Mak 16

1Tũq harơi Sa-bat song nao gãt vloh, Ma-ri Ma-đơ-len, Ma-ri ami Ja-kơ, sì Sa-lô-me vlơi jrao bơu vơlhũ pioh trôh vruah rùp atơu Yàc Je-su. 2Mưng jrang mư-ờp harơi chơmrờp dơlãp sa tơjuh, pơnõq nhũ nao trôh vơnẽq tũq ia harơi ãn tơgùq. 3Pơnõq nhũ tơnĩa gỡuq: “Asơi ròq vlữc voh patơu tơviãq mưng bãc vơnẽq dõc pơnõq drơi nĩ?” 4Nữn tũq pơnõq nhũ iãq tơgùq, pơnõq nhũ bôh voh patơu song vlữc tơviãq vloh, kơyua voh patơu viãq prong. 5Yơu nữn, pơnõq nhũ tơma dơlãp vơnẽq sì bôh sa aràc dãm chồq ao kòq ãn dòq guh gah hơnuãq, sì pơnõq nhũ kơtuãq huaĩq. 6Nữn mơnuĩh nữn đơp sì pơnõq nhũ: “Juơi huaĩq. Pơnõq sơai duah Je-su mơnuĩh Na-sa-ret, Pitao song ãt pỡc đĩn pãq kayơu pỡc. Pitrai hadiuq song vloh! Pitrai ôh dòq pãq đì. Iãq vẽq anĩh pơnõq nhũ song chẽq rùp atơu Pitrai. 7Nữn nao vẽq, akhàt ga dơgrữq mơnuĩh mơgrũ Pitrai sì Pier làiq: ‘Pitrai ròq nao hlơu adơi sơai trôh pãq Ga-li-le. Pãq đỡn, adơi sơai ròq bôh Pitrai,’ drưh yơu Pitrai song đơp ga adơi sơai thơu.”

8Tũq pơnõq nhũ tơviãq blàc, pơnõq nhũ vruh tơviãq mưng vơnẽq, tơtơh huaĩq sì mãq ngãq krơi. Pơnõq nhũ ôh akhàt kaya hagĩq sì mơnuĩh halơi kơyua pơnõq nhũ huaĩq viãq. 9(Jrang mư-ờp harơi chơmrờp dơlãp tơjuh harơi, hadơi sì tũq Yàc hadiuq wỡq, Pitrai pabôh hlơu avih ga Ma-ri Ma-đơ-len, la mơnuĩh song hũ Pitrai dõc suãq mưng tơjuh kamlai mơsãc. 10Nai nao akhàt ga dơgrữq mơnuĩh song dòq sì Pitrai dơlãp tũq pơnõq nhũ ãn ka-ồq ka-iãp sì sia chõq. 11Pơnõq nhũ hũ hmỡq làiq Pitrai tũq nĩ ãn hadiuq sì nai song pãp Pitrai, nữn pơnõq nhũ ôh pãc.

12Hadơi dơgrữq vruãq nữn, Pitrai mãq sẽq rùp tơmo pabôh ga dua aràc dơlãp tơpuôl nhũ, dơlãp tũq dua aràc ãn nao jơlàt wỡq sàc. 13Dua aràc mơnuĩh nữn mai wỡq, nao đơp ga dơgrữq mơnuĩh mơgrũ tơmo, nữn pơnõq nhũ ôh pãc dua aràc nhũ.

14Yàc Je-su hadơi nữn pabôh ga sa plôh sa aràc mơnuĩh gơnuar pơđar ãn tũq pơnõq nhũ dòq guh pãq ban, Pitrai gơloh pơkhè pơnõq nhũ kơyua kaya ôh pãc sì khãc hatai pơnõq nhũ hũ kơyua pơnõq nhũ ôh pãc dơgrữq mơnuĩh song bôh Pitrai hadơi sì tũq mưng kaya mơtai song hadiuq wỡq. 15Pitrai đơp sì pơnõq nhũ: “Iỡuq nao vẽq vãq avih dun kơyua, sì pơto akhàt Pơnuaĩq Siàp ga dơgrữq mơnuĩh. 16Asơi pãc-tui sì ngãq adãt Bãp-tem ròq hũ dõc pơ-tlah, dòq asơi ôh pãc-tui ròq kađòc ngãq dlàiq. 17Dơgrữq nỡm krơi hadơi nĩ ròq nao sigỡuq sì mơnuĩh pãc-tui: Pơnõq nhũ ròq mãq angãn pôgrũ sì pơtiãuq kamlai tơviãq. Pơnõq nhũ ròq đơp dơgrữq pơnuaĩq vơhrơu. 18Pơnõq nhũ ròq angui tơngãn mãq ala, sì mơyah làiq mơnhũm kaya halơi mãq mãl, nữn pơnõq nhũ kung ôh hũ kađòc tơviãq iãh. Pơnõq nhũ ròq chẽq tơngãn pãq dlòc mơnuĩh ruãq, nữn dơgrữq mơnuĩh nữn ròq khơĩh ruãq.”

19Hadơi sì tũq Yàc Je-su đơp sì pơnõq nhũ, nữn Pitrai hũ va tơgùq pãq dlòc lơngĩq sì dòq guh gah tơngãn hơnuãq Yàc Pô Lơngĩq hũ. 20Dơgrữq mơnuĩh mơgrũ tơviãq nao sì pơto akhàt dơgrữq anĩh, dơlãp tũq Yàc ngãq vruãq sigỡuq sì pơnõq nhũ sì ngãq chưng gơnĩt ga pơnuaĩq siàp mưng dơgrữq nỡm krơi tơmo nao tui sigỡuq.)