Lu-ka 4

1Yàc Je-su, vãq sơrè Yàc Vơngãq Sơđah, tơviãq mưng kròc Jô-đãnh, sì hũ Yàc Vơngãq Sơđah va tơmã pãq blàc choah, 2pioh ãt kamlai ơniãi dơlãp pàq plôh harơi. Dơlãp dơgrữq harơi nữn, Pitrai ôh bõc sa kaya hagĩq nữn Pitrai lơpa hadơi nữn tũq dơgrữq harơi ròq tãl vloh. 3Vloh nữn, kamlai đơp sì Pitrai: “Mơyah làiq ung la Anàq Yàc Pô Lơngĩq, nữn iỡuq pơđar voh patơu nĩ pioh nhũ tơviãq jỡc bẽn vẽq.” 4Yàc Je-su đơp sì nhũ: “Hũ pơnuaĩq wãq làiq: ‘Anàq mơnuĩh hadiuq ôh mĩn gơnang mưng bẽn soh ôh.’” 5Vloh tũq ròq va Pitrai tơgùq pãq anĩh dlòc, nhũ tachơi pơto ga Pitrai avih dơgrữq lơgar dơlãp dun kơyua sa asĩt tũq. 6Kamlai đơp sì Pitrai: “Kơu ròq vrơi ga ung avih gơnuar chơnuãq nĩ sigỡuq sì kaya gơhluh nhũ hũ, kơyua nhũ song hũ pơjao ga kơu, sì kơu pơlih hũ vrơi ga nhũ vrơi ga dơgrữq aràc asơi mơyah làiq kơu ưng. 7Yơu nữn, mơyah làiq ung talơvãt pãq anãq kơu, nữn avih dơgrữq kaya la pơweh sì ung hũ.” 8Pioh đơp pơnuaĩq, Yàc Je-su hẽ wỡq sì nhũ: “Hũ pơnuaĩq wãq: ‘Hã iỡuq duh talơvãt Yàc la Yàc Pô Lơngĩq hã hũ, sì mĩn duh vruãq sa aràc Pitrai soh.’” 9Hadơi wỡq, nhũ va Pitrai trôh palơi Je-ru-sa-lem, chẽq Pitrai pãq dlòc pơvũc sàc duh talơvãt, sì nhũ đơp sì Pitrai: “Mơyah làiq ung la Anàq Yàc Pô Lơngĩq, iỡuq pơlẽq rùp trỗt vẽq mưng anĩh nĩ. 10Kơyua hũ pơnuaĩq wãq làiq:

‘Pitrai ròq pơđar ga dơgrữq mơnuĩh gơnrơh Pitrai mưng anàq, pioh iãq jàc anàq,’

11sì làiq: ‘Pơnõq nhũ ròq pồq anàq pãq tơngãn,

huaĩq anàq sơnẽq tơkai drơi agòq patơu.’”

12Pioh hẽ wỡq, Yàc Je-su đơp sì nhũ, làiq: “Hũ pơnuaĩq đơp: ‘Hã juơi lòc Yàc la Yàc Pô Lơngĩq hã hũ.’”

13Hadơi sì tũq song angui avih pơnẽq đơp dơgrữq kaya ơniãi, kamlai prah luơi Pitrai, chàc tũq lơwah tơmo.

14Yàc Je-su mai wỡq pãq Ga-li-le mưng gơnuar chơnuãq Yàc Vơngãq Sơđah hũ, sì hmỡq tiẽng dơnai mưng Pitrai vãq avih dơgrữq phũm lơgar tòp dar. 15Pitrai pơto pơđar dơlãp dơgrữq sàc pơtõm vual vơla hũ, dơgrữq aràc mơnuĩh sơuỗt mơyòp.

16Pitrai nao trôh palơi Na-sa-ret, anĩh Pitrai song dòq mưng tũq tìt tãl prong, sì tui yơu rơđãp drơi hũ, Pitrai nao tơmã sàc pơtõm dơlãp harơi Sa-bat vloh tơgùq dữc sì pơpoh prõc sãp. 17Pỗc sơrãq gơnuar hwơr E-sai, hũ payơr vrơi ga Pitrai, sì tũq pơh sơrãq tơviãq, Pitrai duah bôh anĩh sì hũ wãq yơu nĩ:

18“Vơngãq Sơđah Yàc hũ trỗt đãp pãq dlòc kơu,

kơyua Pitrai ròq pavuh mơnhàq ga kơu pioh akhàt payơr pơnuaĩq siàp ga mơnuĩh rơbah.

