Mak 2

1Tũq Yàc Je-su mai wỡq pãq Ka-be-na-um hadơi nữn sa asĩt harơi, vual vơla hmỡq thơu Pitrai ãn dòq dơlãp sàc. 2Yơu nữn hũ lũ mơnuĩh pơtõm gỡuq pãq đỡn tơviãq jỡc ôh dòq anĩh tơra, pãq anãq bãc tơma tơviãq kung yơu nữn, sì Yàc Je-su pơto akhàt pơnuaĩq siàp ga pơnõq nhũ. 3Tũq nữn hũ sa tơkìq mơnuĩh trôh pãq anĩh Pitrai, chơkồc va sa aràc mơnuĩh ruãq kao; nhũ hũ chơkồc pàq aràc. 4Kơyua hũ lũ mơnuĩh, pơnõq nhũ ôh tũq halơi trôh jẽq Pitrai, nữn pơnõq nhũ yah pơvũc sàc tơpãq anĩh Yàc Je-su dòq guh, ngãq jỡc sa gơlòc tơma, pơnõq nhũ padũng trỗt chơnang sì mơnuĩh ruãq kao dòq đĩh. 5Tũq Yàc Je-su ròq bôh voh-tui pơnõq nhũ hũ, Pitrai đơp sì mơnuĩh ruãq kao: “Ơ anàq, dlàiq dơnũh anàq song hũ tơleh!”

6Tũq nữn, hũ dơgrữq mơnuĩh gơnuar pơto voh-va ãn dòq guh pãq đỡn sơnơng dơlãp hatai pơnõq nhũ: 7“Hayơu mơnuĩh nĩ vloh đơp yơu nữn? Nhũ đơp sơvĩl nữn! Asơi hũ gơnuar tơleh dlàiq rlao mĩn sa Yàc Pô Lơngĩq?”

8Nữn mư, Yàc Je-su thơu dơlãp vơngãq hatai drơi làiq pơnõq nhũ ãn sơnơng krơi yơu nữn, Pitrai tơnĩa pơnõq nhũ: “Hayơu pơnõq ung vloh sơnơng dơgrữq pơnuaĩq nữn dơlãp hatai? 9Pơnuaĩq halơi nữn buôt rlao pioh đơp sì mơnuĩh ruãq kao, ‘Dlàiq dơnũh hã song hũ tơleh!’ hẽla ‘Iỡuq tơgùq dỡc, gơlãp chơnang sì nao’? 10Nữn pioh ga pơnõq ung thơu làiq Anàq Mơnuĩh hũ gơnuar tơleh dlàiq pãq dlòc hlùq nĩ,” vloh Pitrai đơp sì mơnuĩh ruãq kao: 11“Kơu pơđar hã iỡuq tơgùq dỡc, gơlãp chơnang tơgùq, sì nao wỡq sàc.”

12Yơu nữn nhũ tơgùq dỡc sì nữn mư gơlãp chơnang tơgùq vloh tơviãq nao pãq anãq dơgrữq mơnuĩh. Kơyua nữn, mơnuĩh halơi kung mãq ngãq krơi sì sơ-uỗt mơyòp Yàc Pô Lơngĩq, Pơnõq nhũ đơp: “Pơnõq drơi ka-ôh tũq halơi bôh vruãq yơu nữn.”

13Pitrai tơviãq nao pãq gah tơsìq, sì avih tơpuôl vual vơla hũ trôh pãq Pitrai, vloh Pitrai pơto pơđar pơnõq nhũ. 14Tũq Pitrai nao gãt, Pitrai bôh Le-vi, anàq lakơi A-phe hũ, ãn dòq guh pãq anĩh mãq jia, nữn Pitrai iơu ung: “Iỡuq nao tui pôgrũ.” Ung tơgùq dỡc sì nao tui Pitrai.

15Vruãq ròq trôh tũq Yàc Je-su ãn dòq guh bõc pãq sàc Le-vi, hũ lũ mơnuĩh mãq jia kung yơu mơnuĩh hũ dlàiq dòq guh bõc sigỡuq sì Pitrai sì dơgrữq mơnuĩh mơgrũ Pitrai, kơyua hũ lũ mơnuĩh dòq pãq đỡn song tui Pitrai. 16Tũq dơgrữq mơnuĩh gơnuar pơto voh-va, pơweh sì gah tơpuôl Pha-ri-si, bôh Yàc Je-su dòq guh bõc sigỡuq sì mơnuĩh hũ dlàiq sì mơnuĩh mãq jia, nữn pơnõq nhũ đơp sì dơgrữq mơnuĩh mơgrũ Pitrai: “Hayơu ung nữn vloh bõc sigỡuq sì mơnuĩh mãq jia gãm sì mơnuĩh hũ dlàiq yơu nữn?”

