Roglai Bible Literal Text
Akhàt Tơviãq Pơnuaĩq Dơđỡuq 10
Patui nữn, hlãq bôh sa aràc mơnuĩh gơnrơh prãn khãc krơi tơmo mưng dlòc lơngĩq trỗt, nhũ pa-chồq tơmã rùp nhũ dơlãp sa pỗc huãl, gãm sì jơgro chõc pãq dlòc akõq nhũ, bòq mơta mơnuĩh gơnrơh nữn drưh yơu ia harơi, tơkai nhũ nữn drưh yơu gỡc apôi, sì ãn apãt dơlãp tơngãn nhũ sa pỗc sơrãq tìt song pơh tơviãq. Mơnuĩh gơnrơh nữn chẽq tơkai hơnuãq nhũ pãq dlòc ia tơsìq, dòq tơkai iãu nữn dòq pãq dlòc hlùq, vloh nhũ driãu tơgùq sa sãp prõng drưh yơu rơmoòng phũm nhũ gơhũm. Dơlãp tũq mơnuĩh gơnrơh nữn driãu prõng, nữn tơjuh sãp grĩm sỡm wàc tơgùq gãm sì dơgrữq sãp đơp tơpuôl nhũ hũ. Dơlãp tũq tơjuh sãp grĩm pơh sãp tơviãq, hlãq sơga wãq luơi, nữn hlãq hmỡq sa sãp mưng dlòc lơngĩq, đơp: “Iỡuq krỡq tap-ban-kiq dơgrữq kaya hagĩq tơjuh sãp grĩm song đơp, nữn juơi wãq nhũ luơi.” Vloh mơnuĩh gơnrơh, nữn hlãq bôh dòq dữc chẽq tơkai pãq dlòc ia tơsìq sì pãq dlòc hlùq yơr tơngãn hơnuãq nhũ tơgùq pãq dlòc lơngĩq sì nhũ mãq angãn Pitao hadiuq tãl trôh gãm gãm, ôh luôĩq, la Pitao song chrơng pajỡc lơngĩq sigỡuq sì dơgrữq kaya pãq dlòc lơngĩq, voh hlùq sigỡuq sì dơgrữq kaya pãq dlòc hlùq, sì ia tơsìq sigỡuq sì dơgrữq kaya dơlãp ia tơsìq, làiq: “Ròq ôh dòq tũq jơ halơi wỡq tơra. Nữn dơlãp dơgrữq harơi hũ sãp mơnuĩh gơnrơh bãc tơjuh, tũq mơnuĩh nữn jẽq ayùq gơdèt, nữn kaya dơlãp dơđỡuq Yàc Pô Lơngĩq hũ ròq jỡc wil tãl, drưh yơu Pitrai song akhàt vrơi pa-thơu pơnuaĩq siàp nữn ga halỗt mơnãq Pitrai la dơgrữq mơnuĩh gơnuar hwơr.” Vloh sãp nữn hlãq hmỡq mưng lơngĩq vloh đơp wỡq sì hlãq, làiq: “Iỡuq nao, mãq pỗc sơrãq ãn pơh tơviãq dơlãp tơngãn mơnuĩh gơnrơh ãn dòq dữc pãq dlòc ia tơsìq sì pãq dlòc voh hlùq nữn.” Yơu nữn la hlãq nao trôh sì mơnuĩh gơnrơh nữn, đơp sì mơnuĩh nữn pơđar nhũ vrơi ga drơi pỗc sơrãq tìt. Mơnuĩh gơnrơh nữn đơp sì hlãq: “Iỡuq tồq mãq sì bõc nhũ vẽq, vloh nhũ ròq ngãq ga tũc sơai kađòc phìq, nữn dơlãp mơvah sơai, nhũ ròq jơmãn yơu ia chalơko.” Yơu nữn, hlãq mãq pỗc sơrãq tìt dơlãp tơngãn mơnuĩh gơnrơh sì bõc nhũ, nữn nhũ dòq dơlãp mơvah hlãq jơmãn yơu ia chalơko, nữn tũq hlãq song bõc nhũ, tũc hlãq ãt phìq. Vloh hũ lũ sãp đơp sì hlãq: “Sơai iỡuq đơp hwơr wỡq mưng lũ vual vơla, lũ lơgar, dơgrữq pơnuaĩq ơkhar, sì lũ pitao.”
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.