Skip to content
BibleKenya

Roglai Bible Literal Text

Ma-thi-ơ 20

Kơyua lơgar lơngĩq drưh yơu sa aràc mơnuĩh pô sàc dih tũq sơđah mư-ờp tơviãq nao ơpah mơnuĩh ngãq vruãq pãq vỡn nho drơi. Hadơi sì tũq ngãq gơnĩt sì mơnuĩh ngãq vruãq mưng jĩn harơi sa harơi la sa đơ-ni-e, ung pơđar pơnõq nhũ tơma vỡn nho drơi hũ. Dơlãp pơgãp tũq jơ bãc tlơu ung vloh nao tơviãq sì bôh hũ dơgrữq mơnuĩh tơmo dòq dỡc soh pãq dơràq. Ung đơp sì pơnõq nhũ: ‘Pơnõq sơai wỡq, iỡuq tơma ngãq vruãq dơlãp vỡn nho vloh kơu ròq vrơi jĩn harơi iỡuq viãq ga adơi sơai.’ Yơu nữn la pơnõq nhũ tơma. Ung tơviãq nao wỡq dơlãp pơgãp tũq jơ bãc nãm, vloh sa bãc tơra dơlãp tũq jơ bãc salơpãn, sì đơp drưh yơu nữn. Sa bãc tơra wỡq, pơgãp tũq jơ bãc sa plôh sa, ung tơviãq nao kung bôh hũ dơgrữq mơnuĩh ãn dòq dỡc soh. Ung đơp sì pơnõq nhũ: ‘Hayơu pơnõq sơai vloh dòq dỡc soh luôĩq harơi pãq đì yơu nữn?’ Pơnõq nhũ drơ: ‘Kơyua ôh asơi ơpah pơnõq hlãq ôh.’ Ung đơp sì pơnõq nhũ: ‘Pơnõq sơai kung tơma ngãq dơlãp vỡn nho kơu vẽq.’ Trôh sồp tlãp, pô vỡn nho đơp sì mơnuĩh apãt akõq vỡn nho drơi hũ: ‘Iỡuq iơu dơgrữq mơnuĩh ngãq vruãq tơma sì vrơi jĩn harơi ga pơnõq nhũ, pơdòq mưng mơnuĩh luôĩq hadơi tãl trôh mơnuĩh chơmrờp.’ Tũq dơgrữq mơnuĩh ngãq vruãq hũ ơpah mưng tũq jơ bãc sa plôh sa trôh, dơgrữq tãl aràc pơnõq nhũ kung tồq mãq sa đơ-ni-e. Dòq dơgrữq mơnuĩh ngãq vruãq mưng chơmrờp, tũq mai trôh, pơnõq nhũ sơnơng làiq drơi ròq hũ tồq mãq lũ rlao, nữn pơnõq nhũ kung tồq mãq mĩn sa đơ-ni-e ga dơgrữq aràc pơnõq nhũ. Tũq tồq mãq jĩn harơi drơi hũ vloh, pơnõq nhũ buah yuãm mưng mơnuĩh pô vỡn. Vloh làiq: pơnõq nhũ đơp: ‘Dơgrữq mơnuĩh ngãq vruãq tơma hadơi nữn mĩn ngãq sa jơ soh, nữn pô vloh pơyãq pơnõq nhũ drưh yơu pơnõq hlãq, la dơgrữq mơnuĩh ãt dleh dlàr luôĩq harơi mưng kaya tluỡiq di pơđiãq.’ Nữn mơnuĩh pô đơp wỡq sì sa aràc dơlãp pơnõq nhũ: ‘Ơ sơai, kơu ôh pơyãq ôh rĩng pơweh sì pơnõq sơai ôh. Ôh iỡuq la pơnõq sơai song ngãq gơnĩt sì kơu sa harơi la sa đơ-ni-e yơh? Iỡuq tồq mãq jĩn harơi sơai hũ sì nao vẽq. Kơu ưng vrơi ga dơgrữq mơnuĩh ngãq vruãq hũ ơpah dơlãp tũq jơ luôĩq hadơi nĩ drưh yơu kơu vrơi ga sơai mĩn. Bôh iỡuq la kơu ôh hũ gơnuar ngãq kaya kơu ưng pơweh sì kaya mơnã kơu yơh? Hẽ la kơyua kơu siàp hatai nữn adơi sơai ôh sơh hatai?’ Yơu nữn mơnuĩh luôĩq hadơi ròq jỡc mơnuĩh chơmrờp sì mơnuĩh chơmrờp ròq jỡc mơnuĩh luôĩq hadơi.”

