Roglai Bible Literal Text
Ma-thi-ơ 26
Vruãq ròq trôh tũq Yàc Je-su đơp vloh dơgrữq pơnuaĩq nữn, Pitrai đơp sì dơgrữq mơnuĩh mơgrũ: “Adơi sơai thơu làiq dòq dua harơi tơra ròq trôh harơi adãt Pơjũm Bõc Nao Gãt, sì Anàq Mơnuĩh ròq kađòc pơjao pioh ãt pỡc đĩn pãq dlòc kayơu pỡc.” Tũq nữn, dơgrữq mơnuĩh gơnuar pioh kaya talơvãt prong sì dơgrữq mơnuĩh pô tơha dơlãp vual vơla pơjũm pơtõm wỡq dơlãp sàc mơnuĩh gơnuar prõc pioh kaya talơvãt, angãn la Kai-phe. Pơnõq nhũ vơyai sigỡuq duah pơnẽq pơlih pioh mãq Yàc Je-su sì pa-mơtai Pitrai. Nữn pơnõq nhũ đơp: “Ôh jỡc ngãq kaya nữn dơlãp harơi pơjũm, pioh ôh ngãq nhũn sabôn dơlãp vual vơla.”
Tũq nữn, Yàc Je-su dòq pãq palơi Be-tha-ni dơlãp sàc Si-môn, sa aràc mơnuĩh kađòc ruãq aphũng, ãn tũq Pitrai dòq guh pãq ban, nữn hũ sa aràc mơnuĩh kamơi va sa kalõq patơu màc hũ mơnhàq viãq la kuơ màc nao trôh anĩh Pitrai dòq, sì tôh mơnhàq nữn pãq dlòc akõq Pitrai ãn dòq guh bõc. Nữn tũq dơgrữq mơnuĩh mơgrũ Pitrai hũ bôh yơu nữn, pơnõq nhũ nong, sì đơp: “Pròc preh yơu nữn ngãq hagĩq? Kơyua mơnhàq nĩ pơlih hũ pa-vlơi hũ lũ jĩn sì alĩn vrơi ga mơnuĩh ka-sõt rơbah.” Nữn Yàc Je-su thơu kaya nữn, nữn tơnĩa pơnõq nhũ: “Hagĩq adơi sơai vloh ngãq kãn ga mơnuĩh kamơi nĩ? Kơyua nhũ song ngãq sa vruãq siàp ga pôgrũ. Adơi sơai gãm hũ mơnuĩh ka-sõt rơbah dòq sigỡuq sì drơi, nữn ôh iỡuq tũq halơi adơi sơai kung hũ pôgrũ dòq sigỡuq. Tũq nhũ tôh mơnhàq nĩ pãq rùp pôgrũ, la nhũ rơchãc pơkhrà ga kaya dor pôgrũ nữn. Pôgrũ đơp Iỡuq viãq, sì adơi sơai, anĩh halơi Pơnuaĩq Siàp nĩ hũ pơto akhàt dơlãp vãq avih dun kơyua, nữn vruãq mơnuĩh kamơi nĩ song ngãq kung ròq hũ đơp akhàt pioh sơdor trôh nhũ.”
Tũq nữn, hũ sa aràc mơnuĩh dơlãp sa plôh dua aràc mơnuĩh gơnuar pơđar, angãn la Ju-đa Is-ka-ri-ôt, nao pãp dơgrữq mơnuĩh gơnuar pioh kaya duh talơvãt prong, tơnĩa: “Pơnõq ung ưng vrơi ga hlãq hadùp, nữn pioh hlãq pơjao wỡq mơnuĩh nữn ga pơnõq ung?” Nữn, pơnõq nhũ sơkãq vrơi ga nhũ tlơu plôh tleh priãq. Sì mưng tũq nữn, Nhũ duah tũq lơwah pioh pơjao Pitrai.
