He-bơ-rơ 5

1Kơyua dơgrữq tãl aràc mơnuĩh gơnuar pioh kaya duh talơvãt prõng, tũq hũ duỡt ruãh di khrãh vual vơla, hũ ngãq gơnĩt la mơnuĩh ala mơta ga vual vơla ngãq dơgrữq vruãq pơweh trôh pãq Yàc Pô Lơngĩq, pioh pơlih hũ pioh padỡc kaya padỡc sì kaya padỡc pioh dơvuh dlàiq; 2tũq rgơi thơu anĩt anar sì dơgrữq mơnuĩh gơla pơtòq sì sỗq gơvrah, kơyua rùp phuỗt ung kung kađòc lơduh lơmuỡn. 3Kơyua yơu nữn, mơnuĩh nữn iỡuq padỡc kaya padỡc dơvuh dlàiq, ga vual vơla yơu halơi, nữn ga rùp phuỗt drơi kung yơu nữn. 4Ôh hũ sa aràc mơnuĩh halơi tồq mãq kaya mơ-àc mơyàc nĩ ga rùp phuỗt drơi, nữn mĩn hũ Yàc Pô Lơngĩq duỡt ruãh, kung yơu A-rôn. 5Kung yơu nữn, Yàc Dõc Pơ-tlah kung song ôh pồq pa-tơgùq krơi drơi ngãq mơnuĩh gơnuar pioh kaya duh talơvãt prõng. Pa-vlữq wỡq la Pitao song đơp sì Pitrai, hũ đơp làiq:

“Anàq la Anàq Kơu;

harơi nĩ Kơu song pajỡc tơviãq Anàq.”

6Kung yơu Pitao nữn kung đơp pãq sa anĩh tơmo:

“Anàq la mơnuĩh gơnuar pioh kaya duh talơvãt tãl trôh gãm gãm,

tui pơjẽh pơtiàt Men-chi-se-đet.”

7Dơlãp dơgrữq tũq dòq dơlãp rơlo rùp, Yàc Dõc Pơ-tlah song padỡc gãm pơnuaĩq iơu lakơu sì rãn lakơu, gãm sì siàp sia ràc prõng sì ia mơta hõq padỡc tơgùq ga Pitao hũ gơnuar chơnuãq dõc suãq drơi tlah mưng kaya mơtai, sì Pitrai song hũ pa-hmỡq kơyua rài hadiuq tui tơpãq drơi hũ. 8Bôh làiq Pitrai la Anàq, nữn Pitrai song mơgrũ thơu kaya pãc sãp mưng dơgrữq kaya dleh dlàr pơđìq pơđua nữn Pitrai song ãt. 9Sì tũq song hũ ngãq jỡc wil tãl, Pitrai tơviãq jỡc phuỗt kaya dõc pơ-tlah dòq gãm gãm ga avih dơgrữq mơnuĩh pãc sãp Pitrai, 10hadơi sì tũq Pitrai song hũ Yàc Pô Lơngĩq pơto gơnĩt ngãq mơnuĩh gơnuar pioh kaya duh talơvãt prõng tui pơjẽh pơtiàt Men-chi-se-đet, 11kơyua mưng vruãq nĩ nữn lũ viãq kaya ưng đơp vrơi ga pơnõq drơi, nữn kãn sì ràc tơviãq voh gơtha, kơyua pơnõq adơi sơai hmỡq sì suơi thơu pãc. 12Kơyua vloh trôh tũq nĩ, pơnõq adơi sơai iỡuq viãq la ngãq jỡc pô pơto vloh, nữn vloh pơnõq adơi sơai chàc duah hũ mơnuĩh halơi nữn pơto pơđar drơi dơgrữq pơnuaĩq pơto vơhiãn dơlãp dơgrữq pơnuaĩq Yàc Pô Lơngĩq hũ, sì pơnõq adơi sơai song jỡc yơu dơgrữq mơnuĩh chàc hũ ia tasơu, mĩn ôh iỡuq kaya bõc khõl! 13Kơyua avih dơgrữq mơnuĩh halơi mĩn mơnhũm ia tasơu nữn siẽuq kaya pãc thơu mưng pơnuaĩq pơto tơpãq dãng hũ, kơyua mơnuĩh nữn mĩn dòq la lơđeh tìt. 14Nữn kaya bõc khõl la luơi ga mơnuĩh prõng, nữn la dơgrữq mơnuĩh halơi gơnang mưng vruãq ngãq song rơđãp pơ-srãm mơgrũ kaya rgơi kơnãl thơu iãq pơwih kaya siàp sì kaya mơsãc.