Ma-thi-ơ 27

1Trôh mư-ờp, avih dơgrữq mơnuĩh gơnuar pioh kaya duh talơvãt prong sì dơgrữq pô tơha dơlãp vual vơla vơyai duah pơnẽq jơdrãq sì Yàc Je-su pioh pa-mơtai Pitrai. 2Pơnõq nhũ chãq Pitrai, va Pitrai nao pơjao ga pô lơgar prõc Phi-lat.

3Tũq Ju-đa, mơnuĩh song jơdrãq Yàc Je-su, bôh Pitrai kađòc ngãq gơnĩt dlàiq, nữn nhũ wơr drơi sì mơvai tlàq dlàiq, va vrơi wỡq tlơu plôh tleh priãq ga tơpuôl mơnuĩh gơnuar pioh kaya duh talơvãt prõng sì mơnuĩh pô tơha, 4sì đơp: “Hlãq song sỗq dlàiq kơyua pơjao dơrah ôh hũ dlàiq.” Nữn pơnõq nhũ drơ: “Vruãq nữn ôh tơbàq hagĩq trôh pơnõq kơu? Ung ưng krơi drơi ãt vẽq.” 5Vloh nhũ prah dơgrữq tleh priãq tơmã dơlãp sàc talơvãt sì nao wỡq, nhũ nao yuãl tơkuai pa-mơtai rùp. 6Dơgrữq mơnuĩh gơnuar pioh kaya talơvãt prong duỡt dơgrữq tleh priãq, sì đơp làiq: “Voh-va ôh vrơi gơnuar va katih priãq nĩ tơmã dơlãp adũq sàc talơvãt kơyua nữn la katih priãq dơrah hũ.” 7Nữn pơnõq nhũ vơyai vruãq vloh, pơnõq nhũ ròq angui priãq nữn vlơi blàc hama mơnuĩh ngãq gõq mưng katih priãq jĩn nữn pioh ga vruãq ngãq anĩh dor dơgrữq mơnuĩh thuãi chrih. 8Kơyua yơu nữn, blàc hama nữn hũ angãn la “Blàc Hama dơrah” tãl trôh harơi nĩ. 9Yơu nữn, tơviãq jỡc iỡuq viãq yơu pơnuaĩq mưng mơnuĩh gơnuar hwơr Je-re-mi làiq: “Pơnõq nhũ mãq tlơu plôh tleh priãq, la katih priãq song ngãq gơnĩt nữn la dơgrữq anàq lakơi Is-ra-el, 10sì pơnõq nhũ angui priãq nữn pioh vlơi blàc hama mơnuĩh ngãq gõq hũ, drưh yơu Yàc song akhàt ga kơu.”

