Lu-ka 3

1Dơlãp thũt bãc sa plôh lơmã rài Se-sa Ti-be-rơ — ãn tũq Bôn-sơ Phi-lat ngãq pô prõc apãt akõq phũm Ju-đe, He-rôt ngãq pitao adơi phũm Ga-li-le, dòq Phi-lip, adơi lakơi ung ngãq pitao adơi dơlãp phũm Y-tu-re sigỡuq sì phũm Tra-kô-nit, sì Li-sa-ni-a ngãq pitao adơi phũm A-bi-len, 2dơlãp tũq lơwah An-ne sigỡuq sì Kai-phe ngãq mơnuĩh pioh kaya duh talơvãt prong — hũ pơnuaĩq Yàc Pô Lơngĩq song trôh sì Jãng, anàq lakơi Sa-cha-ri, dòq dơlãp blàc choah. 3Vloh nữn, ung nao trôh vãq dơgrữq anĩh tòp dar kròc Jô-đãnh, pơto akhàt adãt bãp-tem mưng kaya mơvai tlàq dlàiq pioh hũ kaya anĩt tơleh dlàiq. 4Yơu pơnuaĩq song hũ wãq dơlãp sơrãq mưng dơgrữq pơnuaĩq mơnuĩh gơnuar hwơr E-sai:

“Hũ sãp priãu prõc dơlãp blàc choah:

‘Iỡuq wah jơlàt ga Yàc hũ,

ngãq tơpãq dơgrữq jơlàt athua Pitrai hũ.

5Dơgrữq anĩh thòc gơhlũc ròq hũ dor vãq,

dơgrữq chỡq tabồq ròq hũ pơviar trỗt,

jơlàt we wãc ròq ngãq jỡc tơpãq,

jơlàt dloòng viar ròq ngãq jỡc pa-rĩng,

6sì dơgrữq rơlo rùp ròq bôh kaya dõc pơ-tlah Yàc Pô Lơngĩq hũ.’”

7Yơu nữn, Jãng đơp sì vual vơla trôh pioh ãt ung ngãq bãp-tem: “Ơ pơjẽh pơtiàt ala mơsãc dih, asơi song pơto hakơi ga pơnõq hã đuaĩq dỡuq tlah kaya anõc mơvai jẽq trôh? 8Kơyua yơu nữn, iỡuq voh chơtai đang mang sì kaya mơvai tlàq dlàiq, sì juơi đơp krơi drơi làiq: ‘Pơnõq drơi hũ A-bra-ham la ung kõq’ kơyua kơu đơp vrơi ga pơnõq hã thơu làiq Yàc Pô Lơngĩq pơlih hũ ngãq anàq tơcho A-bra-ham mưng dơgrữq voh patơu nĩ. 9Vơnah tơmo, bẽq jòc kung song chẽq jẽq phuỗt kayơu vloh. Mơyah làiq, Kayơu halơi ôh tơviãq chơtai voh siàp nữn kađòc koh sì prah tơmã apôi.” 10Vual vơla tơnĩa ung làiq: “Yơu nữn, pơnõq hlãq iỡuq chàc ngãq hagĩq?” 11Pioh hẽ wỡq pơnuaĩq, ung đơp sì pơnõq nhũ: “Asơi hũ dua vlah ao iỡuq mơpha ga mơnuĩh ôh hũ, sì asơi hũ kaya bõc, mơnuĩh nữn kung iỡuq ngãq yơu nữn.” 12Gah tơpuôl mơnuĩh sơkãq jia kung trôh pioh ãt ngãq bãp tem, nữn pơnõq nhũ tơnĩa sì ung: “Ơ pô, pơnõq hlãq iỡuq ngãq hagĩq?” 13Ung đơp sì pơnõq nhũ: “Juơi nao rìq jia lũ rlau katih ngãq gơnĩt ròq akhàt ga adơi sơai.” 14Hũ sa asĩt tơpuôl mơnuĩh ling kung tơnĩa ung làiq: “Dòq pơnõq hlãq, pơnõq hlãq iỡuq chàc ngãq hagĩq?” Ung đơp sì pơnõq nhũ: “Juơi angui prãn khãc mơvlah mãq kaya hagĩq, kung juơi đơp pơdah asơi, sì iỡuq siàp hatai mưng jĩn harơi drơi hũ.”

15Vơnah tơmo, kơyua vual vơla ãn dòq chơkhãq chàc sì kơyua hũ pơnuaĩq ưng tơnĩa krơi hũ sơnơng dơlãp hatai nhũ mưng Jãng, ôh thơu ung hũ iỡuq la Yàc Dõc Pơ-tlah lơĩh. 16Jãng ròq akhàt pa-tơviãq dơlãp tũq đơp sì dơgrữq mơnuĩh: “Kơu ngãq bãp-tem ga pơnõq adơi sơai mưng ia, nữn Pitao jẽq trôh hũ gơnuar chơnuãq rlau kơu, la Pitao kơu ôh đang mang sì tơleh talơi chơkhõq ga Pitrai. Pitrai ròq ngãq bãp-tem ga pơnõq adơi sơai mưng Yàc Vơngãq Sơđah sì mưng apôi, 17la Pitao hũ apãt chơngua dơlãp tơngãn Pitrai pioh tapơi vơhồc làt vơdai drơi, sì yuãq vơdai mi tơmã adũq drơi, nữn Pitrai ròq chôh pakãp apồc sơkàp mưng apôi ôh tũq halơi pơdãp jỡc.”

