Akhàt Tơviãq Pơnuaĩq Dơđỡuq 8

1Dơlãp tũq Avo Anàq pơh tap-ban-kiq bãc tơjuh, hũ kaya suà lìt pãq dlòc lơngĩq pơgãp dơlãp mơtơh tũq jơ. 2Vloh hlãq bôh tơjuh aràc mơnuĩh gơnrơh, nữn pơnõq nhũ dòq dữc pãq anãq Yàc Pô Lơngĩq, sì tơjuh bẽq gơdèt hũ pơjao ga pơnõq nhũ.

3Sa aràc mơnuĩh gơnrơh tơmo trôh, apãt thồp mưng mữh, dòq dữc pãq ban duh talơvãt, sì kung lũ gơhlơu hũ alĩn vrơi ga mơnuĩh gơnrơh nữn pioh padỡc sigỡuq sì dơgrữq pơnuaĩq iơu la lakơu dơgrữq mơnuĩh gơnuar pơđar sơchih hũ pãq dlòc ban talơvãt mưng mữh pãq anĩh sơvan. 4Asãq gơhlơu, gãm sì pơnuaĩq iơu lakơu dơgrữq mơnuĩh gơnuar pơđar sơchih, mưng tơngãn mơnuĩh gơnrơh por tơgùq pãq anãq Yàc Pô Lơngĩq. 5Mơnuĩh gơnrơh mãq thồp gơhlơu, sì pa vuh vãq nhũ mưng apôi pãq ban duh talơvãt, vloh prah thồp nữn trỗt pãq ala hlùq, nữn hũ dơgrữq sãp grĩm sơđô, sãp grĩng grang, gơlia liãq, gãm sơđô mơgơi tơnãh.

6Vloh tơjuh aràc mơnuĩh gơnrơh hũ tơjuh bẽq gơdèt rơchãc lơĩh ga rùp phuỗt pơnõq nhũ pioh pơnõq nhũ pơlih ayùq.

7Mơnuĩh gơnrơh chơmrờp ayùq gơdèt, nữn hũ hajàt patơu sì apôi pa-mơlỗq sì dơrãh pa-trỗt pãq ala hlùq, vloh sa vơnah tlơu voh hlùq kađòc apôi bõc, sa vơnah tlơu kayơu patơu kađòc apôi bõc, sì gãm avih rỡq kayơu mơda kung kađòc apôi bõc.

8Mơnuĩh gơnrơh bãc dua ayùq gơdèt, nữn hũ sa voh hagĩq nữn drưh yơu voh chỡq prõng sơdah khũ dơlãp apôi kađòc prah trỗt pãq ia tơsìq, vloh sa vơnah tlơu ia tơsìq tơviãq jỡc dơrãh, 9sa vơnah tlơu dơgrữq anàq asỡq hũ kaya hadiuq pãq ala ia tơsìq kung mơtai avih, sì sa vơnah tlơu gơlài ahòq ia kađòc pa-lơhiãq.

10Vloh mơnuĩh gơnrơh bãc tlơu ayùq gơdèt, nữn hũ sa voh ia pitỗq viãq prõng, apôi bõc khũ yơu sanuh apôi mưng dlòc lơngĩq hõq trỗt, sì nhũ hõq trỗt pãq dlòc sa vơnah tlơu kròc ia sì chroh ia. 11Angãn ia pitỗq nữn hũ iơu angãn la Jrão Mãq Phìq. Sa vơnah tlơu dơgrữq chroh ia tơviãq jỡc mãq phìq, sì hũ lũ mơnuĩh mơtai kơyua mưng ia nĩ kơyua nhũ song tơviãq jỡc phìq.

12Vloh mơnuĩh gơnrơh bãc pàq ayùq gơdèt, nữn sa vơnah tlơu ia harơi kađòc poh atòc, sigỡuq sì sa vơnah tlơu ia vlàt sì sa vơnah tlơu katih ia pitỗq, nữn pioh sa vơnah tlơu katih pơnõq nhũ tơviãq jỡc sồp kơnãm, nữn dlài harơi gãm sì sa vơnah tlơu nhũ ôh hũ kaya sơdah, sì dlài mơlãp kung yơu nữn.

13Vloh hlãq iãq, sì hlãq hmỡq sa drơi chĩp klàc rơyàq ãn por pãq dlòc dòq di khrãh lơngĩq prong sãp iơu làiq: “Dleh dlàr, dleh dlàr, dleh dlàr ga dơgrữq mơnuĩh hadiuq pãq ala voh hlùq, tũq gãm dòq sãp gơdèt tlơu aràc mơnuĩh gơnrơh hũ jẽq ayùq.”