Roglai Bible Literal Text
Ja-kơ 1
Ja-kơ, halỗt mơnãq Yàc Pô Lơngĩq hũ sì Yàc Dõc Pơ-tlah Je-su hũ, pơyua ga sa plôh dua apõc pơtiàt dòq hadiuq dơlãp kaya chơlah chơluỡn: Lakơu chuãq rơwãc pơnõq adơi sơai dơlãp kaya sơh sơr! Ơ pơnõq adơi sơai hlãq hũ, dơlãp tũq pơnõq adơi sơai tơmã dơlãp tãl avih dơgrữq kaya lòc, iỡuq iãq mững nữn la kaya uỗt sơh wil tãl, kơyua thơu làiq kaya lòc voh-tui pơnõq adơi sơai tơviãq jỡc kaya rgơi thơu ãt-ỡl. Nữn, kaya rgơi thơu ãt ỡl iỡuq ngãq wil tãl vruãq nhũ, pioh ga pơnõq adơi sơai pơlih hũ prong tơgùq drơi hũ sì wil tãl, ôh dòq siẽuq kaya halơi. Dòq mơyah làiq mơnuĩh halơi dơlãp pơnõq adơi sơai siỡuq kaya jãc rgơi, mơnuĩh nữn iỡuq rãn lakơu mưng Yàc Pô lơngĩq, la Pitao vrơi kaya anĩt lanơng lơnai ga dơgrữq mơnuĩh sì ôh gơloh pơkhè, nữn kaya jãc rgơi ròq hũ vrơi ga mơnuĩh nữn. Nữn mơnuĩh nữn iỡuq rãn lakơu dơlãp voh-tui, ôh dỡq dỡng hagĩq, kơyua mơnuĩh dỡq dỡng drưh yơu rơyàq ia tơsìq, kađòc poh rơyàq nao mai tui yua angĩn vluh sì sỡm nãi tơgùq. Mơnuĩh yơu nữn juơi chơkhãq chàc làiq drơi ròq tồq mãq hũ hagĩq mưng Yàc, nữn la mơnuĩh lơđãp dỡq dỡng, ôh gơjãp gơnĩt dơlãp dơgrữq jơlàt athua drơi. Mơnuĩh pơnõq adơi sơai dòq dơlãp kaya siẽuq rơbah iỡuq yeh drơi mưng anĩh dòq mơ-àc mơyàc drơi hũ, dòq mơnuĩh mơda gơnãp iỡuq yeh drơi mưng anĩh dòq ôh jỡc ôh chãq drơi hũ, kơyua mơnuĩh nữn ròq gãt tơpa yơu vơngà pãq blàc rỡq. Ia harơi tơviãq tơgùq gãm sì kaya tluỡiq gơhuar chôh sì ngãq thô tơhĩu rỡq kayơu, vơngà nhũ thô jrũh, kaya siàp mơkrờ nhũ hũ tơ-ãl rơ-ãi. Kung yơu nữn, mơnuĩh mơda gơnãp kung ròq ãt thô thiãq dơlãp dơgrữq vruãq rài hadiuq nhũ hũ. Lơngai ga mơnuĩh ãt lòc dleh dlàr. Kơyua, tũq song hũ nao gãt kaya lòc vloh, mơnuĩh nữn ròq tồq mãq chrang mữh kaya hadiuq, la kaya nữn Yàc Pô Lơngĩq song grưh vrơi ga dơgrữq aràc asơi khiãng duman Pitrai. Tũq kađòc kaya aniãi, juơi hũ aràc asơi đơp làiq: “Hlãq kađòc Yàc Pô Lơngĩq ngãq aniãi”, kơyua Yàc Pô Lơngĩq ôh tũq halơi kađòc kaya mơsãc ngãq aniãi, sì mĩn rùp phuỗt Pitrai kung ôh ngãq iãh aràc asơi. Nữn dơgrữq mơnuĩh kađòc ơniãi, tũq kađòc dui va sì pa-gơla kơyua mưng