Lu-ka 2

1Vruãq ròq tơviãq jỡc dơlãp dơgrữq harơi nữn, nữn la hũ sa pơnuaĩq gơnuar pơđar mưng Se-sa Au-gut-tơ ròq wãq angãn mơta dơlãp sơrãq sì avih dơgrữq aràc dơlãp dun kơyua. 2Vruãq karhia katih vual vơla mưng chơmrờp nĩ pa-thơu dơlãp rài Kwi-ri-ni-u ãn ngãq pô prong apãt akõq lơgar Si-ri. 3Avih tãl aràc iỡuq mai wỡq pioh wãq angãn tơmã dơlãp srãq, dơgrữq aràc nao wỡq pãq palơi phuỗt drơi. 4Jô-sep kung nao mưng palơi phũm Ga-li-le, tơviãq mưng palơi Na-sa-ret trôh phũm Ju-đe, tơmã palơi Đa-vit, anĩh hũ angãn la Bet-le-hem, kơyua ung pơweh gah pơjẽh pơtiàt Đa-vit, 5pioh wãq angãn tơmã dơlãp sơrãq sigỡuq sì Ma-ri, la mơnuĩh song grữh ưng sì nhũ, ãn dòq mơtiàt. 6Vruãq ròq tơviãq jỡc dơlãp tũq pơnõq nhũ ãn dòq pãq đĩ, nữn la harơi Ma-ri đeh song trôh. 7Nai đeh sa aràc anàq tìt lakơi, la anàq kơchoa drơi hũ, sì nai pơpòq anàq mưng khãt pơchà lơmuỡn vloh chẽq anàq tìt nữn đĩh dơlãp vòc rỡq, kơyua ôh hũ anĩh dòq ga pơnõq nhũ dơlãp sàc ơpah pìq nữn.

8Kung dơlãp phũm nữn, hũ dơgrữq mơnuĩh dlãc avo ãn dòq pãq lơniãu blàc, dơlãp dlài mơlãp mơ-uãh iãq dlãc tơpuôl avo pơnõq nhũ. 9Hũ mơnuĩh gơnrơh Yàc hũ pabôh tơviãq ga pơnõq nhũ, kaya gơhluh Yàc pơsàc gơchràq tòp dar pơnõq nhũ, sì ngãq ga pơnõq nhũ huaĩq tatơh viãq. 10Mơnuĩh gơnrơh đơp sì pơnõq nhũ: “Juơi huaĩq, kơyua iãq nĩ vẽq, kơu va trôh ga pơnõq sơai sa pơnuaĩq siàp viãq uỗt sơh, pơnuaĩq nữn pioh ga dơgrữq mơnuĩh. 11Kơyua harơi nĩ, pãq palơi Đa-vit, Pitao dõc pơ-tlah song đeh ga pơnõq sơai, Pitrai la Yàc Dõc Ala nữn la Yàc! 12Nĩ la khrung nỡm pioh ga pơnõq adơi sơai: Dơgrữq pơnõq adơi sơai duah ròq pãp sa aràc anàq tìt pơpòq mưng dơgrữq khãt pơcha, đĩh dơlãp vòc rỡq.” 13Dơvruh dơvrah, hũ sa tơpuôl mơnuĩh ling pabôh tơviãq sigỡuq sì mơnuĩh gơnrơh nữn sơuỗt mơyòp Yàc Pô Lơngĩq, làiq:

14“Gơhluh viãq angãn Yàc Pô Lơngĩq pãq anĩh dlòc lơngĩq,

sì pãq ala hlùq, dadu lơngai dơlãp dơgrữq mơnuĩh pơweh mưng hatai siàp Yàc hũ.”

