Ma-thi-ơ 25

1Yơu nữn, lơgar lơngĩq ròq drưh yơu sa plôh aràc mơnuĩh kamơi dơra apãt đeng nhũ nao ròq mơtơu lakơi. 2Nữn dơlãp pơnõq nhũ hũ lơmã aràc mơnuĩh gơla sì lơmã aràc mơnuĩh jãc rgơi. 3Kơyua lơmã aràc mơnuĩh kamơi gơla, hadơi nữn nhũ apãt đeng nao, nữn pơnõq nhũ ôh va mơnhàq nao tui sơgãm sì drơi. 4Dòq dơgrữq mơnuĩh kamơi jãc rgơi nữn va mơnhàq nao tui dơlãp kalõq sigỡuq sì đeng. 5Tũq nữn, kơyua mơtơu lakơi trôh suơi, avih dơgrữq pơnõq nhũ tơnòq mơta sì pìq yùp. 6Nữn trôh tũq khrãh mơlãp, hũ sãp iơu: ‘Mơtơu lakơi trôh dih! Iỡuq tơviãq nao trôh tồq ròq.’ 7Yơu nữn, avih dơgrữq mơnuĩh kamơi dơra nữn hũ mơdưh tơgùq, sì rơchãc wỡq đeng nhũ. 8Tũq nữn, dơgrữq mơnuĩh kamơi gơla đơp sì dơgrữq mơnuĩh kamơi jãc rgơi: ‘Lakơu vrơi ga pơnõq hlãq sa asĩt mơnhàq pơnõq sơai hũ, kơyua đeng pơnõq hlãq jẽq pơdãp.’ 9Nữn dơgrữq mơnuĩh kamơi jãc rgơi drơ làiq: ‘Ôh jỡc, huaĩq ôh tãl ga pơnõq hlãq sì pa-mơpha gãm pơnõq sơai; Iỡuq pơlih nao trôh pãq mơnuĩh pa-vlơi mơnhàq sì vlơi ga drơi.’ 10Bôh làiq yơu nữn, dơlãp tũq pơnõq nhũ nao vlơi mơnhàq, nữn mơtơu lakơi trôh, sì dơgrữq mơnuĩh halơi song rơchãc lơĩh nữn nao sigỡuq sì mơnuĩh mơtơu lakơi tơmã dơlãp anĩh bõc mơnhũm pa-khiãng, vloh nữn ròq krỡq bãc. 11Hadơi nữn, dơgrữq mơnuĩh kamơi dơra gơla dih kung trôh, pa-thơu: ‘Ơ Pô, ơ Pô, lakơu pơh bãc ga pơnõq hlãq.’ 12Nữn hẽ làiq, ‘Iỡuq viãq, Pôgrũ đơp sì pơnõq nai, kơu ôh thơu pơnõq nai.’ 13Yơu nữn, iỡuq mơ-uãh chơkhãq, kơyua adơi sơai ôh thơu harơi kung ôh thơu jơ.

