Roglai Bible Literal Text
Mak 7
Tũq nữn, dơgrữq mơnuĩh Pha-ri-si sigỡuq sì mơnuĩh gơnuar pơto voh-va mưng Je-ru-sa-lem trôh, pơjũm tòp dar Pitrai. Pơnõq nhũ ròq bôh dơgrữq mơnuĩh mơgrũ Pitrai bõc bẽn mưng blàq tơngãn tasỡuq nrãc, nữn la ka-ôh rao. (Nữn la, mơnuĩh Pha-ri-si kung yơu avih dơgrữq mơnuĩh Ju-đa bôh bõc gĩq, mơyah làiq ka-ôh rao tơngãn drơi tui kaya adãt adia, pơnõq nhũ chròq rơmiãq mưng ung kõq hũ; Tũq pơnõq nhũ va mai mưng dràq, pơnõq nhũ ôh bõc mơyah làiq ka-ôh rao tơngãn, nữn dòq lũ kaya tơmo tơra sì pơnõq nhũ tồq mãq pioh chròq rơmiãq: pơweh sì rao jơlũq chơwàt, gõq dlah, sì dơgrữq kaya ngãq mưng kơsuan.) Dơgrữq mơnuĩh Pha-ri-si sì mơnuĩh gơnuar pơto voh-va tơnĩa Yàc Je-su: “Kơyua hagĩq mơnuĩh mơgrũ pôgrũ ôh hadiuq iỡuq yơu pơnuaĩq adãt adia ung kõq hũ, nữn bõc bẽn sì plàq tơngãn ka-ôh rao?” Nữn Pitrai drơ: “E-sai song đơp hwơr iỡuq viãq mưng dơgrữq mơnuĩh vlữq lor yơu pơnõq ung. Yơu song wãq làiq:
‘Vual vơla nĩ mĩn mãq chơbuai sì kakôh talơvãt kơu,
dòq hatai pơnõq nhũ nữn atah viãq mưng kơu.
Pơnõq nhũ kakôh talơvãt kơu savĩq ôh kuơ,
pơto dơgrữq kaya pơđar-va anàq mơnuĩh yơu pơđar-va jơlàt duh talơvãt.’
Pơnõq ung prah kaya pơđar-va Yàc Pô Lơngĩq, sì rơmiãq jàc pơnuaĩq rài sơđãq anàq mơnuĩh hũ.” Pitrai kung đơp sì pơnõq nhũ: “Viãq iỡuq ga pơnõq ung tlàq luơi avih kaya pơđar-va Yàc Pô Lơngĩq pioh rơmiãq pioh pơnuaĩq yao pơnõq hã hũ! Kơyua Môi-se song pơto: ‘Iỡuq duh huaĩq vẽq ami ama drơi,’ sì ‘Mơnuĩh halơi sơtãp lơmah ami ama nữn ròq iỡuq mơtai.’ Nữn pơnõq ung đơp: ‘Mơyah làiq sa aràc halơi đơp sì ama ami drơi: “Dơgrữq kaya halơi drơi ròq angui pioh chiẽp ròc ami ama, nữn la Ko-ban (gơtha la pioh ga Yàc Pô lơngĩq),”’ yơu nữn pơnõq ung ôh vrơi gơnuar ga mơnuĩh nữn ngãq kaya hagĩq ga ami ama drơi wỡq, Pơnõq ung ngãq ga pơnuaĩq Yàc Pô Lơngĩq jỡc ôh kua mưng pơnuaĩq yao sì pơnõq ung akhàt wỡq, sì pơnõq ung dòq ngãq lũ vruãq drưh yơu nữn tơra.” Sì Pitrai iơu tơpuôl vual vơla sa bãc tơra sì đơp ga pơnõq nhũ: “Avih dơgrữq pơnõq adơi sơai iỡuq hmỡq kơu sì thơu pãc vẽq. Ôh hũ kaya halơi mưng gah lơniãu tơma dơlãp mơnuĩh nữn pơlih ngãq tasỡuq nrãc ga anàq mơnuĩh. Nữn mĩn dơgrữq kaya tơviãq mưng gah dơlãp nữn ngãq tasỡuq nrãc ga aràc.” Mơnuĩh halơi hũ tanĩa pioh hmỡq, nữn hmỡq vẽq.
