Roglai Bible Literal Text
Mak 3
Vloh Yàc Je-su tơma sàc pơtõm sa bãc tơra, sì hũ sa aràc mơnuĩh kađòc krao plàq tơngãn ãn dòq pãq đỡn. Hũ tơkìq mơnuĩh mưng dio iãq gơnĩt, mơyah làiq Pitrai hũ pakhơĩh ga mơnuĩh nữn dơlãp harơi Sa-bat nữn pơnõq nhũ pơlih yãq dlàiq Pitrai. Yơu nữn, Yàc Je-su pơđar mơnuĩh hũ plàq tơngãn kađòc krao: “Iỡuq tơgùq dỡc vẽq pãq khrãh pơnõq kơu.” Vloh Pitrai tơnĩa vual vơla: “Dơlãp harơi Sa-bat hũ gơnuar ngãq vruãq siàp yơh hẽla ngãq vruãq iãh, dõc mơnuĩh hẽla pa-mơtai mơnuĩh?” Nữn Pơnõq nhũ dòq suà lìt. Pitrai lơnhẽ iãq tòp dar pơnõq nhũ savĩq nõng mơvai, ka-ồq mưng kaya khãc hatai pơnõq nhũ hũ, nữn đơp sì mơnuĩh lakơi: “Iỡuq làc tơviãq plàq tơngãn hã hũ.” Nữn nhũ làc tơviãq plàq tơngãn sì tơngãn nhũ jỡc pakhơĩh. Hadơi nữn, dơgrữq mơnuĩh Pha-ri-si tơviãq nao pãq blàc, tũq nữn mư vơyai pơnẽq sì gah tơpuôl He-rôt pioh jơdrãq wỡq Pitrai, ngãq yơu halơi hũ pa-mơtai Pitrai.
Vloh Yàc Je-su sigỡuq sì dơgrữq mơnuĩh mơgrũ Pitrai pleh nao pãq gah tơsìq, sì hũ tơpuôl vual vơla lũ viãq ròq nao tui mưng Ga-li-le sì pãq Ju-đe, mưng Je-ru-sa-lem, mưng Y-đu-me sigỡuq sì phũm pãq gah dih kròc Jô-đãnh kung yơu wĩt dar palơi prong Ti-rơ sì palơi Si-đôn. Tũq pơnõq nhũ hmỡq dơgrữq vruãq Pitrai ngãq, lũ viãq mơnuĩh va gỡuq nao trôh pãq Pitrai. Kơyua mưng vual vơla lũ viãq, nữn Pitrai pơđar dơgrữq mơnuĩh mơgrũ rơchãc lơĩh sa sơrôh ahòq tìt ga Pitrai, pioh pơnõq nhũ ôh sũl jẽh Pitrai. Kơyua mưng Pitrai song pasồq pakhơĩh lũ mơnuĩh nữn mơnuĩh halơi hũ ruãq sơkìq kung ưng sơkuãq nao sơmar pioh rơwỡq Pitrai. Nữn tũq halơi dơgrữq kamlai bôh Yàc, nữn pơnõq nhũ pađĩh rùp trỗt pãq anãq Pitrai, nữn pơnõq nhũ priãu prong sãp sì đơp làiq: “Pitrai la Anàq Yàc Pô Lơngĩq.” Yơu nữn Pitrai ngãq gơmrữq gơloh pơkhè pơnõq nhũ làiq ôh akhàt tơviãq ga aràc halơi thơu Pitrai.
Pơtui nữn, Pitrai đìq pãq chỡq sì iơu dơgrữq mơnuĩh tui hatai Pitrai ưng, nữn pơnõq nhũ nao trôh pãq Pitrai. Pitrai rơwah padỡc sa plôh dua aràc (dơgrữq mơnuĩh nữn Pitrai kung iơu la mơnuĩh gơnuar pơđar), pioh pơnõq nhũ dòq sigỡuq sì Pitrai sì Pitrai pơlih hũ pơđar pơnõq nhũ nao pơto akhàt, kung vrơi ga pơnõq nhũ hũ gơnuar pơtiãuq kamlai. Pitrai ruãh padỡc sa plôh dua aràc: Nữn Si-môn, Pitrai pơwah pa-angãn tơmo ga nhũ la Pier; Ja-kơ, anàq lakơi Se-be-đe, sì Jãng, adơi Ja-kơ hũ, la pơnõq nhũ Pitrai pơwah pa-angãn tơmo la Bô-a-net, gơtha la anàq lakơi grĩm kơtãl tãq; Sigỡuq sì An-dre, Phi-lip, Ba-the-le-my, Ma-thi-ơ, Thô-ma, Ja-kơ anàq lakơi A-phe, Tha-đe, Si-môn Se-lôt, sì Ju-đa Is-ka-ri-ôt, kung la mơnuĩh jơdrãq sì Pitrai.