14Yơu nữn lơgar Yàc kung drưh yơu sa aràc mơnuĩh dih jẽq nao ơtah. Ung iơu dơgrữq mơnuĩh halỗt mơnãq drơi mai sì pơjao ga pơnõq nhũ kaya mơnã drơi hũ. 15Ung pơjao ga mơnuĩh nĩ lơmã ta-lỡng, mơnuĩh dih dua ta-lỡng, sì mơnuĩh tơmo wỡq sa ta-lỡng, dơgrữq tãl aràc hũ pơjao tui yơu prãn drơi hũ. Vloh nữn ung nao mư. 16Mơnuĩh tồq mãq lơmã ta-lỡng nao kãq pa-vlơi hũ jĩn, sì ngãq hũ lơmã ta-lỡng tơmo tơra. 17Kung yơu nữn, mơnuĩh tồq dua ta-lỡng kung ngãq hũ dua ta-lỡng tơmo tơra. 18Nữn dòq mơnuĩh halỗt mơnãq tồq sa ta-lỡng nữn nao chõh lơvàc pãq ala hlùq vloh dor padỡuq jĩn priãq pô nhũ hũ. 19Tũq nữn, hadơi tũq sa lơwah ơtah, pô dơgrữq mơnuĩh halỗt mơnãq nữn mai wỡq sì gơrhia katih ga pơnõq nhũ. 20Hadơi nữn mơnuĩh halỗt mơnãq tồq lơmã ta-lỡng trôh va pơtãl lơmã ta-lỡng tơra, sì đơp: ‘Ơ pô, pô song pơjao ga hlãq lơmã ta-lỡng. Nữn iãq nĩ, hlãq song ngãq tơviãq hũ lơmã ta-lỡng wỡq.’ 21Pô đơp sì mơnuĩh nữn: ‘Siàp viãq, ơ mơnuĩh halỗt mơnãq lơmuỡn siàp sì tui tơpãq dih! Sơai song tui tơpãq dơlãp vruãq tìt hũ. Kơu ròq pơjao ga sơai apãt iãq lũ vruãq. Iỡuq tơmã tồq hũ kaya sơh sơr sigỡuq sì pô drơi hũ.’ 22Mơnuĩh halỗt mơnãq song tồq dua ta-lỡng kung trôh đơp vrơi thơu: ‘Ơ pô, ung song pơjao ga hlãq dua ta-lỡng. Nữn iãq nĩ, hlãq song ngãq tơviãq hũ dua ta-lỡng wỡq tơra.’ 23Pô đơp sì mơnuĩh nữn: ‘Siàp viãq, mơnuĩh halỗt mơnãq tơpãq siàp sì tui tơpãq dih! Sơai song ngãq tơpãq dơlãp vruãq tìt song hũ pơjao. Kơu ròq chẽq sơai apãt iãq lũ vruãq. Iỡuq tơmã tồq kaya sơh sơr sigỡuq sì pô drơi.’ 24Dòq mơnuĩh halỗt mơnãq song tồq sa ta-lỡng kung trôh vrơi pa-thơu: ‘Ơ pô, hlãq thơu pô la mơnuĩh gơjãp kađỡc. Pô yuãq anĩh drơi ôh dràq sì sơpuãq pơtõm anĩh drơi ôh sa-prãi. 25Kơyua hlãq huaĩq, nữn jỡc hlãq va nao padỡuq ta-lỡng pô hũ dơlãp hlùq. Nĩ, nữn la jĩn pô hũ.’ 26Nữn mơnuĩh pô hẽ: ‘Ơ mơnuĩh halỗt mơnãq iãh mơsãc sì alah atàq dih, sơai thơu kơu yuãq anĩh kơu ôh dràq sì sơpuãq pơtõm pãq anĩh kơu ôh sa-prãi. 27Kơyua yơu nữn, iỡuq viãq sơai iỡuq pơjao jĩn priãq kơu hũ ga mơnuĩh vrơi anham, vloh tũq kơu mai wỡq, kơu ròq tồq mãq kaya phuỗt sì hajũc halàq wỡq. 28Yơu nữn, iỡuq mãq ta-lỡng mơnuĩh nĩ hũ sì vrơi ga mơnuĩh halỗt mơnãq song hũ sa plôh ta-lỡng. 29Kơyua asơi song hũ, nữn ròq hũ vrơi pơtãl wỡq — sì vloh dơlah dơlai wỡq tơra. Nữn pơweh sì mơnuĩh ôh hũ hagĩq, nữn gãm sì dơgrữq kaya nhũ hũ kung ròq kađòc suãq mãq wỡq mưng nhũ. 30Iỡuq prah mơnuĩh halỗt mơnãq ôh kuơ nữn dơlãp anĩh sồp kơnãm pãq lơniãu, anĩh ròq hũ kaya sia chõq sì kẽq tagơi.’