Dơlãp harơi chơmrờp la harơi bõc Bẽn Ôh Voh Tapơi, dơgrữq mơnuĩh mơgrũ trôh tơnĩa Yàc Je-su: “Pôgrũ ưng pơnõq hlãq rơchãc pồq ga pôgrũ bõc adãt Pơjũm Bõc Nao Gãt pãq halơi?” Nữn Pitrai pơđar làiq: “Iỡuq nao tơma dơlãp palơi, nao pãp sa aràc mơnuĩh dih sì đơp sì mơnuĩh nữn: ‘Pôgrũ pơđar: “Tũq jơ pôgrũ ròq jẽq trôh; pôgrũ ròq pơdòq ngãq adãt Pơjũm Bõc Nao Gãt dơlãp sàc sơai sigỡuq sì dơgrữq mơnuĩh mơgrũ pôgrũ hũ.”’” Dơgrữq mơnuĩh mơgrũ ngãq tui yơu pơnuaĩq Yàc Je-su song pơto ga pơnõq nhũ sì rơchãc pồq kaya bõc adãt Pơjũm Bõc Nao Gãt.
Tũq nữn, trôh jơ mơlãp, Pitrai dòq guh bõc sigỡuq sì sa plôh dua aràc mơnuĩh mơgrũ. Tũq pơnõq nhũ ãn dòq bõc, Pitrai đơp sì pơnõq nhũ: “Iỡuq viãq Pôgrũ đơp sì adơi sơai, hũ sa aràc dơlãp adơi sơai ròq jơdrãq sì pôgrũ.” Pơnõq nhũ ka-ồq ka-ãn viãq sì tãl aràc tơnĩa Pitrai: “Ơ Yàc, nữn la ôh iỡuq hlãq yơh?” Nữn Pitrai hẽ: “Mơnuĩh chròq tơngãn tơmã dơlãp sơlao sì pôgrũ nĩ, nữn la mơnuĩh ròq jơdrãq dì pôgrũ. Bôh làiq Anàq Mơnuĩh ròq nao, tui yơu pơnuaĩq song wãq mưng Pitrai, Nữn dleh dlàr ga mơnuĩh jơdrãq sì Anàq Mơnuĩh! Nhũ ôh hũ đeh tơviãq nữn la siàp rlao.” Ju-đa, mơnuĩh ròq jơdrãq sì Pitrai, tơnĩa: “Ơ pôgrũ, nữn la ôh iỡuq hlãq yơh?” Pitrai hẽ: “Mĩn rùp phuỗt hã song đơp kaya nữn.”
Tũq pơnõq nhũ ãn dòq bõc, Yàc Je-su mãq bẽn, ỡn ngai sì pẽq bẽn. Pitrai vrơi bẽn nữn ga mơnuĩh mơgrũ sì đơp: “Mãq vẽq sì bõc. Nĩ la rùp phàp pôgrũ hũ.” Pitrai mãq chơwàt ỡn ngai, vloh vrơi ga pơnõq nhũ sì đơp: “Avih tãl aràc iỡuq mơnhũm vẽq chơwàt nĩ. Kơyua nĩ la dơrah kaya hẽ grưh pôgrũ hũ, la dơrah tôh tơviãq ga lũ mơnuĩh pioh pơnõq nhũ hũ tơleh dlàiq. Nữn pôgrũ đơp pioh ga adơi sơai thơu, gơnĩt viãq la pôgrũ ròq ôh mơnhũm ia voh nho nĩ wỡq tơra, tãl trôh harơi nữn pôgrũ mơnhũm ia nho vơhrơu sigỡuq sì adơi sơai dơlãp lơgar Ama pôgrũ hũ.”
Hadơi sì tũq adoh rơgãm pơnuaĩq sơuỗt mơyòp vloh, pơnõq nhũ đìq nao pãq chỡq Ô-li-ve. Tũq nữn, Yàc Je-su đơp sì pơnõq nhũ: “Mơlãp nĩ, avih pơnõq adơi sơai ròq sơnẽq sỗq kơyua mưng pôgrũ, kơyua hũ pơnuaĩq wãq:
‘Kơu ròq poh mơnuĩh dlãc
nữn avo dơlãp tơpuôl ròq kađòc chơlah chơluỡn.’
