Roglai Bible Literal Text
Ma-thi-ơ 8
Tũq nữn, hadơi sì tũq Yàc Je-su mưng dlòc chỡq song trỗt, hũ dơgrữq tơpuôl vual vơla lũ nao tui Pitrai. Dih, hũ sa aràc mơnuĩh kađòc ruãq aphũng trôh, ròq aguãl tơ-ồq pãq anãq Pitrai, sì drơ: “Talơvãt Yàc, mơyah làiq Pitrai ưng, Pitrai pơlih hũ gơnuar ngãq ga hlãq jỡc sơchih.” Vloh tũq nữn ròq yor tơngãn tơviãq, Pitrai rơwỡq trôh nhũ, sì đơp: “Kơu ưng. Iỡuq sơchih vẽq.” Nữn mư, nhũ jỡc sơchih avih ruãq aphũng. Vloh Yàc Je-su đơp sì nhũ: “Iỡuq sơdor gơnĩt, sơai Juơi akhàt ga asơi, nữn iỡuq nao tơviãq vẽq, akhàt pa-thơu rùp drơi ga gơnuar pioh kaya talơvãt sì pioh adãt Môi-se song pơđar, pioh ngãq chưng ga pơnõq nhũ.”
Tũq nữn, Hadơi nữn Yàc Je-su song tơma dơlãp palơi prong Ka-be-na-um, hũ sa aràc mơnuĩh pô apãt sa rơtôh lĩng song trôh pãq Pitrai, lakơu sì Pitrai làiq: “Talơvãt Yàc, mơnuĩh halỗt hlãq hũ dòq đĩh piãm dơlãp sàc, sì pađìq pơđua viãq.” Yàc Je-su đơp sì ung: “Tũq song trôh vloh, Kơu ròq nao trôh pasồq pakhơĩh ga nhũ.” Nữn hẽ wỡq làiq, pô apãt sa rơtôh lĩng drơ: “Lơvãt Yàc, hlãq ôh đang mang tồq ròq Pitrai tơma sàc drơi ôh, bôh làiq yơu nữn lakơu Pitrai mĩn đơp sa pơnuaĩq, nữn mơnuĩh halỗt hlãq hũ ròq jỡc khơĩh. Kơyua hlãq kung la sa aràc mơnuĩh hũ dòq gah ala gơnuar, sì hũ dơgrữq mơnuĩh lĩng dòq gah ala gơnuar hlãq. Hlãq pơđar mơnuĩh nĩ: ‘Nao vẽq,’ nữn nhũ nao, gãm mơnuĩh tơmo: ‘Iỡuq trôh mư,’ nữn nhũ trôh, sigỡuq sì mơnuĩh halỗt hlãq: ‘Iỡuq ngãq vruãq nĩ,’ nữn nhũ ngãq.” Nữn hadơi sì tũq hmỡq nữn, Yàc Je-su mãq ngãq krơi sì đơp sì dơgrữq mơnuĩh ãn nao tui Pitrai: “Iỡuq viãq, pôgrũ đơp sì adơi sơai, pôgrũ ka-ôh thơu bôh voh-tui prong yơu nữn mưng sa aràc hlơi nữn dơlãp Is-ra-el. Vlữq wỡq làiq, Pôgrũ đơp adơi sơai thơu làiq, lũ mơnuĩh ròq trôh mưng gah ia harơi tơgùq sì gah ia harơi tơma, vloh pơnõq nhũ ròq trôh dòq guh ban sigỡuq sì A-bra-ham, Y-sac sì Ja-kôp dơlãp lơgar lơngĩq. Nữn dơgrữq anàq tơcho palơi lơgar ròq kađòc prah tơma anĩh sồp kơnãm gah lơniãu, anĩh ròq hũ sia chõq sì kẽq tagơi.” Vloh Yàc Je-su đơp sì mơnuĩh apãt sa rơtôh lĩng: “Iỡuq wỡq vẽq! Sơai song pãc yơu halơi nữn vruãq tơviãq jỡc ga sơai yơu nữn.” Sì mơnuĩh halỗt hũ pakhơĩh iỡuq tũq jơ nữn.
Tũq Yàc Je-su tơma dơlãp sàc Pier, Pitrai bôh ami sơdiuq Pier hũ dòq đĩh pãq dlòc chơnang sì ãn ruãq ajur. Yàc Je-su rơwỡq pãq tơngãn mòq, sì kaya ruãq ajur mòq jỡc khơĩh. Vloh mòq tơgùq dỡc sì pơdòq duh vruãq Pitrai. Tũq nữn, tãl tlãp sồp, vual vơla va trôh ga Yàc Je-su lũ mơnuĩh kađòc kamlai ãp. Pitrai angui pơnuaĩq đơp sì pơtiãuq dơgrữq kamlai nữn sì pakhơĩh ga avih dơgrữq mơnuĩh ruãq. Yơu nữn la tơviãq jỡc iỡuq viãq yơu pơnuaĩq mơnuĩh gơnuar hwơr E-sai song đơp làiq: “Mĩn Pitrai song gui anong dơgrữq kaya lơmuỡn lơduh pơnõq drơi sì gui anong kaya ruãq sơkìq pơnõq drơi hũ.”
