Ma-thi-ơ 10

1Yàc Je-su iơu sa plôh dua aràc mơnuĩh mơgrũ Pitrai trôh, sì vrơi ga pơnõq nhũ gơnuar pãq dlòc dơgrữq kamlai, pioh pơtiãuq pơnõq nhũ sì pasồq pakhơĩh avih kaya ruãq sì lơmuỡn lơduh. 2Angãn sa plôh dua aràc mơnuĩh gơnuar pơđar la yơu nĩ: Chơmrờp, Si-môn (kung hũ angãn la Pier) sì An-dre, adơi ung hũ; Ja-kơ anàq lakơi Se-be-đe sì Jãng, adơi ung hũ; 3Phi-lip sì Ba-the-le-my; Thô-ma sì Ma-thi-ơ, la mơnuĩh mãq jia; Ja-kơ anàq A-phe hũ, sì Tha-đe; 4Si-môn Se-lôt, sì Ju-đa Is-ka-ri-ôt, kung la mơnuĩh jơdrãq sì Pitrai.

5Tũq nĩ Yàc Je-su pơđar sa plôh dua aràc mơnuĩh nĩ nao, Pitrai hakơi pơnõq nhũ, làiq: “Juơi nao jơlàt halơi dơgrữq mơnuĩh la anĩh Vual Vơla Lơniãu dòq, kung juơi tơma dơlãp palơi halơi mơnuĩh Sa-ma-ri hũ. 6Nữn iỡuq nao vẽq trôh sì dơgrữq anàq avo sỗq gơprah sàc Is-ra-el hũ. 7Sì tũq nao jơlàt, adơi sơai nao iỡuq pơto akhàt làiq: ‘Lơgar lơngĩq trôh jẽq vloh.’ 8Iỡuq pasồq pakhơĩh mơnuĩh ruãq sơkìq, ngãq ga mơnuĩh mơtai hadiuq wỡq, ngãq sơchih mơnuĩh aphũng sì prôh pơtiãuq dơgrữq kamlai. Adơi sơai song hũ tồq mãq soh, nữn iỡuq vrơi soh. 9Juơi va tui mữh, priãq, hẽla jĩn dơlãp talơi akãq kơ-iãng drơi. 10Juơi va kadũc tũq nao jơlàt, hẽla dua vlah ao, chơkhõq, hẽla gai mơjrà, kơyua mơnuĩh ngãq vruãq nữn hũ kaya bõc drơi. 11Dòq dơlãp palơi prong hẽla palơi tìt halơi sì adơi sơai tơma, iỡuq duah asơi dơlãp anĩh nữn la mơnuĩh đang mang, sì dòq pãq đỡn tãl trôh tũq adơi sơai tơviãq nao. 12Tũq adơi sơai tơma dơlãp sàc halơi, iỡuq mãq hatai ki ngãm sì vrơi kaya lơngai ga sàc nữn. 13Mơyah làiq sàc nữn đang mang, kaya lơngai adơi sơai hũ ròq tôh pãq dlòc pơnõq nhũ, vơnah tơmo wỡq, mơyah làiq pơnõq nhũ ôh đang mang, nữn kaya lơngai adơi sơai hũ ròq mai wỡq pãq adơi sơai. 14Dòq mơnuĩh halơi ôh tồq ròq adơi sơai, hẽla ôh ưng hmỡq pơnuaĩq adơi sơai hũ, tũq adơi sơai tơviãq nao mưng sàc hẽla palơi prong nữn, iỡuq tapơh thũl pãq tơkai drơi. 15Iỡuq viãq, pôgrũ đơp sì adơi sơai, dơlãp harơi ròq kađòc palơi Sô-đôm sì Gô-mô-rơ ròq hũ kaya chahrơna sa-iỡl rlao palơi prong nữn.

16Iãq nĩ, pôgrũ pơđar adơi sơai nao yơu avo dòq pãq khrãh tơpuôl asơu sĩc, kơyua nữn iỡuq tơviãq jỡc jãc rgơi yơu anàq ala sì siàp lơmuỡn yơu chĩp katrơu. 17Nữn iỡuq gơrhia mưng anàq mơnuĩh, Kơyua pơnõq nhũ ròq pơjao adơi sơai ga mơnuĩh gơnuar chahrơna, sì aràc ròq atòc poh adơi sơai mưng gai dơlãp sàc pơtõm pơnõq nhũ hũ; 18Vloh adơi sơai ròq kađòc va trôh pãq anãq dơgrữq pô prõc lơgar sì dơgrữq pitao kơyua mưng pôgrũ, pioh ngãq chưng ga pơnõq nhũ sì ga dơgrữq vual vơla lơniãu. 19Nữn tũq pơnõq nhũ pơjao adơi sơai, juơi sơnơng rơchãc drơi ròq iỡuq đơp hagĩq hẽla đơp yơu hayơu, kơyua kaya hagĩq chàc iỡuq đơp ròq hũ vrơi ga adơi sơai dơlãp tũq nữn. 20Kơyua ôh iỡuq adơi sơai la mơnuĩh đơp, nữn la Vơngãq Sơđah Ama adơi sơai hũ, ròq đơp mưng adơi sơai. 21Lơniãu, sơai ròq pơjao adơi pioh pãq anĩh kaya pa-mơtai, sì Ama ròq pơjao anàq. Anàq tơcho ròq tơgùq dỡc jơdrãq wỡq ami ama sì ngãq ga pơnõq nhũ iỡuq kađòc pa-mơtai. 22Sì adơi sơai ròq kađòc dơgrữq mơnuĩh lơmùq mơvai kơyua mưng angãn pôgrũ, nữn mơnuĩh halơi ãt jỡc tãl trôh tũq luôĩq hadơi, mơnuĩh nữn ròq hũ dõc pơ-tlah. 23Nữn tũq halơi pơnõq nhũ mãq pakỡuq adơi sơai dơlãp palơi prong nĩ, nữn iỡuq đuaĩq nao pãq palơi prong gah dih, kơyua pôgrũ đơp sì adơi sơai, viãq ngãq gơnĩt adơi sơai ròq ôh tũq halơi nao avih dơgrữq palơi Is-ra-el hũ tãl trôh tũq Anàq Mơnuĩh trôh.