Tũq Yàc Je-su tơma dơlãp sàc, atah dì tơpuôl lũ, dơgrữq mơnuĩh mơgrũ tơnĩa Pitrai mưng pơnuaĩq pa-mơyơu. Yàc Je-su tơnĩa Pơnõq nhũ: “Nữn adơi sơai kung ka-ôh thơu pãc yơh? Adơi sơai ôh tồq thơu bôh kaya mưng gah lơniãu tơma dơlãp sa aràc mơnuĩh pơlih ôh tũq halơi ngãq tasỡuq nrãc anàq mơnuĩh jỡc? Kơyua mưng kaya nữn ôh nao tơma dơlãp hatai mơnuĩh, nữn tơma dơlãp tũc, vloh tơviãq pãq blàc, yơh?” (Kơyua yơu nữn, avih dơgrữq kaya bõc nữn la sơchih.) Vloh Pitrai đơp wỡq: “Kaya mưng dơlãp hatai anàq mơnuĩh tơviãq nữn ka ngãq ga anàq mơnuĩh jỡc tasỡuq nrãc. Kơyua mưng gah dơlãp anàq mơnuĩh, mưng dơlãp hatai, tơviãq dơgrữq kaya sơnơng iãh mơsãc, drì drõc, tlẽq sơwah, pa-mơtai mơnuĩh, drì drõc, ham guãm, brưh mơsãc, pa-gơla pơgàt, arĩh athãm, sàq hatai, đơp siẽq siẽl, đơp pơchrìq, dĩq dĩl. Dơgrữq kaya tasỡuq nrãc nữn tơviãq mưng dơlãp tơviãq sì nhũ ngãq tasỡuq ga aràc.”
Vloh Pitrai tơgùq dỡc tơviãq tlah mưng nữn nao trôh phũm Ty-rơ sì Si-đôn, Pitrai tơma sa voh sàc sì ôh ưng vrơi ga mơnuĩh halơi thơu, yơu nữn ôh tũq halơi padỡuq jỡc. Mư tũq nữn, sa aràc mơnuĩh kamơi dih, la mơnuĩh hũ anàq kamơi tìt kađòc kamlai ãp, kơyua hmỡq akhàt mưng Yàc Je-su, sì nai nao trôh, aguãl tơ-ồq pãq ala tơkai Pitrai. Tũq nữn, nai la mơnuĩh Gơ-rec, vual vơla Si-rô-phe-ni-si, Nai lakơu sì Yàc pơtiãuq kamlai tơviãq tlah mưng anàq kamơi nhũ. Pitrai đơp sì nai: “Halơu viãq, iỡuq luơi ga anàq tơcho bõc tarơi halơu ka, kơyua mãq bẽn anàq tơcho nữn prah ga asơu bõc la sa kaya ôh iỡuq.” Nữn mơnuĩh kamơi drơ wỡq sì Pitrai: “Viãq, ơ Yàc, gãm sì asơu dòq pãq ala ban kung hũ bõc dơgrữq bẽn lơveh hõq anàq tơcho hũ.” Yơu nữn Pitrai đơp sì nai: “Kơyua mưng pơnuaĩq nĩ, nai iỡuq nao wỡq vẽq, kamlai song tơviãq tlah mưng anàq kamơi nai vloh.” Nhũ nao wỡq trôh pãq sàc sì bôh anàq kamơi tìt dòq đĩh pãq dlòc chơnang, kamlai nữn song tơviãq nao vloh.
Hadơi nữn, Pitrai vloh tơviãq tlah mưng phũm Ty-rơ sì nao gãt tơpa pãq palơi Si-đôn trôh tơsìq Ga-li-le tơma dơlãp phũm Đe-ka-bu-lơ. Hũ mơnuĩh va trôh ga Pitrai sa aràc mơnuĩh đơp karơwãl, vloh pơnõq nhũ lakơu Pitrai chẽq tơngãn pãq dlòc mơnuĩh nữn. Hadơi nữn ròq tơviãq krơi nhũ tlah mưng tơpuôl lũ, Pitrai chẽq dua chơđiãc tơngãn tơma dơlãp lơvàc tanĩa nhũ, sì ka-chôh ia mơvah, Pitrai vruah pãq dơlah nhũ. Vloh Pitrai angơìq mơta tơgùq pãq lơngĩq sì sãp suãq yua, nữn đơp sì nhũ: “Ep-pha-ta,” (gơtha la: “Pơh tơviãq vẽq!”). Yơu nữn la tanĩa nhũ jỡc hmỡq, dơlah nhũ jỡc lơmuỡn, sì nhũ pơdòq đơp nĩq nũn. Yàc Je-su pakỡuq pơnõq nhũ juơi akhàt kaya nữn ga mơnuĩh halơi. Yơu nữn Pitrai brõq pakỡuq nữn pơnõq nhũ brõq akhàt tơviãq sa vĩq lơnang lơnai. Dơgrữq pơnõq nhũ mãq ngãq krơi, đơp làiq: “Ung nữn ngãq dơgrữq vruãq siàp. Ung nữn rgơi ngãq ga mơnuĩh tơngoh jỡc hmỡq, mơnuĩh kamlo đơp jỡc.”
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.