Mak 9

1Pitrai đơp wỡq sì pơnõq nhũ: “Iỡuq viãq, Pôgrũ đơp sì adơi sơai làiq hũ tơkìq mơnuĩh ãn dòq dỡc pãq đĩ viãq la dơgrữq mơnuĩh ròq ôh nao gãt kaya mơtai hlơu sì bôh lơgar Yàc Pô Lơngĩq trôh dơlãp gơnuar chơnuãq.” 2Nãm harơi hadơi, Yàc Je-su va krơi Pier, Ja-kơ sì Jãng đìq nao pãq chỡq dloòng, sì Pitrai sarlỡuq rùp pãq anãq pơnõq nhũ. 3Ao Pitrai tơviãq jỡc sơdah gơchràq, kòq blãc, ôh hũ mơnuĩh khưh halơi dòq pãq dun kơyua nĩ rgơi voh ao ngãq ga kòq jỡc yơu nữn. 4Tũq nữn, E-li sì Môi-se pabôh tơviãq sì pơnõq nhũ, vloh đơp dlai sì Yàc Je-su. 5Yơu nữn la Pier đơp sì Yàc Je-su làiq: “Ơ Pôgrũ, pơnõq hlãq dòq pãq đĩ siàp viãq, lakơu vrơi pơnõq hlãq padỡc tlơu voh tlam, sa voh ga pôgrũ, sa voh ga Môi-se, sì sa voh ga E-li.” 6(Kơyua ung ôh thơu kaya hagĩq pioh đơp, kơyua pơnõq nhũ huaĩq viãq.) 7Vloh hũ sa pỗc huãl katũc trôh tlỗp vơvãc pơnõq nhũ, sì hũ pơnuaĩq đơp tơviãq mưng dơlãp pỗc huãl: “Nĩ la Anàq khiãng duman kơu hũ. Hmỡq vẽq pơnuaĩq Anàq nữn.” 8Dơvruh dơvrah, tũq pơnõq nhũ iãq tòp dar, pơnõq nhũ ôh dòq bôh asơi tơmo pãq đỡn sì drơi, mĩn bôh sa aràc Yàc Je-su.

9Tũq pơnõq nhũ mưng dlòc chỡq trỗt, Pitrai hakơi pakỡuq pơnõq nhũ juơi akhàt wỡq ga mơnuĩh halơi thơu dơgrữq kaya pơnõq hã song bôh, mơyah làiq ka ôh tãl trôh tũq Anàq Mơnuĩh mưng anĩh mơtai hadiuq wỡq. 10Yơu nữn, pơnõq nhũ chròq rơmiãq dơđỡuq vruãq nữn song pabôh ga krơi drơi, nữn làiq vơyai tơnĩa sigỡuq iãq “hadiuq wỡq mưng kaya mơtai” gơtha la yơu halơi. 11Vloh pơnõq nhũ tơnĩa Pitrai: “Kơyua hagĩq dơgrữq mơnuĩh gơnuar pơto voh-va đơp E-li iỡuq trôh hlơu?” 12Vloh nữn Pitrai đơp sì pơnõq nhũ: “E-li iỡuq trôh hlơu pioh pơsiàp padỡc wỡq dơgrữq vruãq. Yơu nữn hayơu hũ wãq mưng Anàq Mơnuĩh làiq Pitrai iỡuq ãt pơđìq pơđua dleh dlàr lũ sì kađòc siẽq siẽl? 13Bôh làiq yơu nữn, pôgrũ đơp sì adơi sơai làiq E-li song trôh vloh, sì pơnõq nhũ song ngãq ga ung, tui hatai ưng pơnõq nhũ, drưh yơu pơnuaĩq song wãq mưng ung.”

