Rô-ma 13

1Avih tãl aràc iỡuq duh huaĩq dơgrữq mơnuĩh hũ gơnuar pãq dlòc drơi, kơyua ôh hũ gơnuar halơi la ôh trôh mưng Yàc Pô Lơngĩq. Dơgrữq gơnuar tũq nĩ hũ kung la mưng Yàc Pô Lơngĩq pơto ngãq gơnĩt. 2Yơu nữn, mơnuĩh halơi jơdrãq sì dơgrữq mơnuĩh hũ gơnuar, nữn la jơdrãq sì gơnuar pơđar Yàc Pô Lơngĩq hũ; sì dơgrữq mơnuĩh ngãq yơu nữn ròq ãt mãq kaya ngãq dlàiq ga drơi. 3Kơyua mơnuĩh hũ gơnuar ôh iỡuq la kaya tơtơh huaĩq ga mơnuĩh ngãq vruãq siàp ôh, nữn la ga mơnuĩh ngãq mơsãc. Pơnõq adơi sơai ưng ôh huaĩq mơnuĩh hũ gơnuar mĩn? Iỡuq ngãq kaya tơpãq siàp, nữn pơnõq adơi sơai ròq hũ sơuỗt mơyòp mưng mơnuĩh gơnuar apãt akõq, 4kơyua pơnõq nhũ la mơnuĩh duh vruãq Yàc Pô Lơngĩq hũ ngãq vruãq pioh kuơ màc ga pơnõq adơi sơai. Nữn mơyah làiq pơnõq adơi sơai ngãq kaya mơsãc, nữn iỡuq tơtơh huaĩq, kơyua pơnõq nhũ ôh tơ-iàq đao savĩq ôh hũ gơtha, kơyua pơnõq nhũ la mơnuĩh duh vruãq Yàc Pô Lơngĩq hũ, la mơnuĩh ngãq dlàiq ga mơnuĩh ngãq vruãq iãh mơsãc. 5Yơu nữn, pơnõq adơi sơai iỡuq ngãq tui, ôh iỡuq mĩn kơyua huaĩq kađòc ngãq dlàiq, nữn kung kơyua mưng tũc hatai drơi. 6Kung mưng nữn, nữn pơnõq adơi sơai iỡuq pioh sơkãq jia; kơyua pơnõq nhũ la mơnuĩh hũ gơnuar duh vruãq Yàc Pô Lơngĩq, gãm ãt ngãq dơgrữq vruãq nĩ. 7Iỡuq vơyar ga dơgrữq mơnuĩh drơi dòq srẽ. Sơkãq jia ga mơnuĩh drơi iỡuq sơkãq jia, vuh jĩn ga mơnuĩh drơi iỡuq vuh, huaĩq mơnuĩh drơi iỡuq huaĩq; ki ngãm mơnuĩh drơi iỡuq ki ngãm.

8Juơi kađòc srẽ mơnuĩh halơi kaya hagĩq, lơniãu kaya khiãng duman pơweh sì gỡuq, kơyua mơnuĩh halơi khiãng duman mơnuĩh tơmo nữn la ngãq wil tãl voh-va. 9Viãq dơgrữq pơnuaĩq pơđar-va, yơu: “Anàq juơi sỗq dlàiq drì drõc, anàq juơi pa-mơtai mơnuĩh, anàq juơi tlẽq sơwah, anàq juơi ham guãm,” sì mơyah làiq dòq hũ gơnuar halơi tơmo, nữn kung wãq pơgòp wỡq dơlãp pơnuaĩq pơđar-va nĩ: “Anàq iỡuq anĩt duman mơnuĩh jẽq phia anàq yơu rùp phàp drơi.” 10Kaya khiãng duman ôh ngãq iãh sì mơnuĩh dòq jẽq phia. Yơu nữn, kaya khiãng duman la kaya ngãq wil tãl voh-va.

11Iỡuq ngãq yơu nữn, kơyua pơnõq drơi thơu tũq lơwah, song trôh tũq pơnõq drơi mưng pơnìq pìq trôh kaya mơdưh tơgùq. Kơyua tũq nĩ kaya dõc pơ-tlah pơnõq drơi song jẽq rlao pơweh sì tũq pơnõq drơi vơhrơu pãc-tui. 12Mơlãp jẽq avih, harơi jẽq sơdah. Yơu nữn, pơnõq drơi iỡuq tlàq luơi dơgrữq vruãq sồp kơnãm, sì chồq ao mãq dơgrữq kaya mơsôh mưng kaya sơdah hũ. 13Pơnõq drơi iỡuq yàp nao ga tơpãq iỡuq yơu di khrãh dlài harơi, ôh bõc mơnhũm sì mơvũq mơvẽl, ôh hadiuq drì drõc sì vlìq pơtar, kung juơi mơvlah kơchah sì lơmùq mơvai. 14Nữn iỡuq chồq mãq vẽq Yàc Dõc Pơ-tlah Je-su, sì juơi ngãq tui pơnẽq vơyai gah rơlo rùp pơweh mưng dơgrữq kaya ham ưng krơi nhũ hũ.