Skip to content
BibleKenya

Roglai Bible Literal Text

Ma-thi-ơ 17

Nãm harơi hadơi, Yàc Je-su va tui Pier, Ja-kơ sigỡuq sì adơi ung la Jãng, va tlơu aràc pơnõq nhũ nao đìq pãq chỡq dlòc. Pitrai sarlỡuq rùp pãq anãq pơnõq nhũ, Bòq mơta Pitrai pơsàc gơchràq yơu ia harơi, dòq ao Pitrai tơviãq jỡc gơchràq yơu kaya sơdah. Iãq dih, hũ Môi-se sì E-li pabôh tơviãq sigỡuq sì pơnõq nhũ, đơp dlài sì Pitrai. Tũq nữn, Pier drơ sì Yàc Je-su: “Ơ Yàc, pơnõq drơi dòq anĩh nĩ siàp viãq. Mơyah làiq pôgrũ ưng, hlãq ròq padỡc pãq đì tlơu voh tlam — sa voh ga pôgrũ, sa voh ga Môi-se sì sa voh ga E-li.” Dơlãp tũq ung gãm ãn dòq đơp, nữn hũ sa pỗc huãl sơdah blãc chãc gỡp pơnõq nhũ, sì iãq nĩ, hũ sãp đơp mưng dơlãp pỗc huãl, đơp làiq: “Nĩ la Anàq khiãng duman Kơu hũ, Nhũ siàp hatai Kơu dơlãp avih dơgrữq kaya. Iỡuq hmỡq vẽq ngãq tui pơnuaĩq Anàq nữn.” Tũq dơgrữq mơnuĩh mơgrũ hmỡq sãp đơp nữn, pơnõq nhũ pađĩh rùp pãq ala hlùq sì huaĩq tơtơh viãq. Vloh Yàc Je-su trôh rơwỡq pãq pơnõq nhũ, đơp làiq: “Tơgùq dỡc vẽq sì juơi huaĩq.” Nữn, pơnõq nhũ angơìq mơta iãq, nữn ôh bôh asơi lơniãu mĩn sa aràc Yàc Je-su.

Ãn tũq pơnõq nhũ mưng chỡq trỗt, Yàc Je-su hakơi pơnõq nhũ, “Juơi akhàt wỡq ga asơi vruãq drơi song bôh tãl trôh tũq Anàq Mơnuĩh song mưng kaya mơtai hadiuq wỡq.” Dơgrữq mơnuĩh mơgrũ tơnĩa Pitrai, làiq: “Yơu nữn hayơu dơgrữq mơnuĩh gơnuar pơto voh-va đơp làiq E-li iỡuq trôh hlơu?” Tũq nữn Yàc Je-su hẽ làiq: “Viãq, E-li ròq trôh pioh ngãq pơsiàp wỡq avih dơgrữq vruãq. Nữn pôgrũ vrơi ga adơi sơai thơu làiq E-li song trôh vloh, nữn pơnõq nhũ ôh thơu kơnãl ung. Pa-vlữq wỡq, pơnõq nhũ ngãq ga ung tui kaya pơnõq nhũ ưng. Kung yơu nữn, Anàq Mơnuĩh kung ròq ãt dleh dlàr kơyua mưng tơngãn pơnõq nhũ.” Tãl tũq nữn, dơgrữq mơnuĩh mơgrũ thơu pãc Pitrai ãn dòq đơp sì pơnõq nhũ mưng Jãng Bãp-tit.

