Skip to content
BibleKenya

Roglai Bible Literal Text

Mak 6

Mưng anĩh nữn, Yàc Je-su ròq tơviãq nao, sì wỡq trôh pãq palơi phuỗt, sì dơgrữq mơnuĩh mơgrũ nao tui Pitrai. Trôh harơi Sa-bat, Pitrai pơdòq pơto akhàt dơlãp sàc pơtõm. Lũ mơnuĩh hmỡq Pitrai pơto nữn mãq ngãq krơi, đơp làiq: “Ung nĩ mơgrũ dơgrữq pơnuaĩq nĩ mưng halơi? Kaya jãc rgơi hũ vrơi ga ung nĩ sigỡuq sì dơgrữq kaya krơi tơmo mưng tơngãn ung nĩ ngãq jỡc nữn la hayơu? Ôh iỡuq nĩ la mơnuĩh rgơi ngãq kayơu, anàq Ma-ri, sì sơai Ja-kơ, Jô-se, Ju-đe sì Si-môn yơh? Ôh iỡuq la dơgrữq adơi kamơi ung nữn ãn dòq pãq khrãh pơnõq drơi nĩ yơh?” Pơnõq nhũ song đơp sơnẽq sỗq sì Yàc Je-su. Yàc Je-su đơp sì pơnõq nhũ: “Mơnuĩh gơnuar hwơr ôh siẽuq kaya ki ngãm, lơniãu pãq palơi phuỗt drơi, pãq khrãh tơpuôl gỡuq gãt, sì mơnuĩh sàc drơi.” Pitrai ôh tũq halơi ngãq dơgrữq vruãq gơnuar chơnuãq halơi pãq đỡn, lơniãu vruãq chẽq tơngãn pãq dlòc dơgrữq mơnuĩh ruãq sì pasồq pakhơĩh ga pơnõq nhũ. Pitrai mãq ngãq krơi mưng hatai ôh pãc tui pơnõq nhũ, Pitrai nao tòp dar dơgrữq palơi phuỗt sì pơto akhàt.

Nữn Pitrai iơu sa plôh dua aràc mơnuĩh gơnuar pơđar sì pơdòq pơđar pơnõq nhũ tơviãq nao, sa yơu dua aràc, Pitrai vrơi ga pơnõq nhũ hũ gơnuar pãq dlòc dơgrữq kamlai, sì hakơi pơnõq nhũ juơi va kaya hagĩq tui tũq nao jơlàt, lơniãu mĩn gai mơjrà — ôh va bẽn, ôh va kadũc, kung ôh va jĩn priãq akãq dơlãp kơ-iãng — nữn iỡuq juãq kalìq juãq, sì “Adơi sơai ôh chồq dua vlah ao.” Pitrai kung đơp sì pơnõq nhũ: “Mơyah làiq tũq halơi adơi sơai tơma sàc halơi, nữn iỡuq dòq pãq đỡn tãl trôh tũq adơi sơai tơviãq sàc nữn. Anĩh halơi ôh ưng tồq ròq hẽla ôh ưng hmỡq adơi sơai, nữn tũq tơviãq tlah mưng đỡn, iỡuq tơtôh thũl pãq tơkai pioh ngãq chưng jơdrãq wỡq sì pơnõq nhũ.” Hadơi nữn, pơnõq nhũ tơviãq nao, pơnõq nhũ pơto akhàt làiq dơgrữq mơnuĩh iỡuq mơvai tlàq dlàiq. Pơnõq nhũ pơtiãuq lũ kamlai, sì pavuh mơnhàq ga lũ mơnuĩh ruãq sì pasồq pakhơĩh ga pơnõq nhũ.