Vloh hadơi sì tũq pôgrũ hadiuq wỡq, pôgrũ ròq nao hlơu adơi sơai trôh pãq lơgar Ga-li-le.” Nữn Pier drơ sì Pitrai, làiq: “Bôh làiq avih tãl aràc ròq sơnẽq sỗq kơyua mưng pôgrũ, nữn hlãq kung ôh tũq halơi sơnẽq sỗq ôh.” Yàc Je-su đơp sì ung: “Iỡuq viãq Pôgrũ đơp sì sơai, dơlãp mơlãp nĩ, hlơu sì tũq mơnũq kơ-iòc, sơai ròq kơmlah pôgrũ tlơu bãc.” Pier drơ sì Pitrai: “Sì mơyah làiq hlãq iỡuq mơtai sigỡuq sì pôgrũ, gơnĩt viãq la hlãq kung ròq ôh kơmlah luơi pôgrũ.” Avih dơgrữq mơnuĩh mơgrũ dih kung đơp yơu nữn.
Hadơi nữn, Yàc Je-su nao sì pơnõq nhũ trôh sa anĩh angãn la Get-se-ma-ne, sì Pitrai đơp sì dơgrữq mơnuĩh mơgrũ: “Dòq guh vẽq pãq anĩh nĩ dơlãp tũq Pôgrũ nao pãq anĩh dih iơu lakơu.” Pitrai va Pier sigỡuq sì dua aràc anàq lakơi Se-be-đe nao tui Pitrai, vloh Pitrai pơdòq kaya ka-ồq ka-ãn sì tơrãq viãq. Tũq nữn, Pitrai đơp sì pơnõq nhũ: “Vơngãq yua pôgrũ ka-ồq ka-ãn viãq tãl trôh mơtai. Dòq vẽq pãq anĩh nĩ sì mơ-uãh chơkhãq sigỡuq sì pôgrũ.” Pitrai nao ơtah sa asĩt tơra, Pitrai kồq kapìq mơta trỗt sì iơu lakơu: “Ơ Ama anàq hũ, mơyah làiq jỡc, lakơu vrơi chơwàt nĩ tlah mưng anàq. Nữn ôh yơu hatai ưng anàq, nữn yơu hatai ưng Ama.” Vloh Pitrai trôh pãq anĩh dơgrữq mơnuĩh mơgrũ sì bôh pơnõq nhũ ãn dòq pìq, nữn Pitrai đơp sì Pier: “Yơu nữn, adơi sơai ôh tũq halơi mơ-uãh chơkhãq sigỡuq sì pôgrũ hũ sa tũq jơ yơh? Iỡuq mơ-uãh chơkhãq vẽq sì iơu lakơu pioh adơi sơai ôh tơmã dơlãp kaya aniãi. Viãq, vơngãq hatai nữn ưng, dòq rơlo rùp vloh lơduh lơmuỡn.” Pitrai nao bãc dua sì iơu lakơu wỡq, làiq: “Ơ Ama anàq hũ, mơyah làiq chơwàt nĩ pơlih ôh tũq halơi tlah mưng anàq sì anàq iỡuq mơnhũm chơwàt nĩ, nữn lakơu hatai ưng Ama hũ ngãq jỡc.” Pitrai mai wỡq bãc tơra sì bôh pơnõq nhũ ãn dòq pìq lơngãp, kơyua mơta pơnõq nhũ yùp viãq. Kơyua yơu nữn, Pitrai luơi wỡq pơnõq nhũ sì nao, iơu lakơu bãc tlơu đơp dơgrữq pơnuaĩq drưh yơu pơnuaĩq iơu lakơu hlơu. Hadơi nữn, Yàc Je-su mai trôh pãq anĩh dơgrữq mơnuĩh mơgrũ sì tơnĩa pơnõq nhũ: “Adơi sơai gãm dòq pìq lơngãp sì padơi dleh yơh? Dih, jơ jẽq trôh, sì Anàq Mơnuĩh ròq kađòc pơjao tơma tơngãn mơnuĩh hũ dlàiq. Tơgùq dỡc vẽq, nao. Dih, mơnuĩh jơdrãq pôgrũ trôh vloh.”