Tũq pơnõq nhũ song trôh anĩh vual vơla, hũ sa aràc mơnuĩh trôh pãp Pitrai, aguãl ta-ồq trỗt pãq anãq Pitrai, sì drơ: “Ơ Yàc, lakơu anĩt anar anàq lakơi hlãq, kơyua nhũ kađòc ruãq hanruơi kađòc dleh dlàr viãq, kơyua nhũ lơđãp lơvuh tơma apôi, sì kung miẽt lơvuh tơma dơlãp ia. Hlãq ròq va nhũ ga dơgrữq mơnuĩh mơgrũ Pitrai hũ, nữn pơnõq nhũ ôh pakhơĩh ga nhũ jỡc.” Tũq nữn Yàc Je-su đơp: “Nĩ ơ pơjẽh pơtiàt ôh hũ voh-tui sì iãh mơsãc dih, kơu ròq iỡuq dòq sigỡuq sì pơnõq hã tãl trôh tũq halơi? Kơu iỡuq ãt-ỡl pơnõq hã tãl trôh tũq halơi wỡq tơra? Iỡuq va anàq mai trôh pãq nĩ ga kơu.” Yàc Je-su gơloh pơkhè kamlai, nữn nhũ tơviãq tlah mưng anàq lakơi. Anàq lakơi hũ khơĩh mư dơlãp tũq jơ nữn.

Tũq nữn, dơgrữq mơnuĩh mơgrũ pãp krơi Yàc Je-su, sì tơnĩa: “Kơyua hayơu pơnõq hlãq ôh tũq halơi pơtiãuq kamlai tơviãq jỡc?” Yàc Je-su đơp wỡq sì pơnõq nhũ: “Kơyua adơi sơai hũ sa asĩt voh-tui; pôgrũ đơp viãq ga adơi sơai, mơyah làiq adơi sơai hũ voh-tui mĩn pơgãp sa asar savĩl soh, nữn adơi sơai pơlih hũ pơđar voh chỡq: ‘Iỡuq pađuỡt mưng anĩh nĩ trôh pãq anĩh dih,’ nữn nhũ ròq ngãq yơu nữn, sì ôh hũ kaya halơi nữn adơi sơai ôh tũq halơi ngãq jỡc.” (Nữn tơpuôl kamlai nĩ ôh kađòc tơviãq jỡc mơyah làiq ôh hũ kaya iơu lakơu sì ãt bõc.)

Dơlãp tũq pơnõq nhũ dòq pơtõm gỡuq wỡq pãq Ga-li-le, Yàc Je-su đơp sì dơgrữq mơnuĩh mơgrũ: “Anàq Mơnuĩh ròq kađòc pơjao dơlãp tơngãn anàq mơnuĩh, sì pơnõq nhũ ròq pa-mơtai Pitrai, tãl trôh harơi bãc tlơu, Pitrai ròq hadiuq wỡq.” Dơgrữq mơnuĩh mơgrũ ka-ồq ka-ãn viãq.

Dơlãp tũq, pơnõq nhũ song nao wỡq trôh pãq palơi Ka-be-na-um, dơgrữq mơnuĩh mãq jia sàc talơvãt trôh pãp Pier sì tơnĩa: “Pôgrũ sơai hũ ôh sơkãq jia sàc talơvãt yơh?” Pier drơ: “Hũ mĩn.” Tũq Pier tơma sàc, Yàc Je-su tơnĩa hlơu sì ung, làiq: “Si-môn, hã sơnơng yơu halơi? Dơgrữq pitao dơlãp dun kơyua nĩ mãq jia hẽla kaya mơnã mưng asơi? Mưng anàq tơcho drơi hẽla mưng mơnuĩh lơniãu?” Tũq ung drơ: “Mưng mơnuĩh lơniãu.” Yàc Je-su đơp sì ung: “Yơu nữn anàq tơcho pơnõq nhũ ôh chàc sơkãq jia. Nữn luơi pơnõq drơi ôh ngãq ga dơgrữq mơnuĩh mãq jia sỗq dlàiq, nữn tũq hã nao pãq tơsìq, hã iỡuq pơlẽq wah sì katũc mãq anàq akàt tơgùq chơmrờp. Hadơi nữn reh chơbuai nhũ tơviãq, hã ròq bôh hũ sa đong priãq. Mãq hũ priãq nữn vloh, iỡuq vrơi ga dơgrữq mơnuĩh mãq jia pioh sơkãq jia ga pôgrũ sì ga adơi sơai.”

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.