơnuaĩq, tồq akhàt pioh pơto pa-sơdor ga pơnõq adơi sơai, mưng kaya anĩt Yàc Pô Lơngĩq song alĩn vrơi ga hlãq, 16pioh ngãq ga hlãq tơviãq jỡc sa aràc mơnuĩh halỗt mơnãq Yàc Dõc Pơ-tlah Je-su hũ trôh sì dơgrữq vual vơla lơniãu, tũq ngãq tơviãq gơnuar pioh kaya duh talơvãt ga Pơnuaĩq Siàp Yàc Pô Lơngĩq hũ, tồq ga dơgrữq vual vơla lơniãu pơlih ngãq kaya padỡc siàp hatai Yàc, mưng tũq ngãq jỡc sơđah sơchih kơyua mưng Yàc Vơngãq Sơđah. 17Kơyua nữn, dơlãp Yàc Dõc Pơ-tlah Je-su, hlãq hũ kanõh gơtha pioh yeh drơi pơweh sì dơgrữq vruãq pơweh pa Yàc Pô Lơngĩq. 18Kơyua hlãq ròq ôh khĩn đơp mưng avih dơgrữq kaya halơi tơmo nữn lơniãu sì dơgrữq vruãq nữn ôh iỡuq Yàc Dõc Pơ-tlah song ngãq wil tãl tơpa hlãq, tồq va vual vơla lơniãu trôh pãq kaya duh huaĩq — kơyua mưng pơnuaĩq đơp gãm sì vruãq ngãq, 19mưng kaya prãn khãc dơgrữq kaya nỡm krơi sì kaya krơi tơmo, mưng gơnuar chơnuãq Vơngãq Sơđah Yàc Pô Lơngĩq hũ — hlãq song ràc akhàt Pơnuaĩq Siàp Yàc Dõc Pơ-tlah hũ savĩq wil tãl mưng palơi Je-ru-sa-lem sì dơgrữq phũm tòp dar tãl trôh pãq palơi I-ly-ri; 20nữn kaya chơkhãq khiãng hlãq hũ hlơu thrơi la pơto akhàt Pơnuaĩq Siàp nữn ôh iỡuq dơlãp angãn Yàc Dõc Pơ-tlah song hũ hmỡq thơu, tồq ga hlãq ôh vỡq padỡc pãq dlòc gơnang di rơnỡq mơnuĩh tơmo hũ. 21Bôh làiq yơu nữn, drưh yơu pơnuaĩq song wãq làiq:

“Dơgrữq mơnuĩh ôh-ka hmỡq pơnuaĩq siàp mưng Pitrai nữn ròq bôh Pitrai, sì

dơgrữq mơnuĩh ôh-ka hmỡq nữn ròq pãc thơu.”

22Yơu nữn, lũ bãc hlãq kung song kađòc mãq pakỡuq pioh nao trôh rơwãc pơnõq adơi sơai. 23Nữn tũq nĩ, kơyua hlãq ôh dòq hũ anĩh halơi dơlãp dơgrữq phũm nĩ tơra, nữn kơyua dơgrữq thũt nao gãt hlãq gãm chơkhãq khiãng ưng nao trôh rơwãc pơnõq adơi sơai, 24yơu nữn, mơyah làiq tũq halơi hlãq nao trôh pãq Es-pa-in, hlãq chơkhãq khiãng viãq, tũq nao gãt jơlàt, pãp pơnõq adơi sơai, sì hũ pơnõq adơi sơai dõc va hlãq nao trôh pãq đỡn, hadơi sì tũq hlãq iãq siàp hatai dòq sì pơnõq adơi sơai dơlãp sa asĩt tũq. 25Dòq tũq nĩ hlãq ãn nao jơlàt trôh pãq Je-ru-sa-lem tồq va dơgrữq kaya pioh dõc vruãq ga dơgrữq mơnuĩh gơnuar pơđar sơđah. 26Kơyua mơnuĩh Ma-se-đoan sì mơnuĩh lơgar A-chai song siàp hatai iơu pơgòp rìq jĩn pioh dõc dơgrữq mơnuĩh rơbah rơbờp di khrãh dơgrữq mơnuĩh gơnuar pơđar sơđah pãq palơi Je-ru-sa-lem. 27Kơyua pơnõq nhũ song siàp hatai sì pơnõq nhũ la dơgrữq mơnuĩh kađòc srẽ dơgrữq mơnuĩh nữn. Kơyua mơyah làiq vual vơla lơniãu hũ tồq mãq sigỡuq dơgrữq kaya anĩt gah suàt vơngãq mơnuĩh nữn hũ, nữn pơnõq nhũ kung hũ vơnah pioh rùp duh vruãq dơgrữq mơnuĩh nữn mưng kaya mơnã gah vơnah rài nĩ. 28Yơu nữn, dơlãp tũq hlãq song ngãq wil tãl vruãq nĩ sì pơjao kaya alĩn pơgòp nĩ trôh sì pơnõq nhũ, nữn hlãq ròq pơdòq nao weh gãt rơwãc pơnõq adơi sơai pioh nao trôh pãq palơi Es-pa-in. 29Nữn hlãq thơu làiq dơlãp tũq hlãq trôh rơwãc pơnõq adơi sơai, hlãq ròq va tui wil tãl kaya anĩt Yàc Dõc Pơ-tlah hũ.

30Vơnah tơmo, ơ pơnõq adơi sơai, kơyua mưng Yàc pơnõq drơi hũ, la Dõc Pơ-tlah Je-su, sì kơyua mưng kaya khiãng duman dơlãp Vơngãq Sơđah, hlãq lakơu pơnõq adơi sơai mơsôh sigỡuq sì hlãq mưng kaya iơu lakơu ala mơta hlãq padỡc tơgùq ga Yàc Pô Lơngĩq, 31pioh hlãq pơlih hũ dõc suãq tlah mưng dơgrữq mơnuĩh ôh duh huaĩq pãq phũm Ju-đe, kung yơu pioh ga gơnuar vruãq hlãq hũ pãq Je-ru-sa-lem ròq hũ dơgrữq mơnuĩh gơnuar pơđar sơđah siàp hatai tồq mãq; 32tồq ga kơyua mưng hatai ưng Yàc Pô Lơngĩq hũ, hlãq pơlih trôh rơwãc pơnõq adơi sơai mưng hatai uỗt sơh, kơyua hũ padơi dleh sigỡuq sì pơnõq adơi sơai. 33Lakơu dadu lơngai Yàc Pô Lơngĩq hũ dòq sigỡuq sì avih dơgrữq pơnõq adơi sơai. A-men.