Ja-kơ 2

1Ơ pơnõq adơi sơai hlãq hũ, juơi rơmiãq jàc voh-tui dơlãp Yàc pơnõq drơi, la Yàc Dõc Pơ-tlah Je-su gơhluh, mưng kaya gah vơnãh halơi. 2Kơyua mơyah làiq hũ sa aràc mơnuĩh vuh krãh mữh sigỡuq sì ao charơpha siàp mơkrờ mơ-àc mơyàc tơma dơlãp sàc pơjũm pơnõq adơi sơai hũ, nữn hũ sa aràc mơnuĩh rơbah sì iãq mững ao charơpha tasỡuq nrãc kung tơma wỡq, 3nữn pơnõq adơi sơai iãq pãq mơnuĩh angui chồq ao charơpha siàp mơkrờ sì đơp: “Lakơu ung dòq guh pãq anĩh mơ-àc siàp nĩ!”, sì pơweh sì mơnuĩh rơbah, pơnõq adơi sơai đơp: “Sơai dữc sơgah dih”, hẽla “Iỡuq dòq guh pãq ala tơkai hlãq nĩ!”, 4nữn ôh iỡuq pơnõq adơi sơai song pa-chơlah krơi di khrãh rùp phuỗt pơnõq adơi sơai sì tơviãq jỡc mơnuĩh chahrơna sì dơgrữq kaya sơnơng iãh sàq yơh? 5Ơ pơnõq adơi sơai anĩt duman hlãq hũ, iỡuq hmỡq vẽq: Ôh iỡuq Yàc Pô Lơngĩq song duỡt ruãh mơnuĩh rơbah la-ơi dơlãp dun kơyua pioh tơviãq jỡc mơnuĩh mơda gơnãp dơlãp voh-tui sì mơnuĩh hũ vơnah patui palơi lơgar nữn Pitrai song grưh sì dơgrữq mơnuĩh halơi khiãng duman Pitrai yơh? 6Nữn vloh pơnõq adơi sơai song siẽq siẽl mơnuĩh rơbah! Ôh iỡuq mơnuĩh mơda gơnãp lơđãp juãq jơlìq pơnõq adơi sơai sì pơnõq nhũ la lơđãp katũc va pơnõq adơi sơai tơviãq pãq anĩh chahrơna yơh? 7Ôh iỡuq pơnõq nhũ lơđãp đơp sơvĩl trôh angãn kaya mơ-àc mơyàc song hũ chẽq pa-angãn pãq dlòc pơnõq adơi sơai yơh? 8Bôh làiq yơu nữn, mơyah làiq pơnõq adơi sơai ngãq wil tãl voh-va Pitao hũ tui yơu Sơrãq Sơđah: “Iỡuq khiãng duman mơnuĩh jẽq phia drơi yơu rùp phuỗt drơi”, nữn pơnõq adơi sơai ngãq iỡuq viãq. 9Nữn mơyah làiq pơnõq adơi sơai iãq pơweh gah vơnah halơi nữn, nữn pơnõq adơi sơai sỗq dlàiq, sì kađòc voh-va ngãq dlàiq yơu mơnuĩh sỗq voh-va. 10Kơyua mơnuĩh halơi pơlih rơmiãq jàc avih dơgrữq voh-va, nữn sơnẽq sỗq mĩn sa kaya, nữn mơnuĩh nữn tơviãq jỡc la mơnuĩh ngãq sỗq avih voh-va. 11Kơyua Pitao song đơp: “Juơi sỗq dlàiq drì drõc”, kung song đơp: “Juơi pa-mơtai mơnuĩh”. Nữn mơyah làiq pơnõq adơi sơai ôh sỗq dlàiq drì drõc, nữn vloh sỗq dlàiq pa-mơtai mơnuĩh, nữn pơnõq adơi sơai tơviãq jỡc mơnuĩh ngãq sỗq voh-va. 12Yơu nữn iỡuq đơp vẽq sì ngãq yơu dơgrữq mơnuĩh ròq kađòc chahrơna kơyua mưng voh-va kaya lanơng lơnai hũ.

