Roglai Bible Literal Text
Ja-kơ 3
Ơ pơnõq adơi sơai hlãq hũ, juơi hũ lũ mơnuĩh dơlãp pơnõq adơi adơi ngãq pô pơto, kơyua thơu làiq pơnõq drơi ròq iỡuq tồq mãq kaya ãt chahrơna prong rlao. Kơyua avih tãl aràc pơnõq drơi sỗq dlàiq dơlãp lũ pơnẽq. Mơyah làiq mơnuĩh halơi ôh sơnẽq sỗq dơlãp pơnuaĩq đơp, nữn la mơnuĩh wil tãl, pơlih iãq pơwih vãq avih rùp phàp drơi. Mơyah làiq pơnõq drơi pơtlãp kanhĩm pasơi tơma moòng ơseh pioh ngãq ga nhũ pãc sãp tui pơnõq drơi, nữn pơnõq drơi dui va avih rùp phàp nhũ hũ. Kung iỡuq iãq dơgrữq srôh ahòq ia hũ sơnua dũq prõc hadùp sì kađòc rơvùq vluh prãn khãc sũl va, nữn dơgrữq srôh ahòq hũ yuỡq pơweh kơyua mĩn sa voh kõng payuỡq tìt viãq pioh va nhũ trôh anĩh nữn kơyua mưng mơnuĩh yuỡq ahòq ưng ngãq gơnĩt. Kung yơu nữn, dơlah la sa vơnah tìt dơlãp vơnah rùp phàp nữn vloh đơp yeh dơgrữq vruãq prong. Iỡuq iãq sa-kơnãm apôi tìt yơu halơi chôh bõc avih sa vanơr kaĩh dlài prong yơu halơi yơh. Dơlah kung drưh yơu apôi, dun kơyua ôh tơpãq rĩng. Dơlah dòq dơlãp khrãh dơgrữq vơnah rùp phàp pơnõq drơi hũ, ngãq tasỡuq nrãc avih rùp phàp sì chôh pơkãp gãm rài hadiuq, nữn mĩn nhũ nữn kađòc chôh bõc pãq tơnãh ala. Dơgrữq pơjẽh anàq asỡq dlài sì dơgrữq anàq chĩp, anàq ruơi pãq hlùq sì pơjẽh kaya dơlãp tơsìq kung hũ sì song ãt pơjẽh anàq mơnuĩh apãt akõq. Nữn ôh asơi pơlih apãt akõq dơlah, nữn la sa kaya brơh mơsãc nhũ ôh padưh ngãq iãh, vãq kaya mỡq mãl sì mơtai lơhiãq. Sì dơlah nữn pơnõq drơi sơ-uỗt mơyòp Yàc sì Ama, sì kung nhũ, pơnõq drơi sơtãp ơluah anàq mơnuĩh, la pơjẽh patui yơu song hũ chrơng pajỡc tui sẽq vơlai Yàc Pô Lơngĩq hũ. Pơnuaĩq sơ-uỗt mơyòp sì pơnuaĩq sơtãp ơluah sì tơviãq mưng sa voh chơbuai dơlah. Ơ pơnõq adơi sơai hlãq hũ, dơgrữq vruãq yơu nữn ôh iỡuq ròq ngãq yơu nữn. Sa voh rơnuai chroh ia chãq sigỡuq sì sa kơblah patơu nữn đuaĩq tơviãq hayơu hũ ia tơvà sì gãm ia phìq, iỡuq lơĩh? Ơ pơnõq adơi sơai hlãq hũ, kayơu vãl ôh tũq halơi tơviãq voh ô-liu jỡc, hẽla kayơu nho tơviãq voh vãl, iỡuq lơĩh? Ia bãq kung ôh tũq halơi tơviãq ia tơvà.
Mơnuĩh halơi jãc rgơi sì thơu pãc di khrãh pơnõq adơi sơai? Mơnuĩh nữn iỡuq ngãq nao dơgrữq vruãq ngãq drơi hũ tơviãq mưng rài hadiuq ngãq siàp dơlãp vơngãq hatai vơviar rùp sì kaya jãc rgơi hũ. Nữn mơyah làiq pơnõq adơi sơai hũ kaya hãm khiãng mơvai lơmùq sì hãm guam dơlãp hatai drơi, nữn juơi yeh rùp sì đơp lor jơdrãq sì pơnuaĩq tơpãq. Nĩ ôh iỡuq la kaya jãc rgơi trôh mưng dlòc, nữn la kaya pơweh sì dun kơyua, nhũ la rơlo gah rùp, kamlai. Kơyua kaya hũ hatai lơmùq mơvai sì hãm guam dòq anĩh halơi, nữn kaya gơprah gơprĩc sì dơgrữq vruãq iãh sàq dòq pãq đỡn. Pa-vlữq wỡq, kaya jãc rgơi mưng dlòc hlơu avih la sơđah sơchih, hadơi nữn la kaya khiãng anĩt dadu lơngai, lơmuỡn siàp, thơu gơhria duh huaĩh, vãq hatai siàp lơmuỡn, sì dơgrữq voh chơtai siàp, ôh hũ hatai dỡq dỡng, ôh ngãq vlữq lor. Voh chơtai kaya tơpãq dãng hũ dràq dơlãp dadu lơngai mưng dơgrữq mơnuĩh ngãq tơviãq jỡc kaya dadu lơngai.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.