Ja-kơ 5

1Dòq tũq nĩ, iỡuq pãc gơnĩt nĩ, dơgrữq mơnuĩh mơda gơnãp dih, iỡuq sia chõq, sì priãu papơ kơyua kaya rũc rài dơgrữq mơnuĩh ãn trôh pãq dlòc nhũ. 2Kaya mơnã pơnõq adơi sơai kađòc vrũq lơmuĩq, dòq ao charơpha pơnõq adơi sơai nữn tơviãq jỡc kaya bõc moa mõq. 3Mữh sì priãq pơnõq adơi sơai kađòc pôh ia vruah sì kaya eh khãq pasơi bõc kaya pơnõq adơi sơai hũ ròq la ngãq chưng jơdrãq wỡq sì pơnõq adơi sơai, sì nhũ ròq bõc luỗt rơlo rùp pơnõq adơi sơai drưh yơu apôi. Pơnõq adơi sơai song pioh rơmiãq kaya mơnã drơi dơlãp dơgrữq harơi rài luôĩq hadơi. 4Iỡuq iãq dih, jĩn harơi dơgrữq mơnuĩh ngãq ơpah, nữn la dơgrữq mơnuĩh rgơi yuãq pãq dlòc dơgrữq blàc hama pơnõq adơi sơai hũ jĩn nữn song pioh wỡq pãq anĩh pơnõq adơi sơai, nhũ ãn priãu tơgùq, sì dơgrữq sãp ia gơraĩq dơgrữq mơnuĩh rgơi yuãq nữn song trôh pãq tanĩa Yàc dơgrữq tơpuôl lĩng. 5Pơnõq adơi sơai song hadiuq pròc prẽh sì pãq dlòc voh hlùq. Pơnõq adơi sơai song ngãq tui rùp phàp. Pơnõq adơi sơai song ngãq lơmãq ga tũc hatai drơi ga harơi pa-mơtai ngãq rơlo. 6Pơnõq adơi sơai song ngãq dlàiq sì pa-mơtai mơnuĩh tơpãq dãng, mơnuĩh nữn ôh jơdrãq wỡq pơnõq nhũ.

7Kơyua yơu nữn, ơ pơnõq adơi sơai, iỡuq ãt ỡl tãl trôh tũq Yàc trôh. Iãq dih, mơnuĩh ngãq apôh hama chàc chơkhãq voh chơtai kuơ màc mưng hlùq, ãt ỡl dòq chàc nhũ tãl trôh tũq hlùq tơnãh tồq mãq hũ hajàt akõq thũt sì luôĩq thũt. 8Pơnõq adơi sơai kung iỡuq ãt ỡl. Iỡuq ngãq ga gơjãp hatai drơi mưng kaya ròq trôh Yàc hũ song jẽq. 9Ơ pơnõq adơi sơai, juơi buah yòq gỡuq, pioh pơnõq adơi sơai tlah kađòc chahrơna. Iãq dih, Kơyua pô gơnuar chahrơna ãn dòq dữc pãq mơvah bãc. 10Ơ pơnõq adơi sơai, iỡuq ngãq tui krỡh ãt dleh dlàr sì ãt ỡl dơgrữq mơnuĩh gơnuar hwơr hũ, dơgrữq mơnuĩh mãq angãn Yàc pơto akhàt. 11Iãq nĩ, pơnõq drơi iơu angãn dơgrữq mơnuĩh gơjãp hatai la hũ lơngai. Pơnõq adơi sơai song hmỡq đơp mưng khưh rgơi thơu ãt ỡl Jop hũ, sì pơnõq adơi sơai ròq bôh sa kanõh Yàc hũ, kơyua mưng Yàc hũ hatai mơda gơnãp anĩt duman, sì siàp lơmuỡn.

12Nữn, hlơu avih, pa-thơu pơnõq adơi sơai hlãq hũ, juơi sơtãp, kung juơi tachơi lơngĩq hẽla hlùq, hẽla avih dơgrữq pơnuaĩq sơtãp halơi tơmo. Nữn, “hũ” nữn iỡuq la “ôh”, pioh pơnõq adơi sơai ôh lẽq tơma kaya chahrơna.

13Mơnuĩh halơi dơlãp pơnõq adơi sơai ãn ãt dleh dlàr lơĩh? Mơnuĩh nữn iỡuq iơu lakơu. Hũ asơi sơh sơr mĩn? Mơnuĩh nữn iỡuq adoh sơ-uỗt mơyòp. 14Mơnuĩh halơi dơlãp pơnõq adơi sơai ruãq sơkìq pơđìq pơđua lơĩh Mơnuĩh nữn iỡuq jàq dơgrữq pô tơhã dơlãp sàc pơjũm sơđah trôh sì mãq angãn Yàc, pơnõq nhũ iỡuq iơu lakơu ala ga mơnuĩh ruãq, pa-vuh mơnhàq ga nhũ. 15Pơnuaĩq iơu lakơu voh-tui hũ ròq dõc suãq sì mơnuĩh ruãq sơkìq pơđìq pơđua, Yàc ròq wơh mơnuĩh nữn tơgùq. Mơyah làiq mơnuĩh nĩ pơlih ròq sỗq dlàiq, sì mơnuĩh nữn ròq hũ tơleh dlàiq. 16Yơu nữn, iỡuq akhàt dlàiq sigỡuq sì iơu lakơu ga gỡuq pioh pơnõq adơi sơai pơlih hũ pasồq pakhơĩh. Pơnuaĩq iơu lakơu mơnuĩh tơpãq dãng nữn hũ tồq tơviãq jỡc yơu pơnuaĩq iơu lakơu nữn. 17E-li la sa aràc mơnuĩh hũ hatai kung drưh yơu pơnõq drơi, sì ung iơu lakơu jơmriẽt jơmrãiq sì rãn lakơu ga lơngĩq juơi hajàt, nữn lơngĩq ôh hajàt dơlãp lơgar miẽt dơlãp tlơu thũt nãm vlàt. 18Vloh ung làiq iơu lakơu, nữn lơngĩq vrơi hajàt, sì hlùq pajỡc tơviãq vơngà chơtai.

19Ơ pơnõq adơi sơai hlãq hũ, mơyah làiq mơnuĩh halơi dơlãp pơnõq adơi sơai yàp sỗq suẽl tlah mưng pơnuaĩq tơpãq, sì aràc asơi nữn ròq va mơnuĩh nữn mai wỡq, 20nữn iỡuq thơu làiq asơi gơlàiq weh gah mơnuĩh hũ dlàiq tơviãq tlah mưng jơlàt sỗq suẽl nhũ hũ, mơnuĩh nữn ròq dõc suãq vơngãq yua mơnuĩh nữn tlah mưng kaya mơtai, sì ròq chãc vơvãc padỡuq lũ-lã dlàiq dơnũh.