Ma-thi-ơ 28

1Trôh hadơi harơi Sa-bat, dơlãp tũq jrang mư-ờp harơi chơmrờp dơlãp tơjuh harơi, Ma-ri Ma-đơ-len sì Ma-ri tơmo trôh rơwãc vơnẽq. 2Dih, hũ sa kaya sơđô mơgơi tơnãh prong viãq, kơyua hũ sa aràc mơnuĩh gơnrơh Yàc hũ mưng lơngĩq trỗt, trôh sì vlữc voh patơu tơviãq, vloh dòq guh pãq dlòc nữn. 3Rùp phuỗt mơnuĩh gơnrơh drưh yơu gơlia liãq, dòq ao nữn kòq yơu pơlia. 4Mưng huaĩq mơnuĩh gơnrơh nữn, tơpuôl mơnuĩh ling iãq jàc vơnẽq tatơh rùp nữn tơviãq jỡc yơu mơnuĩh mơtai. 5Nữn mơnuĩh gơnrơh đơp sì dơgrữq mơnuĩh kamơi: “Pơnõq nai juơi huaĩq, kơyua kơu thơu làiq pơnõq sơai duah Je-su, Pitao song ãt pỡc đĩn. 6Pitrai ôh dòq pãq nĩ ôh, nữn hadiuq wỡq vloh, tui yơu pơnuaĩq Pitrai song đơp. Iỡuq trôh iãq anĩh Pitrai đĩh. 7Iỡuq sơmar nao, iỡuq akhàt ga dơgrữq mơnuĩh mơgrũ Pitrai làiq: ‘Yàc song mưng kaya mơtai hadiuq wỡq. Sì iãq dih, Pitrai ròq nao hlơu adơi sơai trôh pãq lơgar Ga-li-le. Pãq đỡn, adơi sơai ròq bôh Pitrai.’ Iãq nĩ, kơu song akhàt ga pơnõq sơai vloh.” 8Sì tũq nữn tơpuôl mơnuĩh kamơi nữn sơmar sơmar vruh mưng anĩh vơnẽq bãc sì huaĩq gãm sì sơh sơr viãq, pơnõq nhũ ròq đuaĩq nao akhàt ga dơgrữq mơnuĩh mơgrũ Pitrai. 9Dih, Yàc Je-su pãp pơnõq nhũ, sì đơp: “Siàp drơi lơĩh pơnõq sơai!” Nữn tơpuôl mơnuĩh kamơi trôh jẽq, kuar tơkai Pitrai sì duh talơvãt Pitrai. 10Vloh Yàc Je-su đơp sì pơnõq nhũ: “Juơi huaĩq. Iỡuq nao akhàt ga adơi sơai pôgrũ trôh pãq lơgar Ga-li-le. Pãq đỡn pơnõq nhũ ròq pãp pôgrũ.”

11Dơlãp tũq pơnõq mơnuĩh kamơi nữn nao, nữn iãq dih hũ dơgrữq mơnuĩh ling iãq jàc vơnẽq tơma dơlãp palơi akhàt wỡq ga dơgrữq mơnuĩh gơnuar pioh kaya duh talơvãt prong avih dơgrữq vruãq song tơviãq trôh. 12Hadơi sì tũq pơtõm sì dơgrữq mơnuĩh pô tơha sì vơyai vruãq, song vloh pơnõq nhũ vrơi ga dơgrữq mơnuĩh ling nữn sa katih jĩn priãq prong viãq, 13sì hakơi: “Iỡuq đơp: ‘Dơgrữq mơnuĩh mơgrũ nhũ song trôh dơlãp tũq mơlãp sì tlẽq rùp atơu nhũ dơlãp tũq pơnõq hlãq ãn dòq pìq lơngãp.’ 14Mơyah làiq vruãq nĩ hmỡq trôh ga pô lơgar prong, pơnõq kơu ròq duah pơnuaĩq đơp sì ung nữn sì rơmiãq jàc pơnõq sơai ôh pãp kaya dleh dlàr.” 15Yơu nữn la tơpuôl mơnuĩh ling mãq jĩn vloh ngãq tui yơu pơnuaĩq hakơi. Vruãq nữn hũ đơp tơviãq vãq avih dơlãp vual vơla Ju-đa sì gãm tãl trôh harơi nĩ.

16Nữn sa plôh sa aràc mơnuĩh mơgrũ nao trôh pãq lơgar Ga-li-le, trôh pãq chỡq nữn Yàc Je-su song pơto ga pơnõq nhũ. 17Dơlãp tũq pơnõq nhũ bôh Pitrai, nữn pơnõq nhũ duh talơvãt Pitrai, nữn hũ dơgrữq mơnuĩh dòq dỡq dỡng. 18Yàc Je-su trôh đơp sì pơnõq nhũ: “Avih dơgrữq kaya gơnuar chơnuãq pãq dlòc lơngĩq sì pãq ala hlùq song pơjao ga pôgrũ. 19Kơyua yơu nữn, nao vẽq sì ngãq ga dơgrữq vual vơla tơviãq jỡc mơnuĩh mơgrũ pôgrũ hũ. Iỡuq ngãq bãp-tem ga pơnõq nhũ mãq angãn Yàc Ama, Yàc Anàq sì Yàc Vơngãq Sơđah. 20Iỡuq pơto pơnõq nhũ rơmiãq jàc avih dơgrữq kaya sì pôgrũ song akhàt ga adơi sơai. Sì iãq dih, pôgrũ dòq gãm gãm sigỡuq sì adơi sơai, tãl trôh luôĩq hadơi.”