15Vruãq ròq trôh mư tũq nữn mơnuĩh gơnrơh tlàq luơi pơnõq nhũ tơgùq pãq dlòc lơngĩq, dơgrữq mơnuĩh dlãc avo đơp sì gỡuq: “Iỡuq viãq, pơnõq drơi iỡuq nao trôh pãq palơi Bet-le-hem sì pioh iãq vruãq vơhrơu nữn la kaya ròq tơviãq, nữn Yàc song akhàt ga pơnõq drơi.” 16Pơnõq nhũ dơvruh dơvrah tơviãq nao pãq đỡn, vloh pãp avih dua Ma-ri sì Jô-sep, sigỡuq sì anàq tìt ãn dòq đĩh dơlãp vòc rỡq. 17Hadơi sì tũq iãq bôh, pơnõq nhũ akhàt mưng dơgrữq pơnuaĩq song hũ đơp pa-thơu ga drơi mưng anàq tìt nữn. 18Mơnuĩh halơi hmỡq kung hũ mãq ngãq krơi viãq mưng dơgrữq pơnuaĩq hagĩq hũ akhàt wỡq ga drơi kơyua mưng dơgrữq mơnuĩh dlãc avo. 19Dòq Ma-ri miẽt wãq sơdor dơgrữq pơnuaĩq nữn, sì sanơng-vơwan dơlãp hatai drơi. 20Vloh dơgrữq mơnuĩh dlãc avo mai wỡq, sì adoh sơuỗt mơyòp Yàc Pô Lơngĩq kơyua avih dơgrữq pơnuaĩq sì pơnõq nhũ song hmỡq sì bôh, drưh yơu pơnuaĩq sơh song akhàt ga pơnõq nhũ.

21Tũq lơwah hũ talơpãn harơi pioh ãt sìq kalìq ga anàq tìt song hũ ngãq, sì angãn anàq tìt nữn la Je-su, la angãn hũ iơu pa-angãn mưng mơnuĩh gơnrơh song pa-angãn halơu sì tũq anàq tìt ãn dòq mơtiàt dơlãp tũc ami.

22Sì tũq dơgrữq harơi rao sơchih pơnõq nhũ tui voh-va Môi-se song nao gãt vloh, pơnõq nhũ va anàq tìt tơgùq nao pãq palơi Je-ru-sa-lem pioh padỡc ga Yàc 23(yơu song hũ wãq dơlãp kaya voh-va Yàc hũ, làiq: “Avih dơgrữq anàq lakơi kơchoa ròq hũ iơu la sơchih ga Yàc”), 24sì pioh padỡc adãt tui yơu kaya pơto dơlãp voh-va Yàc hũ: “sa yơu chĩp katrơu hẽla sa yơu chĩp katrơu anàq”. 25Sì iãq vẽq dih, hũ sa aràc mơnuĩh pãq Je-ru-sa-lem, angãn ung la Si-me-ôn, mơnuĩh lakơi nĩ tơpãq rĩng sì kher pơđer, ãn dòq chơkhãq chàc kaya paluơ padờp vual vơla Is-ra-el, sì Yàc Vơngãq Sơđah dòq sigỡuq sì ung. 26Nữn la kaya pơto akhàt ga ung thơu mưng Yàc vơngãq Sơđah la ung ròq ôh bôh kaya mơtai halơu sì tũq ung pơlih bôh Pitao Dõc Pơ-tlah Yàc hũ. 27Sì kơyua mưng Yàc Vơngãq Sơđah, ung tơviãq nao tơmã sàc talơvãt, tũq ami ama va anàq tìt Je-su trôh pioh aràc ngãq tui yơu kaya lơđãp ngãq gơnĩt dơlãp voh-va hũ pơweh sì anàq tìt nĩ, 28ung pồq anàq tìt pãq dlòc tơngãn, sơuỗt mơyòp Yàc Pô Lơngĩq, nữn ung đơp:

29“Talơvãt Yàc, tũq nĩ, Pitrai ãn vrơi halỗt mơnãq Pitrai tơviãq nao savĩq dadu lơngai tui yơu pơnuaĩq Pitrai.

30Kơyua mơta anàq song bôh kaya dõc pơ-tlah Pitrai hũ,

31nữn Pitrai song rơchãc pơkhrà pãq anãq vual vơla:

32Kaya sơdah sì akhàt tơviãq ga avih dơgrữq vual vơla gah lơniãu, sì ngãq gơhluh ga vual vơla la Is-ra-el Pitrai hũ.”

