Ma-thi-ơ 21

1Tũq Yàc Je-su sì mơnuĩh mơgrũ jẽq trôh palơi Je-ru-sa-lem, tũq trôh palơi Be-pha-je, gah Chỡq Ô-li-ve, nữn Yàc Je-su pơđar dua aràc mơnuĩh mơgrũ nao, 2làiq: “Iỡuq nao tơma dơlãp palơi pãq anãq adơi sơai, vloh adơi sơai ròq bôh mư sa drơi halang kađòc akãq pãq đỡn sigỡuq sì halang anàq nhũ hũ. Iỡuq wàq talơi sì va nhũ trôh ga pôgrũ. 3Mơyah làiq asơi đơp hagĩq mưng vruãq nữn, adơi sơai nữn đơp: ‘Yàc ưng angui dua drơi halang nữn,’ nữn mư mơnuĩh nữn ròq vrơi dua drơi halang nữn nao sigỡuq sì adơi sơai.” 4Vruãq nữn tơviãq trôh pioh tơviãq jỡc iỡuq viãq tui yơu pơnuaĩq mơnuĩh gơnuar hwơr song đơp, làiq:

5“Đơp vẽq sì anàq kamơi palơi Si-ôn:

‘Dih, Pitao hã trôh sì hã,

lơmuỡn siàp sì đìq halang

— la halang anàq, anàq halang vơnai hũ.’”

6Dơgrữq mơnuĩh mơgrũ nao ngãq tui yơu dơgrữg pơnuaĩq Yàc Je-su song đơp sì pơnõq nhũ, 7pơnõq nhũ va halang vơnai sì halang anàq mai, vloh làc ao lơniãu drơi hũ pãq dlòc grõc halang pioh ga Yàc Je-su dòq guh pãq dlòc nữn. 8Sa vơnah prong vual vơla làc ao drơi pãq jơlàt, dòq dơgrữq mơnuĩh tơmo nữn koh thàt kayơu vloh pràc thàt kayơu nữn pãq jơlàt. 9Vloh tơpuôl vual vơla nao hlơu Yàc Je-su kung yơu tơpuôl mơnuĩh nao tui hadơi Pitrai priãu prong sãp:

“Hô-sa-na anàq Pitao Da-vĩt!

Lơngai ga Pitao mãq angãn Yàc sì trôh!

Hô-sa-na dòq pãq anĩh dlòc dloòng rlao avih!”

10Tũq Yàc Je-su tơma dơlãp palơi prong Je-ru-sa-lem, nữn avih dơgrữq vual vơla dơlãp palơi prong ngãq srôh srah, tơnĩa gỡuq: “Mơnuĩh nĩ la asơi nữn?” 11Tơpuôl vual vơla drơ: “Nĩ la mơnuĩh gơnuar hwơr Je-su, tơviãq mưng palơi Na-sa-ret phũm Ga-li-le.”

12Vloh Yàc Je-su tơma dơlãp sàc talơvãt. Pitrai pơtiãuq avih tãl dơgrữq mơnuĩh pa-vlơi dơlãp sàc talơvãt tơviãq avih, pa-vlỡc ban dơgrữq mơnuĩh sơdua jĩn hũ sì gìq mơnuĩh kãq pa-vlơi chĩp katrơu. 13Pitrai đơp sì pơnõq nhũ: “Hũ pơnuaĩq wãq: ‘Sàc kơu ròq hũ angãn la sàc iơu lakơu,’ nữn pơnõq ung ngãq ga sàc nữn tơviãq jỡc lơvàc tlẽq sơwah.” 14Nữn, hũ dơgrữq mơnuĩh vùp sì mơnuĩh kuẽ kuẽt trôh sì Pitrai dơlãp sàc talơvãt, sì Pitrai pasồq pakhơĩh ga pơnõq nhũ. 15Nữn hadơi sì tũq dơgrữq mơnuĩh gơnuar pioh kaya duh talơvãt prong sì mơnuĩh gơnuar pơto voh-va bôh dơgrữq vruãq chrih-làq nữn Pitrai song ngãq, kung yơu hmỡq dơgrữq anàq tìt priãu tơgùq dơlãp sàc talơvãt, làiq: “Hô-sa-na anàq pitao Da-vĩt,” Nữn pơnõq nhũ nong viãq. 16Pơnõq nhũ tơnĩa Pitrai: “Pôgrũ hũ hmỡq tơpuôl vual vơla đơp hagĩq lơĩh?” Yàc Je-su đơp sì pơnõq nhũ: “Hmỡq! Nữn ôh iỡuq la pơnõq ung ka-ôh pơpoh pơnuaĩq làiq: ‘Yàc song rơchãc lơĩh pơnuaĩq sơ-uỗt mơyòp mưng mơvah anàq tìt sì dơgrữq anàq tìt ãn dòq mõm,’ yơh?” 17Vloh Yàc Je-su tlàq luơi pơnõq nhũ, nao tơviãq pãq lơniãu palơi prong sì trôh pãq palơi Be-tha-ni sì pìq sa mơlãp pãq đỡn.

