Akhàt Tơviãq Pơnuaĩq Dơđỡuq 9

1Vloh mơnuĩh gơnrơh bãc lơmã ayùq gơdèt, nữn hlãq bôh sa voh pitỗq mưng dlòc lơngĩq song hõq trỗt pãq ala hlùq, sì anàq tlir anĩh thòc dơlãp ôh hũ tơkai song alĩn vrơi ga nhũ. 2Nhũ pơh lơvàc dơlãp ôh hũ tơkai tơviãq, nữn asãq mưng mơvah lơvàc nữn por tơgùq yơu asãq sa voh agòq apôi prõng, sì ia harơi sigỡuq sì yuà vluh khrãh lơwah kung ãt sồp kơnãm avih kơyua mưng asãq tơviãq mưng mơvah lơvàc nĩ. 3Vloh mưng asãq nữn, tơpuôl anàq katòc tơviãq vãq pãq dlòc voh hlùq, sì kaya prãn khãc hũ alĩn vrơi ga pơnõq nhũ drưh yơu prãn khãc dơgrữq pơjẽh anàq adiãc hũ pãq dlòc voh hlùq. 4Hũ pơnuaĩq đơp ga tơpuôl nhũ nữn la tơpuôl nhũ juơi ngãq pa-tơyãh rỡq kayơu pãq dlòc voh hlùq hẽla avih dơgrữq kaya hẽla kayơu patơu halơi, nữn mĩn ngãq savỡc ga anàq mơnuĩh, la dơgrữq mơnuĩh ôh hũ kaya nỡm Yàc Pô Lơngĩq pãq dlòc thơi nhũ. 5Vruãq hũ pơjao ga tơpuôl nhũ nữn la tơpuôl nhũ ôh pa-mơtai pơnõq nhũ, bôh làiq yơu nữn pơnõq nhũ ròq kađòc ngãq pơđìq pơđua dơlãp lơmã vlàt, sì kaya pơđìq pơđua pãq dlòc pơnõq nhũ drưh yơu kaya ngãq pơđìq pơđua mưng vĩh anàq adiãc tũq nhũ kẽq. 6Dơlãp dơgrữq harơi nữn, anàq mơnuĩh ròq duah kaya mơtai, nữn pơnõq nhũ viãq ròq ôh duah bôh nhũ, sì pơnõq nhũ ròq chơkhãq khiãng ưng mơtai, vloh kaya mơtai nữn ròq pleh atah di pơnõq nhũ. 7Dơgrữq tơpuôl anàq katòc nữn sẽq rùp drưh yơu bòq ơseh rơchãc pơkhrà pioh tơviãq nao mơsôh. Pãq dlòc akõq tơpuôl nhũ hũ kaya hagĩq nữn drưh yơu chrang màc mưng mữh, dòq bòq mơta tơpuôl nhũ nữn drưh yơu bòq mơta mơnuĩh. 8Tơpuôl nhũ hũ bồq drưh yơu bồq mơnuĩh kamơi, sì tagơi pơnõq nhũ nữn drưh yơu tagơi rơmoòng phũm. 9Tơpuôl nhũ chồq ao vơvãc dơda la yơu ao mưng pasơi, sì sãp yuà siãuq tơpuôl nhũ drưh yơu sãp dơgrữq rơdeh ơseh nao mơsôh, yơu lũ-lã ơseh ãn gơluh tơmã dơlãp kaya mơsôh. 10Tơpuôl nhũ hũ akô sì hũ vĩh kung drưh yơu anàq adiãc, sì kaya prãn tơpuôl nhũ dơlãp dơgrữq akô nhũ pioh ngãq savỡc ga anàq mơnuĩh dơlãp lơmã vlàt. 11Tơpuôl nhũ hũ pitao apãt akõq la kamlai satan pãq anĩh thòc dơlãp ôh hũ tơkai. Angãn nhũ dơlãp sãp đơp Hy-ba-lai la A-ba-đôn, dòq dơlãp sãp đơp Gơ-rec, nhũ hũ angãn la A-bô-ly-ôn.

12Kaya dleh dlàr bãc chơmrờp song nao gãt. Iãq dih, miẽt gãm dòq wỡq bãc dua kaya dleh dlàr ãn trôh hadơi dơgrữq vruãq nĩ.

13Vloh mơnuĩh gơnrơh bãc nãm ayùq gơdèt, sì hlãq hmỡq sa sãp đơp tơviãq mưng dơgrữq bẽq tơki ban duh talơvãt mưng mữh hũ dòq pãq anãq Yàc Pô Lơngĩq, 14akhàt ga mơnuĩh gơnrơh bãc nãm, la mơnuĩh ãn hũ bẽq gơdèt: “Iỡuq pơrlao pàq aràc mơnuĩh gơnrơh kađòc akãq pãq kròc prõng Ơ-phơ-rat tơviãq.” 15Yơu nữn la pàq aràc mơnuĩh gơnrơh, la dơgrữq mơnuĩh song rơchãc lơĩh tơmã dơlãp tũq jơ nữn, harơi nữn, vlàt nữn, thũt nữn, hũ pơrlao tơviãq tồq pioh ga pơnõq nhũ pơlih pa-mơtai sa vơnah tlơu anàq mơnuĩh dun kơyua. 16Katih mơnuĩh lĩng đìq ơseh la dua rơtôh tơlãc. Hlãq ròq hmỡq katih pơgòp tơpuôl nhũ hũ la yơu nữn. 17Sì dơlãp kaya pabôh nữn, hlãq ròq bôh tơpuôl ơseh gãm sì dơgrữq mơnuĩh đìq pãq dlòc nhũ yơu nĩ — pơnõq nhũ hũ ao pasơi vơvãc dơda phũrn chrĩc, sì ia la-ngơu lơngĩq, sigỡuq sì ia kanhìq yơu patơu kràc. Akõq dơgrữq anàq ơseh nĩ nữn drưh yơu akõq rơmoòng phũm, mưng mơvah tơpuôl nhũ ka-prôh tơviãq apôi, asãq sì sơdah patơu kràc. 18Sa vơnah tlơu pơjẽh anàq mơnuĩh dun kơyua kađòc pa-mơtai kơyua mưng tlơu kaya rũc rài nĩ, kơyua mưng apôi, asãq, sì sơdah patơu kràc kanhìq ka-prôh tơviãq mưng mơvah tơpuôl nhũ. 19Mưng kaya prãn khãc tơpuôl anàq ơseh la dòq pãq mơvah tơpuôl nhũ, sì anĩh mũl akô tơpuôl nhũ, kơyua akô tơpuôl nhũ drưh yơu ala hũ akõq, sì kơyua mưng nữn tơpuôl nhũ ngãq halôh dơgrẽh anàq mơnuĩh. 20Vơnah dòq wỡq anàq mơnuĩh dun kơyua, la dơgrữq mơnuĩh ka-ôh ãt pa-mơtai mưng dơgrữq kaya rũc rài nĩ, song ôh mơvai tlàq dlàiq mưng dơgrữq vruãq tơngãn drơi ngãq tồq ga pơnõq nhũ ròq ôh duh talơvãt kamlai satan sigỡuq sì dơgrữq rùp rãp mưng mữh, priãq, kơsuan, patơu, sì kayơu, la dơgrữq kaya ôh iãq bôh, hẽla pa hmỡq, hẽla lơvàq nao. 21Pơnõq nhũ kung ôh mơvai tlàq dlàiq mưng dơgrữq dlàiq pa-mơtai mơnuĩh, jũh proh, arĩh athãm, hẽla dlàiq tlẽq sơwah drơi hũ.