Tũq nữn, Yàc Je-su iãq bôh vual vơla dòq tòp dar Pitrai, Pitrai pơđar nao gãt pãq gah dih tơsìq Ga-li-le. Tũq nữn, hũ sa aràc mơnuĩh gơnuar pơto voh-va trôh jẽq, song đơp sì Pitrai: “Ơ Pôgrũ, hlãq ròq tui pôgrũ bôh làiq pôgrũ nao pãq anĩh halơi.” Yàc Je-su đơp wỡq sì ung: “Anàq mơja hũ gùq, chĩp lơngĩq hũ srôh, nữn Anàq Mơnuĩh ôh hũ anĩh guãl akõq.” Vloh nữn, sa aràc mơnuĩh tơmo dơlãp dơgrữq mơnuĩh mơgrũ drơ sì Pitrai: “Talơvãt Yàc, lakơu vrơi gơnuar hlãq nao dor ama hlãq hlơu ka.” Nữn Yàc Je-su đơp sì nhũ: “Tui vẽq pôgrũ, sì luơi mơnuĩh mơtai dor mơnuĩh mơtai pơnõq nhũ hũ.”
Tũq Yàc Je-su tơma dơlãp ahòq vloh, dơgrữq mơnuĩh mơgrũ nao tui Pitrai tơma dơlãp ahòq. Sì dih, hũ rơvùq angĩn prõc tơgùq pãq khrãh tơsìq, tơviãq jỡc ahòq kađòc rơyàq sỡm nãi ia tơgùq gỡp ahòq. Nữn Yàc Je-su ãn dòq pìq. Vloh nữn mơnuĩh mơgrũ trôh jẽq, pa-mơdưh Pitrai tơgùq, “Ơ Yàc, lakơu Pitrai dõc pơnõq hlãq; pơnõq drơi jẽq mơtai luôĩq tơra!” Nữn Yàc Je-su đơp sì pơnõq nhũ: “Dơgrữq mơnuĩh tơkìq voh-tui dih, kơyua hayơu adơi sơai huaĩq?” Hadơi nữn, Pitrai tơgùq dỡc, Pitrai gơloh angĩn sì tơsìq. Yơu nữn ia tơsìq tơviãq jỡc suà lìt kađữc rĩc. Dòq pơnõq nhũ nữn mãq ngãq krơi, tơnĩa gỡuq: “Mơnuĩh nĩ la asơi, vloh mĩn angĩn sì tơsìq kung pãc sãp Nhũ?”
Tũq Yàc Je-su song nao gãt trôh pãq gah dih tơma dơlãp phũm Ga-da-ra, hũ dua aràc mơnuĩh kađòc kamlai ãp trôh pãp Pitrai. Hadơi sì tũq tơviãq mưng anĩh vơnẽq, pơnõq nhũ mơsãc tơviãq jỡc ôh mơnuĩh halơi pơlih ôh tãl prãn nao gãt jơlàt nữn. Dih, pơnõq nhũ priãu tơgùq, làiq: “Talơvãt Anàq Yàc Pô Lơngĩq, pơnõq hlãq hũ kaya hagĩq sì Pitrai? Iỡuq mĩn Pitrai trôh pãq nĩ pioh ngãq dleh dlàr pơnõq hlãq hlơu sì tũq harơi ngãq gơnĩt?” Tũq nữn, hũ sa tơpuôl vơvui lũ ãn dòq bõc pơgãp anĩh pơnõq nhũ ôh ơtah. Vloh nữn, dơgrữq kamlai miẽt lakơu Yàc Je-su, làiq: “Mơyah làiq Pitrai pơtiãuq pơnõq hlãq, lakơu vrơi pơnõq hlãq tơma dơlãp tơpuôl vơvui dih.” Yàc Je-su pơđar pơnõq nhũ: “Nao vẽq!” Nữn la dơgrữq kamlai tơviãq tlah, sì tơma dơlãp tơpuôl vơvui; sì iãq dih, avih tơpuôl vơvui mưng chỡq plõc trỗt tơsìq sì mơtai krãp tơma dơlãp ia. Bôh làiq yơu nữn, dơgrữq mơnuĩh dlãc vơvui dỡuq đuaĩq tơma palơi, akhàt wỡq dơgrữq vruãq, gãm sì dơgrữq vruãq song tơviãq jỡc ga dua aràc mơnuĩh kađòc kamlai ãp. Sì iãq dih, avih dơgrữq mơnuĩh dơlãp palơi prõc tơviãq pioh pãp Yàc Je-su. Tũq pơnõq nhũ bôh Pitrai, pơnõq nhũ lakơu Pitrai tơviãq tlah mưng anĩh lơgar pơnõq nhũ hũ.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.