Roglai Bible Literal Text
Lu-ka 1:37
Verse 37 is marked below, with the whole chapter around it. Read from the start
Kơyua hũ lũ mơnuĩh song hũ vruãq wãq pơnuaĩq akhàt wỡq mưng dơgrữq vruãq song hũ ngãq wil tãl di khrãh pơnõq drơi, tui yơu dơgrữq mơnuĩh mưng tũq chơmrờp tơviãq jỡc dơgrữq mơnuĩh ngãq chưng mư sì halỗt mơnãq Yàc hũ song pioh wỡq ga pơnõq drơi, nữn tũq iãq pơwih dơgrữq vruãq mưng chơmrờp savĩq gơrhia iãq, hlãq bôh viãq la siàp ga drơi pioh wãq wỡq tui yơu lơnãq ga tơpuôl ung, ơ ung The-ô-phi-lơ la mơnuĩh đang mang sì ki ngãm, tồq ga dơgrữq tơpuôl ung pơlih thơu iãq mưng gơnĩt viãq dơgrữq pơnuaĩq tơpãq nữn drơi song hũ mơgrũ pơto.
Dơlãp rài He-rôt, pitao phũm Ju-đe, hũ sa aràc pô pioh kaya duh talơvãt dih angãn la Sa-cha-ri pơweh gah tơpuôl A-bi-ja. Sơdiuq ung pơweh gah pơjẽh pơtiàt dơdrữq anàq kamơi A-rôn, sì angãn mòq la E-li-sa-bet. Avih dua aràc tơpuôl nhũ nữn tơpãq dãng di anãq Yàc Pô Lơngĩq, kơyua hadiuq ôh hũ kaya sỗq suẽl halơi dơlãp dơgrữq kaya pơđar-va sì voh-va Yàc hũ. Pơnõq nhũ ôh hũ anàq kơyua E-li-sa-bet ãt kơtuãl, sì avih dua aràc nữn song dlòc thũt.
Vruãq ròq tơviãq jỡc trôh tãl ung ngãq gơnuar vruãq pô pioh kaya duh talơvãt di anãq Yàc Pô Lơngĩq tui lơnãq tơpuôl drơi hũ, tui yơu lơđãp ngãq gơnĩt tơpuôl gơnuar pioh kaya duh talơvãt hũ, ung ròq suãq katih tơma dơlãp sàc duh talơvãt Yàc Pô Lơngĩq pioh padỡc kaya bơu vơlhũ. Avih tơpuôl vual vơla dòq pãq gah lơniãu iơu lakơu dơlãp tũq pioh padỡc kaya bơu vơlhũ. Tũq nữn, mơnuĩh gơnrơh Yàc hũ pa-tơviãq mơta sì ung, nữn dòq dữc pãq gah hơnuãq ban duh talơvãt pioh chôh vơlhũ. Sa-cha-ri kađòc jơdỡl tũq bôh mơnuĩh gơnrơh, sì kaya huaĩq tatơh viãq tlỗp pãq dlòc ung. Nữn mơnuĩh gơnrơh đơp sì ung: “Ơ, Sa-cha-ri, juơi huaĩq, kơyua sãp iơu lakơu ung hũ song hũ tồq, sì sơdiuq ung, E-li-sa-bet, ròq đeh ga ung sa aràc anàq lakơi, nữn ung pa-angãn ga anàq lakơi nữn la Jãng. Nữn ròq la kaya uỗt sơh, sì sơh sơr ga ung, sì lũ mơnuĩh ròq uỗt sơh sơh sơr kơyua anàq tìt nữn hũ đeh tơviãq. Kơyua nhũ ròq hũ ki ngãm di anãq Yàc Pô Lơngĩq, nhũ ôh mơnhũm alãc hẽla kaya hagĩq ngãq ga mơvũq, sì nhũ ròq hũ vãq sơrè Yàc Vơngãq Sơđah mưng tũq nhũ dòq dơlãp tũc ami nhũ. Nhũ ròq ngãq ga lũ anàq tơcho Is-ra-el gơlàiq mai wỡq pãq Yàc la Yàc Pô Lơngĩq pơnõq nhũ. Rùp phuỗt nhũ ròq nao pãq anãq Yàc yơu mơnuĩh pơh jơlàt mưng vơngãq hatai sì gơnuar chơnuãq E-li, pioh ngãq ga hatai ama gơlàiq mai wỡq sì anàq tơcho, sì mơnuĩh ôh ngãq tui trôh sì kaya jãc rgơi mơnuĩh tơpãq rĩng hũ — pioh rơchãc pơkhrà ga Yàc sa vual vơla song hũ rơchãc lơĩh.”