Tũq nữn, Pitrai tơma dơlãp sa voh sàc, sì sa tơpuôl vual vơla sì va gỡuq nao trôh, Pitrai sigỡuq sì mơnuĩh mơgrũ tơviãq jỡc ôh bõc bẽn jỡc. Tũq dơgrữq mơnuĩh dơlãp sàc anĩh Pitrai hmỡq thơu yơu nữn, pơnõq nhũ trôh pioh mãq Pitrai va nao wỡq, kơyua pơnõq nhũ đơp làiq: “Nữn nhũ lơhiãq dlò vloh.” Dơgrữq mơnuĩh gơnuar pơto voh-va mưng Je-ru-sa-lem trỗt đơp: “Nhũ song kađòc Be-el-se-bul ãp,” sì “Gơnang gơnuar Yàc kamlai nữn nhũ rgơi pơtiãuq kamlai jỡc.” Nữn Yàc Je-su iơu pơnõq nhũ trôh, sì đơp ga pơnõq nhũ mưng pơnuaĩq pa-mơyơu: “Ngãq yơu halơi Sa-tan vloh pơtiãuq jỡc kamlai Sa-tan? Mơyah làiq sa lơgar kađòc pa-chơlah jơdrãq wỡq sì nhũ, nữn lơgar nữn ôh tũq halơi dòq dỡc kơjãp jỡc. Mơyah làiq sa voh sàc anĩh halơi ưng pa-chơlah krơi nữn sàc anĩh nữn kung ôh tũq halơi dòq dỡc kơjãp jỡc. Sì mơyah làiq Kamlai Sa-tan tơgùq jơdrãq wỡq nhũ sì pa-chơlah tơviãq, nữn nhũ ôh tũq halơi dòq dỡc kơjãp, nữn nhũ song trôh tũq kađòc pa-lơhiãq. Pa-vlữq wỡq sì vruãq kaya jơdrãq krơi drơi, ôh tũq halơi pơlih tơma sàc sa aràc mơnuĩh prãn khãc, pioh tlẽq kaya mơnã nhũ hũ, mơyah làiq ka-ôh mãq chãq nhũ halơu, hadơi nữn song hũ tlẽq kaya dơlãp sàc nhũ. Iỡuq viãq, kơu đơp sì pơnõq ung làiq, dơgrữq dlàiq dơnũh pơjẽh anàq mơnuĩh hũ nữn ròq hũ tơleh, gãm sì avih dơgrữq pơnuaĩq đơp sơvĩl pơnõq nhũ đơp tơviãq, nữn mơnuĩh halơi đơp sơvĩl jơdrãq wỡq sì Yàc Vơngãq Sơđah, ròq ôh tũq halơi hũ tơleh, nữn ròq dòq kađòc dlàiq gãm gãm.” — Pitrai đơp yơu nữn kơyua mưng pơnõq nhũ đơp: “Nhũ nữn kađòc kamlai ãp.”
Ami Pitrai sigỡuq sì dơgrữq adơi Pitrai hũ nao trôh ãn dòq dỡc gah lơniãu, pơnõq nhũ lakơu pơyua đơp ga Pitrai, iơu Pitrai tơviãq. Hũ tơpuôl vual vơla dòq guh tòp dar Pitrai nữn pơnõq nhũ đơp sì Pitrai: “Dih, ami sì adơi sơai pôgrũ dòq pãq lơniãu, ãn duah pôgrũ.” Pitrai đơp sì pơnõq nhũ: “Asơi la ami kơu sì adơi sơai kơu?” Vloh Pitrai lơnhẽ iãq dơgrữq mơnuĩh ãn dòq guh tòp dar Pitrai, sì đơp: “Nĩ la ami kơu sì adơi sơai kơu! Kơyua mưng mơnuĩh halơi ngãq tui hatai ưng Yàc Pô Lơngĩq nữn la adơi sơai kơu, gỡuq kamơi kơu, sì ami kơu.”
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.