33Ama sì ami Anàq tìt nữn mãq ngãq krơi viãq pãq anãq dơgrữq pơnuaĩq hagĩq ung đơp mưng Anàq tìt. 34Vloh Si-me-ôn vrơi lơngai ga pơnõq nhũ sì đơp sì Ma-ri, ami Anàq tìt: “Iãq dih, anàq tìt nĩ song ngãq gơnĩt hũ sơnẽq sỗq hẽla pa-tơgùq nữn pioh ngãq ga lũ mơnuĩh dơlãp Is-ra-el, sì ngãq sa khrung nỡm kađòc anàq mơnuĩh sòq jơdrãq — 35Vơnah tơmo, sa bẽq đao ròq tlãuq vơngãq yua nai hũ — tồq ga hatai sơnơng gah dơlãp lũ hatai hũ akhàt pa-tơviãq.” 36Pãq đỡn kung hũ mơnuĩh kamơi gơnuar hwơr An-ne, anàq kamơi Pha-nu-en hũ, pơweh sì pơjẽh pơtiàt A-se. Mòq dlòc thũt viãq, hadiuq sigỡuq sì pơsàc tơjuh thũt mưng tũq mòq dòq soh, 37vloh nữn mòq dòq vlơu tãl trôh tũq nĩ ròq talơpãn plôh pàq thũt, nữn ôh tũq halơi tơviãq mưng sàc talơvãt, miẽt duh vruãq harơi sì mơlãp gãm sì kaya ãt bõc sì iơu lakơu. 38Dơlãp tũq bôh mơta jơ nữn, mòq pơdòq sãp đơp ỡn ngai Yàc Pô Lơngĩq, sì đơp mưng anàq tìt ga dơgrữq aràc mơnuĩh ãn dòq chơkhãq chàc kaya dõc pơ-tlah sì tơvuh Je-ru-sa-lem hũ. 39Dơlãp tũq pơnõq nhũ ròq ngãq wil tãl avih dơgrữq vruãq tui kaya voh-va Yàc hũ, vloh pơnõq nhũ mai wỡq phũm Ga-li-le mưng palơi phuỗt nhũ la Na-sa-ret.

40Anàq tìt prõc tơgùq sì tơviãq jỡc prãn khãc, hũ vãq kaya jãc rgơi, sì kaya anĩt anar Yàc Pô Lơngĩq dòq pãq dlòc anàq tìt nữn.

41Dơgrữq thũt, ami ama Pitrai nao trôh pãq palơi Je-ru-sa-lem pioh nao angui bõc kaya Adãt Nao Gãt. 42Tũq Pitrai hũ sa plôh dua thũt, nữn pơnõq nhũ tơgùq nao pãq đỡn tui yơu rơđãp harơi ngãq adãt. 43Hadơi sì tũq dơgrữq harơi adãt nao gãt vloh, tũq nữn pơnõq nhũ ãn nao jơlàt mai wỡq, anàq tìt Je-su gãm dòq pãq palơi Je-ru-sa-lem nữn Ami ama Pitrai ôh thơu. 44Nữn pơlih sanơng Pitrai dòq sigỡuq dơlãp tơpuôl nao jơlàt, nữn pơnõq nhũ nao avih sa harơi jơlàt, vloh nữn nao duah Pitrai dơlãp tơpuôl gỡuq gãt sì ban mayơu. 45Sì tũq nữn duah ôh bôh, pơnõq nhũ gơlàiq mai wỡq pãq Je-ru-sa-lem, sì pơdòq duah wỡq Pitrai. 46Vruãq ròq trôh nữn la hadơi sì tlơu harơi, pơnõq nhũ duah bôh Pitrai dơlãp sàc talơvãt, ãn dòq guh pãq khrãh dơgrữq pô pơto, bãc hmỡq pơnõq nhũ bãc tơnĩa pơnuaĩq pơnõq nhũ. 47Dơgrữq mơnuĩh halơi hmỡq Pitrai nữn kơtuãq mưng kaya thơu pãc kung yơu pơnuaĩq đơp sì hẽ Pitrai hũ. 48Ama ami kơtuãq tũq bôh Pitrai, sì ami Pitrai đơp sì Pitrai: “Ơ anàq, hayơu anàq vloh ngãq ga ami ama yơu nữn? Iãq nĩ, Ama anàq sì ami ròq pơđìq pơđua sì ka-ùq ka-ãn viãq duah anàq.” 49Pitrai hẽ wỡq sì pơnõq nhũ: “Kơyua hagĩq Ama ami duah anàq? Ama ami ròq ôh thơu làiq anàq iỡuq dòq dơlãp sàc Ama anàq hũ ôh yơh?” 50Nữn pơnõq nhũ ôh thơu pãc pơnuaĩq nữn Pitrai đơp sì pơnõq nhũ. 51Vloh Pitrai nao trỗt sigỡuq sì ama ami, trôh pãq palơi Na-sa-ret, sì ãt duh vruãq sì pãc sãp pơnõq nhũ. Dòq ami Pitrai nữn wãq sơdor dơgrữq vruãq nữn dơlãp hatai nhũ.

52Yàc Je-su brõq harơi brõq jãc rgơi sì prõc tơgùq, kung hũ brõq siàp hatai pãq anãq Yàc Pô Lơngĩq sì anàq mơnuĩh.