Vloh nữn, pitao He-rôt song hũ hmỡq vruãq nĩ, kơyua tiẽng dơnai Yàc Je-su hũ lũ mơnuĩh thơu, sì hũ mơnuĩh đơp: “Jãng bãp-tit song hadiuq wỡq mưng kaya mơtai, mưng nữn dơgrữq vruãq krơi tơmo gơnuar chơnuãq hũ ngãq jỡc dơlãp ung nữn.” Mơnuĩh tơmo đơp: “Ung nữn la E-li.” Sì mơnuĩh tơmo wỡq nữn đơp: “Ung nữn la sa aràc mơnuĩh gơnuar hwơr, drưh yơu sa dơlãp dơgrữq mơnuĩh gơnuar hwơr mưng kal.” Nữn tũq He-rôt hmỡq yơu nữn, ung nữn đơp làiq: “Jãng, la mơnuĩh sì kơu koh akõq, song hũ hadiuq wỡq.” Mưng rùp phuỗt He-rôt song pơđar mơnuĩh, mãq Jãng sì chãq ung dơlãp sàc jam, kơyua mưng vruãq He-rô-đia (sơdiuq Phi-lip hũ, adơi pitao) kơyua pitao song mãq nhũ ngãq sơdiuq. Jãng song đơp sì He-rôt: “Pitao khiãng sơdiuq adơi lakơi drơi hũ la ôh iỡuq voh-va.” He-rô-đia nõng mơvai pơnuaĩq jơdrãq ung hũ sì ưng pa-mơtai ung mư, nữn nhũ ôh pơlih ngãq jỡc, mưng He-rôt huaĩq Jãng, kơyua pitao thơu làiq Jãng la sa aràc mơnuĩh tơpãq dãng, sì sơđah sơchih, nữn pitao gãm iãq jàc ung hũ dòq siàp lơngai, Bôh làiq hmỡq ung đơp, ngãq ga pitao kãn sì dòq viãq, nữn pitao siàp hatai ưng pa-hmỡq ung. Vloh tũq lơwah trôh, tũq He-rôt pồq kaya bõc mơnhũm harơi đeh pơyãq dơgrữq mơnuĩh gơnuar prong sì dơgrữq mơnuĩh apãt akõq tơpuôl lĩng, sigỡuq sì dơgrữq mơnuĩh pô apãt prong phũm Ga-li-le, Tũq nữn rùp phuỗt anàq kamơi He-rô-đia hũ tơma, tãm-ya duh vruãq pơnõq nhũ, sì nai ngãq ga He-rôt sigỡuq sì dơgrữq mơnuĩh dòq bõc sigỡuq sì pitao viãq siàp hatai, nữn pitao đơp sì nai: “Iỡuq lakơu sì kơu kaya hagĩq anàq ưng nữn kơu ròq vrơi kaya nữn ga anàq.” Ung hẽ grưh sì nai làiq: “Bôh làiq anàq lakơu sì kơu, dơgrữq kaya hagĩq sa vơnah lơgar kơu hũ, kơu kung ròq vrơi ga anàq.” Yơu nữn, nai tơviãq pãq gah lơniãu tơnĩa ami nhũ: “Anàq ròq yòc lakơu kaya hagĩq?” Ami nhũ đơp: “Akõq Jãng Bãp-tit hũ.” Mư tũq nữn, nai chơmãq chơmao tơma wỡq pãq anĩh Pitao sì lakơu: “Anàq ưng Pitao tũq nĩ mư vrơi ga anàq akõq Jãng Bãp-tit hũ chẽq pãq dlòc salao.” Bôh làiq ka-ồq ka-ãn viãq, nữn pitao ôh jỡc kơmlah pơnuaĩq lakơu nai hũ kơyua pơnuaĩq pitao song hẽ grưh sigỡuq sì dơgrữq mơnuĩh thuãi ãn dòq guh dơlãp ban sì drơi. Nữn mư pitao pơđar sa aràc mơnuĩh apãt đao, hakơi pơđar-va akõq Jãng pãq đĩ, nữn mơnuĩh apãt đao nao sì koh akõq Jãng dơlãp sàc jam. Nhũ va akõq Jãng sì chẽq pãq dlòc salao va vrơi ga nai, sì nai song vrơi wỡq ga ami nhũ. Tũq nữn song hmỡq thơu vruãq, dơgrữq mơnuĩh grũ Jãng hũ trôh, mãq rùp atơu ung, va nao dor dơlãp vơnẽq.

