Mak 8

1Dơlãp dơgrữq harơi nữn, vloh hũ lũ viãq, tơpuôl vual vơla, sì ôh hũ kaya hagĩq pioh bõc, hadơi nữn Yàc Je-su iơu dơgrữq mơnuĩh mơgrũ đơp sì pơnõq nhũ: 2“Pôgrũ anĩt anar tơpuôl vual vơla nĩ, mưng pơnõq nhũ miẽt dòq sì pôgrũ dơlãp tlơu harơi vloh sì ôh hũ kaya hagĩq pioh bõc. 3Mơyah làiq pôgrũ luơi ga pơnõq nhũ nao wỡq sàc sì ôh bõc kaya hagĩq nữn tũc lơpa, sì huaĩq pơnõq nhũ avih prãn lơvuh trỗt rah jơlàt, sì hũ tơkìq mơnuĩh dơlãp pơnõq nhũ song trôh mưng anĩh atah.” 4Dơgrữq mơnuĩh mơgrũ drơ sì Pitrai làiq: “Dòq pãq anĩh suà lìt nĩ, pơlih mãq mưng halơi sì vrơi ga vual vơla bẽn pioh bõc?” 5Pitrai tơnĩa pơnõq nhũ: “Adơi sơai hũ hadùp voh bẽn nữn?” Pơnõq nhũ drơ: “Pa-thơu, hũ tơjuh voh.” 6Pitrai pơđar ga tơpuôl vual vơla dòq guh pãq hlùq, Pitrai apãt tơjuh voh bẽn, ỡn ngai, vloh pẽq bẽn. Pitrai vrơi bẽn ga dơgrữq mơnuĩh mơgrũ pioh pơnõq nhũ va vrơi ga tơpuôl vual vơla, nữn pơnõq nhũ pa-phanh ga avih dơgrữq aràc. 7Pơnõq nhũ kung hũ hadùp drơi akàt tìt, nữn hadơi sì tũq ỡn ngai mưng pơnõq nữn, Pitrai kung pơđar pơnõq nhũ pa-phanh akàt. 8Avih vual vơla bõc tarơi viãq, vloh pơnõq nhũ duỡt pơtõm wỡq hũ tơjuh vai tleh bẽn dòq lơveh. 9Tũq nữn, pơgãp hũ pàq rơvơu mơnuĩh, vloh Pitrai vrơi ga pơnõq nhũ nao wỡq sàc. 10Nữn mư, Pitrai đìq ahòq sigỡuq sì mơnuĩh mơgrũ, sì pơnõq nhũ nao trôh pãq phũm Đa-ma-nu-tha.

11Tũq nữn, dơgrữq mơnuĩh Pha-ri-si nao trôh sì pơdòq đơp prơjai sì Pitrai, pơnõq nhũ duah pơnẽq dơlãp Pitrai sa nỡm krơi mưng dlòc lơngĩq, pioh lòc Pitrai. 12Pitrai suãq yuà dơlãp hatai sì đơp làiq: “Kơyua hagĩq pơjẽh pơtiàt nĩ lakơu sa nỡm krơi? Iỡuq viãq, kơu đơp sì pơnõq ung thơu, ròq ôh hũ nỡm krơi halơi pioh vrơi ga pơjẽh pơtiàt nĩ ôh.” 13Vloh Pitrai luơi pơnõq nhũ nao, tơma wỡq dơlãp ahòq, sì nao tơpa pãq gah dih.

14Dơgrữq mơnuĩh mơgrũ wơr va bẽn nao tui, sì pơnõq nhũ ôh hũ kaya hagĩq dơlãp ahòq drơi lơniãu nữn mĩn hũ sa voh bẽn soh. 15Tũq nữn, Yàc Je-su pa-sơdor pơnõq nhũ: “Iỡuq grơhia vẽq sì iãq mững voh tapơi mơnuĩh Pha-ri-si sì kung yơu voh tapơi He-rôt hũ.” 16Yơu nữn dơgrữq mơnuĩh mơgrũ đơp vơyai sì gỡuq: “Nữn la kơyua mưng pơnõq drơi ôh hũ bẽn.” 17Yàc Je-su thơu kaya nữn, Pitrai đơp sì pơnõq nhũ: “Hayơu adơi sơai đơp vơyai gơrlah mưng vruãq ôh hũ bẽn? Adơi sơai mĩn ka-ôh tồq mãq jỡc, hẽla ka-ôh thơu pãc yơh? Hatai adơi sơai tơviãq jỡc khãc vloh yơh? 18Adơi sơai hũ mơta sì ôh bôh yơh? Adơi sơai hũ tanĩa sì ôh hmỡq yơh? Sì adơi sơai ôh sơdor yơh? 19Dơlãp tũq pôgrũ pẽq lơmã voh bẽn dơlãp lơmã rơvơu mơnuĩh, adơi sơai song duỡt pơtõm hũ hadùp vai vãq bẽn hõq tleh lơveh?” Pơnõq nhũ drơ: “Pa-thơu sì Pitrai, sa plôh dua vai.” 20“Tũq pôgrũ pẽq tơjuh voh bẽn vrơi ga pàq rơvơu mơnuĩh, adơi sơai duỡt pơtõm hũ hadùp vai vãq bẽn hõq tleh lơveh?” Pơnõq nhũ drơ: “Pa-thơu, tơjuh vai.” 21Pitrai đơp pơtui wỡq sì pơnõq nhũ: “Yơu nữn hayơu adơi sơai ka-ôh thơu pãc?”

