Skip to content
BibleKenya

Roglai Bible Literal Text

Mak 5

Hadơi nữn pơnõq nhũ nao trôh tơsìq gah dih, dơlãp phũm Je-ra-se. Tũq Yàc Je-su tơviãq mưng ahòq, mư tũq nữn, hũ sa aràc mơnuĩh kađòc kamlai ãp tơviãq mưng anĩh vơnẽq tồq ròq Pitrai, Mơnuĩh nĩ hadiuq dơlãp dơgrữq anĩh vơnẽq, Ôh asơi pơlih rgơi mãq krỡq nhũ jỡc, mãq angui gãm talơi srẽng akãq kung ôh jỡc. Kơyua nhũ gãm lũ bãc kađòc mãq chãq sì vuh mưng gơsàc, sì talơi srẽng nữn nhũ kung ngãq kađòc yãh tơyah, dòq gơsàc kađòc jãt pơchãh, sì ôh asơi hũ prãn pioh mãq nhũ. Luôĩq harơi mơlãp nhũ dòq dơlãp dơgrữq anĩh vơnẽq sì dơgrữq rơnuãi pãq dlòc chỡq, nhũ driãu pa-pơ tơgùq sì grẽh rùp nhũ mưng patơu akõq hluỡq. Tũq nhũ tơlàq iãq bôh Yàc Je-su dòq mưng atah, nhũ đuaĩq trôh anĩh Pitrai sì aguãl ta-ồq pãq anãq Pitrai. Nhũ iơu priãu prong sãp, làiq: “Ơ Yàc Je-su, Anàq Yàc Pô Lơngĩq hũ Dloòng Dlòc Rlao Avih, hlãq sì Pitrai hũ kaya hagĩq lơĩh? Hlãq rãn lakơu pãq anãq Yàc pô lơngĩq, Pitrai juơi ngãq dleh dlàr hlãq.” Kơyua Pitrai song pơđar nhũ, làiq: “Ơ kamlai dih, iỡuq tơviãq vẽq tlah mưng mơnuĩh nĩ.” Yàc Je-su tơnĩa nhũ: “Hã angãn hagĩq?” Nhũ drơ: “Angãn hlãq la Tơpuôl Lĩng, kơyua pơnõq hlãq lũ.” Yơu nữn nhũ miẽt rãn lakơu Yàc Je-su juơi pơtiãuq pơnõq nhũ tơviãq tlah mưng phũm nữn. Tũq nữn, hũ sa tơpuôl vơvui lũ viãq ãn dòq bõc pãq bò chỡq, nữn pơnõq nhũ rãn lakơu Pitrai, làiq: “Lakơu pơđar ga pơnõq hlãq tơma dơlãp tơpuôl vơvui, pioh pơnõq hlãq hũ pơlih ãp tơma dơlãp nhũ.” Yàc vrơi gơnuar, yơu nữn la dơgrữq kamlai tơviãq nao sì tơma dơlãp tơpuôl vơvui, tơpuôl vơvui — pơgãp dua rơvơu drơi — pơlẽq rùp mưng dlòc chỡq trỗt ia tơsìq sì mơtai lơngãq avih dơlãp ia tơsìq. Dơgrữq mơnuĩh dlãc vơvui tlàq đuaĩq sì akhàt wỡq vruãq nữn vãq avih dơlãp palơi prong sì dơlãp palơi tìt, nữn hũ lũ aràc mơnuĩh nao trôh pioh mững vruãq hagĩq song tơviãq jỡc. Dơgrữq mơnuĩh nao mững vruãq tơviãq jỡc trôh pãq anĩh Yàc Je-su sì bôh mơnuĩh kađòc kamlai ãp — nữn la mơnuĩh Tơpuôl Lĩng kamlai ãp tơma — ãn dòq guh pãq đỡn, chồq ao charơpha siàp mơkrơ sì dlò jãc siàp yơu lơđãp, nữn pơnõq nhũ huaĩq tơtơh viãq. Dơgrữq mơnuĩh song bôh vruãq tơviãq jỡc ga mơnuĩh kađòc kamlai ãp akhàt wỡq ga pơnõq nhũ hmỡq mưng vruãq song tơviãq trôh sì mưng tơpuôl vơvui. Vloh pơnõq nhũ pơh pơnuaĩq lakơu sì Yàc Je-su tơviãq tlah mưng anĩh phũm pơnõq drơi hũ. Tũq Yàc Je-su ãn yàp tơma ahòq, mơnuĩh kađòc kamlai ãp lakơu Pitrai vrơi ga nhũ hũ nao sigỡuq sì Pitrai. Nữn Yàc Je-su ôh vrơi gơnuar sơai, nữn sơai: “Iỡuq nao wỡq sàc sì trôh anĩh ban mơyơu hã, akhàt ga pơnõq nhũ vruãq prõc rlao Yàc song ngãq ga hã, sì Pitrai song ràc tơviãq hatai anĩt duman sơai yơu halơi.” Yơu nữn, la nhũ nao wỡq sì pơdòq akhàt tơviãq dơlãp phũm Đe-ka-bu-lơ dơgrữq vruãq prong rlao Yàc Je-su song ngãq ga drơi, avih dơgrữq mơnuĩh mãq ngãq krơi.