31Dơlãp tũq Anàq Mơnuĩh trôh dơlãp kaya gơhluh Pitrai sigỡuq sì avih mơnuĩh gơnrơh, nữn Pitrai ròq dòq guh pãq dlòc sơvan gơhluh drơi hũ. 32Avih vual vơla ròq pơjũm wỡq pãq anãq Pitrai, sì Pitrai ròq pa-chơlah mơnuĩh nĩ sì mơnuĩh dih, nữn mơnuĩh dlãc avo pa-chơlah avo sì vơve mĩn. 33Pitrai ròq chẽq avo pãq gah hơnuãq drơi hũ, dòq vơve nữn dòq pãq gah iãu. 34Hadơi nữn, Pitao ròq đơp sì dơgrữq mơnuĩh dòq gah hơnuãq drơi: ‘Pơnõq anàq, la dơgrữq mơnuĩh song hũ Ama kơu vrơi lơngai, iỡuq mai vẽq tồq mãq lơgar lơngĩq song hũ rơchãc lơĩh ga drơi mưng tũq chrơng pajỡc lơngĩq tơnãh. 35Kơyua Kơu lơ-pa, pơnõq anàq vrơi Kơu bõc; Kơu mơhao, nữn pơnõq anàq vrơi Kơu mơnhũm; Kơu la mơnuĩh thuãi chrih, nữn pơnõq anàq tồq ròq tơma sàc; 36Kơu dòq kalôh, pơnõq anàq pa-chồq ga Kơu; Kơu ruãq, pơnõq anàq iãq chơ Kơu; Kơu kađòc mãq krỡq, pơnõq anàq nao rơwãc Kơu.’ 37Tũq nữn, dơgrữq mơnuĩh tơpãq dãng ròq drơ sì Pitrai làiq: ‘Talơvãt Yàc, tũq halơi pơnõq anàq bôh Pitrai lơ-pa nữn vrơi ga Pitrai bõc? Hẽla mơhao nữn vrơi ga Pitrai mơnhũm? 38Tũq halơi pơnõq anàq bôh Pitrai la mơnuĩh thuãi nữn tồq ròq Pitrai tơma sàc? Hẽla dòq kalôh nữn pa-chồq ao ga Pitrai? 39Nữn, tũq halơi pơnõq anàq bôh Pitrai ruãq hẽla kađòc mãq krỡq nữn nao rơwãc Pitrai?’ 40Pitao ròq hẽ sì pơnõq nhũ: ‘Iỡuq viãq Kơu đơp sì pơnõq anàq, pơnõq anàq ngãq vruãq nữn ga sa aràc mơnuĩh tìt rlao avih dơlãp anĩh dơgrữq adơi sơai Kơu hũ, nữn la pơnõq anàq song ngãq ga Kơu.’ 41Vloh pơtui wỡq Pitao ròq đơp sì dơgrữq mơnuĩh dòq gah iãu: ‘Ơ dơgrữq mơnuĩh kađòc sơtãp lơmah, pơnõq hã kadũn vẽq tlah mưng kơu nữn nao tơmã dơlãp apôi dòq gãm gãm la anĩh song rơchãc lơĩh ga kamlai satan sì dơgrữq tơpuôl kamlai nhũ hũ. 42Kơyua kơu lơ-pa, pơnõq hã ôh vrơi bõc; kơu mơhao, pơnõq hã ôh vrơi mơnhũm; 43Kơu la mơnuĩh thuãi chrih, nữn pơnõq hã ôh tồq ròq tơma sàc; Kơu dòq kalôh pơnõq hã ôh pa-chồq ga Kơu; Kơu ruãq sì kađòc mãq krỡq, pơnõq hã ôh iãq chơ kơu.’ 44Tũq nữn, pơnõq nhũ kung drơ: ‘Ơ Yàc, tũq halơi pơnõq anàq bôh Pitrai lơ-pa, hẽla mơhao, ngãq mơnuĩh thuãi chrih, dòq kalôh, kađòc ruãq, hẽla kađòc mãq krỡq nữn vloh ôh duh vruãq Pitrai?’ 45Tũq nữn, Pitao ròq hẽ sì pơnõq nhũ làiq: ‘Iỡuq viãq Kơu đơp sì pơnõq hã, pơnõq hã ôh ngãq vruãq nữn ga sa aràc dơlãp dơgrữq mơnuĩh tìt rlao avih dơlãp tơpuôl nĩ, nữn la pơnõq hã ôh ngãq ga Kơu.’ 46Dơgrữq mơnuĩh nữn ròq tơmã dơlãp kaya ngãq dlàiq gãm gãm, dòq dơgrữq mơnuĩh tơpãq dãng nữn tơmã dơlãp kaya hadiuq dòq gãm gãm.”