He-bơ-rơ 2

1Kơyua yơu nữn, pơnõq drơi iỡuq iãq gơnĩt rlao wỡq mưng kaya drơi song hmỡq, huaĩq pơnõq drơi kađòc sỡq lơhiãq thĩt yơh. 2Kơyua mơyah làiq pơnuaĩq siàp mưng dơgrữq mơnuĩh gơnrơh akhàt tơviãq song tơviãq jỡc la la kaya iỡuq viãq, sì tãl dơgrữq kaya sỗq dlàiq gãm sì kaya ôh ngãq tui iỡuq ãt kaya ngãq dlàiq savĩq đang mang, 3nữn yơu halơi pơnõq drơi ròq tlah jỡc mơyah làiq pơnõq drơi tlàq luơi kaya dõc pơ-tlah prõc yơu nữn? Nữn kaya dõc pơ-tlah nữn, hadơi sì tũq pơdòq gơnang mưng Yàc akhàt vrơi pa-thơu hlơu avih, nữn hũ ngãq chưng ga pơnõq drơi kơyua mưng dơgrữq mơnuĩh song hmỡq; 4kơyua Yàc Pô Lơngĩq kung ngãq chưng ga pơnuaĩq siàp mưng dơgrữq nỡm krơi, kaya chrih làq, gãm sì dơgrữq vruãq gơnuar chơnuãq krơi di gỡuq, sì dơgrữq kaya anĩt Yàc Vơngãq Sơđah hũ pa-mơpha vrơi tui hatai ưng Pitrai.

5Kơyua ôh iỡuq Yàc Pô Lơngĩq mãq dun kơyua hadơi nĩ pioh ga mơnuĩh gơnrơh, la dun kơyua nữn pơnõq drơi ãn đơp trôh. 6Vơnah tơmo, hũ mơnuĩh song ngãq chưng, làiq:

“Anàq mơnuĩh la hagĩq, nữn Pitrai sơdor trôh mưng pơnõq nhũ?

Hẽla pơjẽh anàq mơnuĩh la hagĩq, nữn Pitrai iãq jàc pơnõq nhũ?

7Pitrai ngãq ga pơnõq nhũ dòq gah ala dơgrữq mơnuĩh gơnrơh sa asĩt;

Pitrai pa-tơruãq ga pơnõq nhũ kaya gơhluh sì ki ngãm.

8Pitrai chẽq dơgrữq kaya dòq gah ala tơkai Anàq Mơnuĩh.”

Tũq mãq dơgrữq kaya duh huaĩq Anàq Mơnuĩh, nữn Pitrai ôh luơi ga sa kaya halơi ôh duh huaĩq di Anàq Mơnuĩh. Nữn tũq nĩ pơnõq drơi ka-ôh bôh dơgrữq kaya duh huaĩq Anàq Mơnuĩh, 9nữn pơnõq drơi iãq bôh Yàc Je-su, la Pitao hũ ngãq pơviar rlao sì dơgrữq mơnuĩh gơnrơh sa asĩt, vloh hũ pa-tơruãq chrang mữh gơhluh sì ki ngãm kơyua mưng kaya pơđìq pơđua dơlãp kaya mơtai Pitrai hũ, pioh kơyua mưng kaya anĩt Yàc Pô Lơngĩq hũ, Pitrai pơlih ãt kaya mơtai ala ga anàq mơnuĩh. 10Viãq, kơyua Yàc Pô Lơngĩq, Pitao chrơng pajỡc dơgrữq kaya sì dơgrữq kaya mưng Pitrai hũ chrơng pajỡc, pioh ưng va mai lũ anàq trôh pãq kaya gơhluh, nữn song ngãq ga Pitao Va Kõq kaya dõc pơ-tlah pơnõq nhũ hũ tơviãq jỡc wil tãl mưng kaya dleh dlàr pơđìq pơđua. 11Kơyua mưng Pitao ngãq jỡc sơchih sigỡuq sì dơgrữq mơnuĩh hũ ngãq jỡc sơchih nữn tơviãq sa phuỗt akhà sigỡuq. Kơyua yơu nữn, Pitrai ôh mơlơu ơlah iơu pơnõq nhũ la adơi sơai, 12Pitrai đơp:

“Anàq ròq akhàt tơviãq angãn Pitrai ga adơi sơai Anàq,

Anàq ròq adoh sơuỗt mơyòp Pitrai dòq di khrãh dơgrữq mơnuĩh sơđah sơchih.”

13Sì Pitrai đơp wỡq:

“Hlãq ròq chàc gơnang di Yàc Pô Lơngĩq.”

Vloh:

“Nĩ, hlãq nĩ sì dơgrữq vual vơla nữn Yàc Pô Lơngĩq ròq pơjao ga hlãq.”

14Yơu nữn, kơyua dơgrữq anàq tơcho hũ vơnah dơlãp rơlo sì dơrãh, nữn Pitrai kung hũ vơnah sigỡuq dơlãp kaya nữn drưh yơu nữn pioh kơyua mưng kaya mơtai, Pitrai pa-lơhiãq mơnuĩh apãt gơnuar kaya mơtai, nữn la kamlai sa-tan, 15sì pơlih pơrlao dơgrữq mơnuĩh nữn, nữn la avih dơgrữq mơnuĩh halơi hadiuq huaĩq di kaya mơtai nữn ngãq halỗt tãl avih rài. 16Kơyua iỡuq viãq, ôh iỡuq Pitrai trôh pioh dõc iãq dơgrữq mơnuĩh gơnrơh, nữn Pitrai iãq jàc pơjẽh pơtiàt A-bra-ham, 17kơyua yơu nữn Pitrai iỡuq chàc tơviãq jỡc drưh yơu adơi sơai drơi mưng dơgrữq vơnah, pioh Pitrai pơlih hũ ngãq jỡc mơnuĩh gơnuar pioh kaya duh talơvãt prõng gãm khiãng anĩt sì tui tơpãq pơweh sì avih dơgrữq vruãq pơweh pa Yàc Pô Lơngĩq hũ tồq ràc tơviãq kaya anĩt dơvuh sơlih ga vual vơla Pitrai hũ. 18Hadơi sì tũq ãt ơniãi, Pitrai pơlih dõc suãq dơgrữq mơnuĩh halơi kađòc ơniãi, kơyua rùp phuỗt Pitrai song tơpa gãt kaya nữn vloh.