Tũq nữn, Yàc Je-su dòq pãq dlòc ahòq nao gãt pãq gah dih sa bãc tơra, nữn hũ sa tơpuôl vual vơla lũ viãq pơjũm pơtõm tòp dar Pitrai, nữn Pitrai ãn dòq pãq gah ia tơsìq. Tũq nữn, dih, hũ sa aràc dơlãp dơgrữq mơnuĩh apãt sàc pơtõm, angãn la Jai-ru, nao trôh, tũq ung bôh Yàc, ung aguãl ta-ồq pãq anĩh tơkai Pitrai. Ung miẽt rãn lakơu Yàc, làiq: “Anàq kamơi tìt hlãq hũ jẽq mơtai. Lakơu Pitrai trôh chẽq tơngãn pãq dlòc nhũ pioh nhũ pasồq pakhơĩh sì hũ hadiuq.” Yơu nữn la Pitrai nao sì ung, sa tơpuôl vual vơla lũ kung nao tui Pitrai sì sũl jẽh tòp dar Pitrai.

Tũq nữn, hũ sa aràc mơnuĩh kamơi kađòc ruãq tôh dơrah song hũ sa plôh dua thũt. Mơnuĩh kamơi nữn song ãt dleh dlàr lũ viãq mưng dơgrữq mơnuĩh gơnuar jrão sì song lơhiãq avih dơgrữq kaya drơi hũ, nữn ôh kuơ hagĩq, nữn pa-vlữq wỡq, ruãq nữn tơviãq jỡc tơrãq rlao wỡq, Hadơi sì tũq hũ hmỡq akhàt wỡq mưng Yàc Je-su, mơnuĩh kamơi nữn trôh jẽq gah hadơi Pitrai pãq khrãh tơpuôl vual vơla lũ, sì kamơi nữn rơwỡq ao Pitrai. Mưng mơnuĩh kamơi nữn sơnơng: “Mơyah làiq drơi mĩn chàc rơwỡq trôh ao Pitrai, nữn drơi ròq hũ khơĩh.” Tũq nữn mư, dơrah hõq tơviãq mơnuĩh kamơi nữn hũ ôh tơviãq wỡq tơra, sì mơnuĩh kamơi nữn iãq thơu dơlãp rùp phàp drơi song jỡc khơĩh ruãq. Yàc Je-su nữn mư iãq thơu dơlãp rùp phàp drơi làiq gơnuar chơnuãq song hũ tơviãq mưng rùp phàp Pitrai. Pitrai weh wỡq pãq khrãh tơpuôl lũ sì tơnĩa: “Asơi song rơwỡq trôh pãq ao kơu?” Dơgrữq mơnuĩh mơgrũ đơp sì Pitrai: “Pôgrũ bôh tơpuôl lũ nĩ sũl jẽh pôgrũ, nữn pôgrũ dòq tơnĩa wỡq: ‘Asơi rơwỡq trôh pãq kơu’ yơh?” Nữn Yàc Je-su iãq tòp dar pioh mững mơnuĩh song ngãq kaya nữn. Mơnuĩh kamơi thơu vruãq song tơviãq trôh ga drơi, nữn huaĩq sì tơtơh, trôh vơ-viar rùp pãq ala tơkai Pitrai sì akhàt wỡq ga Pitrai avih dơgrữq kaya la viãq. Nữn Pitrai đơp sì mơnuĩh kamơi nữn: “Nĩ ơ anàq kamơi, voh-tui anàq song pasồq pakhơĩh anàq. Iỡuq nao dơlãp kaya dadu lơngai sì hũ khơĩh tlah ruãq sơkìq anàq hũ.”

Dơlãp tũq Pitrai ãn dòq đơp, hũ dơgrữq mơnuĩh mưng sàc mơnuĩh apãt akõq sàc pơtõm trôh pa-thơu: “Anàq kamơi ung mơtai vloh. Hayơu dòq ngãq nhũn trôh pãq Pitrai hagĩq wỡq?” Nữn dơlãp tũq hmỡq pơnuaĩq pơnõq nhũ đơp, Pitrai đơp sì mơnuĩh apãt akõq sàc pơtõm: “Juơi huaĩq. Mĩn pãc tui vẽq.” Pitrai ôh vrơi gơnuar mơnuĩh halơi nao tui sigỡuq sì drơi, mĩn Pier, Ja-kơ sì Jãng, adơi Ja-kơ. Pitrai nao pãq sàc mơnuĩh apãt akõq sàc pơtõm sì Pitrai bôh tơpuôl mơnuĩh ngãq nhũn sabôn, mơnuĩh nữn ngãq sia chõq sì mơnuĩh nữn priãu prõc sãp. Tũq Pitrai tơma sàc, Pitrai đơp sì pơnõq nhũ: “Hayơu pơnõq hã ka-ồq ka-ãn sì sia chõq yơu nữn? Anàq tìt nĩ ôh mơtai ôh, nữn nhũ mĩn dòq pìq.” Yơu nữn pơnõq nhũ tlao siẽq siẽl Pitrai, nữn Pitrai pơtiãuq pơnõq nhũ tơviãq blàc avih, mĩn va ami, ama anàq tìt sì dơgrữq mơnuĩh nao sigỡuq sì Pitrai, vloh Pitrai nao tơma pãq anĩh anàq tìt dòq đĩh. Pitrai apãt tơngãn anàq tìt vloh đơp sì nhũ: “Ta-li-tha, kum!” Pơnuaĩq nữn hũ gơtha la: “Anàq kamơi tìt, Kơu pơđar anàq, iỡuq tơgùq dỡc.” Nữn mư, anàq kamơi tìt tơgùq dỡc sì yàp nao, (Kơyua nhũ song tãl sa plôh dua thũt), sì dơgrữq mơnuĩh dòq pãq đỡn kơtuãq, sì mãq ngãq krơi viãq. Tũq nữn, Pitrai pakỡuq gơnĩt pơnõq nhũ làiq ôh vrơi asơi thơu vruãq nĩ, sì Pitrai kung pơđar pơnõq nhũ iỡuq vrơi ga anàq kamơi tìt nữn bõc sa asĩt kaya gĩq vẽq.

Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.