Rô-ma 11

1Yơu nữn hlãq lakơu tơnĩa: Iỡuq lơĩh Yàc Pô Lơngĩq song kơmlah luơi vual vơla Pitrai? Ôh tũq halơi hũ vruãq nữn. Kơyua hlãq kung la sa aràc mơnuĩh Is-ra-el, anàq tơcho A-bra-ham, pơweh sì apõc pơtiàt Ben-ja-min. 2Yàc Pô Lơngĩq song ôh kơmlah luơi vual vơla Pitrai, la vual vơla Pitrai song thơu hlơu. Hẽla pơnõq adơi sơai ôh thơu pơnuaĩq Srãq Sơđah wãq hagĩq mưng E-li, dơlãp tũq ung akhàt yãq sì Yàc Pô Lơngĩq jơdrãq sì vual vơla Is-ra-el? 3“Talơvãt Yàc, pơnõq nhũ song pa-mơtai dơgrữq mơnuĩh gơnuar hwơr Pitrai, dòq mĩn sa aràc anàq, nữn pơnõq nhũ ãn duah pơnẽq pioh pa-mơtai anàq.” 4Nữn Yàc Pô Lơngĩq song hẽ pơnuaĩq ga ung wỡq yơu halơi? “Kơu song pioh luơi ga Kơu tơjuh rơvơu mơnuĩh lakơi ka-ôh aguãl tơ-ồq pãq anãq Ba-ãnh.” 5Kung drưh yơu nữn, tũq nĩ kung dòq sa vơnah dòq wỡq hũ duỡt ruãh kơyua mưng kaya anĩt. 6Nữn mơyah làiq nữn la kơyua mưng kaya anĩt, nữn ôh iỡuq mưng vruãq tơra. Mơyah làiq ôh yơu nữn, kaya anĩt ròq ôh dòq la kaya anĩt. 7Yơu nữn la yơu hayơu? Kaya nữn vual vơla Is-ra-el duah tui nữn pơnõq nhũ ôh hũ, nữn dơgrữq mơnuĩh hũ duỡt ruãh nữn song hũ tồq mãq, dơlãp tũq katih mơnuĩh dòq wỡq tơviãq jỡc khãc hatai. 8Iỡuq yơu pơnuaĩq song wãq, làiq: “Yàc Pô Lơngĩq song vrơi ga pơnõq nhũ suàt vơngãq gơla pơtòq, mơta ôh bôh, tanĩa ôh hmỡq, tãl trôh harơi nĩ.” 9Dòq Đa-vit nữn đơp:

“Lakơu ban pơnõq nhũ hũ tơviãq jỡc dãq sơnhuãl, vơnrẽq,

ngãq jỡc voh patơu sơnẽq tơkai, sì kaya yor đồq tơngãn pioh ga pơnõq nhũ.

10Lakơu mơta pơnõq nhũ kađòc vùp sồp pioh ôh bôh,

sì iỡuq ngãq tồq rõc pơnõq nhũ miẽt kađòc ka-kồq kơ-iãng gãm.”

11Yơu nữn, hlãq lakơu tơnĩa: “Iỡuq lơĩh pơnõq nhũ sơnẽq tơkai tồq vloh lẽq lơvuh yơh?” Ôh tũq halơi hũ vruãq nữn. Pa-vlữq wỡq yơu nữn, kơyua mưng kaya alah pơnõq nhũ hũ, kaya dõc pơ-tlah song trôh sì vual vơla lơniãu, pioh pasũl ga pơnõq nhũ mơvai lơmùq. 12Mơyah làiq kaya alah pơnõq nhũ hũ ngãq mơda gơnãp ga dun kơyua, sì mơyah làiq kaya lơduh lơhuãi pơnõq nhũ hũ ngãq mơda gơnãp ga vual vơla lơniãu, nữn wil tãl pơnõq nhũ hũ ròq mơda gơnãp dơlah dơlai rlao ôh thơu hadùp? 13Tũq nĩ, hlãq lakơu đơp sì pơnõq adơi sơai la mơnuĩh lơniãu. Hlãq iãq mơ-àc mơyàc mưng gơnuar vruãq drơi dơlãp tũq hũ ngãq mơnuĩh gơnuar pơđar ga vual vơla lơniãu, 14tồq mưng pơnẽq halơi nữn, hlãq pơlih ròq ngãq ga vual vơla tui vơnah rơlo rùp hlãq hũ mơvai lơmùq sì hlãq pơlih kung ròq dõc pơ-tlah hũ tơkìq mơnuĩh dơlãp pơnõq nhũ. 15Kơyua mơyah làiq vruãq pơnõq nhũ kađòc kơmlah luơi ngãq ga dun kơyua hũ salơnuãq sigỡuq, nữn vruãq pơnõq nhũ hũ tồq mãq ròq yơu halơi mơyah làiq ôh iỡuq la kaya hadiuq wỡq mưng kaya mơtai? 16Mơyah làiq, vơnah hlỡq chơmrờp la sơđah, nữn avih sakhũc hlỡq kung yơu nữn. Sì mơyah làiq akhà la sơđah, nữn dơgrữq thàt kung yơu nữn. 17Nữn mơyah làiq hũ tơkìq thàt kađòc gỡq luơi, mơyah làiq pơnõq adơi sơai, la thàt ô-liu dlài, hũ pơtlãp tơma dơlãp đỡn, sì mơyah làiq pơnõq adơi sơai hũ tồq mãq sigỡuq kaya hadiuq dơlãp akhà kayơu ô-liu nữn, 18nữn pơnõq adơi sơai juơi yeh drơi rơlao sì dơgrữq thàt nữn. Dòq mơyah làiq pơnõq adơi sơai yeh drơi nữn iỡuq sơdor làiq ôh iỡuq pơnõq adơi sơai ròc akhà kayơu, nữn la akhà kayơu ròc pơnõq adơi sơai. 19Pơnõq adơi sơai vloh đơp: “Dơgrữq thàt nữn song kađòc gỡq luơi, tồq ga hlãq hũ pơtlãp tơmã.” 20Iỡuq yơu nữn! Pơnõq nhũ kađòc gỡq luơi kơyua hatai ôh pãc-tui, dòq pơnõq adơi sơai nữn dòq dỡc gơjãp gơnang mưng voh tui. Juơi pơweh trôh dơgrữq kaya sơnơng dlòc dloòng, nữn iỡuq tơtơh huaĩq. 21Kơyua mơyah làiq Yàc Pô Lơngĩq song ôh duman dơgrữq thàt phuỗt nhũ dih, Pitrai kung ròq ôh duman pơnõq adơi sơai ôh. 22Miẽt iãq tơmã kaya ngãq lơmuỡn siàp gãm sì kaya ngãq gơmrữq Yàc Pô Lơngĩq hũ: Ngãq gơmrữq sì mơnuĩh lơvuh liẽq, nữn lơmuỡn siàp sì pơnõq adơi sơai, mơyah làiq pơnõq adơi sơai miẽt dòq dơlãp kaya lơmuỡn siàp Pitrai. Ôh yơu nữn, pơnõq adơi sơai kung ròq kađòc kõh tlàq. 23Dòq vơnah pơnõq nhũ, mơyah làiq pơnõq nhũ ôh ngãq patui dơlãp kaya ôh pãc, kung ròq hũ pơtlãp wỡq. Kơyua Yàc Pô Lơngĩq hũ gơnuar chơnuãq pơtlãp pơnõq nhũ tơmã sigỡuq wỡq. 24Mơyah làiq pơnõq adơi sơai song kađòc kõh mưng phuỗt nữn mưng phuỗt akhà nhũ la kayơu ô-liu dlài, sì hũ pơtlãp tơmã kayơu ô-liu siàp sa kaya ngãq ôh iỡuq yơu phuỗt akhà nhũ, nữn mơnuĩh miẽt gãm la dơgrữq thàt ôh mưng phuỗt akhà krơi nhũ dih, vloh đang mang hũ pơtlãp tơmã wỡq dơlãp phuỗt kayơu ô-liu pơnõq nhũ hũ lũ rơlao thơu hadùp?