Tũq Yàc Je-su ãn dòq đơp, nữn dih, Ju-đa, sa aràc dơlãp sa plôh dua aràc mơnuĩh mơgrũ, trôh. Nao sigỡuq sì nhũ la sa tơpuôl mơnuĩh lũ viãq apãt đao sì gai, hũ dơgrữq mơnuĩh gơnuar pioh kaya duh talơvãt prong sì mơnuĩh pô tơha dơlãp vual vơla pơđar. Tũq nữn, mơnuĩh jơdrãq Yàc Je-su song vrơi ga pơnõq nhũ sa nỡm, yơu nĩ: “Kơu chũm asơi nữn la mơnuĩh nữn, mãq vẽq nhũ.” Nữn mư, nhũ trôh pãq anĩh Yàc Je-su sì đơp: “Talơvãt pôgrũ!” vloh nhũ chũm Pitrai. Yàc Je-su đơp sì nhũ: “Ơ mơyơu, vruãq sơai trôh ngãq nữn iỡuq ngãq vẽq.” Yơu nữn la pơnõq nhũ trôh yơr tơngãn pãq Yàc Je-su sì mãq Pitrai. Sì dih, sa aràc dơlãp dơgrữq mơnuĩh nao sì pabôh bòq mơta sigỡuq sì Yàc Je-su, tũq mãq tơngãn suãq đao nhũ tơviãq tãq mơnuĩh halỗt mơnãq mơnuĩh gơnuar prõc va akõq pioh kaya talơvãt hũ, koh tloh tanĩa mơnuĩh nữn. Yàc Je-su đơp sì mơnuĩh nữn: “Iỡuq chròq đao sơai tơmã sơrỗp, kơyua avih tãl aràc asơi apãt đao nữn ròq mơtai mưng đao. Hẽla iỡuq lơĩh sơai sơnơng pôgrũ ôh rgơi lakơu sì Ama pôgrũ, nữn Pitrai pơđar trôh mư ga pôgrũ rlao sa plôh dua tơpuôl mơnuĩh gơnrơh yơh? Yơu nữn, ngãq yơu hayơu dơgrữq pơnuaĩq Sơrãq Sơđah song wãq iỡuq viãq, làiq vruãq nĩ iỡuq tơviãq yơu nữn?” Tơmã jơ nữn, Yàc Je-su đơp sì pơnõq nhũ: “Pơnõq hã apãt đao sì gai mai pãq nĩ pioh mãq kơu yơu mãq mơnuĩh tlẽq sơwah yơh? Dơgrữq harơi kơu dòq guh pơto akhàt dơlãp sàc talơvãt nữn pơnõq hã vloh ôh mãq kơu. Nữn avih dơgrữq vruãq nĩ tơviãq trôh pioh tơviãq iỡuq viãq yơu pơnuaĩq dơgrữq mơnuĩh gơnuar hwơr.” Tũq nữn, avih dơgrữq mơnuĩh mơgrũ tlàq luơi Pitrai đuaĩq dỡuq.
Tũq nữn, dơgrữq mơnuĩh mãq Yàc Je-su va Pitrai nao trôh pãq anĩh mơnuĩh gơnuar prõc apãt akõq pioh kaya duh talơvãt Kai-phe, la anĩh dơgrữq mơnuĩh gơnuar pơto voh-va sì mơnuĩh pô tơha song pơjũm sigỡuq. Nữn Pier nao tui Pitrai ơtah ơtah trôh pãq làt sàc prong mơnuĩh gơnuar prõc apãt akõq pioh kaya duh talơvãt. Ung tơmã dơlãp sì dòq guh sì tơpuôl mơnuĩh ling iãq jàc pioh iãq vruãq nữn tơviãq yơu hayơu. Tũq nữn, dơgrữq mơnuĩh gơnuar pioh kaya duh talơvãt prong sì avih Tơpuôl Mơnuĩh Gơnuar Chahrơna duah pơnuaĩq ngãq chưng lor yãq Yàc Je-su, pioh pơnõq nhũ pơlih hũ ngãq gơnĩt dlàiq pa-mơtai Pitrai. Pơnõq nhũ ôh duah bôh krung pahanh halơi, bôh làiq lũ mơnuĩh trôh dòq dỡc ngãq