Ma-thi-ơ 7

1Juơi chahrơna, pioh adơi sơai ôh kađòc chahrơna. 2Kơyua adơi sơai chahrơna aràc yơu halơi, nữn adơi sơai ròq kađòc chahrơna drưh yơu nữn, sì adơi sơai sơkãq ga aràc kor halơi, nữn pơnõq nhũ kung ròq sơkãq wỡq ga adơi sơai kor nữn. 3Nữn hayơu adơi sơai iãq bôh harô tìt tiu dơlãp mơta adơi sơai drơi, nữn vloh ôh bôh kayơu dơra gãm dòq dơlãp mơta drơi? 4Hẽla, ngãq yơu hayơu adơi sơai pơlih hũ đơp sì adơi sơai drơi: ‘Iỡuq luơi ga hlãq mãq harô dơlãp mơta sơai tơviãq,’ sì iãq dih, kayơu dơra nữn ãn dòq dơlãp mơta sơai? 5Ơ mơnuĩh vlữq lor! Hlơu viãq, iỡuq mãq kayơu dơra tlah mưng mơta drơi, vloh ka adơi sơai bôh nĩq nũn pioh mãq harô dòq dơlãp mơta adơi sơai drơi tơviãq. 6Juơi vrơi ga asơu kaya sơchih, kung juơi prah kaya màc drơi hũ pãq anãq tơpuôl vơvui. Huaĩq pơnõq nhũ juãq jơlì dơgrữq kaya nữn pãq ala tơkai pơnõq nhũ, vloh gơlàiq wỡq kẽq hàq adơi sơai.

7Iỡuq lakơu, sì adơi sơai ròq hũ vrơi. Iỡuq duah, sì adơi sơai ròq pãp. Iỡuq tơtoh, sì bãc ròq hũ pơh ga adơi sơai. 8Kơyua asơi lakơu nữn hũ; asơi duah nữn pãp; asơi tơtoh bãc nữn ròq hũ pơh. 9Hẽla hũ mơnuĩh halơi dơlãp tơpuôl adơi sơai, nữn tũq anàq drơi lakơu bẽn, vloh vrơi ga nhũ voh patơu lơĩh? 10Hẽla, tũq anàq drơi lakơu akàt, vloh vrơi ga nhũ anàq ala? 11Yơu nữn, mơyah làiq adơi sơai, la iãh, vloh thơu vrơi ga anàq drơi kaya siàp mơkrơ, nữn Ama adơi sơai hũ pãq dlòc lơngĩq ròq vrơi ga dơgrữq asơi lakơu Pitrai dơgrữq kaya siàp mơkrơ rlao ôh thơu hadùp? 12Kơyua yơu nữn, dơlãp avih vruãq, mơyah làiq adơi sơai ưng dơgrữq kaya hagĩq pioh aràc ngãq ga drơi, nữn adơi sơai kung iỡuq ngãq kaya nữn ga pơnõq nhũ, kơyua nữn la voh-va sì dơgrữq pơnuaĩq gơnuar hwơr.

13Iỡuq tơma bãc gơniãq, kơyua bãc lơnang sigỡuq sì jơlàt prong va trôh kaya lơhiãq thĩt, sì hũ lũ mơnuĩh nao tơma pãq đỡn. 14Dòq bãc tìt sì jơlàt gơniãq hũ va nao trôh kaya hadiuq, sì hũ tơkìq mơnuĩh duah bôh nhũ.

15Iỡuq gơrhia mơnuĩh gơnuar hwơr vlữq lor, la mơnuĩh chồq ao avo trôh sì adơi sơai, nữn gah dơlãp, pơnõq nhũ la asơu sĩc kẽq hàq bõc. 16Kơyua voh pơnõq nhũ hũ sì adơi sơai ròq iãq thơu pơnõq nhũ. Ôh hũ asơi pẽq voh nho pãq anĩh bôr druơi, hẽla voh vãl pãq anĩh bôr druơi, iỡuq lơĩh? 17Kung yơu nữn, dơgrữq kayơu siàp song tơviãq voh siàp, dòq kayơu iãh nữn tơviãq voh iãh. 18Kayơu siàp ôh tũq halơi tơviãq voh iãh jỡc, sì kayơu iãh kung ôh tũq halơi tơviãq jỡc voh siàp. 19Dơgrữq kayơu ôh tơviãq voh siàp song kađòc koh sì prah tơma apôi. 20Kơyua yơu nữn, pơnõq adơi sơai ròq iãq thơu pơnõq nhũ mưng voh pơnõq nhũ hũ. 21Ôh iỡuq tãl aràc mơnuĩh đơp sì pôgrũ: ‘Talơvãt Yàc, talơvãt Yàc’, song ròq hũ tơma dơlãp lơgar lơngĩq, nữn mĩn mơnuĩh ngãq tui hatai ưng Ama pôgrũ dòq pãq dlòc lơngĩq mĩn. 22Dơlãp harơi nữn, lũ mơnuĩh ròq đơp sì pôgrũ làiq: ‘Lơvãt Yàc, Lơvãt Yàc, ôh iỡuq pơnõq hlãq song mãq Angãn Pitrai đơp hwơr, song mãq Angãn Pitrai pơtiãuq kamlai sì mãq Angãn Pitrai ngãq lũ vruãq gơnuar chơnuãq, yơh?’ 23Tũq nữn, pôgrũ ròq pa-thơu nĩq nũn sì pơnõq nhũ làiq: ‘Kơu ôh thơu pơnõq hã! Tơpuôl mơnuĩh ngãq kaya mơsãc dih, iỡuq nao tơviãq tlah di mơta kơu!’

24Yơu nữn, dơgrữq mơnuĩh halơi hmỡq pơnuaĩq pôgrũ đơp nĩ sì rơmiãq jàc ròq drưh yơu sa aràc mơnuĩh jãc rgơi, la mơnuĩh vữq padỡc sàc drơi pãq dlòc patơu tali. 25Hajàt halip hõq trôh, ia blũc tơgùq, angĩn vluh sì sũl mơgơi sàc nữn, nữn nhũ ôh jơlưh jỡc kơyua song padỡc pãq dlòc patơu tali. 26Sì dơgrữq mơnuĩh hmỡq pơnuaĩq đơp Pôgrũ nĩ nữn ôh rơmiãq jàc, ròq yơu sa aràc mơnuĩh gơla pơtòq, la mơnuĩh padỡc sàc drơi pãq dlòc hlùq choah. 27Hajàt hõq trỗt, ia blũc tơgùq, angĩn vluh sì sũl mơgơi sàc nữn, nữn nhũ jơlưh trỗt sì kađòc tơyah tơyai avih.”

28Tũq Yàc Je-su đơp dơgrữq pơnuaĩq nữn vloh, nữn tơpuôl vual vơla mãq ngãq krơi mưng pơnuaĩq pơto Pitrai hũ, 29kơyua Pitrai pơto pơnõq nhũ yơu mơnuĩh hũ gơnuar, ôh drưh yơu dơgrữq mơnuĩh gơnuar pơto voh-va pơnõq nhũ hũ.