Ma-thi-ơ 9

1Tũq nữn Yàc Je-su tơma dơlãp ahòq, Pitrai gãt ia tơsìq sì wỡq trôh palơi phuỗt nhũ. 2Dih, aràc va trôh ga Pitrai sa aràc mơnuĩh ruãq kao ãn đĩh pãq dlòc chiau. Tũq Yàc Je-su bôh voh-tui pơnõq nhũ hũ, Pitrai pơđar mơnuĩh ruãq kao: “Ơ anàq, iỡuq gơjãp hatai. Dlàiq dơnũh anàq song hũ tơleh.” 3Sì iãq dih, hũ tơkìq mơnuĩh gơnuar pơto voh-va đơp sì gỡuq: “Mơnuĩh nĩ đơp sơvĩl.” 4Nữn Yàc Je-su thơu kaya sơnơng pơnõq nhũ, nữn tơnĩa: “Kanõh gơtha halơi pơnõq ung sơnơng iãh mơsãc dơlãp hatai drơi yơu nữn? 5Kơyua kaya halơi la buôt rlao pioh đơp: ‘Dlàiq dơnũh sơai song hũ tơleh,’ hẽla đơp: ‘Tơgùq dỡc vẽq sì yàp nao?’ 6Nữn la pioh pơnõq ung thơu làiq Anàq Mơnuĩh hũ gơnuar tơleh dlàiq pãq hlùq …” vloh Pitrai pơđar mơnuĩh kađòc ruãq kao làiq: “Iỡuq tơgùq dỡc, pơpuỗt chiau sơai hũ tơgùq, sì nao wỡq sàc drơi vẽq.” 7Hadơi nữn mơnuĩh nữn tơgùq dỡc, nao wỡq sàc nhũ. 8Tũq tơpuôl vual vơla bôh yơu nữn, pơnõq nhũ huaĩq tatơh sì sơuỗt mơyòp Yàc Pô Lơngĩq, Pitao song vrơi ga anàq mơnuĩh gơnuar chơnuãq yơu nữn. 9Tũq Yàc Je-su mưng anĩh nữn tơviãq nao, Pitrai iãq bôh sa aràc mơnuĩh angãn Ma-thi-ơ, ãn dòq guh dơlãp adũq mãq jia, vloh Pitrai iơu ung: “Iỡuq tui pôgrũ.” Hadơi nữn Ung phuah tơgùq dỡc sì tui Pitrai.

10Vruãq tơviãq trôh tũq Yàc Je-su dòq guh bõc dơlãp sàc, dih, lũ mơnuĩh mãq jia sì mơnuĩh hũ dlàiq song trôh, song dòq guh sigỡuq sì Yàc Je-su sì dơgrữq mơnuĩh mơgrũ Pitrai. 11Mơnuĩh Pha-ri-si bôh yơu nữn, nữn đơp sì mơnuĩh mơgrũ Pitrai: “Kơyua hayơu pôgrũ pơnõq sơai vloh dòq guh bõc sigỡuq sì mơnuĩh mãq jia gãm sì tơpuôl mơnuĩh hũ dlàiq?” 12Tũq Yàc Je-su hmỡq yơu nữn, Pitrai đơp: “Mơnuĩh prãn khãc dơlãp rùp phàp nữn ôh chàc mơnuĩh gơnuar jrão, nữn mĩn mơnuĩh kađòc ruãq iỡuq chàc. 13Dòq hadơi sì ung nao tlah, sì iỡuq mơgrũ pioh thơu pơnuaĩq gơtha nĩ la gĩq: ‘Kơu ưng hatai khiãng anĩt, nữn ôh ưng kaya pioh duh talơvãt.’ Kơyua kơu trôh, ôh iỡuq pioh iơu mơnuĩh tơpãq dãng, nữn pioh iơu mơnuĩh hũ dlàiq.”

14Tũq nữn, dơgrữq mơnuĩh mơgrũ Jãng hũ trôh pãp Pitrai, tơnĩa: “Kơyua hayơu pơnõq hlãq sì mơnuĩh Pha-ri-si gãm rơđãp ãt bõc, nữn mơnuĩh mơgrũ pôgrũ hũ vloh ôh ãt bõc?” 15Yàc Je-su đơp wỡq sì pơnõq nhũ: “Hayơu vloh dơgrữq mơnuĩh ban mơyơu nao bõc pơhuãq vloh ka-ồq ka-ãn dơlãp tũq mơtơu lakơi ãn dòq sigỡuq sì pơnõq nhũ? Nữn ròq trôh harơi tũq sì mơnuĩh mơtơu lakơi hũ va nao tlah mưng pơnõq nhũ, tũq nữn pơnõq nhũ ròq ãt bõc. 16Ôh asơi vãl sa vlah pơcha vơhrơu tơma ao tlãq, mưng sa vlah nữn ròq ôh tarơhẽt tẽq ao, sì ròq ngãq ga anĩh tẽq tơviãq jỡc prong. 17Kung ôh asơi tôh alãc vơhrơu tơma kadoh tlãq. Kơyua mơyah làiq ngãq yơu nữn, huaĩq kadoh ròq pơchãh, alãc hõq tơviãq sì kadoh ôh angui jỡc. Pa-vlữq wỡq, aràc tôh alãc vơhrơu tơma kadoh vơhrơu, nữn la dua kaya ròq hũ dòq siàp.”