13Kơyua kaya chahrơna ôh anĩt duman mơnuĩh ôh akhàt tơviãq kaya anĩt duman. Hatai anĩt duman pha rlao sì kaya chahrơna! 14Ơ pơnõq adơi sơai hlãq hũ, hũ kuơ hagĩq mơyah làiq aràc halơi nữn đơp drơi hũ voh-tui nữn vloh ôh hũ vruãq ngãq? Voh-tui nữn pơlih dõc pơ-tlah mơnuĩh nữn, iỡuq lơĩh? 15Mơyah làiq hũ sa aràc adơi sơai hẽla adơi sơai kamơi mĩn hũ rùp phàp ôh hũ ao charơpha sì siẽuq sier kaya bõc dơgrữq harơi, 16nữn hũ sa aràc dơlãp pơnõq adơi sơai đơp sì pơnõq nhũ: “Iỡuq nao dơlãp kaya dadu lơngai yơh, iỡuq chồq ao charơpha pioh pơđao rùp sì bõc tarơi yơh!”, nữn pơnõq adơi sơai ôh vrơi ga pơnõq nhũ dơgrữq kaya rùp phàp nhũ ưng angui, nữn hũ kuơ hagĩq? 17Voh-tui kung yơu nữn, mơyah làiq ôh hũ vruãq ngãq nữn mơtai krơi nhũ. 18Bôh làiq yơu nữn, mơnuĩh halơi nữn ròq đơp: “Sơai hũ voh-tui, dòq hlãq hũ vruãq ngãq.” Iỡuq vrơi ga hlãq bôh voh-tui ôh hũ vruãq ngãq sơai hũ, vloh hlãq ròq vrơi ga sơai bôh voh-tui mưng vruãq ngãq hlãq hũ. 19Sơai pãc-tui làiq mĩn hũ sa Yàc Pô Lơngĩq. Sơai pãc-tui iỡuq. Kamlai satan kung pãc-tui sì tơpuôl nhũ tơtơh huaĩq. 20Nĩ mơnuĩh gơla pơtòq, sơai ưng thơu làiq voh-tui ôh hũ vruãq ngãq la ôh kuơ lơĩh? 21Ôh iỡuq A-bra-ham, ung kõq pơnõq drơi, ròq hũ angãn tơpãq dãng mưng vruãq ngãq tũq ung pioh padỡc Y-sac, anàq lakơi nhũ, pãq dlòc ban talơvãt yơh? 22Sơai bôh làiq voh-tui nao sigỡuq sì vruãq ngãq ung hũ, sì gơnang mưng vruãq ngãq, voh-tui ung song jỡc wil tãl. 23Pơnuaĩq Sơrãq Sơđah nĩ song tơviãq jỡc iỡuq yơu nữn, làiq: “A-bra-ham pãc-tui Yàc Pô Lơngĩq, sì kaya nữn hũ angãn la tơpãq dãng ga ung”, sì ung hũ angãn la ban mơyơu Yàc Pô Lơngĩq hũ. 24Pơnõq adơi sơai bôh nữn, sa aràc hũ angãn tơpãq dãng mưng vruãq ngãq, sì ôh mĩn kơyua mưng voh-tui nữn soh. 25Kung yơu nữn mĩn, ôh iỡuq mơnuĩh kamơi Ra-hap hũ angãn tơpãq dãng kơyua mưng vruãq ngãq dơlãp tũq nhũ tồq ròq dơgrữq mơnuĩh ãt pơđar sì va pơnõq nhũ nao mưng jơlàt tơmo yơh? 26Kơyua yơu rơlo rùp, ôh hũ vơngãq nữn mơtai yơu halơi, voh-tui ôh hũ vruãq ngãq nữn kung mơtai yơu nữn.