Skip to content
BibleKenya

Roglai Bible Literal Text

Rô-ma 14

Iỡuq tồq ròq mơnuĩh lơduh lơmuỡn voh tui, juơi chahrơna mưng dơgrữq vruãq ngãq ga gơrlah pơnuaĩq. Hũ mơnuĩh pãc-tui la bõc jỡc dơgrữq kaya, nữn mơnuĩh lơduh lơmuỡn mĩn bõc iãm soh. Mơnuĩh hũ bõc dơgrữq kaya juơi iãq ôh srãp mơnuĩh ôh hũ bõc. Nữn mơnuĩh ôh bõc jỡc dơgrữq kaya kung juơi chahrơna mơnuĩh bõc. Kơyua Yàc Pô Lơngĩq song tồq mơnuĩh nữn. Hã la asơi nữn khĩn chahrơna mơnuĩh ngãq halỗt mơnuĩh tơmo hũ? Mơnuĩh nữn ãn dòq dỡc hẽla lơvuh kung dòq pãq anãq pô drơi. Nữn mơnuĩh nữn ròq dòq dỡc, kơyua Yàc pơlih ngãq ga mơnuĩh nữn dòq dỡc. Hũ mơnuĩh iãq harơi nĩ kuơ màc rlao harơi dih. Nữn mơnuĩh tơmo nữn iãq dơgrữq harơi kung yơu gỡuq. Dơgrữq tãl aràc iỡuq pãc-tui gơnĩt dơlãp kaya sơnơng drơi. Mơnuĩh chròq rơmiãq harơi la rơmiãq kơyua mưng Yàc sì chròq rơmiãq; mơnuĩh bõc la kơyua mưng Yàc nữn bõc, kơyua mơnuĩh nữn ỡn ngai Yàc Pô Lơngĩq. Mơnuĩh ôh bõc, nữn la mơnuĩh ãt bõc kơyua mưng Yàc, kung ỡn ngai Yàc Pô Lơngĩq. Kơyua ôh hũ mơnuĩh halơi dơlãp pơnõq drơi hadiuq ga rùp phuỗt drơi, kung ôh hũ mơnuĩh halơi kơyua mưng rùp phuỗt drơi nữn mơtai. Kơyua mơyah làiq pơnõq drơi hadiuq, la hadiuq ga Yàc, sì mơyah làiq pơnõq drơi mơtai, la mơtai ga Yàc. Yơu nữn, bôh làiq pơnõq drơi hadiuq hẽla mơtai, nữn pơnõq drơi kung pơweh sì Yàc. Nữn la mưng kaya kanõh gơtha nĩ nữn Yàc Dõc Pơ-tlah song mơtai sì hadiuq wỡq, tồq ga Pitrai ngãq Yàc mơnuĩh mơtai sì gãm mơnuĩh hadiuq hũ. Nữn sơai dih, hayơu sơai vloh chahrơna adơi sơai drơi? Dòq sơai, hayơu vloh iãq ôh srãp adơi sơai drơi? Kơyua avih dơgrữq tãl aràc pơnõq drơi ròq dòq dỡc pãq anãq sơvan chahrơna Yàc Pô Lơngĩq hũ. Kơyua hũ pơnuaĩq wãq làiq:

“Yàc đơp: ‘yơu Kơu gãm hadiuq, dơgrữq ta-ồq ròq aguãl ta-ồq di anãq Kơu,

sì dơgrữq dơlah ròq akhàt tơviãq dlàiq sì Yàc Pô Lơngĩq.’”

Yơu nữn, avih tãl aràc pơnõq drơi ròq akhàt tơviãq mưng rài hadiuq drơi ga Yàc Pô Lơngĩq.

Yơu nữn, pơnõq drơi juơi chahrơna gỡuq drơi, nữn pa-vlữq wỡq, iỡuq ngãq gơnĩt juơi dãq voh patơu sơnẽq tơkai hẽla pơnẽq ngãq sơnẽq lơvuh ga adơi sơai drơi. Hlãq thơu sì pãc gơnĩt viãq dơlãp Yàc Je-su, làiq ôh hũ kaya hagĩq la tasỡuq nrãc krơi nhũ ôh. Mĩn mơnuĩh halơi sơnơng kaya halơi la tasỡuq nrãc, nữn nhũ la tasỡuq nrãc pơweh sì mơnuĩh nữn mĩn. Mơyah làiq kơyua mưng kaya bõc nữn ngãq ga pơnõq adơi sơai drơi kađòc pơđìq ka-ồq, nữn pơnõq adơi sơai ôh dòq yàp nao dơlãp kaya khiãng duman tơra. Juơi angui kaya bõc pa-lơhiãq mơnuĩh nữn Yàc Dõc Pơ-tlah song mơtai ala ga mơnuĩh nữn. Yơu nữn juơi luơi kaya pơnõq adơi sơai iãq la siàp mơkrờ kađòc angãn la mơsãc. Kơyua palơi lơgar Yàc Pô Lơngĩq ôh iỡuq la mưng vruãq kaya bõc, kaya mơnhũm, nữn la mưng kaya tơpãq dãng, dadu lơngai, sì uỗt sơh dơlãp Yàc Vơngãq Sơđah. Kơyua mơnuĩh halơi duh vruãq Yàc Dõc Pơ-tlah tui yơu nữn, nữn hũ Yàc Pô Lơngĩq siàp hatai sì hũ anàq mơnuĩh iãq kuơ màc. Yơu nữn, pơnõq drơi iỡuq duah tui vẽq kaya ngãq ga mơnuĩh jỡc salơnuãq sì vỡq padỡc sì gỡuq. Juơi kơyua mưng vruãq kaya bõc sì ngãq lơhiãq vruãq Yàc Pô Lơngĩq hũ. Viãq dơgrữq kaya kung sơđah sơchih, nữn mơnuĩh halơi bõc tồq vloh ngãq ga mơnuĩh tơmo sơnẽq sỗq, nữn la iãh mơsãc. Nữn vloh juơi bõc rơlo, mơnhũm alãc hẽla avih dơgrữq kaya hagĩq ngãq ga adơi sơai drơi sơnẽq sỗq, sỗq dlàiq, hẽla tơviãq jỡc lơduh lơmuỡn. Voh tui pơnõq adơi sơai hũ nữn miẽt chròq rơmiãq vẽq di anãq mơta Yàc Pô Lơngĩq. Lơngai ga mơnuĩh ôh ngãq dlàiq krơi ga drơi kơyua mưng kaya drơi iãq la iỡuq. Mơnuĩh halơi dỡq dỡng vloh kung bõc nữn kađòc ngãq dlàiq, kơyua vruãq nữn ôh tơviãq mưng voh tui. Ngãq vruãq hagĩq ôh kơyua mưng voh tui nữn la dlàiq.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.