18Nữn yơh, iỡuq sì angui dơlãp kaya pơto pơđar lũ kaya tơmo, ung akhàt pa-tơviãq pơnuaĩq Yàc ga vual vơla. 19Nữn pitao adơi He-rôt, hadơi sì tũq kađòc Jãng gơloh pơkhè mưng vruãq He-rô-đia, sơdiuq adơi nhũ, sì mưng avih dơgrữq vruãq iãh mơsãc tơmo nữn pitao song ngãq, 20vloh nữn ròq ngãq pơtãl wỡq vruãq nĩ patui lũ kaya vruãq iãh ga drơi hũ: nữn la ung nữn vrơi mãq Jãng krỡq tơmã sàc jam.

21Bôh làiq, dơlãp tũq dơgrữq aràc mơnuĩh ãt ngãq bãp-tem, vruãq ròq trôh nữn la Yàc Je-su kung ãt ngãq bãp-tem, sì tũq Pitrai ãn iơu lakơu, nữn dơgrữq tãl lơngĩq pơh tơviãq, 22vloh nữn Yàc Vơngãq Sơđah trỗt đãp pãq dlòc Pitrai mãq rùp phuỗt gah lơniãu drưh yơu chĩp katrơu, sì hũ sa sãp đơp mưng dlòc lơngĩq: “Anàq la anàq khiãng duman Kơu hũ. Kơu siàp hatai mưng Anàq.”

23Tũq pơdòq ngãq gơnuar vruãq, nữn rùp phuỗt Yàc Je-su hũ pơgãp tlơu plôh thũt, (tui yơu anàq mơnuĩh sanơng làiq) Pitrai la anàq Jô-sep hũ, Jô-sep anàq He-li, 24He-li anàq Mat-tat, Mat-tat anàq Le-vi, Le-vi anàq Men-chi, Men-chi anàq Ja-ne, Ja-ne anàq Jô-sep, 25Jô-sep anàq Ma-ta-thia, Ma-ta-thia anàq A-môt, A-môt anàq Na-hum, Na-hum anàq Ech-li, Ech-li anàq Na-ge, 26Na-ge anàq Ma-at, Ma-at anàq Ma-ta-thia, Ma-ta-thia anàq Se-me-in, Se-me-in anàq Jô-set, Jô-set anàq Jô-đa, 27Jô-đa anàq Jô-a-nan, Jô-a-nan anàq Re-sa, Re-sa anàq Sô-rô-ba-ben, Sô-rô-ba-ben anàq Sa-la-thi-el, Sa-la-thi-el anàq Ne-ri, 28Ne-ri anàq Men-chi, Men-chi anàq A-đi, A-đi anàq Kô-sam, Kô-sam anàq El-ma-đam, El-ma-đam anàq E-rơ, 29E-rơ anàq Jô-sue, Jô-sue anàq E-li-e-se, E-li-e-se anàq Jô-rim, Jô-rim anàq Mat-that, Mat-that anàq Le-vi, 30Le-vi anàq Si-me-ôn, Si-me-ôn anàq Ju-đa, Ju-đa anàq Jô-sep, Jô-sep anàq Jô-nam, Jô-nam anàq E-li-a-kim, 31E-li-a-kim anàq Me-le-a, Me-le-a anàq Men-na, Men-na anàq Mat-ta-tha, Mat-ta-tha anàq Na-than, Na-than anàq Đa-vit, 32Đa-vit anàq Je-se, Je-se anàq Ô-bet, Ô-bet anàq Bô-ô, Bô-ô anàq Sanh-môn, Sanh-môn anàq Na-at-sôn, 33Na-at-sôn anàq A-mi-na-đap, A-mi-na-đap anàq At-min, At-min anàq A-rơ-ni, A-rơ-ni anàq Het-rôn, Het-rôn anàq Phe-re, Phe-re anàq Ju-đa, 34Ju-đa anàq Ja-kôp, Ja-kôp anàq Y-sac, Y-sac anàq A-bra-ham, A-bra-ham anàq Tha-re, Tha-re anàq Na-kô, 35Na-kô anàq Se-ruc, Se-ruc anàq Re-hu, Re-hu anàq Be-lec, Be-lec anàq He-be, He-be anàq Sa-la, 36Sa-la anàq Kai-nam, Kai-nam anàq A-bat-sat, A-bat-sat anàq Sem, Sem anàq Nô-e, Nô-e anàq Le-mec, 37Le-mec anàq Me-tu-se-la, Me-tu-se-la anàq He-noc, He-noc anàq Ja-ret, Ja-ret anàq Ma-ha-la-en, Ma-ha-la-en anàq Ke-nan, 38Ke-nan anàq E-not, E-not anàq Set, Set anàq A-đam, A-đam anàq Yàc Pô Lơngĩq.