18Trôh sơđah mư-ờp, tũq Pitrai gơlàiq mai wỡq tơma dơlãp palơi, nữn Pitrai lơ-pa. 19Hadơi iãq bôh sa bẽq kayơu vãl dòq gah jơlàt, Pitrai nao trôh anĩh kayơu nữn mĩn bôh hlàq soh. Pitrai đơp sì kayơu nữn: “Mưng tũq nĩ tãl halơi tơra ôh tơviãq voh wỡq,” nữn mư, kayơu vãl nữn thô tơhiu mư. 20Dơgrữq mơnuĩh mơgrũ bôh yơu nữn, sì mãq ngãq krơi, đơp làiq: “Ngãq yơu halơi kayơu vãl vloh nữn mư tơviãq jỡc thô tơhiu yơu nữn?” 21Yàc Je-su đơp làiq, “Iỡuq viãq kơu đơp sì adơi sơai, mơyah làiq adơi sơai hũ voh-tui sì ôh hũ dỡq dỡng, nữn adơi sơai ròq ngãq jỡc ôh mĩn ga kayơu vãl nĩ, nữn sì vloh adơi sơai pơđar chỡq nĩ: ‘Yỡc tơgùq vẽq sì pơlẽq rùp tơma dơlãp tơsìq,’ nữn vruãq ròq tơviãq jỡc yơu nữn. 22Avih dơgrữq kaya adơi sơai lakơu dơlãp tũq iơu lakơu, mưng hatai pãc tui, nữn adơi sơai ròq tồq mãq jỡc.”

23Tũq Yàc Je-su nao tơma dơlãp sàc talơvãt vloh, dơgrữq mơnuĩh gơnuar pioh kaya duh talơvãt prong sì mơnuĩh pô tơha dơlãp vual vơla trôh pãp Pitrai tũq Pitrai ãn dòq pơto akhàt, sì tơnĩa: “Kơyua mưng gơnuar halơi vloh pôgrũ ngãq dơgrữq vruãq nĩ, nữn asơi vrơi ga pôgrũ gơnuar nữn?” 24Yàc Je-su đơp sì pơnõq nhũ: “Kơu kung ròq tơnĩa pơnõq ung sa pơnuaĩq, sì mơyah làiq pơnõq ung pơlih drơ sì kơu, nữn kơu kung ròq đơp ga pơnõq ung thơu kơu ngãq dơgrữq kaya nĩ mưng gơnuar halơi. 25Adãt bãp-tem Jãng hũ — trôh mưng halơi trôh? Mưng dlòc lơngĩq hẽla mưng anàq mơnuĩh?” Vloh yơu nữn, pơnõq nhũ vơyai sì gỡuq, làiq: “Mơyah làiq pơnõq drơi đơp: ‘Mưng dlòc lơngĩq,’ nữn nhũ ròq đơp sì pơnõq drơi: ‘Yơu nữn kơyua kanõh gĩq sì pơnõq ung ôh pãc tui Jãng?’ 26Dòq mơyah làiq pơnõq drơi drơ: ‘Mưng anàq mơnuĩh,’ nữn pơnõq drơi vloh huaĩq sì vual vơla, kơyua mưng pơnõq nhũ song iãq Jãng la mơnuĩh gơnuar hwơr.” 27Yơu nữn la pơnõq nhũ drơ wỡq sì Yàc Je-su làiq: “Pơnõq hlãq ôh thơu.” Pitrai kung hẽ wỡq sì pơnõq nhũ: “Kơu kung ròq ôh vrơi ga pơnõq ung thơu kơu ngãq dơgrữq vruãq nĩ mưng gơnuar halơi. 28Nữn pơnõq ung sơnơng yơu halơi? Sa aràc mơnuĩh dih hũ dua aràc anàq lakơi, nữn nao pãp anàq kơchoa, ung đơp: ‘Ơ anàq lakơi, harơi nĩ anàq iỡuq nao ngãq vruãq pãq vỡn nho.’ 29Anàq lakơi nữn drơ: ‘Anàq ôh ưng nao ôh,’ nữn hadơi nữn, nhũ sơnơng wỡq, vloh nhũ ưng nao. 30Vloh mơnuĩh ama trôh pãp anàq bãc dua, sì kung đơp drưh yơu nữn. Vloh, tũq drơ: ‘Ơ ama, luơi ga anàq nao,’ nữn nhũ vloh ôh ưng nao. 31Mơnuĩh halơi dơlãp dua aràc anàq lakơi nữn ngãq tui hatai ưng ama drơi hũ?” Pơnõq nhũ drơ: “Anàq lakơi kơchoa.” Yàc Je-su đơp sì pơnõq nhũ: “Iỡuq viãq, Kơu đơp sì pơnõq ung làiq dơgrữq mơnuĩh mãq jia sì kamơi drì drõc ròq hũ tơma dơlãp lơgar Yàc Pô Lơngĩq hlơu pơnõq ung. 32Kơyua Jãng song trôh sì pơnõq ung tui jơlàt tơpãq dãng, nữn pơnõq ung ôh pãc tui ung nữn. Dòq dơgrữq mơnuĩh mãq jia sì mơnuĩh kamơi drì drõc nữn vloh pãc tui nhũ. Nữn pơnõq ung, bôh làiq iãq bôh kaya nữn, pơnõq ung kung ôh ưng mơvai tlàq dlàiq nữn pãc tui Jãng.

