Ma-thi-ơ 19:26

1Tũq Yàc Je-su đơp vloh dơgrữq pơnuaĩq nữn, Pitrai tơviãq tlah mưng Ga-li-le nao trôh pãq phũm Ju-đe dòq pãq gah dih kròc Jô-đãnh. 2Hũ tơpuôl vual vơla lũ viãq nao tui Pitrai sì Pitrai pakhơĩh ruãq ga pơnõq nhũ pãq đỡn.

3Hũ dơgrữq mơnuĩh Pha-ri-si trôh pioh lòc Pitrai, nữn pơnõq nhũ tơnĩa Pitrai: “Mơnuĩh lakơi hũ gơnuar tlàq luơi sơdiuq drơi kơyua mưng dơgrữq kanõh gơtha halơi lơĩh?” 4Yàc Je-su hẽ: “Pơnõq ung ôh pơpoh bôh Pitao chrơng pajỡc pơnõq nhũ mưng tũq chơmrờp song chrơng pajỡc pơnõq nhũ, la mơnuĩh lakơi sì mơnuĩh kamơi yơh? 5Pitrai kung đơp: ‘Kơyua mưng kanõh gơtha nữn, mơnuĩh lakơi ròq tơviãq mưng ami ama drơi nữn pãq mơtlìq sì sơdiuq, sì dua aràc ròq tơviãq jỡc sa rơlo rùp?’ 6Kơyua yơu nữn, pơnõq nhũ ôh dòq la dua tơra, nữn la sa rơlo rùp. Yơu nữn, dơgrữq kaya Yàc Pô Lơngĩq song pơgãp sì gỡuq, nữn anàq mơnuĩh ôh hũ gơnuar pa-chơlah.” 7Pơnõq nhũ tơnĩa Pitrai: “Yơu nữn kơyua hayơu Môi-se pơto pơđar pơnõq hlãq vrơi sơrãq wãq patloh vloh tlàq luơi sơdiuq vẽq?” 8Pitrai hẽ pơnõq nhũ làiq: “Kơyua mưng kaya khãc hatai pơnõq ung hũ nữn jỡc Môi-se vrơi gơnuar pơnõq ung patloh sơdiuq, nữn mưng tũq chơmrờp ôh kaya nữn ôh iỡuq yơu nữn. 9Kơu đơp ga pơnõq ung thơu làiq lơniãu mưng dlàiq arĩh athãm, mơnuĩh halơi ngãq vơ-ar patloh sơdiuq drơi vloh khiãng kamơi tơmo nữn sỗq dlàiq drì drõc; mơnuĩh lakơi halơi khiãng sa aràc mơnuĩh kamơi kađòc tlàq luơi kung sỗq dlàiq drì drõc.” 10Dơgrữq mơnuĩh mơgrũ drơ sì Yàc Je-su: “Mơyah làiq mơnuĩh lakơi iỡuq ngãq sì sơdiuq drơi yơu nữn, nữn siàp rlao ôh padỡc sàc anĩh.” 11Nữn Yàc Je-su đơp sì pơnõq nhũ: “Ôh iỡuq asơi kung tồq mãq jỡc pơnuaĩq đơp nĩ, nữn la mĩn dơgrữq mơnuĩh hũ vrơi kaya anĩt nữn soh. 12Kơyua hũ dơgrữq mơnuĩh kơtuãl mưng tũq dòq dơlãp tũc ami, sì hũ dơgrữq mơnuĩh kơtuãl mưng tơngãn anàq mơnuĩh ngãq tơviãq; Kung hũ dơgrữq mơnuĩh kơyua mưng lơgar lơngĩq nữn ngãq krơi drơi jỡc kơtuãl. Asơi pơlih hũ tồq mãq pơnuaĩq pơto nĩ nữn tồq mãq vẽq.”

13Pơtui nữn, hũ mơnuĩh va dơgrữq anàq tìt trôh pãq Pitrai pioh Pitrai chẽq tơngãn pãq dlòc pơnõq nhũ sì iơu lakơu, nữn dơgrữq mơnuĩh mơgrũ gơloh pơkhè pơnõq nhũ. 14Bôh làiq yơu nữn, Yàc Je-su đơp: “Iỡuq luơi dơgrữq anàq tìt trôh pãq pôgrũ, juơi chơkhãq pơnõq nhũ, kơyua lơgar lơngĩq pơweh sì dơgrữq asơi drơh yơu nữn.” 15Hadơi nữn Pitrai chẽq tơngãn pãq dlòc dơgrữq anàq tìt, vloh Pitrai tơviãq tlah mưng nữn.