24Mơnuĩh mơgrũ sì ôh prong rlao pôgrũ, halỗt kung ôh rlao sì pô drơi. 25Pơweh sì mơnuĩh mơgrũ hũ, yơu sì mơnuĩh halỗt hũ yơu pô la tãl vloh. Mơyah làiq mơnuĩh pô sàc vloh pơnõq nhũ hũ iơu la Be-el-se-bul, nữn pơnõq nhũ iơu mơnuĩh sàc la kaya hagĩq lơĩh ôh jỡc! 26Yơu nữn, juơi huaĩq pơnõq nhũ, kơyua ôh hũ kaya hagĩq ãt padỡuq sì ôh hũ ràc pa-tơviãq, kung ôh hũ vruãq hagĩq padỡuq dơđỡuq sì ôh hũ kơnãl thơu. 27Kaya pôgrũ đơp sì adơi sơai dơlãp anĩh sồp kơnãm, iỡuq đơp tơviãq pãq anĩh sơdah, sì kaya adơi sơai hmỡq đơp pãq tanĩa, iỡuq pa-thơu akhàt tơviãq pãq dlòc pơvũc sàc. 28Juơi huaĩq mơnuĩh pa-mơtai rùp phàp nữn ôh tũq halơi pa-mơtai jỡc vơngãq yua. Pa-vlữq wỡq, nữn iỡuq huaĩq Pitao rgơi ngãq pa-lơhiãq rùp phàp sì vơngãq yua tơma dơlãp tơnãh ala. 29Ôh iỡuq dua drơi chĩp niãq pa-vlơi ôh hũ sa su yơh? Sì ôh hũ sa drơi anàq halơi katih dơlãp pơnõq nhũ song lẽq pãq ala hlùq sì lơniãu hatai ưng Ama adơi sơai hũ. 30Gam sì bồq pãq dlòc akõq adơi sơai, kung hũ karhia avih vloh. 31Kơyua yơu nữn, juơi huaĩq; adơi sơai kuơ màc rlao chĩp niãq. 32Kơyua yơu nữn, dơgrữq mơnuĩh halơi akhàt tơviãq pôgrũ pãq anãq aràc, nữn pôgrũ kung ròq akhàt tơviãq mưng mơnuĩh nữn pãq anãq Ama pôgrũ pãq dlòc lơngĩq. 33Nữn mơnuĩh halơi kơmlah pôgrũ pãq anãq anàq mơnuĩh, nữn pôgrũ kung ròq kơmlah mơnuĩh nữn pãq anãq Ama pôgrũ pãq dlòc lơngĩq.

34Juơi sơnơng làiq pôgrũ trôh pioh va kaya lơngai ga dun kơyua. Pôgrũ ôh trôh pioh va kaya lơngai, nữn la va thõc đao. 35Kơyua pôgrũ trôh pioh ngãq anàq lakơi jơdrãq wỡq sì ama, anàq kamơi jơdrãq wỡq sì ami, mơtơu kamơi jơdrãq wỡq sì tơhma; 36mơnuĩh jơdrãq sì anàq mơnuĩh hũ ròq la mơnuĩh dơlãp sàc drơi. 37Asơi anĩt ami hẽla ama rlao pôgrũ nữn ôh đang mang sì pôgrũ; asơi anĩt anàq lakơi hẽla anàq kamơi rlao pôgrũ nữn kung ôh đang mang sì pôgrũ. 38Sì asơi ôh gơlãp kayơu pỡc drơi sì tui pôgrũ nữn ôh đang mang sì pôgrũ. 39Asơi duah kaya hadiuq drơi ròq lơhiãq, nữn asơi lơhiãq kaya hadiuq drơi kơyua mưng angãn pôgrũ ròq duah bôh wỡq.

40Asơi tồq ròq adơi sơai la tồq ròq pôgrũ, sì asơi tồq ròq pôgrũ kung tồq ròq Pitao song pơđar pôgrũ trôh. 41Asơi tồq ròq sa aràc mơnuĩh gơnuar hwơr kơyua mơnuĩh nữn la mơnuĩh gơnuar hwơr ròq tồq mãq kaya ban mơnuĩh gơnuar hwơr, dòq asơi tồq ròq sa aràc mơnuĩh tơpãq dãng kơyua nhũ la tơpãq dãng ròq tồq mãq kaya ban mơnuĩh tơpãq dãng hũ. 42Sì mơyah làiq asơi vrơi sa aràc dơlãp dơgrữq mơnuĩh tìt nĩ sa chơwàt ia lơ-ãt pioh mơnhũm mĩn kơyua mơnuĩh nữn la mơnuĩh mơgrũ pôgrũ nữn, pôgrũ đơp viãq sì adơi sơai, mơnuĩh nữn ròq ôh tũq halơi lơhiãq kaya ban drơi.”