Roglai Bible Literal Text
Ma-thi-ơ 18
Tơma jơ nữn, dơgrữq mơnuĩh mơgrũ trôh pãq Yàc Je-su, tơnĩa: “Mơnuĩh halơi la prong rlao avih dơlãp lơgar lơngĩq?” Yàc Je-su iơu sa aràc anàq tìt trôh sì Pitrai, nữn chẽq nhũ pãq khrãh dơgrữq mơnuĩh mơgrũ sì đơp: “Iỡuq viãq, pôgrũ đơp sì adơi sơai, mơyah làiq adơi sơai ôh hũ pa sơdua sì ngãq jỡc yơu dơgrữq anàq tìt, nữn viãq la adơi sơai ôh tơma dơlãp jỡc lơgar lơngĩq. Kơyua yơu nữn, asơi vơviar rùp drơi trỗt drưh yơu anàq tìt nĩ, nữn mơnuĩh nữn la prong rlao avih dơlãp lơgar lơngĩq. Mơyah làiq asơi mãq angãn pôgrũ tồq ròq sa aràc anàq tìt yơu nĩ, nữn la tồq ròq pôgrũ. Nữn mơnuĩh halơi ngãq ga sa dơlãp dơgrữq anàq tìt song pãc pôgrũ nữn ròq sỗq dlàiq, nữn vloh akãq sa voh lơsũc patơu prong tơma tơkuai mơnuĩh nữn vloh prah nhũ tơma krãp dơlãp tơsìq la siàp rlao.
Dleh dlàr ga dun kơyua mưng dơgrữq kaya ngãq sỗq dlàiq! Kơyua mưng kaya ngãq ga sỗq dlàiq la iỡuq tơviãq trôh, kơyua nữn, dleh dlàr ga mơnuĩh ngãq ga mơnuĩh tơmo sỗq dlàiq! Vơnah tơmo mơyah làiq tơngãn hẽla tơkai adơi sơai ngãq ga adơi sơai sỗq dlàiq, iỡuq koh tlàq sì prah ga nhũ ơtah adơi sơai. Nữn la siàp ga adơi sơai kađòc koh tơngãn hẽla wuẽ wac vloh hũ tồq mãq kaya hadiuq nữn siàp rlao la hũ tãl tơngãn hẽla tơkai vloh kađòc prah tơma apôi gãm gãm. Mơyah làiq mơta adơi sơai ngãq ga adơi sơai sỗq dlàiq, iỡuq alẽc nhũ tơviãq sì prah ga nhũ ơtah adơi sơai. Nữn siàp ga adơi sơai nữn mĩn sa gah mơta sì tồq hũ kaya hadiuq, siàp rlao la hũ tãl dua gah mơta vloh kađòc prah tơma apôi tơnãh ala. Iỡuq gơrhia juơi iãq ôh srãp sa aràc mơnuĩh tìt halơi dơlãp tơpuôl nĩ. Kơyua pôgrũ đơp ga adơi sơai thơu, pãq dlòc lơngĩq, dơgrữq mơnuĩh gơnrơh pơnõq nhũ gãm iãq bôh bòq mơta Ama pôgrũ pãq dlòc lơngĩq. (Kơyua Anàq Mơnuĩh song trôh pioh dõc pơ-tlah mơnuĩh kađòc lơhiãq thĩt.) Adơi sơai sơnơng yơu halơi? Mơyah làiq mơnuĩh halơi nữn hũ sa rơtôh drơi avo, nữn sa drơi dơlãp tơpuôl nữn nao lơhiãq thĩt, nữn ôh iỡuq mơnuĩh nữn luơi salơpãn plôh salơpãn drơi avo pãq dlòc chỡq nữn nao duah anàq nao sỗq kơ-prãh ôh yơh? Mơyah làiq duah bôh anàq avo nữn, pôgrũ đơp viãq sì adơi sơai làiq mơnuĩh nữn ròq sơh sơr kơyua avo nữn rlao la kơyua salơpãn plôh salơpãn drơi anàq avo ôh kađòc sỗq kơ-prãh. Kung yơu nữn, Ama adơi sơai dòq pãq dlòc lơngĩq ôh ưng sa aràc mơnuĩh halơi dơlãp dơgrữq mơnuĩh tìt nĩ kađòc lơhiãq thĩt.