16Dih, hũ sa aràc mơnuĩh trôh pãp Yàc Je-su, tơnĩa: “Ơ pôgrũ, hlãq iỡuq ngãq vruãq siàp hagĩq pioh hlãq hũ kaya hadiuq gãm gãm?” 17Yàc Je-su đơp sì nhũ: “Hayơu sơai vloh tơnĩa kơu mưng vruãq siàp? Mĩn hũ sa Pitao la siàp nữn soh, nữn mơyah làiq sơai ưng tồq mãq hũ kaya hadiuq, nữn iỡuq rơmiãq jàc dơgrữq kaya pơđar-va.” 18Mơnuĩh nữn tơnĩa wỡq Pitrai: “Dơgrữq kaya pơđar-va halơi?” Yàc Je-su hẽ: “Juơi pa-mơtai mơnuĩh, juơi sỗq dlàiq drĩ drõc, juơi tlẽq sơwah, juơi ngãq chưng lor, 19iỡuq ki ngãm ami ama, sì khiãng duman mơnuĩh jẽq phia drơi yơu rùp phuỗt drơi.” 20Mơnuĩh dãm nữn drơ sì Pitrai: “Hlãq song rơmiãq jàc avih dơgrữq pơnuaĩq nữn. Hlãq dòq siẽuq kaya hagĩq wỡq tơra?” 21Yàc Je-su đơp sì nhũ: “Mơyah làiq hã ưng jỡc wil tãl, nữn iỡuq nao, pa-vlơi avih dơgrữq kaya hagĩq drơi hũ nữn vrơi ga mơnuĩh rơbah, vloh hã ròq hũ kaya màc pãq dlòc lơngĩq; sì iỡuq nao tui kơu.” 22Nữn tũq mơnuĩh dãm nữn hmỡq pơnuaĩq Yàc Je-su đơp, nhũ ka-ồq ka-ãn tlàq nao, kơyua nhũ hũ lũ viãq kaya mơnã.

23Tũq nữn, Yàc Je-su đơp sì dơgrữq mơnuĩh mơgrũ: “Iỡuq viãq, Pôgrũ đơp sì adơi sơai làiq: mơnuĩh mơda tơma lơgar lơngĩq la kãn viãq. 24Pôgrũ kung đơp sì adơi sơai thơu, anàq lac-đa luãq tơma lơvàc jrũp dòq buôt rlao mơnuĩh mơda tơma lơgar Yàc Pô Lơngĩq.” 25Tũq nữn, dơgrữq mơnuĩh mơgrũ hmỡq yơu nữn, pơnõq nhũ mãq ngãq krơi viãq, đơp: “Yơu nữn asơi hũ dõc pơ-tlah?” 26Yàc Je-su iãq pơnõq nhũ sì đơp: “Pơweh sì anàq mơnuĩh nữn vruãq nĩ la ôh jỡc, nữn pơweh sì Yàc Pô Lơngĩq, ngãq jỡc avih dơgrữq vruãq.” 27Vloh nữn Pier tơnĩa Pitrai, làiq: “Pôgrũ iãq, pơnõq hlãq song prah luơi avih dơgrữq kaya sì nao tui pôgrũ. Yơu nữn pơnõq hlãq ròq hũ kaya hagĩq?” 28Yàc Je-su đơp sì pơnõq nhũ: “Iỡuq viãq Pôgrũ đơp sì adơi sơai, làiq adơi sơai nữn la dơgrữq mơnuĩh nao tui pôgrũ, dơlãp rài vơhrơu, tũq Anàq Mơnuĩh dòq guh pãq dlòc sơvan gơhluh Pitrai, nữn adơi sơai kung ròq dòq guh pãq dlòc sa plôh dua sơvan, chahrơna sa plôh dua apõc pơtiàt vual vơla Is-ra-el. 29Mơyah làiq dơgrữq mơnuĩh halơi tlàq luơi sàc anĩh, adơi sơai, gỡuq kamơi, ama, ami, sơdiuq, anàq, hẽla apôh hama kơyua mưng angãn pôgrũ, nữn ròq tồq mãq hũ rlao sa rơtôh bãc sì hũ tồq kaya hadiuq dòq gãm gãm. 30Nữn hũ lũ mơnuĩh gãm la chơmrờp ròq tơviãq jỡc luôĩq hadơi, sì dơgrữq mơnuĩh luôĩq hadơi ròq tơviãq jỡc chơmrờp.