Pitrai song pơđar kơu akhàt vrơi pa-thơu kaya lơnang lơnai ga mơnuĩh kađòc mãq krỡq,

sì kaya pasồq pakhơĩh ga mơnuĩh vùp,

pioh wàq tơleh mơnuĩh kađòc ngãq dleh dlàr sì tơviãq tlah,

19sì akhàt pa-tơviãq lơmã thũt siàp Yàc hũ.”

20Hadơi sì tũq pỗc sơrãq vloh vrơi ga mơnuĩh dõc vruãq, Pitrai dòq guh. Dơgrữq mơnuĩh dơlãp sàc pơtõm ròq iãq mững gơnĩt Pitrai. 21Nữn vloh, Pitrai pơdòq đơp sì pơnõq nhũ, làiq: “Harơi nĩ, pơnuaĩq Sơrãq Sơđah nữn trôh pãq pơnõq adơi sơai nữn song hũ tơviãq jỡc iỡuq viãq.” 22Avih tãl aràc mơnuĩh hũ ngãq chưng siàp mưng Pitrai sì pơnõq nhũ mãq ngãq krơi pãq anãq dơgrữq pơnuaĩq vãq kaya anĩt tơviãq mưng chơbuai Pitrai, sì pơnõq nhũ đơp: “Nĩ ôh iỡuq la anàq lakơi Jô-sep nĩ yơh?” 23Pitrai đơp sì pơnõq nhũ: “Viãq pơnõq adơi sơai ròq đơp sì kơu pơnuaĩq pơđĩc nĩ: ‘Ơ mơnuĩh gơnuar jrao, iỡuq pasồq khơĩh krơi rùp drơi. Ôh thơu hadùp vruãq sì pơnõq hlãq ròq hmỡq ràc pa-tơviãq pãq Ka-be-na-um, nữn ung kung iỡuq ngãq pãq anĩh nĩ, la anĩh palơi phuỗt drơi vẽq.’” 24Vloh nữn Pitrai đơp: “Iỡuq viãq, kơu đơp viãq sì pơnõq adơi sơai, làiq ôh hũ mơnuĩh gơnuar hwơr halơi hũ tồq ròq pãq anĩh palơi phuỗt drơi hũ. 25Kơu đơp sì pơnõq adơi sơai gơnang mưng pơnuaĩq viãq, làiq lũ mơnuĩh dòq vlơu pãq Is-ra-el dơlãp rài E-li, tũq lơngĩq kađòc krỡq gơjãp dơlãp tlơu thũt nãm vlàt, tũq nữn, kaya ờq lơpa prõc tơviãq trôh dơlãp vãq avih lơgar, 26nữn E-li hũ pơđar nao trôh sì ôh hũ asơi dơlãp tơpuôl pơnõq nhũ, lơniãu anĩh nữn trôh Sa-rep-ta, pãq palơi Si-đôn trôh sigỡuq sì sa aràc mơnuĩh kamơi vlơu ôh hũ vơsàc. 27Kung hũ lũ mơnuĩh kađòc ruãq aphũng dòq pãq Is-ra-el dơlãp rài gơnuar hwơr E-li-se, nữn ôh asơi dơlãp tơpuôl pơnõq nhũ hũ sơchih, lơniãu Na-a-man, mơnuĩh Si-ri.” 28Dơlãp tũq hmỡq dơgrữq pơnuaĩq nữn, dơgrữq aràc dòq dơlãp sàc pơtõm vãq sơrè kaya lơmùq mơvai sì nong viãq. 29Hadơi tũq nữn tơgùq dữc, pơnõq nhũ pơgùq va Pitrai tơviãq lơniãu palơi, sì va Pitrai trôh pãq anĩh gah tabiỡh chỡq sì palơi pơnõq nhũ pãq dlòc đỡn, pioh prah Pitrai trỗt pãq ala. 30Nữn Pitrai prah luơi hadơi nữn sì nao gãt pãq khrãh anãq pơnõq nhũ.

