Roglai Bible Literal Text
Akhàt Tơviãq Pơnuaĩq Dơđỡuq 7
Hadơi vruãq nữn, hlãq bôh pàq aràc mơnuĩh gơnrơh dòq dữc pàq gah akiãc voh hlùq, apãt gơjãp pàq gah yuà angĩn hlùq hũ pioh ga angĩn ôh vluh tơmã pãq voh hlùq, hẽla pãq dlòc tơsìq, hẽla pãq bẽq kayơu halơi. Vloh hlãq bôh sa aràc mơnuĩh gơnrơh tơmo tơgùq nao mưng gah ia harơi tơgùq, ãn apãt kaya tap-ban-kiq Yàc Pô Lơngĩq gãm hadiuq. Mơnuĩh prõng sãp iơu pàq aràc mơnuĩh gơnrơh, la dơgrữq mơnuĩh nữn gơnuar hũ vrơi ga pơnõq nhũ pioh ngãq savỡc voh hlùq sì ia tơsìq, làiq: “Juơi ngãq savỡc voh hlùq, hẽla ia tơsìq, hẽla kayơu halơi, tãl trôh tũq pơnõq drơi song pơlih ngãq tap-ban-kiq dơgrữq halỗt mơnãq Yàc Pô Lơngĩq pơnõq drơi hũ pãq dlòc thơi pơnõq nhũ hũ.” Hlãq hmỡq katih mơnuĩh hũ ngãq tap-ban-kiq la sa rơtôh pàq plôh pàq rơvơu aràc, nữn la dơgrữq mơnuĩh hũ ngãq tap-ban-kiq mưng dơgrữq apõc pơtiàt anàq tơcho Is-ra-el:
mưng apõc pơtiàt Ju-đa, sa plôh dua rơvơu aràc song hũ ngãq tap-ban-kiq;
mưng apõc pơtiàt Ru-ben, sa plôh dua rơvơu;
mưng apõc pơtiàt Gat, sa plôh dua rơvơu;
mưng apõc pơtiàt A-se, sa plôh dua rơvơu;
mưng apõc pơtiàt Nep-ta-li, sa plôh dua rơvơu;
mưng apõc pơtiàt Ma-na-se, sa plôh dua rơvơu;
mưng apõc pơtiàt Si-me-ôn, sa plôh dua rơvơu;
mưng apõc pơtiàt Le-vi, sa plôh dua rơvơu;
mưng apõc pơtiàt Y-sa-ka, sa plôh dua rơvơu;
mưng apõc pơtiàt Sa-bu-lôn, sa plôh dua rơvơu;
mưng apõc pơtiàt Jô-sep, sa plôh dua rơvơu;
mưng apõc pơtiàt Ben-ja-min, sa plôh plôh rơvơu aràc song hũ ngãq tap-ban-kiq.
Hadơi dơgrữq vruãq nữn, hlãq iãq, sì dih, bôh sa tơpuôl mơnuĩh lũ-lã nữn ôh asơi pơlih karhia jỡc tơpuôl lũ nữn, trôh mưng dơgrữq lơgar, dơgrữq apõc pơtiàt, dơgrữq vual vơla sì dơgrữq ơkhar đơp, ãn dòq dữc pãq anãq sơvan sì pãq anãq Avo Anàq, tũq hũ chồq ao ơtah kòq, sì dơgrữq thàt kayơu aguãl la dơlãp tơngãn pơnõq nhũ, vloh pơnõq nhũ driãu prõng sãp, làiq:
“Kaya dõc pơ-tlah pơweh sì Yàc Pô Lơngĩq pơnõq drơi, Pitao ãn dòq guh pãq dlòc sơvan sì pơweh sì Avo Anàq!”
Yơu nữn la avih dơgrữq mơnuĩh gơnrơh ãn dòq dữc tòp dar sơvan sigỡuq sì dơgrữq pô tơha sì pàq drơi anàq asỡq kung vơviar rùp pãq anãq sơvan nữn duh talơvãt Yàc Pô Lơngĩq, nữn đơp làiq:
“A-men! Kaya sơ-uỗt mơyòp, kaya gơhluh, kaya jãc rgơi, kaya ỡn ngai, kaya ki ngãm, gơnuar chơnuãq, sigỡuq sì kaya prãn khãc kung pơweh sì Yàc Pô Lơngĩq pơnõq drơi tãl trôh gãm gãm, ôh luôĩq! A-men!”
Vloh sa aràc dơlãp dơgrữq mơnuĩh pô tơha hũ pơnuaĩq đơp sì hlãq, làiq: “Dơgrữq mơnuĩh hũ chồq ao ơtah kòq dih — pơnõq nhũ la asơi, nữn pơnõq nhũ mưng halơi trôh?” Hlãq đơp sì ung: “Ơ yàc hlãq, Pitrai song thơu.” Vloh, ung nữn đơp sì hlãq: “Nĩ la dơgrữq mơnuĩh song trôh mưng Kaya Rũc Rài Prõng, pơnõq nhũ song voh ao ơtah drơi, sì ngãq ga ao pơnõq nhũ jỡc kòq dơlãp dơrãh Avo Anàq.
Kơyua mưng kanõh gơtha nĩ, pơnõq nhũ hũ dòq pãq anãq sơvan Yàc Pô Lơngĩq,
mơlãp harơi duh talơvãt Pitrai dơlãp sàc talơvãt Pitrai.
Sì Pitao dòq guh pãq dlòc sơvan ròq ngãq padỡc tlam dòq pãq dlòc pơnõq nhũ.
Pơnõq nhũ ròq ôh dòq lơpa tơra, kung ôh dòq mơhao ia tơra,
ia harơi hẽla avih dơgrữq yuà tluỡiq gơhual halơi,
ròq ôh tũq halơi chôh gơhual pơnõq nhũ,
kơyua Avo Anàq, Pitao dòq pãq khrãh sơvan, ròq dlãc-va pơnõq nhũ,
Pitrai ròq dui-va pơnõq nhũ trôh chroh ia kaya hadiuq,
sì Yàc Pô Lơngĩq ròq uãq avih ia mơta hõq tlah mưng mơta pơnõq nhũ.”
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.