kaya hãm khiãng krơi rùp phuỗt drơi hũ. Patui nữn, hadơi sì tũq ròq ãt mơtiàt, kaya hãm khiãng nữn ròq đeh tơviãq dlàiq dơnũh, sì hadơi ròq hũ jỡc prõng tơgùq, dlàiq dơnũh pajỡc tơviãq kaya mơtai. Ơ pơnõq adơi sơai anĩt anar hlãq hũ, juơi luơi drơi kađòc pa-gơla. Dơgrữq kaya alĩn vrơi siàp mơkrờ sì dơgrữq kaya anĩt wil tãl kung tơviãq mưng dlòc, la trôh mưng Ama kaya sơdah hũ, nữn dơlãp Pitrai ôh hũ kaya pa-sơdua hẽla kaya tarsẽq vơngãq pa-sơdua hũ. Tui yơu ngãq gơnĩt, Pitrai song pajỡc pơnõq drơi tơviãq mưng pơnuaĩq tơpãq hũ, pioh pơnõq drơi ròq la voh akõq thũt dơlãp dơgrữq kaya chrơng pajỡc Pitrai hũ. Ơ pơnõq adơi sơai anĩt anar hlãq hũ, iỡuq thơu làiq: Dơgrữq tãl aràc iỡuq sơmar hmỡq, rơlẽq đơp, sì ôh drah nõng. Kơyua kaya nõng mơvai anàq mơnuĩh hũ ôh ngãq jỡc kaya tơpãq dãng Yàc Pô Lơngĩq hũ. Kơyua yơu nữn, hadơi sì tũq wàq tlàq avih dơgrữq kaya tasỡuq nrãc sigỡuq sì dơgrữq kaya iãh sàq, iỡuq tồq mãq dơlãp kaya siàp lơmuỡn pơnuaĩq song hũ dràq pơla, la pơnuaĩq pơlih dõc suãq vơngãq yuà pơnõq adơi sơai. Iỡuq tơviãq jỡc dơgrữq mơnuĩh ngãq tui pơnuaĩq, juơi mĩn la dơgrữq mơnuĩh hmỡq nữn pa-gơla rùp drơi. Kơyua mơyah làiq mơnuĩh halơi la mơnuĩh hmỡq pơnuaĩq nữn ôh iỡuq la mơnuĩh ngãq tui, nữn mơnuĩh nữn drưh yơu sa aràc mơnuĩh iãq kơnãl bòq mơta vơhiãn drơi hũ dơlãp krơh. Mơnuĩh nữn song pơsàc rùp drơi vloh tlàq nao, nữn vloh wơr dlài bòq mơta drơi la yơu halơi. Nữn mơnuĩh halơi iãq gơnĩt dơlãp voh-va wil tãl kaya lanơng lơnai hũ, sì miẽt patui ngãq yơu nữn, ôh iỡuq mĩn hmỡq vloh wơr thĩt, nữn la mơnuĩh ngãq tui pơnuaĩq iỡuq chàc ngãq, nữn mơnuĩh nữn ròq hũ lơngai dơlãp vruãq ngãq drơi hũ. Mơyah làiq asơi sơnơng drơi la tui jơlàt kakôh talơvãt, nữn ôh iãq gơrhia dơlah drơi, nữn miẽt dòq pa-gơla hatai drơi, nữn jơlàt kakôh talơvãt mơnuĩh nữn hũ ôh kuơ màc hagĩq. Jơlàt kakôh talơvãt sơdah sơchih sì ôh nỡm khrung pãq anãq Yàc Pô Lơngĩq, la Ama pơnõq drơi, nữn la dõc mơnuĩh la-ơi, mơnuĩh kamơi vlơu dơlãp kaya rũc rài pơnõq nhũ hũ, sì rơmiãq rùp drơi ôh tasỡuq nrãc kơyua mưng dun kơyua.
Roglai Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.