Sa-cha-ri drơ sì mơnuĩh gơnrơh: “Mưng pơnẽq halơi nữn hlãq ròq tồq mãq jỡc kaya nữn? Kơyua hlãq song tơha vloh, sì sơdiuq hlãq kung dlòc thũt.” Pioh hẽ wỡq, mơnuĩh gơnrơh đơp sì ung: “Kơu la Gap-ri-en, la mơnuĩh dòq dữc di anãq Yàc Pô Lơngĩq, kơu hũ pơđar trôh đơp sì ung nữn va pơnuaĩq sơh sơr nĩ ga ung. Iỡuq hmỡq gơnĩt nĩ, ung ròq kađòc kamlo sì ôh đơp jỡc tãl trôh harơi dơgrữq vruãq nữn ròq tơviãq jỡc, kơyua mưng ung song ôh pãc pơnuaĩq kơu, la dơgrữq pơnuaĩq ròq hũ tơviãq iỡuq viãq dơlãp tũq lơwah nhũ hũ.” Vual vơla ãn dòq chàc Sa-cha-ri, sì pơnõq nhũ bôh sì mãq ngãq krơi tũq ung dòq suơi dơlãp sàc talơvãt. Nữn dơlãp tũq tơviãq blàc, ung ôh tũq halơi đơp dlài jỡc sì pơnõq nhũ, nữn pơnõq nhũ thơu pãc làiq ung song bôh kaya pabôh dơlãp sàc talơvãt, dòq ung miẽt pa-tơviãq sa khrung nỡm ga pơnõq nhũ nữn miẽt dòq kamlo. Vruãq ròq tơviãq jỡc dơlãp tũq dơgrữq harơi duh vruãq adãt kaya duh talơvãt ung hũ ròq avih, ung tơviãq nao wỡq sàc nhũ.
Nữn hadơi dơgrữq harơi nữn, sơdiuq ung, la E-li-sa-bet, ròq mơtiàt, sì mòq padỡuq rùp nhũ, dơlãp nãm vlàt, đơp làiq: “Yàc song ngãq yơu nữn ga hlãq, dơlãp dơgrữq harơi nữn Pitrai iãq anĩt duman hlãq, pioh suãq kaya malơu ơlah hlãq hũ di khrãh dơgrữq mơnuĩh.”
