Akhàt Tơviãq Pơnuaĩq Dơđỡuq 5

1Vloh hlãq bôh dơlãp tơngãn hơnuãq Pitao dòq guh pãq dlòc sơvan sa pỗc sơrãq song hũ wãq gah dơlãp gãm sì gah lơniãu, hũ krỡq sier kơyua mưng tơjuh nỡm krỡq tap-ban-kiq. 2Hlãq kung bôh sa aràc mơnuĩh gơnrơh prãn khãc prõng sãp akhàt vrơi pa-thơu: “Asơi đang mang pơh pỗc sơrãq sì tơleh dơgrữq nỡm krỡq tap-ban-kiq nhũ hũ?” 3Ôh hũ asơi pãq dlòc lơngĩq hẽla pãq ala hlùq hẽla gah ala hlùq pơlih pơh pỗc sơrãq hẽla iãq mững nhũ. 4Nữn la hlãq sia tơviãq jỡc sãp kơyua ôh asơi duah iãq pơwih bôh la đang mang pioh pơh pỗc sơrãq hẽla pơpoh nhũ. 5Vloh nữn sa aràc dơlãp tơpuôl pô tơha đơp sì hlãq: “Juơi sia. Iãq dih! Rơmoòng Phũm, Pitao tơviãq mưng apõc pơtiàt Ju-đa, Phuỗt Akhà Đa-vit hũ, Pitrai song pha rlao pioh pơh pỗc sơrãq sigỡuq sì tơjuh nỡm krỡq tap-ban-kiq nhũ hũ.” 6Sì dòq pãq khrãh sơvan sigỡuq sì pàq drơi anàq asỡq, sì dòq di khrãh dơgrữq pô tơha, hlãq bôh Avo Anàq ãn dòq dữc, yơu song kađòc pa-mơtai, hũ tơjuh bẽq tơki sì tơjuh anàq mơta, nữn la tơjuh vơngãq Yàc Pô Lơngĩq hũ pơđar nao trôh vãq avih dơgrữq anĩh pãq voh hlùq. 7Pitrai trôh sì tồq mãq pỗc sơrãq mưng tơngãn hơnuãq Pitao dòq guh pãq dlòc sơvan hũ. 8Tũq Pitrai song tồq mãq pỗc sơrãq, pàq drơi anàq asỡq sì dua plôh pàq aràc pô tơha pơviar rùp trỗt pãq anãq Avo Anàq, dơgrữq tãl aràc hũ sa bẽq tơpĩng kathũr sì sa voh chơwàt mưng mữh vuh vãq gơhlơu, nữn la dơgrữq pơnuaĩq iơu lakơu mơnuĩh gơnuar pơđar sơđah hũ. 9Pơnõq nhũ adoh sa rơgãm adoh vơhrơu, làiq:

“Pitrai đang mang tồq mãq pỗc sơrãq

sì pơh dơgrữq nỡm krỡq tap-ban-kiq nhũ hũ,

kơyua Pitrai song kađòc pa-mơtai sì kơyua mưng dơrãh drơi, Pitrai vlơi dơvuh sơlih ga Yàc Pô Lơngĩq

dơgrữq mơnuĩh pơweh dơgrữq apõc pơtiàt, sãp đơp, dơgrữq vual vơla sì dơgrữq lơgar.

10Pitrai song ngãq ga pơnõq nhũ tơviãq jỡc sa palơi lơgar sì dơgrữq mơnuĩh gơnuar pioh kaya duh talơvãt ga Yàc Pô Lơngĩq pơnõq drơi,

sì pơnõq nhũ ròq apãt akõq pãq dlòc voh hlùq.”

11Vloh hlãq iãq mững sì hmỡq sãp lũ mơnuĩh gơnrơh hũ dòq wĩt dar sơvan sigỡuq sì dơgrữq drơi anàq asỡq sì dơgrữq pô tơha, sì katih pơtõm pơgòp pơnõq nhũ hũ la rơvơu tơlãc tamỡn, 12sa hatai sigỡuq đơp prõng:

“Avo Anàq song kađòc pa-mơtai, viãq la đang mang pioh tồq mãq gơnuar chơnuãq, mơda gơnãp, kaya jãc rgơi, prãn khãc, ki ngãm, kaya gơhluh, sigỡuq sì kaya sơ-uỗt mơyòp.”

13Vloh hlãq hmỡq dơgrữq kaya chrơng pajỡc pãq dlòc lơngĩq, pãq ala hlùq, gah ala voh hlùq, pãq dlòc ia tơsìq, sì dơgrữq kaya dơlãp pơnõq nhũ, đơp làiq:

“Lakơu ga Pitao dòq guh pãq dlòc sơvan sigỡuq sì Avo Anàq hũ sơ-uỗt mơyòp, ki ngãm, kaya gơhluh, sì gơnuar apãt akõq tãl trôh gãm gãm, ôh luôĩq.”

14Pàq drơi anàq asỡq đơp: “A-men!” dòq dơgrữq pô tơha pơviar rùp trỗt sì duh talơvãt.