Akhàt Tơviãq Pơnuaĩq Dơđỡuq 6

1Vloh hlãq tơlàq iãq tũq Avo Anàq pơh sa voh nỡm dơlãp tơjuh nỡm tap-ban-kiq krỡq, sì hlãq hmỡq sa drơi dơlãp pàq drơi anàq asỡq đơp yơu sãp yuà grĩm, làiq: “Iỡuq trôh!” 2Yơu nữn, hlãq iãq sì bôh dih, sa drơi ơseh kòq làiq! Mơnuĩh đìq pãq dlòc ơseh nữn hũ iàq sa bẽq srãuq brãp, sì sa chrang mữh hũ alĩn vrơi ga nhũ, vloh mơnuĩh nữn tơviãq nao ngãq mơvlah pioh pha rlao.

3Tũq Avo Anàq pơh tap-ban-kiq bãc dua, hlãq hmỡq anàq asỡq bãc dua đơp: “Iỡuq trôh vẽq!” 4Yơu nữn la sa drơi ơseh tơmo pabôh tơviãq — ia phũrn yơu apôi. Pơweh sì mơnuĩh đìq pãq dlòc ơseh nĩ nữn hũ alĩn vrơi ga drơi gơnuar suãq kaya dadu lơngai pãq ala tơnãh, pioh anàq mơnuĩh pa-mơtai gỡuq, sì hũ sa bẽq đao prõng viãq song hũ vrơi ga mơnuĩh nữn.

5Tũq Avo Anàq pơh tap-ban-kiq bãc tlơu, hlãq hmỡq anàq asỡq bãc tlơu đơp: “Iỡuq trôh!” Yơu nữn la hlãq iãq bôh dih, sa drơi ơseh jùq, sì mơnuĩh đìq pãq dlòc ơseh nĩ hũ sa voh wal iàq dơlãp tơngãn nhũ. 6Vloh hlãq hmỡq yơu hũ sãp dòq pãq khrãh pàq drơi anàq asỡq, làiq: “Sa wal jàq vơdai mi sì sa đơ-ni-e; tlơu wal jàq vơdai mi sì sa đơ-ni-e. Sì juơi ngãq pròc preh mơnhàq sì alãc.”

7Tũq Avo Anàq pơh tap-ban-kiq bãc pàq, hlãq hmỡq sãp anàq asỡq bãc pàq đơp: “Iỡuq trôh vẽq!” 8Yơu nữn la hlãq iãq sì dih bôh, sa drơi ơseh la-ngơu sơrãc yơu hlàq kayơu. Mơnuĩh đìq pãq dlòc ơseh nĩ angãn nhũ la “Kaya Mơtai”, sì hũ tơnãh ala tui hadơi nhũ. Pơnõq nhũ hũ gơnuar pãq dlòc sa vơnah pàq hũ vrơi ga pơnõq nhũ, pioh pa-mơtai mưng đao thõc, ờq lơpa, ruãq sơkìq sì mưng dơgrữq anàq asỡq kaĩh mơsãc pãq dlòc voh hlùq.

9Tũq Avo Anàq pơh tap-ban-kiq bãc lơmã, hlãq bôh pãq ala ban duh talơvãt vơngãq yuà dơgrữq mơnuĩh song kađòc pa-mơtai kơyua mưng pơnuaĩq Yàc Pô Lơngĩq hũ sì kơyua mưng pơnuaĩq ngãq chưng nữn pơnõq nhũ ròq hũ rơmiãq. 10Pơnõq nhũ sa hatai sigỡuq driãu prõng sãp, làiq: “Talơvãt Pitao Gơnuar Apãt Akõq, Pitao sơđah sơchih sì tơpãq viãq, tãl trôh tũq halơi nữn Pitrai ròq miẽt ka-ôh chahrơna sì yơr đồq tơngãn ga dơrãh pơnõq hlãq hũ mưng dơgrữq mơnuĩh dòq hadiuq pãq dlòc voh hlùq nĩ?” 11Vloh dơgrữq tãl aràc dơlãp pơnõq nhũ hũ alĩn vrơi sa vlah ao ơtah kòq, sì pơnõq nhũ hũ đơp làiq pơnõq nhũ mĩn dòq chơkhãq chàc sa asĩt tơra tãl trôh tũq hũ tãl katih dơgrữq ban mơyơu pơnõq nhũ gãm sì adơi sơai pơnõq nhũ, la dơgrữq mơnuĩh jẽq kađòc pa-mơtai kung drưh yơu pơnõq nhũ.

12Tũq Avo Anàq pơh tap-ban-kiq bãc nãm, hlãq tlàq iãq pơwih, sì hũ sa kaya sơđô mơgơi tơnãh prõng viãq, vloh ia harơi tơviãq jỡc sồp kơnãm yơu ao pơcha mưng vlơu, dòq dơgrữq ia vlàt nữn tơviãq jỡc drưh yơu dơrãh, 13sì dơgrữq ia pitỗq pãq dlòc lơngĩq jruh hõq pãq voh hlùq, drưh yơu kayơu vãl jruh voh mơtãh tũq kađòc rơvùq prõng rơyũh mơgơi. 14Tãl lơngĩq lơhiãq thĩt yơu sa pỗc sơrãq kađòc vlìq wỡq, sì dơgrữq tabồq chỡq sigỡuq sì pỗc pơlao kung kađòc pađuỡt va tlah mưng anĩh pơnõq nhũ hũ. 15Vloh dơgrữq pitao pãq dlòc voh hlùq, sigỡuq sì dơgrữq pô apãt akõq, dơgrữq mơnuĩh apãt akõq prõng, mơnuĩh mơda gơnãp, mơnuĩh hũ gơnuar chơnuãq, sì dơgrữq mơnuĩh halỗt mơnãq gãm sigỡuq sì mơnuĩh lơnang lơnai, kung padỡuq dơđỡuq rùp drơi dơlãp gùq lơvàc sì pãq khrãh dơgrữq anĩh kàq patơu tali prõng pãq dlòc dơgrữq tabồq chỡq; 16pơnõq nhũ đơp sì dơgrữq tabồq chỡq sì dơgrữq anĩh kàq patơu tali: “Iỡuq jơlưh trỗt pãq dlòc pơnõq hlãq sì padỡuq dơđỡuq pơnõq hlãq tlah mưng Pitao dòq guh pãq dlòc sơvan sì tlah mưng kaya ơnõc mơvai Avo Anàq hũ, 17kơyua harơi ơnõc mơvai prõng dơgrữq Pitao nữn hũ song trôh, nữn asơi pơlih ãt jỡc lơĩh?”