Trôh vlàt bãc nãm, mơnuĩh gơnrơh Gap-ri-en hũ Yàc Pô Lơngĩq pơđar trôh pãq palơi phũm Ga-li-le angãn palơi nữn la Na-sa-ret, pãp sa aràc mơnuĩh kamơi dơra song grữh hẽ ưng sì sa aràc mơnuĩh angãn la Jô-sep, gah pơjẽh pơtiàt Đa-vit, dòq angãn mơnuĩh kamơi dơra la Ma-ri. Dơlãp tũq trôh pãp nai, mơnuĩh gơnrơh đơp: “Viãq uỗt sơh ga nai kơyua hũ kaya anĩt! Yàc dòq sigỡuq sì nai.” Nữn nai kađòc jơdỡl kơyua mưng dơgrữq pơnuaĩq nữn sì sơnơng iãq mưng pơnuaĩq chuãq rơwãc nĩ hũ gơtha hagĩq. Vloh mơnuĩh gơnrơh đơp sì nhũ: “Ơ Ma-ri, lakơu juơi huaĩq, kơyua nai song hũ kaya anĩt di anãq Yàc Pô Lơngĩq. Iãq nĩ, nai ròq mơtiàt dơlãp tũc vloh đeh sa aràc anàq lakơi, sì nai ròq pa-angãn anàq tìt nữn la Je-su. Anàq lakơi nữn ròq hũ mơ-àc mơyàc sì ròq angãn la Anàq Pitao Dlòc Dloòng Rlao Avih hũ, sì Yàc la Yàc Pô Lơngĩq ròq vrơi ga Pitrai sơvan Đa-vit, la ung kõq Pitrai. Pitrai ròq apãt akõq pãq dlòc sàc Ja-kôp tãl trôh gãm gãm, sì palơi lơgar Pitrai hũ ròq ôh tũq halơi luôĩq.” Ma-ri đơp sì mơnuĩh gơnrơh: “Vruãq nữn ròq tơviãq jỡc yơu hayơu, tũq hlãq ka kơnãl thơu sa aràc mơnuĩh lakơi halơi?” Pioh hẽ wỡq làiq, mơnuĩh gơnrơh đơp sì nhũ: “Yàc Vơngãq Sơđah ròq trôh pãq dlòc nai sì gơnuar chơnuãq Pitao Dlòc Dloòng Rlao Avih ròq kơ-rơwàc nai. Kơyua yơu nữn, Anàq Sơchih đeh tơviãq ròq hũ angãn la Anàq Yàc Pô Lơngĩq. Iỡuq mưng dih, E-li-sa-bet, mơnuĩh gỡuq gãt gah nai — mòq kung song mơtiàt sa aràc anàq lakơi dơlãp tũq mòq dlòc thũt, sì mơtiàt nữn ãn hũ nãm vlàt dơlãp tũc mòq, la mơnuĩh hũ tiẽng dơnai la kơtuãl. Kơyua ôh hũ vruãq halơi Yàc Pô Lơngĩq ôh ngãq jỡc.” Tũq nữn, Ma-ri drơ: “Hlãq nĩ, la mơnuĩh kamơi halỗt mơnãq Yàc hũ. Lakơu vruãq nữn tơviãq trôh ga hlãq tui yơu pơnuaĩq Pitrai akhàt.” Vloh mơnuĩh gơnrơh tlàq luơi nai.
Dơlãp dơgrữq harơi nữn, Ma-ri tơgùq dữc mưng hatai chơmãq chơmao, nai tơgùq nao pãq palơi rơnuãi gah chỡq, trôh sa palơi pơweh gah Ju-đa, vloh nai tơmã dơlãp sàc Sa-cha-ri sì tơnĩa rơwãc E-li-sa-bet. Vruãq ròq tơviãq jỡc tũq nữn E-li-sa-bet hmỡq pơnuaĩq chuãq rơwãc Ma-ri, anàq tìt dòq dơlãp tũc mòq plõc jơdoh sơh sơr, dòq E-li-sa-bet hũ vãq sơrè Yàc Vơngãq Sơđah. Mòq driãu prõng sãp nữn đơp: “Nai hũ lơngai di khrãh dơlãp tơpuôl mơnuĩh kamơi, anàq dòq dơlãp tũc nai kung hũ lơngai. Mưng hlơi nữn vruãq nĩ trôh ga hlãq, nữn la ami Yàc hlãq ròq mai trôh sì hlãq? Kơyua iãq dih, mưng tũq sãp pơnuaĩq chuãq rơwãc nai trôh hmỡq dơlãp tơnĩa hlãq, anàq dòq dơlãp tũc hlãq plõc jơdoh kơyua uỗt sơh. Lơngai ga mơnuĩh song pãc tui làiq dơgrữq pơnuaĩq mưng Yàc ròq đơp sì drơi hũ tơviãq jỡc iỡuq viãq.” Vloh Ma-ri đơp:
“Vơngãq yuà hlãq sơuỗt mơyòp Yàc,
suàt vơngãq hlãq avih prãn sơh sơr dơlãp Yàc Pô Lơngĩq la Yàc Dõc Pơ-tlah hlãq hũ.