Dơgrữq mơnuĩh gơnuar pơđar pơjũm pơtõm sigỡuq sì Yàc Je-su, akhàt wỡq ga Pitrai dơgrữq vruãq pơnõq nhũ song ngãq sì dơgrữq kaya pơnõq nhũ song pơto. Pitrai đơp sì pơnõq nhũ: “Pơnõq nhũ va gỡuq nao trôh anĩh halơi suà lìt padơi dleh sa asit.” Kơyua mơnuĩh nao mai lũ viãq, ngãq ga pơnõq nhũ tơviãq jỡc ôh hũ tũq jơ pioh bõc. Nữn pơnõq nhũ tơma ahòq nao trôh sa anĩh suà lìt. Nữn lũ mơnuĩh bôh tơpuôl nữn tơviãq nao sì hũ lũ mơnuĩh thơu kơnãl pơnõq nhũ, mưng avih palơi, aràc jàq gỡuq sigỡuq sì vruh nao tơkai trôh pãq đỡn sì trôh pãq anĩh nữn halơu pơnõq nhũ. Tũq pơnõq nhũ tơma trôh pãq gah, Pitrai bôh sa vual vơla lũ viãq sì Pitrai anĩt anar pơnõq nhũ kơyua pơnõq nhũ drưh yơu avo ôh hũ mơnuĩh dlãc. Kơyua yơu nữn, Pitrai pơdòq pơto pơnõq nhũ lũ kaya. Tũq jơ song avih vloh, tãl tũq dơgrữq mơnuĩh mơgrũ trôh pãp Pitrai, pa-thơu làiq: “Anĩh nĩ la anĩh suà lìt nữn tũq jơ song sồp kơnãm vloh. Lakơu vrơi ga tơpuôl vual vơla nao wỡq, pioh pơnõq nhũ nao tơma phũm palơi tìt sì dơgrữq palơi jẽq anĩh nĩ, nữn pơlih pioh nao vlơi kaya bõc.” Nữn Pitrai hẽ sì pơnõq nhũ: “Adơi sơai iỡuq vrơi ga pơnõq nhũ bõc.” Pơnõq nhũ pa-thơu sì Pitrai: “Viãq làiq pơnõq hlãq iỡuq nao vlơi tãl trôh dua rơtôh đơ-ni-e bẽn vrơi ga pơnõq nhũ bõc yơh?” Nữn, Pitrai tơnĩa pơnõq nhũ: “Iỡuq nao. Duah iãq. Adơi sơai hũ hadùp voh bẽn?” Tũq song karhia vloh, pơnõq nhũ vrơi thơu: “Hũ lơmã voh bẽn sì dua drơi akàt.” Vloh Pitrai pơđar ga dơgrữq mơnuĩh dòq guh tui yơu tơpuôl pãq dlòc blàc rỡq. Pơnõq nhũ dòq guh tui yơu tơpuôl sa rơtôh hẽla lơmã plôh. Pitrai apãt lơmã voh bẽn sigỡuq sì dua drơi akàt, nữn angơìq tơgùq pãq dlòc lơngĩq, Pitrai ỡn ngai sì pẽq bẽn vrơi ga dơgrữq mơnuĩh mơgrũ va pa-mơpha ga tơpuôl vual vơla. Pitrai kung pa-chơlah dua drơi akàt vrơi ga dơgrữq mơnuĩh. Avih tãl aràc pơnõq nhũ song bõc tãl trôh tarơi tũc viãq. Hadơi nữn, pơnõq nhũ duỡt pơtõm wỡq hũ sa plôh dua vai vãq dơgrữq tleh bẽn lơveh sì akàt. Katih dơgrữq mơnuĩh bõc bẽn hũ lơmã rơvơu mơnuĩh lakơi.

Nữn mư, Pitrai pơđar dơgrữq mơnuĩh mơgrũ tơma dơlãp ahòq sì nao halơu Pitrai gãt tơpa gah dih, trôh Bet-sai-đa, dơlãp tũq Pitrai vrơi ga vual vơla nao wỡq. Tũq pơnõq nhũ nao wỡq avih vloh, Pitrai đìq nao pãq dlòc chỡq pioh iơu lakơu. Trôh mơlãp, ahòq song trôh pãq khrãh tơsìq, nữn Pitrai dòq sa aràc pãq dlòc hlùq. Pitrai bôh pơnõq nhũ pơgùq prãn wah ahòq, kơyua angĩn vluh dơgar. Pơgãp tũq jơ bãc pàq tũq dlài mơlãp nữn, Pitrai nao tơkai pãq dlòc tơsìq trôh anĩh pơnõq nhũ sì Pitrai ưng nao gãt tơpa halơu pơnõq nhũ. Nữn tũq pơnõq nhũ iãq bôh Pitrai ãn yàp nao pãq dlòc ia tơsìq, pơnõq nhũ sơnơng Pitrai la phùt, yơu nữn priãu prong tơgùq, kơyua pơnõq nhũ song chàc bôh Pitrai sì huaĩq tơtơh. Nữn mư Yàc đơp sì pơnõq nhũ, làiq: “Gơjãp hatai vẽq! Pôgrũ dòq pãq đĩ! Juơi huaĩq!” Vloh Pitrai yàp tơma dơlãp ahòq sigỡuq sì pơnõq nhũ sì angĩn ôh vluh wỡq tơra, dơgrữq mơnuĩh mơgrũ mãq ngãq krơi viãq pãq krãh pơnõq nhũ. Kơyua mưng pơnõq nhũ ôh thơu pãc mưng kaya krơi Yàc ngãq bẽn, vlữq wỡq la nữn hatai pơnõq nhũ miẽt dòq khãc krẽc.

Tũq song nao trôh pãq dlòc hlùq, pơnõq nhũ nao trôh Ge-ne-sa-ret sì pơlẽq gơ-lơnuaĩq vơdũc ahòq pãq đỡn. Tũq pơnõq nhũ tơviãq mưng ahòq, vual vơla nữn mư thơu kơnãl Pitrai, pơnõq nhũ đuaĩq nao vãq avih phũm sì pơdòq va dơgrữq mơnuĩh hũ ruãq sakìq lơduh lơmuỡn đĩh pãq dlòc chơnang trôh pãq anĩh halơi pơnõq nhũ hmỡq làiq hũ Pitrai. Anĩh halơi Pitrai nao trôh, dơlãp dơgrữq palơi prong hẽla palơi tìt, aràc song va mơnuĩh hũ ruãq sơkìq chẽq pãq anĩh jơlàt prong; sì lakơu Pitrai làiq mĩn iỡuq vrơi ga pơnõq nhũ rơwỡq trôh kanui ao Pitrai, sì mơnuĩh halơi hũ rơwỡq trôh pãq Pitrai nữn ruãq hũ khơĩh.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.