11Tũq nữn, Yàc Je-su dòq dỡc pãq anãq pô lơgar prong, sì ung tơnĩa Pitrai: “Hã iỡuq viãq la Pitao vual vơla Ju-đa lơĩh?” Yàc Je-su hẽ: “Mĩn yơu pơnuaĩq ung đơp.” 12Nữn tũq Pitrai kađòc dơgrữq mơnuĩh gơnuar pioh kaya duh talơvãt prõc sì dơgrữq mơnuĩh pô tơha yãq dlàiq Pitrai, nữn Pitrai ôh hẽ sa pơnuaĩq halơi. 13Vloh Phi-lat tơnĩa Pitrai: “Viãq la hã ôh hmỡq avih dơgrữq pơnuaĩq yãq pơnõq nhũ đơp tơviãq jơdrãq sì hã yơh?” 14Nữn Pitrai ôh hẽ sa pơnuaĩq halơi dơlãp dơgrữq pơnuaĩq yãq dlàiq halơi, tơviãq jỡc pô lơgar prong sì mãq ngãq krơi viãq. 15Dơlãp harơi kaya pơjũm bõc adãt, pô lơgar prong hũ vruãq rơđãp ngãq la pơrlao sa aràc mơnuĩh dlàiq ga vual vơla, tui hatai anàq mơnuĩh nhũ ưng. 16Dơlãp tũq lơwah nữn, hũ sa aràc mơnuĩh mãq krỡq hũ tiẽng dơnãi angãn la Ba-ra-ba. 17Kơyua yơu nữn, tũq pơnõq nhũ pơjũm pơtõm wỡq, Phi-lat tơnĩa pơnõq nhũ: “Pơnõq hã ưng kơu pơrlao asơi ga pơnõq hã nĩ? Ba-ra-ba, hẽla Je-su, hũ angãn la Yàc Dõc Pơ-tlah?” 18Kơyua Phi-lat thơu làiq pơnõq nhũ song pơjao Pitrai ga ung mưng hatai mơvai lơmùq. 19Dơlãp tũq Phi-lat ãn dòq guh pãq sơvan chahrơna, sơdiuq nhũ đơp sì ung nữn làiq: “Sơai juơi ngãq hagĩq ga mơnuĩh ôh hũ dlàiq nữn. Kơyua harơi nĩ adơi song kađòc pơđìq pơđua lũ viãq kơyua dơlãp kaya lapơi mưng mơnuĩh nĩ.” 20Dòq dơgrữq mơnuĩh gơnuar pioh kaya duh talơvãt prong sì mơnuĩh pô tơha paluơ padờp vual vơla pioh lakơu pơrlao Ba-ra-ba sì pa-mơtai Yàc Je-su. 21Pô lơgar prong tơnĩa pơnõq nhũ: “Pơnõq hã ưng kơu pơrlao asơi dơlãp dua aràc mơnuĩh nĩ ga pơnõq hã?” Pơnõq nhũ drơ: “Ba-ra-ba.” 22Phi-lat tơnĩa pơnõq nhũ: “Yơu nữn, kơu iỡuq ngãq hagĩq ga Je-su, hũ angãn la Yàc Dõc Pơ-tlah, nĩ?” Avih dơgrữq pơnõq nhũ song drơ: “Pỡc đĩn nhũ vẽq pãq dlòc kayơu pỡc.” 23Vloh Phi-lat tơnĩa: “Kơyua vruãq hagĩq mơnuĩh nĩ ngãq sỗq dlàiq?” Nữn pơnõq nhũ priãu sãp prong rlao wỡq tơra, làiq: “Nhũ ãt pỡc đĩn pãq dlòc kayơu pỡc.” 24Tũq Phi-lat thơu nhũ ôh tũq halơi ngãq hagĩq jỡc, nữn pa-vlữq wỡq, kaya nhũn sabôn jẽq tơviãq trôh, nữn ung mãq ia rao tơngãn pãq anãq vual vơla sì đơp: “Kơu ôh hũ dlàiq hagĩq mưng dơrah mơnuĩh nĩ. Pơnõq hã ngãq ãt pơnõq hã vẽq.” 25Avih dơgrữq vual vơla drơ wỡq: “Dơrah nhũ iỡuq tôh pãq dlòc pơnõq hlãq sì pãq dlòc anàq tơcho pơnõq hlãq.” 26Yơu nữn la Phi-lat pơrlao Ba-ra-ba ga pơnõq nhũ, nữn pơđar poh Yàc Je-su sì pơjao Pitrai pioh ãt pỡc đĩn pãq dlòc kayơu pỡc.

27Tũq nữn, dơgrữq tơpuôl ling pô lơgar prong va Yàc Je-su tơma dơlãp sàc ngãq vruãq mơnuĩh pô sì pơjũm pơtõm avih tơpuôl ling dòq tòp dar Pitrai. 28Pơnõq nhũ wàq ao Pitrai sì pa-chồq ga Pitrai sa vlah ao ơtah mơriãh. 29Pơnõq nhũ mơnham sa voh chrơng mưng druơi vloh, pa-tơruãq pãq akõq Pitrai, sì chẽq sa voh gai mơjrà pãq tơngãn hơnuãq Pitrai, Pơnõq nhũ aguãl tơ-ồq trỗt pãq anãq Pitrai sì siẽq siẽl Pitrai làiq: “Talơvãt pitao vual vơla Ju-đa!” 30Pơnõq nhũ ka-chôh ia mơvah pãq Pitrai, vloh pơnõq nhũ mãq gai mơjrà poh pãq akõq Pitrai. 31Tũq pơnõq nhũ siẽq siẽl Pitrai vloh, pơnõq nhũ wàq ao ơtah tơviãq sì pa-chồq wỡq ao ga Pitrai, vloh va Pitrai nao pỡc đĩn pãq dlòc kayơu pỡc.