25Pa-thơu pơnõq adơi sơai, hlãq ôh ưng adơi sơai ôh thơu mưng kaya dơlãp dơđỡuq nĩ, pioh pơnõq adơi sơai ôh jãc rgơi tui yơu kaya sơnơng krơi drơi hũ. Kaya dơlãp dơđỡuq nữn la sa vơnah vual vơla Is-ra-el song khãc hatai, tãl trôh tũq katih vual vơla lơniãu va vuh tơmã wil tãl; 26sì yơu nữn, avih vual vơla Is-ra-el ròq hũ dõc pơ-tlah, yơu song wãq làiq:

“Pitao dõc suãq ròq trôh mưng Si-ôn.

Pitrai ròq suãq prah kaya ôh pãc tơviãq tlah mưng Ja-kôp.

27Sì nĩ ròq la kaya hẽ grưh Kơu sì pơnõq nhũ hũ,

dơlãp tũq Kơu ròq suãq va dơgrữq dlàiq dơnũh pơnõq nhũ hũ.”

28Pơweh mưng pơnuaĩq siàp, pơnõq nhũ la mơnuĩh jơdrãq kơyua mưng pơnõq adơi sơai. Nữn pơweh mưng kaya duỡt ruãh Yàc Pô Lơngĩq, nữn pơnõq nhũ hũ khiãng anĩt kơyua mưng dơgrữq ung kõq drơi. 29Kơyua dơgrữq kaya alĩn vrơi sì duỡt ruãh Yàc Pô Lơngĩq hũ ôh tũq halơi pa-sơdua. 30Kơyua yơu tũq halơu dih pơnõq adơi sơai song ôh ngãq tui Yàc Pô Lơngĩq, nữn nĩ vloh hũ anĩt duman kơyua mưng kaya ôh ngãq tui pơnõq nhũ hũ, 31nữn, dơgrữq mơnuĩh Ju-đa nĩ tũq nĩ kung ôh ngãq tui. Kaya hajũc hlàq la tũq nĩ pơnõq nhũ kung pơlih hũ anĩt duman gơnang mưng kaya khiãng duman song ràc tơviãq ga pơnõq adơi sơai. 32Kơyua Yàc Pô Lơngĩq song krỡq dơgrữq mơnuĩh dơlãp kaya ôh ngãq tui, pioh Pitrai ràc tơviãq kaya khiãng anĩt ga avih tãl aràc.

33Viãq, kaya jãc rgơi sì kaya pãc thơu Yàc Pô Lơngĩq hũ dơlãp dơđỡuq, mơda gơnãp thơu hadùp! Kaya chahrơna Pitrai hũ ôh mơnuĩh halơi duah jỡc, jơlàt ơthua Pitrai ôh mơnuĩh halơi thơu jỡc!

34Kơyua, “Mơnuĩh halơi song thơu kaya sơnơng Yàc?

Hẽla mơnuĩh halơi song ngãq jỡc mơnuĩh vơyai vruãq ga Pitrai?

35Hẽla mơnuĩh halơi song padỡc hagĩq ga Yàc Pô Lơngĩq hlơu,

pioh ga hũ Pitrai vơyiar wỡq?”

36Kơyua avih dơgrữq kaya la mưng Pitrai, kơyua mưng Pitrai, sì pơweh mưng Pitrai. Lakơu Pitrai hũ gơhluh gãm gãm. A-men.