Ja-kơ 4

1Dơgrữq kaya đơp gơrlah trôh mưng anĩh hlơi sì dơgrữq kaya mơvlah gơchah pơdòq mưng chơmrờp pãq khrãh dơlãp pơnõq adơi sơai? Ôh iỡuq pơnõq nhũ đơp tơviãq mưng dơgrữq kaya hãm khiãng pơnõq adơi sơai hũ, la kaya miẽt ãn mơvlah mơsôh dì khrãh dơgrữq vơnah rùp phàp pơnõq adơi sơai yơh? 2Pơnõq adơi sơai ham khiãng nữn ôh hũ hagĩq jỡc, pơnõq adơi sơai pa-mơtai mơnuĩh. Pơnõq adơi sơai lơmùq mơvai, sì ôh ngãq hagĩq jỡc, pơnõq adơi sơai grơlah sì ngãq kalìt. Pơnõq adơi sơai ôh hũ kơyua pơnõq adơi sơai ôh lakơu. 3Pơnõq adơi sơai lakơu nữn ôh tồq mãq hũ kơyua pơnõq adơi sơai lakơu savĩq suẽl pơnuaĩq, pioh angui ga dơgrữq kaya hãm khiãng drơi hũ. 4Ơ dơgrữq mơnuĩh drì drõc dih! Pơnõq adơi sơai ôh thơu làiq vruãq ngãq ban mơyơu sì dun kơyua la kaya jơdrãq sì Yàc Pô lơngĩq yơh? Yơu nữn, mơyah làiq asơi ưng ngãq mơyơu sì dun kơyua, la mơnuĩh nữn kađòc tơma pãq anĩh mơnuĩh sòq drãq sì Yàc Pô Lơngĩq hũ. 5Hẽla pơnõq adơi sơai sơnơng làiq Sơrãq Sơđah đơp ôh kuơ: “Yàc Vơngãq Sơđah nữn Pitrai ngãq ga hadiuq dơlãp pơnõq drơi, Pitao nữn ham khiãng pơnõq drơi tơviãq jỡc hatai mơvai lơmùq”? 6Bôh làiq yơu nữn, Pitrai vrơi kaya anĩt prong rlao, nữn Sơrãq Sơđah wãq làiq: “Yàc Pô Lơngĩq jơdrãq sì mơnuĩh pa-dlòc rùp nữn Pitrai vrơi kaya anĩt ga mơnuĩh pơviar rùp.” 7Kơyua yơu nữn, iỡuq duh huaĩq Yàc Pô Lơngĩq. Nữn iỡuq jơdrãq vẽq sì kamlai, vloh nhũ ròq pleh tlah dì pơnõq adơi sơai. 8Iỡuq trôh jẽq sì Yàc Pô Lơngĩq, sì Pitrai ròq trôh jẽq sì pơnõq adơi sơai. Dơgrữq mơnuĩh sỗq dlàiq, iỡuq ngãq sơchih tơngãn drơi, dơgrữq mơnuĩh halơi hũ dua hatai, iỡuq rao sơchih hatai drơi. 9Iỡuq thơu mơvai tlàq kaya savữc rỡc drơi, pơđìq pơđua sì sia chõq vẽq! Iỡuq sơdua vẽq sãp tlao uỗt pơnõq adơi sơai tơviãq jỡc kaya sia chõq, sì pa-sơdua kaya sơh sơr tơviãq jỡc ka-ồq ka-ãn. 10Iỡuq vơviar rùp drơi trỗt di anãq Yàc, vloh Pitrai ròq wơh pơnõq adơi sơai tơgùq.

11Ơ pơnõq adơi sơai, juơi đơp siàq dì gỡuq. Mơnuĩh đơp siàq pơnõq adơi sơai drơi hẽla chahrơna pơnõq adơi sơai drơi la đơp iãh voh-va sì chahrơna voh-va. Nữn mơyah làiq chahrơna voh-va nữn pơnõq adơi sơai ôh iỡuq la mơnuĩh ngãq tui voh-va, nữn la pô chahrơna. 12Pitao vrơi voh-va sì kaya chahrơna la mĩn sa, la Pitao hũ gơnuar dõc pơ-tlah sì pa-lơhiãq. Dòq pơnõq adơi sơai la asơi, vloh khĩn chahrơna mơnuĩh jẽq phia drơi?

13Tũq nĩ, iỡuq pa-hmỡq vẽq nĩ, dơgrữq mơnuĩh ãn dòq đơp làiq: “Harơi nĩ hẽla harơi pơgi pơnõq hlãq ròq nao trôh palơi dih, vloh ròq ngãq vruãq pãq đỡn sa thũt, kãq pa-vlơi sì hũ pơtuah pơtuai.” 14Nữn la dơgrữq mơnuĩh ôh thơu jỡc vruãq harơi pơgi, rài hadiuq pơnõq adơi sơai la hagĩq? Kơyua pơnõq adơi sơai la yơu ia kơkuar tơviãq dơlãp sa asĩt vloh thĩt mư. 15Pa-vlữq wỡq, pơnõq adơi sơai iỡuq đơp: “Mơyah làiq Yàc ưng, nữn pơnõq hlãq ròq hadiuq sì ròq ngãq vruãq nĩ hẽla vruãq dih.” 16Nữn, pơnõq adơi sơai ãn dòq yeh drơi mưng dơgrữq kaya mãq sẽq pa-dlòc rùp drơi hũ. Dơgrữq vruãq pa-dlòc rùp yơu nữn la iãh sàq. 17Yơu nữn, mơnuĩh halơi thơu vruãq siàp iỡuq chàc ngãq nữn vloh ôh ngãq, sì mơnuĩh nữn hũ dlàiq.