32Tũq nữn ãn nao tơviãq, pơnõq nhũ bôh sa aràc mơnuĩh lơgar Si-ren, angãn la Si-môn, pơnõq nhũ mãq ung gơlãp kayơu pỡc ga Pitrai. 33Pơnõq nhũ nao trôh sa anĩh angãn la Gô-gô-tha, anĩh nữn hũ gơtha la “Anĩh Tơlàc Akõq.” 34Pơnõq nhũ vrơi Pitrai mơnhũm alãc jrơu sì ia phìq, nữn tũq Pitrai liah vloh, nữn Pitrai ôh ưng mơnhũm. 35Tũq pỡc đĩn Pitrai pãq dlòc kayơu pỡc vloh, pơnõq nhũ pa-mơpha gỡuq ao Pitrai hũ mưng vruãq suãq katih, 36vloh pơnõq nhũ dòq guh pãq đỡn iãq jàc Pitrai. 37Pãq dlòc akõq Pitrai, pơnõq nhũ ơteh pơnuaĩq ngãq gơnĩt dlàiq Pitrai, hũ wãq làiq: “Nĩ la Je-su, pitao vual vơla Ju-đa.” 38Tũq nữn, hũ dua aràc mơnuĩh tlẽq sơwah kađòc pỡc đĩn sigỡuq sì Pitrai, sa aràc dòq gah hơnuãq sì sa aràc dòq gah iãu. 39Dơgrữq mơnuĩh nao gãt sơnhah akõq siẽq siẽl Pitrai, 40làiq: “Ơ mơnuĩh dih, mơnuĩh ròq ngãq tơyah sàc talơvãt sì vữq padỡc wỡq dơlãp tlơu harơi, iỡuq dõc pơ-tlah krơi drơi vẽq! Mơyah làiq hã la Anàq Yàc Pô Lơngĩq, iỡuq trỗt tlah mưng kayơu pỡc vẽq!” 41Dơgrữq mơnuĩh gơnuar pioh kaya duh talơvãt prong, sigỡuq sì dơgrữq mơnuĩh gơnuar pơto voh-va sì dơgrữq mơnuĩh pô tơha, kung siẽq siẽl Pitrai drưh yơu nữn, làiq: 42“Nhũ dõc mơnuĩh tơmo, nữn ôh tũq halơi dõc krơi rùp phuỗt drơi jỡc. Nhũ la Pitao Is-ra-el hũ. Tũq nĩ, pơđar nhũ trỗt tlah mưng kayơu pỡc, vloh pơnõq drơi ròq pãc tui nhũ. 43Nhũ pãc gơnang Yàc Pô Lơngĩq, nữn jỡc tũq nĩ iỡuq luơi Yàc Pô Lơngĩq dõc suãq nhũ mơyah làiq Pitrai ưng hũ nhũ. Kơyua nhũ đơp: ‘Kơu la Anàq Yàc Pô Lơngĩq.’” 44Kung yơu nữn, dua aràc mơnuĩh tlẽq kađòc pỡc đĩn sigỡuq sì Pitrai kung đơp pơnuaĩq siẽq siẽl Pitrai.