33Iỡuq hmỡq sa pơnuaĩq pa-mơyơu tơmo wỡq tơra. Hũ sa aràc la mơnuĩh pô tơnãh, la mơnuĩh pơla sa vỡn nho, ngãq vơga tòp dar vỡn nữn, kalơi lơvàc gơlìq alãc nho pãq đỡn, vỡq sa voh vơ-mũng, sì vrơi ga tơpuôl mơnuĩh pơla nho ơpah, vloh ung nao pãq lơgar tơmo. 34Tũq jẽq trôh vlàt pẽq voh nho, ung pơđar dơgrữq mơnuĩh halỗt mơnãq nhũ trôh pãq tơpuôl mơnuĩh pơla nho pioh tồq mãq hajũc halàq ung hũ. 35Nữn tơpuôl mơnuĩh pơla nho nữn mãq dơgrữq mơnuĩh halỗt mơnãq mơnuĩh pô hũ, poh mơnuĩh nĩ, pa-mơtai mơnuĩh dih, prah patơu mơnuĩh dih. 36Pô vỡn pơđar wỡq dơgrữq mơnuĩh halỗt mơnãq tơmo trôh, lũ rlao tũq hlơu, nữn ngãq ga pơnõq nhũ drưh yơu nữn. 37Hadơi nữn, mơnuĩh pô vỡn pơđar mĩn anàq lakơi nhũ nao trôh pãp pơnõq nhũ, làiq: ‘Pơnõq nhũ ròq ki ngãm anàq lakơi drơi.’ 38Nữn tũq tơpuôl mơnuĩh pơla nho, hadơi nữn bôh anàq lakơi nữn, vơyai sì gỡuq: ‘Nĩ la sa aràc mơnuĩh la anàq patui wỡq. Hẽ, pơnõq drơi pa-mơtai nhũ vẽq pioh mơvlah mãq kaya mơnã nhũ.’ 39Nữn la pơnõq nhũ mãq anàq lakơi nữn vloh, pơnõq nhũ mãq prah tơviãq tlah vỡn nho sì pa-mơtai. 40Yơu nữn, tũq mơnuĩh pô vỡn nho trôh, mơnuĩh pô nữn ròq ngãq hagĩq sì tơpuôl mơnuĩh pơla nho nữn?” 41Pơnõq nhũ drơ sì Pitrai: “Mơnuĩh pô nữn ròq tơpãq tơngãn ngãq dlàiq pãq tơpuôl mơnuĩh sơnãc mơsãc dih savĩq ôh anĩt anar, vloh vrơi ga tơpuôl mơnuĩh pơla nho tơmo ơpah vỡn nữn, la dơgrữq mơnuĩh ròq vrơi ga ung vơnah hajũc halàq ung hũ dơlãp vlàt pẽq nho.” 42Yàc Je-su đơp sì pơnõq nhũ: “Ôh iỡuq la pơnõq ung ka-ôh pơpoh pơnuaĩq nĩ dơlãp Sơrãq Sơđah yơh:

‘Voh patơu sì mơnuĩh vỡq sàc tlàq luơi,

nhũ ròq tơviãq jỡc voh patơu gah akiãc sàc.

Nĩ la vruãq Yàc hũ,

sì la kaya chrih-làq dơlãp mơta pơnõq drơi?’

43Kơyua kanõh nĩ, kơu đơp pioh pơnõq ung thơu làiq: lơgar Yàc Pô Lơngĩq hũ ròq kađòc suãq mãq tlah mưng pơnõq ung sì pơjao ga sa vual vơla tơviãq jỡc chơtai voh ga vual lơgar nữn. 44Asơi lẽq pãq dlòc patơu nĩ ròq kađòc dơvrãm pơchãh, dòq voh patơu lẽq gòq asơi nữn, nhũ ròq katỡq dơvrãm mơnuĩh nữn.” 45Hadơi sì tũq hmỡq dơgrữq pơnuaĩq pa mơyơu Pitrai hũ, mơnuĩh gơnuar pioh kaya duh talơvãt prong sì mơnuĩh Pha-ri-si pơnõq nhũ thơu làiq Pitrai ãn đơp mưng pơnõq nhũ. 46Nữn tũq duah pơnẽq mãq Pitrai, pơnõq nhũ vloh huaĩq vual vơla, kơyua vual vơla iãq Pitrai la mơnuĩh gơnuar hwơr.