18Dơlãp tũq Yàc Je-su ãn dòq đơp dơgrữq pơnuaĩq nữn sì pơnõq nhũ, dih, hũ sa aràc mơnuĩh apãt akõq sàc pơtõm trôh jẽq, ròq aguãl tơ-ồq pãq anãq Pitrai, Ung pa-thơu làiq: “Anàq kamơi hlãq vơhrơu mơtai, nữn lakơu pôgrũ trôh chẽq tơngãn pãq dlòc nhũ, nữn nhũ ròq hadiuq.” 19Hadơi nữn tơgùq dỡc, Yàc Je-su, sì dơgrữq mơnuĩh mơgrũ Pitrai nao tui ung nữn. 20Sì iãq dih, hũ sa aràc mơnuĩh kamơi kađòc ruãq tôh dơrah dơlãp sa plôh dua thũt, tũq nữn nao trôh gah lakồq Yàc Je-su, sì rơwỡq trôh kơnui ao Pitrai, 21Mưng kamơi nữn sơnơng krơi: “Mơyah làiq kơu mĩn rơwỡq trôh ao Pitrai soh, nữn drơi ròq jỡc pakhơĩh ruãq.” 22Nữn Yàc Je-su weh iãq bôh mơnuĩh kamơi, nữn đơp: “Ơ anàq kamơi, iỡuq gơjãp hatai. Voh-tui anàq song ngãq ga anàq jỡc khơĩh.” Mưng tũq nữn mơnuĩh kamơi jỡc khơĩh ruãq. 23Vloh tũq nữn Yàc Je-su tơma dơlãp sàc mơnuĩh apãt akõq sàc pơtõm nữn, nữn Pitrai bôh tơpuôl mơnuĩh ayùq tơliãq sigỡuq sì tơpuôl lũ ngãq tơsrãh viãq, 24pitrai đơp: “Tơviãq nao vẽq pãq blàc, kơyua anàq kamơi tìt nĩ ôh mơtai, nữn nhũ ãn dòq pìq.” Vloh nữn pơnõq nhũ tlao siẽq Pitrai. 25Tũq tơpuôl mơnuĩh lũ song kađòc pơtiãuq tơviãq blàc vloh, Pitrai tơma dơlãp adũq apãt tơngãn anàq kamơi tìt, sì anàq kamơi tìt tơgùq dỡc. 26Pơnuaĩq nĩ hũ đơp tơviãq vãq avih phũm nữn.

27Tũq Yàc Je-su mưng anĩh nữn tơviãq nao, hũ dua aràc mơnuĩh vùp mơta nao tui Pitrai, pơnõq nhũ miẽt priãu prong, làiq: “Talơvãt Anàq pitao Da-vĩt, lakơu anĩt duman pơnõq hlãq!” 28Tũq nữn, Yàc Je-su tơma dơlãp sàc vloh, dua aràc mơnuĩh vùp mơta nữn trôh pãp Pitrai nữn Yàc Je-su tơnĩa pơnõq nhũ: “Pơnõq anàq pãc làiq kơu pơlih ngãq jỡc vruãq nữn yơh?” Pơnõq nhũ đơp sì Pitrai: “Ơ Yàc, pơnõq hlãq pãc.” 29Dơlãp tũq nữn, Yàc Je-su rơwỡq mơta pơnõq nhũ, sì đơp: “Vruãq nữn iỡuq hũ tơviãq jỡc tui yơu voh-tui Pơnõq sơai.” 30Mơta pơnõq nhũ jỡc pơh tơviãq, nữn Yàc Je-su mãq pơnuaĩq pakỡuq pơnõq nhũ, làiq: “Iỡuq Sơdor gơnĩt, juơi vrơi ga asơi thơu mưng vruãq nĩ.” 31Nữn hadơi sì tũq pơnõq nhũ tơviãq blàc, pơnõq nhũ akhàt pa-tơviãq vruãq nữn vãq avih phũm nữn.

32Tũq nữn, pơnõq nhũ ãn nao tơviãq, dih, hũ aràc va trôh ga Yàc Je-su sa aràc mơnuĩh kamlo kađòc kamlai ãp. 33Tũq kamlai kađòc pơtiãuq tơviãq vloh, nữn mơnuĩh kamlo đơp jỡc, sì tơpuôl vual vơla mãq ngãq krơi, đơp sigỡuq: “Vruãq nĩ Ka-ôh tũq halơi bôh dơlãp Is-ra-el!” 34Nữn mơnuĩh Pha-ri-si đơp: “Ung nữn gơnang yàc kamlai sì pơtiãuq kamlai.”

35Yàc Je-su nao vãq avih dơgrữq palơi prõc sì palơi tìt. Pitrai pơdòq wỡq pơto pơđar dơlãp dơgrữq sàc pơtõm pơnõq nhũ hũ, pơto akhàt pơnuaĩq siàp mưng lơgar dlòc lơngĩq, sì pasồq pakhơĩh avih dơgrữq kaya ruãq sì lơmuỡn lơduh. 36Tũq nữn, Pitrai iãq bôh dơgrữq tơpuôl vual vơla lũ, Pitrai hũ hatai anĩt duman pơnõq nhũ, mưng pơnõq nhũ kađòc dleh dlàr sì chơlah chơluỡn, yơu avo ôh hũ mơnuĩh dlãc. 37Hadơi nữn, Pitrai đơp sì dơgrữq mơnuĩh mơgrũ làiq: “Vlàt yuãq nữn pơtuah viãq, vloh mơnuĩh yuãq nữn tơkìq. 38Kơyua yơu nữn, iỡuq avih hatai iơu lakơu sì Yàc vlàt yuãq hũ, pioh ga Pitrai pơđar mơnuĩh yuãq tơma dơlãp anĩh yuãq Pitrai hũ.”