Vơnah tơmo, mơyah làiq sa aràc adơi sơai halơi sỗq dlàiq sì adơi sơai, iỡuq nao, đơp ga mơnuĩh nữn thơu dlàiq dơnũh song sỗq, tũq nữn mĩn adơi sơai sì mơnuĩh nữn. Mơyah làiq mơnuĩh nữn ưng hmỡq adơi sơai, nữn adơi sơai ròq tồq hũ wỡq adơi sơai drơi. Nữn mơyah làiq mơnuĩh nữn ôh ưng hmỡq adơi sơai, nữn iỡuq va tui sa hẽla dua aràc adơi sơai tơmo nao sigỡuq, pioh ga kơyua mưng mơvah đơp dua aràc hẽla tlơu aràc ngãq chưng nữn dơgrữq pơnuaĩq pơlih hũ tồq mãq. Sì mơyah làiq mơnuĩh nữn kung ôh ưng hmỡq pơnõq nhũ, nữn iỡuq akhàt vruãq nữn ga sàc Pơjũm Sơđah. Mơyah làiq mơnuĩh nữn kung ôh ưng hmỡq sàc Pơjũm Sơđah, nữn adơi sơai iỡuq iãq mơnuĩh nữn yơu Vual Vơla Lơniãu sì mơnuĩh mãq jia. Pôgrũ đơp viãq sì adơi sơai, kaya halơi adơi sơai akãq pãq ala hlùq ròq akãq pãq dlòc lơngĩq; sì kaya halơi adơi sơai tơleh pãq ala hlùq ròq hũ tơleh pãq dlòc lơngĩq. Pôgrũ kung đơp viãq sì adơi sơai, mơyah làiq dua aràc dơlãp adơi sơai sa hatai sigỡuq pãq ala hlùq mưng dơgrữq kaya halơi pơnõq nhũ iơu lakơu, nữn kaya nữn ròq hũ ngãq jỡc ga pơnõq nhũ kơyua mưng Ama pôgrũ, Pitao dòq pãq dlòc lơngĩq. Kơyua anĩh halơi hũ dua hẽla tlơu aràc mãq angãn pôgrũ pơjũm pơtõm sigỡuq, nữn pôgrũ dòq pãq khrãh pơnõq nhũ.”
Tũq nữn, Pier trôh tơnĩa Yàc Je-su: “Ơ Yàc, mơyah làiq sa aràc adơi sơai sỗq dlàiq sì hlãq, nữn hlãq ròq tơleh dlàiq ga mơnuĩh nữn hadùp bãc? Iỡuq tơleh trôh tơjuh bãc lơĩh?” Yàc Je-su hẽ: “Pôgrũ ôh đơp sì adơi sơai la tơjuh bãc, nữn la tơjuh plôh tơjuh bãc. Mưng nữn, lơgar lơngĩq drưh yơu sa aràc pitao dih ưng karhia katih sì dơgrữq mơnuĩh halỗt drơi. Tũq Pitao pơdòq karhia katih, aràc va trôh ga pitao sa aràc mơnuĩh halỗt kađòc srẽ sì pitao sa plôh rơvơu ta-lỡng. Nữn kơyua mơnuĩh nữn ôh hũ kaya hagĩq vơyar srẽ, nữn jỡc pitao pơđar nhũ pa-vlơi rùp phuỗt nhũ, sigỡuq sì sơdiuq, anàq sì avih dơgrữq kaya nhũ hũ pioh vơyar srẽ. Nữn la nhũ aguãl ta-ồq trỗt kakôh talơvãt pitao, sì rãn lakơu: ‘Ơ pô, lakơu palơh wỡq ga hlãq, nữn hlãq ròq vơyar ga pô avih dơgrữq kaya.’ Kơyua mưng hatai lơhẽ lơhuãi anĩt anar, nữn jỡc pô mơnuĩh halỗt nữn song pơlao sì tơleh srẽ ga nhũ. Nữn mơnuĩh halỗt nữn tơviãq nao sì pãp sa aràc mơnuĩh mơyơu ngãq vruãq sigỡuq, gãm dòq kađòc srẽ sì nhũ sa rơtôh đơ-ni-e. Nhũ apãt mãq mơyơu drơi, gơriãq tơkuai, đơp: ‘Vơyar srẽ ga kơu katih jĩn hã dòq srẽ.’ Mơnuĩh mơyơu nữn aguãl ta-ồq trỗt rãn lakơu: ‘lakơu palơh wỡq ga hlãq, vloh hlãq ròq vơyar ga sơai.’ Nữn nhũ ôh ưng. Pa-vlữq wỡq, nhũ mãq mơnuĩh mơyơu nữn krỡq tơma sàc jam tãl trôh tũq vơyar avih dơgrữq kaya hagĩq mơnuĩh nữn srẽ sì drơi. Tũq dơgrữq mơyơu tơmo bôh vruãq song tơviãq trôh, pơnõq nhũ ka-ồq ka-ãn viãq. Pơnõq nhũ trôh akhàt wỡq ga pô drơi avih dơgrữq vruãq song tơviãq trôh. Yơu nữn la pô nhũ iơu nhũ trôh sì đơp: ‘Ơ mơnuĩh halỗt mơsãc dih, kơu song wàq tơleh avih srẽ ga hã kơyua hã song rãn lakơu kơu. Hayơu sơai sì ôh anĩt anar di mơnuĩh ngãq vruãq sigỡuq sì mơyơu sơai drơi, kung yơu kơu ròq anĩt anar sơai, ôh yơh?’ Kơyua mưng mơnuĩh pô tơgùq ơnõc yơu nữn, sì pô pơjao nhũ ga dơgrữq mơnuĩh apãt sàc jam mãq krỡq tãl trôh tũq nhũ vơyar avih dơgrữq kaya hagĩq dòq srẽ. Gơnang mưng nữn, Ama pôgrũ dòq pãq dlòc lơngĩq kung ròq ngãq yơu nữn ga adơi sơai, mơyah làiq avih tãl aràc dơlãp adơi sơai ôh avih hatai tơleh dlàiq ga adơi sơai drơi.”
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.