Akhàt Tơviãq Pơnuaĩq Dơđỡuq 4

1Hadơi dơgrữq vruãq nữn, hlãq iãq mưng sì bôh, dih hũ sa voh bãc pơh tơviãq pãq dlòc lơngĩq, vloh hũ sãp bãc sa nữn hlãq song hmỡq đơp sì hlãq yơu sãp gơdèt, đơp làiq: “Iỡuq tơgùq pãq đĩ, vloh Kơu ròq pơto ga anàq bôh dơgrữq vruãq iỡuq tơviãq trôh hadơi dơgrữq vruãq nĩ.” 2Mư tũq nữn, hlãq dòq dơlãp Yàc Vơngãq Sơđah, sì iãq dih, hũ sa anĩh sơvan chẽq pãq dlòc lơngĩq! Sì hũ sa Pitao ãn dòq guh pãq dlòc sơvan. 3Pitao dòq guh pãq dlòc sơvan iãq mơkrờ drưh yơu patơu kràc sơdah sì patơu màc phũrn, kung hũ jơgro wĩt dar sơvan iãq mơkrờ drưh yơu patơu màc la-ngơu hlàq kayơu. 4Wĩt dar sơvan hũ dua plôh pàq voh sơvan, sì dòq guh pãq dlòc sơvan la dua plôh pàq aràc mơnuĩh pô tơha chồq ao ơtah kòq, sì tơruãq chrang mưng mữh pãq dlòc akõq pơnõq nhũ. 5Mưng sơvan pa-tơviãq dơgrữq gơlia liãq, sãp grĩng grang, sigỡuq sì sãp grĩm. Tơjuh bẽq đeng mưng apôi ãn khũ pãq anãq sơvan, nữn la tơjuh vơngãq Yàc Pô Lơngĩq hũ. 6Pãq anãq sơvan drưh yơu sa pỗc tơsìq chai sơdah, yơu chai kràc, dòq di khrãh sơvan sì wĩt dar sơvan la pàq drơi anàq asỡq, dơgrữq anàq mơta nhũ dòq vãq, gah halơu gãm sì gah hadơi. 7Anàq asỡq bãc chơmrờp drưh yơu rơmoòng phũm, anàq asỡq bãc dua drưh yơu lơmo anàq, anàq asỡq bãc tlơu hũ bòq mơta yơu bòq mơta mơnuĩh, sì anàq asỡq bãc pàq drưh yơu chĩp klàc rơyàq ãn por. 8Pàq drơi anàq asỡq, dơgrữq drơi dơlãp katih tơpuôl nhũ patui gỡuq hũ nãm gah siãuq wĩt dar rùp nhũ, gah dơlãp hũ vãq dơgrữq anàq mơta, harơi gãm sì mơlãp, pơnõq nhũ ôh hũ kaya padơi padưh dơlãp tũq đơp làiq:

“Sơđah blãc, sơđah blãc, sơđah blãc la Yàc, Yàc Pô Lơngĩq Gơnuar Chơnuãq,

Pitao song hũ, tũq nĩ hũ sì ãn trôh.”

9Mơyah làiq tũq halơi dơgrữq drơi anàq asỡq padỡc kaya gơhluh, kaya ki ngãm, sì pơnuaĩq ỡn ngai ga Pitao dòq guh pãq dlòc sơvan, nữn la Pitao hadiuq tãl trôh gãm gãm, ôh luôĩq, 10nữn dua plôh pàq aràc mơnuĩh pô tơha ròq pơviar rùp duh vruãq pãq anãq Pitao dòq guh pãq dlòc sơvan, sì duh talơvãt Pitao hadiuq tãl trôh gãm gãm, ôh luôĩq, sì pơnõq nhũ chẽq chrang mữh drơi trỗt pãq anãq sơvan, sì đơp làiq:

11“Talơvãt Yàc sì Yàc Pô Lơngĩq pơnõq hlãq,

Pitrai viãq đang mang tồq mãq kaya gơhluh, kaya ki ngãm, sì gơnuar chơnuãq,

kơyua Pitrai chrơng pajỡc dơgrữq kaya;

kơyua mưng hatai ưng Pitrai nữn pơnõq nhũ dòq wỡq sì hũ chrơng pajỡc.”