45Mưng jơ bãc nãm ròq bôh, kaya sồp kơnãm jũp pơgòp vãq avih lơgar tãl trôh jơ bãc salơpãn. 46Pơgãp jơ bãc salơpãn, Yàc Je-su iơu sa sãp prong, làiq: “E-li, E-li, lam-ma-sa-bãt-ta-ni?” Gơtha la: “Ơ Yàc Pô Lơngĩq hlãq, Ơ Yàc Pô Lơngĩq hlãq, hayơu Pitrai tlàq luơi hlãq?” 47Tũq dơgrữq mơnuĩh ãn dòq dỡc pãq anĩh nữn hmỡq yơu nữn, pơnõq nhũ đơp: “Nhũ iơu E-li.” 48Nữn mư, sa aràc dơlãp tơpuôl pơnõq nhũ đuaĩq nao mãq sa tleh kapah irũq vãq ia mơsãp, chẽq pãq dlòc akõq gai mơjrà vloh vrơi ga Pitrai mơnhũm. 49Nữn dơgrữq mơnuĩh dòq wỡq đơp: “Iỡuq luơi nhũ dòq yơu nữn. Pioh iãq E-li hũ trôh dõc nhũ lơĩh.” 50Vloh Yàc Je-su iơu tơgùq sa pơnuaĩq prong vloh tloh yua suãq. 51Dih, pơcha dơrning dơlãp sàc talơvãt kađòc tarơhẽt ngãq jỡc dua vơnah mưng dlòc trỗt tãl ala, dòq hlùq nữn sơđô mơgơi, sì patơu prong pơchãh. 52Dơgrữq vơnẽq atơu pơh tơviãq sì lũ atơu dơgrữq mơnuĩh sơđah hũ song mơtai hũ hadiuq wỡq. 53Hadơi sì tũq Pitrai hadiuq wỡq, pơnõq nhũ tơviãq mưng vơnẽq, nao tơma dơlãp palơi sơđah sì vrơi pabôh ga lũ mơnuĩh bôh. 54Tũq nữn, hadơi sì tũq bôh tơnãh sơđô mơgơi sì dơgrữq vruãq tơviãq trôh, mơnuĩh apãt sa rơtôh ling sigỡuq sì dơgrữq mơnuĩh iãq jàc Yàc Je-su nữn pơnõq nhũ huaĩq viãq, đơp làiq: “Iỡuq viãq, mơnuĩh nĩ la Anàq Yàc Pô Lơngĩq.” 55Dòq hũ lũ mơnuĩh kamơi pãq đỡn iãq mưng atah, la dơgrữq mơnuĩh nao tui Yàc Je-su, mưng lơgar Ga-li-le pioh duh vruãq Pitrai. 56Dơlãp tơpuôl pơnõq nhũ hũ Ma-ri Ma-đơ-len, Ma-ri, ami Ja-kơ sì Jô-sep, sigỡuq sì ami dơgrữq aràc anàq lakơi Se-be-đe hũ.

57Trôh sồp kơnãm, hũ sa aràc mơnuĩh mơda, angãn la Jô-sep, mưng A-ri-ma-the trôh, nữn rùp phuỗt ung kung la sa aràc mơnuĩh mơgrũ Yàc Je-su hũ. 58Ung trôh pãp Phi-lat yòc lakơu rùp atơu Yàc Je-su. Yơu nữn, Phi-lat pơđar vrơi rùp atơu ga ung. 59Jô-sep mãq rùp atơu Pitrai, mãq pơcha lơmuỡn vơhồc pơpòq rùp atơu, 60vloh chẽq rùp atơu tơma dơlãp lơvàc patơu tali vơhrơu ung hũ nữn ung song boh lơvàc dơlãp patơu. Hadơi nữn, ung vlữc sa voh patơu prong krỡq mơvah bãc lơvàc wỡq, vloh nao. 61Tũq nữn, Ma-ri Ma-đơ-len sì Ma-ri tơmo bôh bòq mơta pãq đỡn, dòq guh pa-sơmũ sì vơnẽq Pitrai.

62Harơi hadơi, nữn la harơi hadơi harơi Rơchãc Pơkhrà, dơgrữq mơnuĩh gơnuar pioh kaya duh talơvãt prong sì mơnuĩh Pha-ri-si pơtõm vơyai vruãq sì Phi-lat. 63Pơnõq nhũ đơp: “Ơ pô, pơnõq hlãq sơdor làiq tũq mơnuĩh vlữq lor nữn dòq hadiuq, nhũ song đơp: ‘Tlơu harơi hadơi, kơu ròq hadiuq wỡq.’ 64Kơyua yơu nữn, lakơu pô pơđar mơnuĩh ling iãq jàc vơnẽq gơjãp kađỡc tãl trôh harơi bãc tlơu, huaĩq pơnõq mơnuĩh mơgrũ nhũ hũ pơlih hũ trôh tlẽq rùp atơu nữn nao, vloh đơp sì vual vơla: ‘Pitrai song mưng kaya mơtai hadiuq wỡq,’ nữn kaya vlữq lor hadơi nĩ ròq iãh rlao kaya vlữq lor tũq hlơu.” 65Phi-lat đơp sì pơnõq nhũ: “Pơnõq ung iỡuq pơđar mơnuĩh ling nao iãq jàc. Nao vẽq sì iãq jàc vơnẽq ga gơjãp kađữc tui hatai ưng pơnõq ung.” 66Yơu nữn la pơnõq nhũ nao sì iãq jàc vơnẽq nữn hũ gơjãp kađữc, mưng vruãq pỡc nỡm voh patơu sì vrơi mơnuĩh ling nao iãq jàc.