Kơyua mưng Pitrai song iãq trôh rùp phuỗt ôh jỡc chãq mơnuĩh kamơi halỗt mơnãq Pitrai hũ.
Kơyua iãq dih, mưng tũq nĩ, tãl dơgrữq rài hadơi ròq angãn hlãq la mơnuĩh hũ lơngai,
kơyua mưng Pitao Gơnuar Chơnuãq song ngãq dơgrữq vruãq prõng ga hlãq,
angãn Pitrai la sơđah,
hatai anĩt duman Pitrai hũ tơpa gãt mưng rài nĩ tãl trôh dơgrữq rài hadơi pơweh sì dơgrữq mơnuĩh halơi duh huaĩq di Pitrai.
Pitrai song ngãq dơgrữq vruãq gơnuar chơnuãq mưng blàq tơngãn Pitrai hũ;
Pitrai song ngãq ga dơgrữq mơnuĩh yeh drơi tơviãq jỡc prah gơprĩc tui dơgrữq kaya sơnơng mưng hatai pơnõq nhũ.
Pitrai pa-trỗt dơgrữq pô gơnuar pitao tlah mưng sơvan pitao pơnõq nhũ,
sì yữc pa-tơgùq dơgrữq mơnuĩh dòq pơviar siẽuq tơgùq dloòng.
Pitrai ngãq ga mơnuĩh lơpa hũ tarơi vãq kaya siàp,
nữn pơtiãuq prôh mơnuĩh mơda tơviãq wỡq tơngãn soh.
Pitrai song dõc suãq Is-ra-el, halỗt mơnãq Pitrai,
pioh hũ sơdor wỡq hatai anĩt duman,
yơu Pitrai song đơp sì dơgrữq ung kõq pơnõq hlãq — sigỡuq sì A-bra-ham gãm pơjẽh pơtiàt nhũ tãl trôh gãm gãm.”
Ma-ri dòq sì mòq E-li-sa-bet dơlãp tlơu vlàt, vloh nữn nai mai wỡq sàc phuỗt nhũ.
Tũq nữn trôh dì harơi E-li-sa-bet mòq đeh song trôh, sì mòq ròq đeh sa aràc anàq lakơi. Dơgrữq gỡuq palơi sì mơnuĩh gỡuq gãt mòq hũ hmỡq làiq Yàc song akhàt tơviãq kaya anĩt duman Pitrai hũ prong viãq ga mòq, nữn pơnõq nhũ pa-mơpha sigỡuq kaya sơh sơr sì mòq.
Vruãq ròq tơviãq dơlãp harơi bãc talơpãn, pơnõq nhũ trôh pioh sìq kalìq ga anàq tìt, sì pơnõq nhũ ưng iơu tui yơu angãn ama anàq tìt, nữn la Sa-cha-ri. Drơ wỡq vruãq nữn, ami anàq tìt nữn đơp: “Ôh iỡuq, nữn anàq tìt ròq angãn la Jãng.” Pơnõq nhũ đơp sì mòq làiq: “Ôh hũ asơi dơlãp tơpuôl gỡuq gãt mòq hũ nữn hũ pa-angãn yơu nữn.” Pơnõq nhũ ngãq nỡm ga ama anàq tìt, tơnĩa iãq ama ưng pa-angãn ga anàq la hayơu. Hadơi sì tũq iỡuq chàc ngãq sa vlah tleh pơpàt, sì ung wãq làiq: “Angãn anàq tìt nữn la Jãng.” Nữn avih aràc song mãq ngãq krơi viãq. Tũq nữn mư, chơbuai sì dơlah ung pơh tơviãq, vloh ung hũ đơp làiq pơnuaĩq sơuỗt mơyòp Yàc Pô Lơngĩq. Kaya huaĩq tatơh trôh pãq dlòc avih dơgrữq mơnuĩh dòq hadiuq tòp dar pơnõq nhũ, sì avih dơgrữq vruãq nữn hũ akhàt tơviãq dơlãp vãq avih anĩh chỡq phũm Ju-đe. Dơgrữq mơnuĩh hmỡq bôh nữn wãq tơmã dơlãp hatai drơi, tơnĩa krơi drơi: “Yơu nữn, hadơi nĩ anàq tìt ròq tơviãq yơu halơi?” Kơyua viãq la tơngãn Yàc dòq sì anàq tìt nữn.