22Hadơi nữn, pơnõq nhũ nao trôh Bet-sai-đa, vual vơla va trôh ga Pitrai sa aràc mơnuĩh vùp sì lakơu Pitrai rơwỡq trôh nhũ. 23Yàc Je-su apãt tơngãn mơnuĩh vùp, va nhũ nao tơviãq lơniãu palơi, hadơi sì tũq vruah ia mơvah pãq mơta nhũ, Pitrai chẽq tơngãn pãq dlòc nhũ, Pitrai tơnĩa nhũ: “Hã hũ bôh kaya hagĩq lơĩh?” 24Nhũ angơìq iãq tơgùq, drơ: “Hlãq bôh mơnuĩh aràc iãq yơu dơgrữq kayơu thơu nao.” 25Pơtui wỡq, sa bãc tơra, Pitrai chẽq tơngãn pãq mơta nhũ, vloh nhũ angơìq iãq gơnĩt, sì jỡc sơdah nữn nhũ iãq bôh avih dơgrữq kaya nĩq nũn viãq. 26Yàc Je-su pơđar nhũ nao wỡq sàc, sì hakơi làiq: “Juơi nao tơma dơlãp palơi.”

27Yàc Je-su sì dơgrữq mơnuĩh mơgrũ nao tơma dơgrữq palơi tìt jẽq palơi Se-sa-re Phi-lip. Dơlãp jơlàt nao, Pitrai tơnĩa dơgrữq mơnuĩh mơgrũ: “Pơnõq hã đơp pôgrũ la asơi?” 28Pơnõq nhũ drơ sì Pitrai, làiq: “Jãng Bãp-tit. Mơnuĩh dih đơp la: ‘E-li,’ mơnuĩh tơmo đơp: ‘Sa aràc dơlãp dơgrữq mơnuĩh gơnuar hwơr.’” 29Pitrai tơnĩa pơnõq nhũ: “Dòq adơi sơai nữn đơp pôgrũ la asơi?” Pier drơ sì Yàc: “Pitrai la la Yàc Dõc Pơ-tlah.” 30Yàc Je-su pakỡuq pơnõq nhũ juơi akhàt ga mơnuĩh halơi thơu mưng Pitrai.

31Tũq nữn, Pitrai pơdòq pơto pơnõq nhũ làiq Anàq Mơnuĩh iỡuq ãt lũ kaya dleh dlàr, iỡuq ãt dơgrữq mơnuĩh pô tơha, dơgrữq mơnuĩh gơnuar pioh kaya duh talơvãt sì dơgrữq mơnuĩh gơnuar pơto kaya voh-va, kađòc ãt pa-mơtai, vloh tlơu harơi hadơi ròq hadiuq wỡq. 32Pitrai song đơp pơnuaĩq nĩ savĩq nĩq nũn. Tũq nữn, Pier va Pitrai tơviãq krơi, sì pơdòq đơp puãiq Pitrai. 33Nữn Yàc Je-su weh wỡq iãq dơgrữq mơnuĩh mơgrũ sì gơrloh pơkhè Pier, làiq: “Nĩ kamlai Satan, iỡuq kadũn tơviãq vẽq gah hadơi kơu! Kơyua hã ôh pơweh trôh vruãq Yàc Pô Lơngĩq hũ, yơu nữn mĩn pơweh hatai trôh vruãq anàq mơnuĩh.” 34Hadơi nữn, Pitrai iơu tơpuôl vual vơla sì dơgrữq mơnuĩh mơgrũ, nữn đơp ga pơnõq nhũ: “Mơyah làiq asơi ưng nao tui Pôgrũ, mơnuĩh nữn iỡuq tlàq luơi vẽq rùp drơi, gơlãp kayơu pỡc drơi, sì nao tui Pôgrũ. 35Kơyua mưng mơyah làiq mơnuĩh halơi ưng dõc suãq vơngãq yuà drơi, nữn nhũ ròq lơhiãq, dòq mơnuĩh halơi kơyua mưng Pôgrũ sì Pơnuaĩq Siàp ròq ãt lơhiãq kaya hadiuq drơi, nữn ròq hũ dõc suãq kaya hadiuq drơi. 36Kơyua hũ kuơ hagĩq ga mơnuĩh hũ avih dun kơyua sì lơhiãq thĩt vơngãq yuà drơi? 37Mơnuĩh nữn pơlih mãq hagĩq pioh pa-sơdua vơngãq yuà drơi? 38Mơyah làiq asơi mơlơu alah mưng Pôgrũ sì pơnuaĩq Pôgrũ dơlãp pơjẽh pơtiàt drì drõc sì dlàiq dơnũh nĩ, nữn Anàq Mơnuĩh kung ròq mơlơu alah mưng mơnuĩh nữn tũq Pitrai trôh dơlãp kaya gơhluh Ama Pitrai hũ sigỡuq sì dơgrữq mơnuĩh gơnrơh sơchih.”