14Tũq Yàc Je-su sì tlơu aràc mơnuĩh mơgrũ trôh pãq anĩh dơgrữq mơnuĩh mơgrũ dòq wỡq, nữn pơnõq nhũ bôh sa tơpuôl vual vơla lũ viãq tòp dar sì dơgrữq mơnuĩh gơnuar pơto voh-va ãn prơjai sì dơgrữq mơnuĩh mơgrũ nữn. 15Tũq nữn, avih tơpuôl vual vơla bôh Yàc Je-su, avih dơgrữq pơnõq nhũ mãq ngãq krơi, sì pơnõq nhũ đuaĩq nao trôh tồq ròq Pitrai. 16Pitrai tơnĩa dơgrữq mơnuĩh mơgrũ: “Adơi sơai prơjai sì pơnõq nhũ mưng vruãq hagĩq nữn?” 17Sa aràc mơnuĩh dơlãp tơpuôl lũ drơ sì Pitrai: “Ơ Pôgrũ, hlãq va anàq lakơi hlãq trôh pãq pôgrũ. Nhũ kađòc kamlai ãp tơma, ngãq ga nhũ jỡc kamlo. 18Mơyah làiq hũ bãc tũq halơi nhũ ãp tơma anàq tìt hlãq, nữn nhũ ngãq pa-lơvuh anàq tìt trỗt, jỡc jarơnũ ia mơvah, kẽq tagơi, sì lơgah lơgãn. Hlãq song lakơu dơgrữq mơnuĩh mơgrũ pôgrũ pơtiãuq kamlai, nữn pơnõq nhũ ôh pơtiãuq jỡc.” 19Tũq nữn, Pitrai đơp wỡq sì pơnõq nhũ làiq: “Ơ adơi sơai pơweh sì pơjẽh pơtiàt ôh pãc tui dih, kơu ròq dòq sigỡuq sì pơnõq hã tãl trôh tũq halơi? Kơu ròq ãt-ỡl pơnõq hã tãl trôh tũq halơi? Iỡuq va vẽq anàq tìt mai trôh ga kơu.” 20Yơu nữn pơnõq nhũ va anàq tìt mai ga Pitrai, sì tũq nữn kamlai bôh Yàc Je-su, nữn mư nhũ ngãq ga anàq tìt jơdoh khãc, anàq tìt lơvuh trỗt hlùq, vloh vlữq ơnãl, sì jarơnũ ia mơvah. 21Yàc Je-su tơnĩa mơnuĩh ama: “Anàq tìt nhũ kađòc ãp yơu nĩ mưng tũq halơi vloh?” Mơnuĩh ama drơ: “Mưng tũq nhũ dòq tìt. 22Kamlai song miẽt talỡc nhũ tơma apôi hẽla trỗt dơlãp ia, pioh ưng pa-mơtai nhũ. Yơu nữn mơyah làiq pôgrũ pơlih ngãq jỡc gĩq, nữn lakơu pôgrũ anĩt duman pơnõq hlãq sì dõc ga pơnõq hlãq.” 23Tũq nữn, Yàc Je-su đơp sì nhũ: “‘Mơyah làiq pôgrũ pơlih ngãq jỡc’ yơh? Dơgrữq vruãq hũ pơlih ngãq jỡc soh pơweh sì mơnuĩh hũ hatai pãc tui.” 24Tũq nữn mư, ama anàq tìt priãu prõc, làiq: “Hlãq pãc tui! Lakơu pôgrũ dõc ga kaya ka-ôh hũ voh-tui hlãq hũ!” 25Tũq Yàc Je-su bôh vual vơla mai trôh anĩh pơnõq nhũ, Pitrai gơrloh pơkhè kamlai, làiq: “Ơ kamlai kamlo sì tơngoh dih, kơu pơđar ga hã iỡuq tơviãq vẽq mưng anàq tìt, sì ôh tũq halơi hũ gơnuar ãp tơma nhũ tơra.” 26Kamlai priãu prong, ngãq pa-gruãq khãc anàq tìt vloh tơviãq tlah. Anàq tìt tơviãq jỡc drưh yơu mơnuĩh mơtai, nữn lũ mơnuĩh đơp làiq: “Nhũ mơtai vloh.” 27Yơu nữn Yàc Je-su apãt tơngãn anàq tìt wơh nhũ tơgùq, sì nhũ tơgùq dỡc. 28Tũq Yàc Je-su tơma dơlãp sàc vloh, dơgrữq mơnuĩh mơgrũ tơnĩa krơi Pitrai: “Kơyua hagĩq pơnõq hlãq ôh tũq halơi prôh pơtiãuq kamlai nữn jỡc?” 29Pitrai đơp pơnõq nhũ: “Kamlai ràc nĩ ôh asơi pơlih prôh pơtiãuq jỡc mơyah làiq ôh iơu lakơu sì ãt bõc.”

30Pơnõq nhũ mưng nữn nao gãt pãq phũm Ga-li-le, Yàc Je-su ôh ưng asơi thơu vruãq nữn, 31kơyua Pitrai ãn pơto dơgrữq mơnuĩh mơgrũ làiq: “Anàq Mơnuĩh ròq kađòc pơjao dơlãp tơngãn anàq mơnuĩh, pơnõq nhũ ròq pa-mơtai Pitrai. Hadơi sì tũq kađòc pa-mơtai, tlơu harơi hadơi Pitrai ròq hadiuq wỡq.” 32Nữn pơnõq nhũ ôh thơu pãc pơnuaĩq đơp nữn, sì pơnõq nhũ huaĩq ôh khĩn tơnĩa Pitrai.

