He-bơ-rơ 1

1Mưng rài sơđãq, Yàc Pô Lơngĩq song lũ bãc lũ tũq đơp sì dơgrữq ung kõq pơnõq drơi mưng dơgrữq mơnuĩh gơnuar hwơr, 2nữn dơlãp tũq harơi luôĩq hadơi nĩ, Yàc Pô Lơngĩq đơp sì pơnõq drơi mưng Anàq Pitrai, la Pitao nữn Pitrai song padỡc ngãq Mơnuĩh apãt akõq dơgrữq kaya, sì kung mưng Pitao nữn, Pitrai song chrơng pajỡc lơngĩq tơnãh; 3Anàq nữn la kaya sơdah blãc kaya gơhluh sì kaya sẽq vơlai mưng rùp phuỗt Pitrai hũ, patui nữn kung apãt iãq dơgrữq kaya mưng pơnuaĩq gơnuar chơnuãq Pitrai hũ, vloh hadơi sì tũq ngãq kaya rao sơchih dlàiq dơnũh, Anàq nữn dòq guh gah hơnuãq Pitao Mơ-àc Mơyàc dòq pãq dlòc dloòng; 4kơyua hũ tơviãq jỡc mơ-àc mơyàc tơpa rlao avih dơgrữq mơnuĩh gơnrơh, Anàq song hũ tồq mãq angãn Pitrai dlòc dloòng prõc màc tơpa rlao avih angãn dơgrữq mơnuĩh gơnrơh nữn. 5Kơyua Yàc Pô Lơngĩq hũ tũq đơp lơĩq sì mơnuĩh gơnrơh làiq:

“Anàq la anàq Kơu.

Harơi nĩ Kơu song pajỡc Anàq”?

Hẽla đơp:

“Kơu ròq la Ama Anàq,

sì Anàq ròq la Anàq Kơu”?

6Nữn dòq rlao nữn wỡq, tũq Yàc Pô Lơngĩq va Anàq Kơchoa tơmã dơlãp dun kơyua, Pitrai đơp làiq: “Avih dơgrữq mơnuĩh gơnrơh Yàc Pô Lơngĩq hũ iỡuq duh talơvãt Anàq nữn.” 7Pơweh sì dơgrữq mơnuĩh gơnrơh, Pitrai đơp:

“Pitao ngãq dơgrữq mơnuĩh gơnrơh drơi tơviãq jỡc yuà angĩn,

sì dơgrữq mơnuĩh halỗt drơi tơviãq jỡc dơlah apôi.”

8Dòq pơweh sì Anàq nữn, Pitrai đơp:

“Ơ Yàc Pô Lơngĩq, sơvan Pitrai dòq tãl trôh gãm gãm ôh luôĩq,

sì gơnuar chơnuãq pơnuaĩq tơpãq dãng la gơnuar chơnuãq palơi lơgar Pitrai hũ.

9Pitrai song khiãng duman kaya tơpãq dãng sì mơvai kaya iãh mơsãc.

Kơyua yơu nữn, Yàc Pô Lơngĩq, nữn la Yàc Pô Lơngĩq Pitrai hũ,

song pavuh ga Pitrai mơnhàq kaya sơh sơr lũ rlao dơgrữq ban mơyơu Pitrai.”

10Sì “Talơvãt Yàc, tũq chơmrờp, Pitrai chẽq rơnỡq voh hlùq,

sì dơgrữq tãl lơngĩq la dơgrữq vruãq ngãq mưng tơngãn Pitrai hũ.

11Pơnõq nhũ ròq lơhiãq thĩt, nữn Pitrai dòq gãm gãm,

avih dơgrữq kaya nhũ ròq jỡc tlãq lơhiãq yơu vlah ao ơtah,

12sì yơu vlah ao chồq lơniãu, Pitrai ròq pagũl nhũ wỡq,

yơu ao lơniãu, nhũ ròq pa-sơdua tơviãq,

nữn Pitrai mĩn dòq gãm,

sì dơgrữq thũt Pitrai hũ ròq ôh luôĩq.”

13Yơu nữn, Pitrai ôh tũq halơi đơp sì dơgrữq mơnuĩh gơnrơh làiq:

“Iỡuq dòq guh gah hơnuãq Kơu

tãl trôh tũq halơi Kơu ngãq ga dơgrữq mơnuĩh sòq jơdrãq sì Anàq jỡc kaya kơđãl plàq tơkai ga Anàq”?

14Ôh iỡuq la avih dơgrữq mơnuĩh gơnrơh nữn la dơgrữq vơngãq duh vruãq, sì hũ pơđar nao pioh iãq jàc dơgrữq mơnuĩh ròq hũ tồq mãq kaya dõc pơ-tlah yơh?