chưng lor. Nữn hadơi nữn, hũ dua aràc mơnuĩh trôh, ròq đơp làiq: “Mơnuĩh nĩ song pa-thơu: ‘Pơlih kơu ngãq tarơyah sàc talơvãt Yàc Pô Lơngĩq hũ sì vỡq padỡc nhũ wỡq dơlãp tlơu harơi.’” Mơnuĩh gơnuar prõc apãt akõq pioh kaya duh talơvãt tơgùq dỡc tơnĩa Pitrai: “Hã ôh hẽ wỡq hagĩq yơh? Pơnõq nhũ ãn dòq yãq hã vruãq hagĩq yơu nữn?” Nữn Yàc Je-su dòq suà. Mơnuĩh gơnuar prõc apãt akõq pioh kaya duh talơvãt đơp sì Pitrai: “Kơu tachơi sơtãp Yàc Pô Lơngĩq hadiuq gãm gãm sì pơđar hã iỡuq vrơi ga pơnõq kơu thơu hã iỡuq viãq la Yàc Dõc Pơ-tlah, Anàq Yàc Pô Lơngĩq yơh?” Yàc Je-su hẽ: “Mĩn rùp phuỗt ung song đơp yơu nữn. Bôh làiq yơu nữn, kơu đơp ga pơnõq ung thơu, mưng tũq nĩ tãl trôh hadơi, pơnõq ung ròq bôh Anàq Mơnuĩh dòq guh gah hơnuãq Pitao Gơnuar Chơnuãq hũ, sì ròq trôh pãq dlòc huãl lơngĩq.” Tũq nĩ, mơnuĩh gơnuar prõc pioh kaya duh talơvãt ròq hẽt ao nhũ, sì đơp: “Nhũ song đơp mơsãc sơvĩl. Hayơu pơnõq drơi vloh chàc iỡuq hũ mơnuĩh ngãq chưng? Dih, Tũq nĩ pơnõq ung song hmỡq pơnuaĩq đơp mơsãc sơvĩl nữn vloh. Pơnõq ung sơnơng hayơu?” Pơnõq nhũ drơ: “Nhũ iỡuq mơtai.” Vloh pơnõq nhũ ka-chôh ia mơvah pãq bòq Pitrai, poh sađũq Pitrai, kung hũ dơgrữq mơnuĩh pah Pitrai, sì đơp làiq: “Ơ, Yàc Dõc Pơ-tlah, iỡuq đơp hwơr ga pơnõq kơu vẽq. Asơi la mơnuĩh song poh ung nữn?”
Tũq nữn, Pier ãn dòq guh gah lơniãu làt blàc, hũ sa aràc mơnuĩh halỗt mơnãq kamơi trôh anĩh ung, đơp: “Ung kung la mơnuĩh dòq sigỡuq sì Je-su, mơnuĩh Ga-li-le.” Nữn Pier kơmlah pãq anãq avih aràc pơnõq nhũ, làiq: “Hlãq ôh thơu nai ãn đơp hagĩq.” Tũq Pier tơviãq blàc trôh bãc prong, hũ mơnuĩh halỗt kamơi tơmo iãq bôh ung nữn đơp sì dơgrữq mơnuĩh dòq pãq đỡn: “Mơnuĩh nĩ kung dòq sigỡuq sì Je-su, mơnuĩh Na-sa-ret.” Ung kơmlah wỡq, sì sơtãp rùp làiq: “Hlãq ôh thơu ung nữn!” Sa asĩt tơra, dơgrữq mơnuĩh dòq dỡc jẽq pãq đỡn trôh đơp sì Pier: “Gơnĩt viãq ung kung la sa aràc dơlãp tơpuôl pơnõq nhũ, kơyua sãp đơp ung hũ jỡc aràc thơu ung.” Nữn la ung pơdòq đơp, sì sơtãp rùp: “Hlãq ôh thơu mơnuĩh nữn,” nữn mư mơnũq kơ-iòc. Sì Pier sơdor wỡq pơnuaĩq Yàc Je-su song đơp: “Hlơu sì tũq mơnũq ka-ôh kơ-iòc, sơai ròq kơmlah pôgrũ tlơu bãc.” Vloh, ung nao tơviãq lơniãu blàc sì sia lơngũt viãq.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.