33Vloh pơnõq nhũ trôh pãq Ka-be-na-um, tũq tơma dơlãp sàc, Pitrai tơnĩa pơnõq nhũ: “Adơi sơai song đơp vơyai vruãq hagĩq tũq nao jơlàt yơh?” 34Yơu nữn pơnõq nhũ dòq suà. Kơyua pơnõq nhũ song pơrjai sigỡuq dơlãp jơlàt nao wỡq asơi la prong rlao avih. 35Sì hadơi nữn dòq guh, Pitrai iơu sa plôh dua aràc mơnuĩh gơnuar pơto wỡq nữn đơp sì pơnõq nhũ: “Mơyah làiq asơi ưng ngãq akõq, mơnuĩh nữn iỡuq tơviãq jỡc mơnuĩh luôĩq hadơi dơlãp dơgrữq mơnuĩh nữn la duh vruãq ga dơgrữq mơnuĩh.” 36Pơtui nữn, Pitrai va sa aràc anàq tìt, dòq dỡc pãq khrãh pơnõq nhũ, Pitrai pồq anàq tìt dơlãp tơngãn vloh đơp sì pơnõq nhũ: 37“Mơnuĩh halơi mãq angãn pôgrũ tồq ròq sa aràc dơlãp dơgrữq anàq tìt yơu nĩ nữn la tồq ròq pôgrũ, sì asơi tồq ròq pôgrũ nữn mơnuĩh nữn ôh iỡuq tồq ròq pôgrũ soh, nữn la tồq ròq Pitao song pơđar pôgrũ.” 38Jãng drơ sì Pitrai: “Ơ Pôgrũ, pơnõq hlãq bôh hũ mơnuĩh mãq angãn pôgrũ pơtiãuq kamlai sì pơnõq hlãq song pakỡuq pơnõq nhũ wỡq, kơyua pơnõq nhũ ôh tui pơnõq drơi.” 39Nữn Yàc Je-su đơp: “Juơi pakỡuq ngãq, mơnuĩh nĩ, kơyua ôh asơi hũ mơnuĩh mãq angãn pôgrũ ngãq kaya krơi tơmo vloh hadơi nữn wỡq đơp iãh mưng pôgrũ. 40Kơyua asơi ôh jơdrãq sì pơnõq drơi nữn la pơweh dõc pơnõq drơi. 41Mưng mơnuĩh halơi mãq angãn pôgrũ vrơi ga adơi sơai mơnhũm sa chơwàt ia kơyua adơi sơai pơweh mưng angãn Yàc Dõc Pơ-tlah, iỡuq viãq pôgrũ sì adơi sơai làiq, mơnuĩh nữn ròq ôh lơhiãq kaya ban drơi. 42Dòq mơnuĩh halơi ngãq ga sa aràc dơlãp dơgrữq anàq tìt nĩ song pãc tui anĩh pôgrũ sơnẽq sỗq, nữn vloh akãq lơsũc patơu prong tơma tơkuai nhũ nữn kađòc prah trỗt pãq tơsìq dòq siàp rlao. 43Mơyah làiq tơngãn adơi sơai ngãq ga adơi sơai sơnẽq sỗq, iỡuq koh vẽq nhũ. Vloh siàp rlao ga adơi sơai la hũ tơma dơlãp kaya hadiuq sigỡuq sì kaya hlôh, dòq siàp rlao la hũ tãl avih dua bẽq tơngãn nữn trỗt tơma dơlãp tơnãh ala, anĩh apôi ôh tũq halơi vơdãp. 44(Anĩh halãq halĩc pơnõq nhũ ôh mơtai, sì apôi ôh kađòc pơdãp) 45Mơyah làiq tơkai adơi sơai pơlih ngãq ga adơi sơai sơnẽq sỗq, iỡuq koh nhũ vẽq. Kaya siàp rlao ga adơi sơai la sigỡuq sì tơkai kùt sì tơmã dơlãp kaya hadiuq, dòq siàp rlao tãl dua gah tơkai sì kađòc prah tơma tơnãh ala. 46Nữn la anĩh halãq-halĩc pơnõq nhũ ôh hũ mơtai sì la anĩh apôi ôh hũ vơdãp. 47Sì mơyah làiq mơta adơi sơai ngãq ga adơi sơai sơnẽq sỗq, iỡuq alẽc nhũ tơviãq. Vloh làiq adơi sơai hũ tơma lơgar Yàc Pô Lơngĩq mưng sa gah mơta dòq siàp rlao tãl dua gah mơta sì kađòc prah tơma tơnãh ala, 48anĩh nữn halãq-halĩc nhũ hũ ôh mơtai sì apôi ôh kađòc vơdãp. 49Kơyua avih tãl aràc ròq kađòc sơrã mưng apôi. 50Sơrã nữn hũ kuơ, yơu nữn mơyah làiq sơrã tơviãq jỡc ôh dòq bãq, adơi sơai ròq tawơr nhũ gãm sì kaya hagĩq? Adơi sơai iỡuq hũ sơrã dơlãp drơi, sì hadiuq salơnuãq sigỡuq.”