31Pitrai nao trỗt pãq Ka-be-na-um, sa palơi pơweh phũm Ga-li-le, sì Pitrai pơto pơđar ga vual vơla tơmã dơlãp harơi Sa-bat. 32Pơnõq nhũ mãq ngãq krơi hlơu kaya pơto pơđar Pitrai hũ, kơyua pơnuaĩq Pitrai akhàt tơviãq sigỡuq sì gơnuar chơnuãq. 33Dơlãp sàc pơtõm, hũ sa aràc mơnuĩh kađòc kamlai tasỡuq nrãc ãp tơmã, sì mơnuĩh nữn priãu prõc sãp: 34“He! Je-su Na-sa-ret, pơnõq hlãq sì Pitrai hũ kaya hagĩq lơĩh? Pitrai trôh pioh pa-lơhiãq pơnõq hlãq yơh? Hlãq thơu Pitrai la asơi — La Pitao Sơđah Yàc Pô Lơngĩq hũ!” 35Yàc Je-su gơrloh pơkhè nhũ, làiq: “Dòq suà vẽq, sì tơviãq tlah mưng mơnuĩh nĩ!” Nữn, kamlai pa-lơvuh mơnuĩh nữn trỗt ala hlùq pãq khrãh tơpuôl pơnõq nhũ, nữn kamlai tơviãq tlah mưng sơai nữn, ôh ngãq iãh halôh hagĩq sơai nữn. 36Kaya kơtuãq trôh pãq dlòc avih dơgrữq tãl aràc mơnuĩh, sì pơnõq nhũ đơp sì gỡuq, làiq: “Jơlàt duh talơvãt halơi nĩ, tơviãq jỡc sì trôh pãq gơnuar sì prãn khãc, ung nữn pơđar kamlai mơsãc, sì ngãq ga pơnõq nhũ tơviãq tlah?” 37Tiẽng dơnãi mưng Pitrai vãq tơviãq avih dơlãp phũm jẽq phia.

38Hadơi nữn, tũq ròq tơgùq dữc tơviãq mưng sàc pơtõm, Pitrai tơmã dơlãp sàc Si-môn hũ. Bôh làiq, ami sơdiuq Si-môn hũ ãn dòq pìq pơđua sì ruãq tatơh tơrãq, sì pơnõq nhũ òt lakơu Pitrai pakhơĩh ga mòq. 39Dòq dữc jẽq phia mòq, Pitrai pơđar ruãq ajur tatơh, sì nhũ tơviãq tlah mưng mòq, vloh mòq tũq nữn mư tơgùq dữc sì duh vruãq pơnõq nhũ.

40Tũq ia harơi tơmã, avih dơgrữq mơnuĩh kađòc ruãq sơkìq sì lũ kaya ruãq. Mơnuĩh nữn va trôh pãq Pitrai, vloh Pitrai pasồq pakhơĩh ga pơnõq nhũ tũq chẽq tơngãn avih tãl aràc pãq dlòc tơpuôl nhũ. 41Dơgrữq Kamlai kung tơviãq tlah lũ mơnuĩh, dơlãp tũq pơnõq nhũ priãu prõc sì đơp làiq: “Pitrai la Anàq Yàc Pô Lơngĩq!” Sì mưng pơnẽq gơloh pơkhè, Pitrai ôh vrơi gơnuar pơnõq nhũ đơp, kơyua pơnõq nhũ thơu Pitrai la Yàc Dõc Pơ-tlah.

42Tũq jrang mư-ờp, hadơi sì tũq tơviãq nao tlah anĩh nữn, Pitrai nao trôh pãq anĩh suà lìt, dòq tơpuôl vual vơla nao duah Pitrai, sì pơnõq nhũ ròq nao tãl trôh tũq nữn pãp Pitrai sì rãn òt Pitrai dòq wỡq, ôh vrơi nao tơtlah mưng pơnõq nhũ. 43Nữn Pitrai đơp sì pơnõq nhũ, làiq: “Kơu kung iỡuq pơto akhàt pơnuaĩq siàp mưng lơgar Yàc Pô Lơngĩq vrơi lũ ga palơi prong tơmo, kơyua mưng kơu hũ pơđar mưng vruãq nĩ.”

44Vloh Pitrai pơtui wỡq pơto akhàt dơlãp dơgrữq sàc pơtõm phũm Ju-đe.