Ãn tũq Yàc Je-su nao pãq palơi Je-ru-sa-lem, Pitrai va krơi sa plôh dua aràc mơnuĩh mơgrũ nao sigỡuq, sì tũq nao jơlàt, Pitrai đơp sì pơnõq nhũ: “Nĩ, pơnõq drơi ãn nao pãq Je-ru-sa-lem, vloh Anàq Mơnuĩh ròq kađòc pơjao tơma tơngãn dơgrữq mơnuĩh gơnuar pioh kaya duh talơvãt prong sì mơnuĩh gơnuar pơto voh-va, Pơnõq nhũ ròq ngãq gơnĩt dlàiq pa-mơtai Pitrai sì ròq pơjao Pitrai ga Vual Vơla Lơniãu luơi ga pơnõq nhũ đơp siẽq siẽl, poh atòc, sì pỡc đĩn pãq dlòc kayơu pỡc. Nữn trôh harơi bãc tlơu, Pitrai ròq hadiuq wỡq.”

Tũq nữn, ami dua aràc anàq lakơi Se-be-đe sigỡuq sì dơgrữq anàq mòq trôh pãp Yàc Je-su. Mòq aguãl ta-ồq talơvãt Pitrai sì lakơu Pitrai sa vruãq. Yàc Je-su tơnĩa mòq: “Mòq ưng lakơu kaya hagĩq?” Mòq drơ sì Pitrai: “Lakơu vrơi gơnuar pioh ga dua aràc anàq lakơi hlãq hũ nĩ, sa aràc dòq guh gah hơnuãq, sa aràc hũ dòq guh gah iãu pôgrũ dơlãp lơgar pôgrũ hũ.” Nữn Yàc Je-su hẽ: “Tlơu aràc pơnõq hã ôh thơu drơi ãn lakơu kaya hagĩq. Pơnõq adơi sơai pơlih hũ mơnhũm jỡc chơwàt sì pôgrũ ròq jẽq mơnhũm lơĩh?” Pơnõq nhũ đơp sì Pitrai: “Pơnõq hlãq mơnhũm jỡc.” Pitrai đơp sì pơnõq nhũ: “Viãq adơi sơai ròq mơnhũm chơwàt pôgrũ hũ. Nữn ròq dòq guh gah hơnuãq sì gah iãu pôgrũ hũ ôh iỡuq la vruãq pôgrũ hũ ngãq gơnĩt, nữn la vrơi ga dơgrữq mơnuĩh Ama song rơchãc lơĩh anĩh ga mơnuĩh hlơu.” Hadơi sì tũq sa plôh aràc mơnuĩh mơgrũ dih hmỡq vruãq nĩ, pơnõq nhũ nong viãq sì dua aràc adơi sơai. Nữn Yàc Je-su iơu pơnõq nhũ trôh, sì đơp: “Adơi sơai thơu làiq dơgrữq Pitao Vual Vơla Lơniãu hũ song mãq anàq mơnuĩh duh vruãq drơi, sì dơgrữq mơnuĩh hũ gơnuar prong nữn angui gơnuar prãn pãq dlòc mơnuĩh tơmo. Nữn dơlãp tơpuôl adơi sơai nữn ôh iỡuq yơu nữn. Pa-vlữq wỡq, mơyah làiq asơi ưng ngãq prong dơlãp pơnõq adơi sơai nữn iỡuq ngãq mơnuĩh halỗt adơi sơai, sì asơi ưng dòq dỡc akõq dơlãp pơnõq adơi sơai nữn iỡuq duh vruãq adơi sơai, yơu Anàq Mơnuĩh trôh, ôh iỡuq pioh hũ mơnuĩh duh vruãq, nữn la pioh duh vruãq, sì tlàq kaya hadiuq drơi dơvuh sơlih ga lũ mơnuĩh.”

Tũq pơnõq nhũ mưng palơi Je-ri-kô tơviãq nao, sa tơpuôl vual vơla lũ viãq nao tui Pitrai. Dih, hũ dua aràc mơnuĩh vùp dòq guh gah jơlàt. Tũq dua aràc pơnõq nhũ hmỡq làiq Yàc Je-su jẽq nao gãt, pơnõq nhũ priãu tơgùq: “Talơvãt Yàc, Anàq pitao Da-vĩt, lakơu anĩt anar pơnõq hlãq.” Nữn vual vơla gơloh pơkhè dua aràc pơnõq nhũ, pơđar pơnõq nhũ dòq suà vẽq, yơu nữn vloh pơnõq nhũ iỡuq priãu prong rlao wỡq tơra, làiq: “Talơvãt Yàc, Anàq pitao Da-vĩt, lakơu anĩt anar pơnõq hlãq.” Vloh Yàc Je-su dòq dơh, iơu pơnõq nhũ, sì tơnĩa: “Pơnõq sơai ưng kơu ngãq hagĩq ga pơnõq sơai?” Pơnõq nhũ drơ sì Pitrai: “Ơ Yàc, lakơu vrơi ga pơnõq hlãq hũ sơdah mơta.” Yàc Je-su mưng hatai lơhẽ lơhuãi, Pitrai rơwỡq mơta pơnõq nhũ. Tũq nữn mư, pơnõq nhũ hũ sơdah mơta sì nao tui Pitrai.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.