Sa-cha-ri, ama anàq tìt, hũ vãq sơrè Yàc Vơngãq Sơđah, sì đơp hwơr, làiq:
“Đang mang sì sơuỗt mơyòp Yàc la Yàc Pô Lơngĩq Is-ra-el hũ,
kơyua Pitrai song trôh chuãq rơwãc sì dõc tơvuh ga anàq tơcho vual vơla Pitrai.
Pitrai song padỡc tơgùq ga pơnõq hlãq sa pẽq tơki dõc pơ-tlah
dơlãp pơjẽh pơtiàt Đa-vit, la halỗt mơnãq Pitrai hũ
(yơu Pitrai song đơp mưng rài sơđãq kơyua mưng chơbuai dơgrữq mơnuĩh gơnuar hwơr sơchih Pitrai hũ),
la kaya dõc pơ-tlah mưng mơnuĩh sòq jơdrãq sì pơnõq drơi hũ,
sì tlah mưng tơngãn dơgrữq mơnuĩh lơmùq mơvai pơnõq hlãq hũ;
pioh akhàt pa-tơviãq hatai anĩt duman pơweh sì ung kõq pơnõq hlãq,
sì pioh sơdor wỡq pơnuaĩq hẽ grữh sơđah Pitrai hũ,
nữn la pơnuaĩq hẽ grưh nữn Pitrai ròq hẽ gơnĩt sigỡuq sì A-bra-ham, la ung kõq pơnõq hlãq, pioh vrơi ga pơnõq hlãq
tũq song hũ dõc suãq tơviãq mưng tơngãn mơnuĩh sòq jơdrãq drơi,
tồq pơnõq hlãq ròq duh vruãq Pitrai savĩq ôh huaĩq tatơh,
dơlãp kaya sơđah sơchih sì tơpãq rĩng pãq anãq Pitrai, wil tãl dơgrữq harơi pơnõq hlãq.
Dòq anàq, ơ anàq tìt, anàq ròq hũ iơu la mơnuĩh gơnuar hwơr Pitao Dlòc Dloòng Rlao Avih hũ,
kơyua anàq ròq nao pãq anãq Yàc pioh wah jơlàt ga Pitrai hũ,
pioh va kaya tồq mãq thơu kaya anĩt dõc pơ-tlah ga vual vơla Pitrai
dơlãp kaya tơleh dơgrữq dlàiq dơnũh pơnõq nhũ,
gơnang mưng hatai anĩt duman dơlah dơlài Yàc Pô Lơngĩq pơnõq drơi hũ,
kơyua mưng nữn, ia harơi tơgùq mưng pãq dlòc ròq chuãq rơwãc pơnõq drơi,
pioh tuỗiq pơsàc dơgrữq mơnuĩh halơi ãn dòq dơlãp anĩh sồp kơnãm sì pãq ala kaya mơtai,
pioh dui va plàq tơkai pơnõq drơi tơmã jơlàt dadu lơngai.”
Anàq tìt prõc tơgùq sì gơjãp kađữc prãn khãc dơlãp vơngãq hatai, nhũ dòq dơlãp blàc choah tãl trôh harơi pabôh tơviãq pãq anãq nhũ sì vual vơla Is-ra-el.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.