Phi-le-môn 1

1Pol, mơnuĩh kađòc krỡq jam Yàc Dõc Pơ-tlah Je-su hũ, sì mơnuĩh adơi sơai Ti-mô-the pơyua ga Phi-le-môn, ban mơyơu kung la ban mơyơu ngãq vruãq sigỡuq pơnõq hlãq hũ; 2pơyua ga Ap-bia la adơi sơai kamơi pơnõq hlãq hũ, pơyua ga A-chip, ban mơyơu mơsôh sigỡuq pơnõq hlãq hũ, sì pơyua ga sàc pơjũm sơđah pơjũm pơtõm pãq sàc anĩh sơai hũ. 3Lakơu kaya anĩt sì kaya dadu lơngai alĩn vrơi ga pơnõq adơi sơai mưng Yàc Pô Lơngĩq, Ama pơnõq drơi hũ, sì Yàc Dõc Pơ-tlah Je-su pơnõq drơi hũ.

4Hlãq gãm ỡn ngai Yàc Pô Lơngĩq hlãq hũ, hlãq kung angãn trôh sơai dơlãp pơnuaĩq iơu lakơu hlãq hũ, 5kơyua hlãq song hmỡq mưng kaya khiãng duman sơai hũ sigỡuq sì voh tui nữn sơai hũ dơlãp Yàc Je-su, pơweh sì avih dơgrữq mơnuĩh pãc-tui yàc, 6pioh yơu nữn kaya pa-mơpha voh tui sơai hũ pơlih tơviãq jỡc prãn khãc dơlãp kaya kơnãl thơu mưng dơgrữq kaya siàp mơkrờ dơlãp Yàc Dõc Pơ-tlah dòq di khrãh pơnõq drơi. 7Ơ mơnuĩh adơi sơai, hlãq hũ lũ viãq kaya uỗt sơh sì kaya paluơ padờp kơyua mưng kaya khiãng duman sơai hũ, kơyua lơ-ôh hatai dơgrữq mơnuĩh gơnuar pơđar sơđah hũ song gơnang mưng sơai nữn song hũ siàp vơhrơu.

8Kơyua yơu nữn, bôh làiq hlãq hũ avih dơgrữq kaya chãc khĩn dơlãp Yàc Dõc Pơ-tlah pioh vrơi gơnuar ga sơai ngãq kaya sơai iỡuq ngãq, 9nữn kơyua kaya khiãng duman, halãq hũ sa pơnuaĩq rãn lakơu — dơlãp tũq sa aràc mơnuĩh yơu hlãq, Pol nĩ, song tơhã vloh, nữn tũq nĩ kung la mơnuĩh kađòc krỡq jam kơyua mưng Yàc Dõc Pơ-tlah Je-su — 10Hlãq lakơu ung ala mơta ga anàq hlãq hũ, la anàq nữn hlãq song pajỡc tơviãq dơlãp kaya kađòc krỡq jam hlãq hũ, la Ô-ne-sim. 11Halơu thrơi, nhũ nữn kung ôh hũ kuơ hagĩq ga sơai, nữn tũq nĩ nhũ nữn hũ kuơ gãm ga sơai sì hlãq, 12nữn la mơnuĩh hlãq song pơđar nao pãp sơai — viãq la nhũ nữn — rùp phuỗt nhũ la mưng tũc hatai hlãq hũ. 13Hlãq chơkhãq khiãng pơđar nhũ dòq wỡq sì drơi, pioh nhũ pơlih ala mơta sơai duh vruãq ga hlãq dơlãp tũq hlãq ãt krỡq jam kơyua mưng Pơnuaĩq Siàp. 14Bôh làiq yơu nữn, hlãq ôh ưng ngãq kaya halơi nữn ôh hũ kaya tui siàp yơu hatai sơai, pioh vruãq siàp sơai hũ ôh iỡuq drưh yơu la kơyua mưng kaya pơgùq pơ-èp, nữn kơyua mưng hatai ưng ngãq. 15Pơlih kơyua mưng kanõh gơtha nĩ, nữn nhũ kađòc pa-chơlah sì sơai dơlãp sa tũq lơwah, la pioh ga sơai pơlih tồq mãq wỡq nhũ nữn gãm gãm, 16ôh dòq yơu mơnuĩh ngãq halỗt tơra, nữn prong màc rlao sa aràc mơnuĩh ngãq halỗt — la sa aràc mơnuĩh adơi sơai anĩt anar, halơu viãq pơweh sì hlãq, nữn vloh brõq rlao wỡq pơweh sì sơai, gãm dơlãp rơlo rùp sì gãm dơlãp Yàc. 17Kơyua nữn, mơyah làiq sơai mững hlãq la sa aràc mơnuĩh ngãq vruãq sigỡuq, iỡuq tồq ròq nhũ yơu tồq ròq hlãq yơu nữn. 18Dòq mơyah làiq nhũ song ngãq hagĩq suẽl sì sơai hẽla srẽ sơai avih dơgrữq kaya hagĩq, mĩn karhia kaya nữn ga hlãq. 19Hlãq, Pol, mưng tơngãn hlãq song wãq pơnuaĩq nĩ: Hlãq nĩ ròq pơyar wỡq — nữn hlãq ôh-ka đơp trôh sơai làiq vruãq rùp phuỗt sơai gãm dòq srẽ hlãq! 20Viãq, ơ mơnuĩh adơi sơai, chơkhãq khiãng hlãq hũ tồq mãq kaya uỗt sơh nĩ mưng sơai dơlãp Yàc; lakơu sơai ngãq ga siàp vơhrơu tũc hatai hlãq hũ dơlãp Yàc Dõc Pơ-tlah.

21Kơyua hlãq gơnang dơlãp kaya pãc sãp sơai hũ, yơu nữn hlãq song wãq sơrãq pơyua nĩ ga sơai, hlãq thơu làiq sơai ròq ngãq tơviãq vloh dòq rlao avih kaya hlãq ãn lakơu. 22Kung yơu nữn, hlãq kung lakơu rơchãc lơĩh sa anĩh padơi dleh ga hlãq, kơyua hlãq chơkhãq chàc làiq gơnang mưng pơnuaĩq iơu lakơu pơnõq adơi sơai hũ, hlãq ròq hũ pơrlao tơviãq pioh nao wỡq pãp pơnõq adơi sơai.

23E-phap-ra, mơnuĩh kađòc krỡq jam sigỡuq sì hlãq dơlãp Yàc Dõc Pơ-tlah Je-su, tơnĩa rơwãc sơai. 24Mak, A-ri-tac, Đe-ma, sì Lu-ka la dơgrữq ban mơyơu ngãq vruãq sigỡuq sì hlãq hũ, kung tơnĩa rơwãc sơai.

25Lakơu kaya anĩt Yàc pơnõq drơi hũ, la Yàc Dõc Pơ-tlah Je-su dòq sigỡuq sì vơngãq hatai pơnõq adơi sơai. A-men!