17Tũq Yàc Je-su hmỡq pơnuaĩq nữn, Pitrai đơp sì pơnõq nhũ: “Mơnuĩh prãn khãc ôh chàc mơnuĩh gơnuar jrão, nữn mĩn mơnuĩh kađòc ruãq sơkìq iỡuq chàc. Kơu trôh ôh iỡuq la iơu mơnuĩh tơpãq dãng, sì la pioh iơu mơnuĩh hũ dlàiq.”

18Dơgrữq mơnuĩh mơgrũ Jãng hũ sì mơnuĩh Pha-ri-si ãn ãt bõc, nữn pơnõq nhũ trôh tơnĩa Yàc Je-su: “Kơyua kanõh hagĩq mơnuĩh mơgrũ Jãng sì mơnuĩh mơgrũ Pha-ri-si ãt bõc, dòq mơnuĩh mơgrũ ung hũ vloh ôh ãt bõc?”

19Yàc Je-su đơp: “Thuãi tơma dơlãp kaya bõc pơhuãq ôh pơlih ãt bõc tũq mơnuĩh mơtơu lakơi gãm dòq sigỡuq sì pơnõq nhũ, iỡuq mĩn? Tũq halơi mơnuĩh mơtơu lakơi gãm dòq sigỡuq sì pơnõq drơi, nữn pơnõq nhũ pơlih ôh ãt bõc jỡc. 20Nữn dơgrữq harơi ròq trôh, di tũq mơnuĩh mơtơu kađòc va nao tlah mưng di nhũ, dơlãp tũq dơgrữq harơi nữn, pơnõq nhũ ròq ãt bõc. 21Ôh asơi vãl sa vlah pơcha vơhrơu tơma vlah ao tlãq, mơyah làiq ngãq yơu nữn, nữn vlah vãl ròq tarơhẽt tẽq tơtleh mưng vlah ao, pơcha vơhrơu hẽt tẽq pơcha tlãq, sì anĩh tẽq ròq brõq uãn rlao tơra. 22Ôh asơi tôh alãc vơhrơu tơma dơlãp kadoh kalìq tlãq, mơyah làiq ngãq yơu nữn alãc ròq ngãq pơchãh kadoh kalìq, alãc gãm sì kadoh kalìq kung ôh dòq, vlữq wỡq yơu nữn, alãc vơhrơu iỡuq hũ pioh dơlãp kadoh kalìq vơhrơu.”

23Dơlãp harơi Sa-bat, Yàc Je-su nao gãt dơgrữq blàc hama, sì dơlãp tũq nao jơlàt nữn dơgrữq mơnuĩh mơgrũ Pitrai sơpuãq vơdai mi. 24Yơu nữn mơnuĩh Pha-ri-si tơnĩa Pitrai: “Iãq dih, hayơu pơnõq nhũ vloh ngãq kaya ôh hũ gơnuar ngãq dơlãp harơi Sa-bat?”

25Pitrai hẽ wỡq sì pơnõq nhũ: “Pơnõq ung ka-ôh tũq halơi pơpoh dơgrữq vruãq Da-vĩt sì dơgrữq mơnuĩh nao sigỡuq sì ung song ngãq dơlãp tũq ung kađòc siẽuq sier sì ờq lơ-pa ôh yơh? 26Ngãq yơu halơi pitao song tơma sàc Yàc Pô Lơngĩq tũq dơlãp rài pô pioh kaya duh talơvãt A-bia-tha, sì bõc bẽn pãq ban talơvãt, la bẽn ôh hũ gơnuar bõc, mĩn luơi pioh ga mơnuĩh gơnuar pioh kaya duh talơvãt, yơu nữn ung kung pa-mơpha ga dơgrữq mơnuĩh nao sì nhũ bõc sigỡuq?”

27Vloh Pitrai đơp sì pơnõq nhũ: “Harơi Sa-bat hũ padỡc tơviãq ga anàq mơnuĩh, ôh iỡuq anàq mơnuĩh hũ ngãq tơviãq ga harơi Sa-bat. 28Yơu nữn, Anàq Mơnuĩh la Yàc, kung la Yàc gãm harơi Sa-bat wỡq.”