Skip to content
BibleKenya

Roglai Bible Literal Text

Rô-ma 12

Yơu nữn, Pa-thơu pơnõq adơi sơai, kơyua mưng kaya khiãng anĩt Yàc Pô Lơngĩq hũ, hlãq lakơu pơto pa-sơdor pơnõq adơi sơai pioh rùp phàp drơi ngãq jỡc kaya adãt padỡc hadiuq, sơđah sơchih, siàp hatai Yàc Pô Lơngĩq. Nữn la kaya duh vruãq iỡuq viãq pơnõq adơi sơai hũ. Juơi ngãq tui dun kơyua rài nĩ, nữn iỡuq luơi ga drơi hũ pa-sơdua vơhrơu wỡq mưng kaya sơnơng hũ. Dơlãp tũq ngãq yơu nữn, pơnõq adơi sơai ròq thơu iãq kaya halơi la hatai ưng tơpãq siàp, siàp hatai, sì wil tãl Yàc Pô Lơngĩq hũ.

Kơyua, mưng kaya anĩt song vrơi ga hlãq, hlãq lakơu đơp làiq avih tãl aràc dơlãp pơnõq adơi sơai juơi hũ kaya sơnơng mưng rùp phuỗt drơi la dlòc rlao uãn, dơgrữq kaya hagĩq iỡuq sơnơng. Pa-vlữq wỡq iỡuq hũ kaya sơnơng jãc rgơi, tui yơu kaya sơkãq voh tui nữn Yàc Pô Lơngĩq song vrơi ga tãl aràc mơnuĩh. Kơyua yơu pơnõq drơi hũ lũ vơnah dơlãp sa rùp phàp, nữn ôh iỡuq dơgrữq vơnah kung hũ sigỡuq ngãq vruãq drưh yơu gỡuq, kung yơu nữn, pơnõq drơi bôh làiq lũ, nữn la sa rùp dơlãp Yàc Dõc Pơ-tlah, sì avih tãl aràc la vơnah rùp phàp sigỡuq. Nữn pơnõq drơi hũ dơgrữq kaya anĩt krơi di gỡuq tui yơu kaya anĩt hũ vrơi ga drơi. Mơnuĩh halơi hũ kaya anĩt đơp hwơr, iỡuq đơp kaya sơkãq voh tui drơi. Mơnuĩh halơi hũ kaya anĩt duh vruãq, nữn iỡuq duh vruãq avih hatai drơi. Mơnuĩh halơi hũ kaya anĩt pơto pơđar, nữn iỡuq avih hatai pơto pơđar; Mơnuĩh halơi hũ kaya anĩt paluơ padờp, iỡuq paluơ padờp. Mơnuĩh halơi hũ kaya anĩt alĩn vrơi, iỡuq alĩn vrơi lơnang lơnai. Mơnuĩh halơi hũ kaya anĩt apãt akõq, iỡuq apãt akõq iãq gơrhia. Mơnuĩh halơi hũ kaya anĩt hatai khiãng duman, iỡuq ngãq mưng hatai rơchãc lơĩh.

Kaya khiãng duman nữn ôh vlữq lor, iỡuq lơmùq mơvai kaya brưh mơsãc, salơvãq sì kaya tơpãq siàp; la kaya khiãng anĩt pơnõq adơi sơai, iỡuq anĩt duman di gỡuq; mưng hatai ki ngãm, iỡuq ki ngãm di gỡuq; iỡuq ngãq tơriãc ahmiãc la ôh pa-rơwai dỡq dỡng dơlãp kaya ơlah atàq; tluỡiq gơhual dơlãp vơngãq hatai; iỡuq duh vruãq Yàc; iỡuq uỗt sơh dơlãp kaya chơkhãq chàc; ãt-ỡl dơlãp kaya rũc rài; iỡuq gơjãp gơnĩt dơlãp kaya iơu lakơu; iỡuq pơgòp vrơi dơlãp vơnah kaya angui dơgrữq mơnuĩh gơnuar pơđar sơđah hũ; iỡuq ràc tơviãq hatai charơmah charơmai tồq ròq thuãi. Iỡuq vrơi lơngai ga dơgrữq mơnuĩh mãq pakỡuq pơnõq adơi sơai; iỡuq lakơu kaya lơngai sì juơi duah kaya sơtãp lơmah; iỡuq uỗt sơh vẽq sigỡuq sì mơnuĩh uỗt sơh; sia vẽq sigỡuq sì mơnuĩh sia; iỡuq hũ sa hatai sigỡuq dơlãp kaya sơnơng, juơi sơnơng dlòc dloòng, nữn la iỡuq tồq mãq dơgrữq mơnuĩh ôh jỡc ôh chãq. Juơi đơp krơi ga drơi la mơnuĩh jãc rgơi; juơi mãq kaya iãh mơsãc pioh vơyar wỡq ga mơnuĩh iãh mơsãc, iỡuq ngãq dơgrữq kaya siàp vẽq di anãq dơgrữq mơnuĩh; Mơyah làiq pơlih jỡc, pơnõq adơi sơai iỡuq rãn avih prãn hadiuq salơnuãq sigỡuq sì dơgrữq mơnuĩh; ơ pơnõq adơi sơai anĩt duman, juơi yor đồq tơngãn krơi drơi, nữn iỡuq luơi ga kaya ơnõc mơvai prõng Yàc Pô Lơngĩq hũ. Kơyua hũ pơnuaĩq wãq: “‘Kaya yor đồq tơngãn pơweh sì Kơu; Kơu ròq yor vơyar,’ Yàc đơp yơu nữn.”

“Bôh làiq yơu nữn, mơyah làiq mơnuĩh jơdrãq sì pơnõq adơi sơai lơ-pa, iỡuq vrơi ga pơnõq nhũ bõc.

Mơyah làiq pơnõq nhũ mơhão ia, iỡuq vrơi ga pơnõq nhũ mơnhũm.

Kơyua mơyah làiq ngãq yơu nữn, pơnõq adơi sơai ròq vuh hadãc apôi phũrn pãq dlòc akõq pơnõq nhũ.”

Juơi luơi kaya iãh mơsãc pha rlao sì drơi, nữn iỡuq mãq vẽq kaya tơpãq siàp pioh pha rlao sì kaya iãh mơsãc.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.